1. Shimunenu nsañu yamuBayibolu yamwekeshaña chadidimbiluwu antu jaNzambi amakwawu. (Talenu mwevulu wakutachikilahu.)

 IFUKU dimu nantetemena, Kapristu Muneni Aroni wemeni muchisu chatabanaka yaYehova iku nakwati cheña chakwochela insensi. Kora niantu jindi 250 emeni kwakwihi nawa adiña nakumochela Yehova insensi, wejima wawu adiña nayeña yakwochela insensi. (Kuch. 16:16-18) Amwekeneña neyi wejima wawu adiña akwakudifukula aYehova ashinshika. Ilaña Aroni diyi wambukiluku, awa amakwawu adikañili muloña afwilileña mudimu wawupristu. (Kuch. 16:1-11) Adidimbili nakutoñojoka nawu Nzambi wukwiteja mulambu wawu. Kafwampi adiña nakumusawula hohu Yehova, muloña yena wamonaña nyichima yawantu nawa welukili nindi hiyanfwikiji.—Yere. 17:10.

2. Chumanyi chashimwiniyi Mosi chadimu, nawa mazu indi ashikijeweli?

² Kafwampi Mosi washimwini chadimu nindi: “Kumadiki budidi Yehova wakamwekesha windi.” (Kuch. 16:5) Chalala Yehova wambwili akwakudifukula alala niakutwamba chelili ‘kesi kafumini kudi Yehova kanoñeshi Kora niamayala makulakaji ayedi namakumi atanu adiña nakulambula insensi.’ (Kuch. 16:35; 26:10) Ilaña Yehova wamupulwishili Aroni nawa chumichi  chamwekesheli nawu diyi wadiña kapristu walala nawa mukwakudifukula walala waNzambi.—Tañenu 1 Akorinda 8:3.

3. (a) Kukalanyi kwamwekeni mumafuku akapostolu Pawulu? (b) Chakutalilahwinyi chemikiliyi Yehova kushankulu hakubabesha akwakudikaña?

³ Chuma chadifwanaku chamwekeni chimwahitili yaaka kwakwihi na 1,500 mumafuku akapostolu Pawulu. Antu amakwawu aditeneneña nawu hiyakwaKristu atachikili kutañisha nsañu yakutwamba; ilaña atwalekeluhu kwikala muchipompelu. Antu amakwawu amweneña awa akwakusekesha neyi chamweneñawu antu ejima amuchipompelu. Ilaña akwaKristu ashinshika adiña muwubanji muloña wanawa akwakusekesha. Awa atuñwidi avwalili yitembi yanyikoku atachikili ‘kukundula chikuhwelelu chawakwawu.’ (2 Tim. 2:16-18) Hela chochu, Yehova wadiña nakumona nawa Pawulu welukili Nzambi chayibabesheliyi akwakudikaña, Kora nialunda nindi, muyaaka yakunyima. Ichi tuhanjekenu hansañu yamuBayibolu yakuhayamisha kulonda twiluki yuma yitukudizilaku.

4. Pawulu wakuhweleleli chumanyi, nawa wamwekesheli ñahi chikuhwelelu chindi hakumusonekela Timotewu?

⁴ Pawulu welukili chikupu nindi Yehova welukaña antu adifukulaña muwunfwikiji, nawa wakuhweleleli nindi Yehova weluka antu Amwovwahilaña. Mazu amonenenuwu kumusonekela Timotewu amwekeshaña chuma chakuhweleleliyi Pawulu. Hanyima yakushimuna akwakusekesha chazeyesheleñawu chikuhwelelu chawantu amakwawu muchipompelu, Pawulu wasonekeli nindi: ‘Hakwila chikuku chaNzambi saña chakolela ngu-u, chikweti nsona jakwila nawu, Yehova weluka antu indi; nawu, Ejima akutena ijina daYehova afumi kuyuma yaheña.’—2 Tim. 2:18, 19.

5, 6. Nhoshelu yakwila nawu ‘chikuku chaNzambi chakola’ yazatishiliyi Pawulu yalemenadi, nawa iyi nhoshelu yatela yamukwashili ñahi Timotewu?

⁵ Indi mazu azatishiliyi Pawulu hakusoneka iyi nsona alemenadi? Nhoshelu yakwila nawu ‘chikuku chaNzambi chakola’ ayizatisha kamu hohu muBayibolu. Bayibolu yazatishaña izu dakwila nawu ‘chikuku’ hakutena yuma yashiyashana, kushilahu nimusumba waYerusalema waweni waIsarela wakushankulu. (Mas. 87:1, 2) Mudimu wazatañayi Yesu hakushikija nkeñelu yaYehova awesekeja nachikuku. (1 Kor. 3:11; 1 Pet. 2:6) Chumanyi chatoñojokeleñayi Pawulu hampinji yasonekeliyi nsañu ‘yachikuku chaNzambi chakola’?

⁶ Pawulu wateneni ‘chikuku chaNzambi chakola’ munsañu yoyimu mwateneniyi nimazu aMosi ahosha hadi Kora nialunda nindi ekala haKuchinda 16:5. Chakadi nikujina, Pawulu wateneni hachuma chamwekeni mumafuku aMosi kulonda yamukoleshi Timotewu nikumwanukisha nindi Yehova wukweti wuswa wakumona nikubabesha akwakudikaña. Akwakusekesha akañenyi kukañesha nkeñelu yaYehova muchipompelu neyi chochakañenyiyi Kora kushankulu. Pawulu halumbulwili chikupu mwatalisha ‘chikuku chaNzambi chakolaku.’ Ilaña, mazu azatishiliyi amukolesheli Timotewu kulonda yamukuhweleli chikupu Yehova.

7. Muloñadi wutunateli kukuhwelela chikupu netu Yehova wakazata yuma mukuloña nawa nakashinshi?

⁷ Nshimbi jaYehova jalema hijahimpañaku. Mukanda waMasamu 33:11 wahosha nawu: ‘Mwafukulañayi Yehova mwemanaña haya nyaka mbe-e, niyitoñojoka yamumuchima windi yakolaña kumakiñu ejima mwamba kavwalikilañawu antu.’ Nsona jikwawu jahosha hawanta waYehova, luwi lwasweja, kuloña, nikashinshi kindi nawu kahaya nyaka. (Kwid. 15:18; Mas. 106:1; 112:9; 117:2) Mukanda waMalaki 3:6 wahosha nawu: ‘Ami yami Yehova,  hinabalumukañaku.’ Chochimu, hamukanda waYakoba 1:17 hahosha nawu Yehova ‘habalumukaña, hela kuhimpa neyi mwevulu washetumukañaku.’

8, 9. Chumanyi chitunateli kudizila ‘kunsona’ yekala muchakutalilahu chaPawulu?

⁸ Mazu asonekeliyi Pawulu ha 2 Timotewu 2:19 amwekeshaña chikuku hasonekawu mazu adi neyi nsona yasonekawu. Kushankulu, antu avulileña kusoneka nsona hachikuku chetala, hadaha akeñeleña kumwekesha mwiniitala hela wadituñili. Pawulu diyi nsoneki waBayibolu watachi kuzatisha ichi chakutalilahu. * Nsona yekala ‘hachikuku chaNzambi chakola’ yekala nanhoshelu jiyedi. Yatachi yahosha nawu, “Yehova weluka antu indi” nawa yamuchiyedi yahosha nawu, ‘Ejima akutena ijina daYehova afumi kuyuma yaheña.’ Chumichi chatwanukishaña nsañu yitwatañaña haKuchinda 16:5.—Tañenu.

⁹ Chumanyi chitukudizila ‘kunsona’ kutalisha hamazu asonekeliyi Pawulu? Antu jaNzambi eluka nawu nshimbi yaYehova yashindamena hayikuma yiyedi yalema yakwila nawu: (1) Yehova wakeña antu ashinshika, nawa (2) Yehova wahela antu elaña yuma yaheña. Indi iyi nsañu yinakundami ñahi kudi akwakusekesha muchipompelu?

10. Indi yuma yelileñawu akwakusekesha mumafuku aPawulu yaletesheli akwaKristu ashinshika kwiladi?

¹⁰ Hadaha, Timotewu niakwawu ashinshika adiña nakwakama hayuma yelileñawu akwakusekesha adiña muchipompelu. AkwaKristu amakwawu atela ahayamineña chabuliluwu kuyihaña ana antu muchipompelu. Antu ashinshika atela ahayamineña neyi chakwila Yehova welukili antu adiña ashinshika niakwakudifukula anfwikiji.—Yil. 20:29, 30.

11, 12. Indi nyikanda yaPawulu yakolesheli ñahi chikuhwelelu chaTimotewu?

¹¹ Chakadi nikujina, nyikanda yaPawulu yakolesheli chikuhwelelu chaTimotewu muloña yamwanukishili chuma chamwekeni hampinji yamuyiñishiluwu Aroni washinshika. Ilaña Kora nfwikiji nialunda nindi ayisawili, ayikaanini nawa ayijahili. Kafwampi Pawulu wahosheleña nindi hela chakwila mukachi kawu mwadiña akwaKristu akutwamba, Yehova welukili antu indi neyi chayilukiliyi mumafuku aMosi.

¹² Yehova hahimpañaku nawa tunateli  kumukuhwelela. Wahela yuma yaheña nawa kumbidi wakababesha antu elaña yuma yaheña abulaña kubalumuka munyichima. Chineli Timotewu wadiña ‘nakutena ijina daYehova,’ amwanukishili nawu wateleleli kukaana yuma yaheña yelileñawu akwaKristu akutwamba. *

13. Chumanyi chitwatela kukuhwelela?

¹³ Anetu nawa tunateli kukolesha wulunda wetu naNzambi namazu aPawulu onenawu. Tachi, Yehova weluka chikupu nindi twekala ashinshika. Bayi neyi wakuminaña dakutwiluka hohuku. Ilaña, Yehova washa maana chikupu hadi antu jindi. Bayibolu yahosha nawu: “Mesu aYehova adi nakutalatala mwahita iseki dejima, kulonda akwashuku nañovu adi nanyichima yalala, yindi chikupu.” (2 Kushi. 16:9) Dichi tunateli kukuhwelela chikupu netu yuma yitwamukalakelaña Yehova ‘namuchima wutooka’ mwafumaña wuloku.—1 Tim. 1:5; 1 Kor. 15:58.

14. Kudifukula kwamuchidinyi kwahelayi Yehova?

¹⁴ Twazañalala cheñi hakwiluka netu Yehova wahela antu adifukulaña muwunfwikiji. Mesu indi “adi nakutalatala mwahita iseki dejima,” dichi nateli kumona antu abula kwikala “nanyichima yalala, yindi chikupu.” Mukanda waYishimu 3:32 wahosha nawu, ‘Yehova wahela muntu waheña,’ chidi neyi muntu wamwekeshaña kumesu awantu mumushikila nindi wovwahila ilaña kumbadi wavulumunaña. Hela chakwila muntu watama nateli kudimba antu hakapinji kantesha, Yehova wañovu yejima nawa waloña washimuna hatooka nindi “muntu wabutaña nyiloña yindi hakamona kuwahaku.”—Yish. 28:13; tañenu 1 Timotewu 5:24; Heb. 4:13.

15. Twatela kutondolwela chaakwinyi nawa muloñadi?

¹⁵ Antu jaYehova amavulu adifukulaña namuchima wutooka. Hichishimashima chacheni neyi muntu wamuchipompelu yatachika kudifukula muwunfwikiji mumushikila. Chineli chumichi chamwekeni mumafuku aMosi nimumafuku atachikili chipompelu chawakwaKristu, chinateli kumwekana nimakonu. (2 Tim. 3:1, 5) Hanu dinu, twatela kutachika kujinoka akwetu akwaKristu neyi chakwila ashinshika kudi Yehova? Inehi. Tukuluwañesha neyi tutachika kuyijinoka amana kwetu niahela. (Tañenu Aroma 14:10-12; 1 Akorinda 13:7.) Sweje-e dinu, neyi twikala nachaaku chakujinoka kashinshi kawakwetu muchipompelu, wulunda wetu naNzambi wukuzeya.

16. (a) Chumanyi chitwatela kwila wonsu wetu kulonda tubuli kwikala nanyichima yawunfwikiji? (b) Yumanyi yitwatela kudizila muchikasha chinakwila nawu ‘ Desekenuña . . . Dishinshikenuña . . .’?

¹⁶ MukwaKristu wejima watela ‘kushinshika nyidimu yindi.’ (Ŋal. 6:4) Hamuloña wakubula kuwanina, tunateli kutachika kudifukula kudi Yehova muwunfwikiji chakubula kwiluka. (Heb. 3:12, 13) Dichi twatela kushinshika yuma yatuleñelaña kumukalakela Yehova mumpinji mumpinji. Tunateli kudihula netu: ‘Komana nadifukulaña kudi Yehova muloña namukeña nawa nakeñaña nami yekali nyuuli yami? Tahindi natoñojokaña hohu hankisu yinachiñejaña kudiluñisha muParadisa?’ (Chim. 4:11) Wejima wetu tunateli kuhetelamu neyi tushinshika nyidimu yetu nakuleka wunfwikiji wejima munyichima yetu.

17, 18. Muloñadi wutwatelela kudifukula kudi Yehova namuchima wutooka?

¹⁷ Twahetelañamu chikupu neyi tuzata nañovu kulonda tudifukuleña namuchima  wutooka. Ñimbi yamasamu wahosheli nindi, “Nakooleki yenowu muntu akabula kwinkawu muloña wakuluwa kudi Yehova, hakweti makasu muspiritu yinduku.” (Mas. 32:2) Antu adifukulaña chakadi wunfwikiji munyichima yawu ekala namuzañalu nawa ekalaña nakuchiñeja kwakudiluñisha kumbidi.

¹⁸ Hampinji yatelela, Yehova wamba kasolola antu ejima elaña yuma yatama hela akoñaña nshidi kumbadi, nawa ‘wakambula muntu waloña nawatama, niwamukalakelaña Nzambi, niwabulaña kumukalakela.’ (Mal. 3:18) Chayinu mpinji twatela kukuhwelela chikupu netu “mesu aYehova atalaña antu aloña, nimatu indi atiyililaña chakulembelelawu.”—1 Pet. 3:12.