“Yenu aYinsahu Jami”
“Yehova nindi, Yenu ayinsahu jami.”—ISA. 43:10.
1, 2. (a) Indi kwikala chinsahu kwalumbululadi, nawa akwayikunzulemba amukaayi akañanya ñahi chikupu kwila mwenimu? (b) Muloñadi Yehova chabulilañayi kushindamena hayikunzulemba yamukaayi?
INDI kwikala chinsahu kwalumbululadi? Dikishonari yimu yalumbulula nawu: “Himuntu wamonaña chuma nakushimuna chichamwekeni.” Chakutalilahu, mumusumba waPietermaritzburg, muSouth Africa, mwekala chipapilu chansañu chatenañawu nawu The Witness (Chinsahu) nawa munahiti dehi yaaka kubadika ha 160 kufuma hatachikiluwu kuchisoneka. Idi ijina datelela, muloña ichi chipapilu chansañu chashimunaña wunsahu wejima jiika hayuma yamwekanaña mukaayi. Mukulumpi watachikili ichi chipapilu cha The Witness wakanini nindi chikushimunaña “wunsahu walala chakubula kushiyaku.”
2 Chawushona akwayikunzulemba amukaayi adiwulaña chikupu hela kulebumuna nsañu yalema nankashi muchihandilu chawantu. Iyi nsañu yinesekani nachahosheliyi Nzambi wañovu yejima kuhitila mudi kaprofwetu kindi Ezekeli wakushankulu nindi: ‘Nyunza yakeluka nawu yami Yehova.’ (Ezek. 39:7) Ilaña Nyuuli Wabadika mukaayi kejima hashindamenaña hansañu yashimunañawu hayikunzulembaku. Nzambi wukweti aYinsahu akushika kwakwihi na 8 miliyoni alejaña antu munyunza yejima nsañu yindi ninyidimu yindi yakushankulu nichazatañayi nawantu makonu. Idi izaza dawaYinsahu dashimunaña cheñi hankisu yaNzambi yakakiswilayi antu kumbidi. Neyi tulemesha iwu mudimu wakushimwina, dikwila nawu ijina datwinkayi Nzambi dikututelela kwesekeja nachashimunayi Yehova haIsaya 43:10 nindi: “Yenu ayinsahu jami, nikambuñami inatondi.”
3, 4. (a) Atudizi aBayibolu atachikili kuzatisha ijina dadiha chaakanyi, nawa atiyili ñahi hakuyitena idi jina? (Talenu mwevulu wakutachikilahu.) (b) Malwihwinyi itukuhanjekahu?
3 Tukweti kukooleka hakututena hejina daYehova muloña diyi ‘Mwanta wahaya nyaka,’ wahosha nindi: “Ijina dami dodenidi dahaya nyaka, dodamba kañanukañawu nachu, kunyaka yejima amba kavwalikilañawu antu.” (1 Tim. 1:17; Kwid. 3:15; esekejenuku Mukwakutaŋisha 2:16.) Mu 1931, Atudizi aBayibolu atachikili kuzatisha ijina dakwila nawu aYinsahu jaYehova. Kuhiñahu, mumagazini aKaposhi Kakutalila asonekelumu nyikanda yayivulu yakusakilila yasonekeleñawu antu. Chipompelu chimu chakuCanada chasonekeli nawu, “Tunazañalali nansañu yayiwahi yakututena nawu tudi ‘aYinsahu jaYehova,’ nawa tunafuukuluhu chikupu kwila yuma yikumwekeshaña nawu twalemesha idi ijina dadiha.”
4 Wunateli kumwekesha ñahi neyi wasakililaña hakukooleka kwakukutena ijina daNzambi? Cheñi nawa, wunateli kulumbulula ñahi Nsona hafuma ijina detu dakwila nawu, aYinsahu jaYehova?
AYINSAHU JANZAMBI AKUSHANKULU
5, 6. (a) Indi anvwali aIsarela ekalili ñahi aYinsahu jaYehova? (b) Chumanyi chikwawu chayilejeluwu anvwali aIsarela kwila, nawa muloñadi anvwali makonu chatela kulondelawu chumichi?
5 AIsarela amumafuku aIsaya adiñi “ayinsahu” jaYehova hamuntu hamuntu, nawa munza wejima wadiña “kambuña” Nzambi. (Isa. 43:10) Anvwali amuIsarela adiñi nakushimwina wunsahu kuhitila mukutañisha nyanawu chazatiliyi Nzambi nawankakulula jawu. Chakutalilahu, chayilejeleñawu kwanakana Paseka antu ayilejeleña nawu: ‘Chakayihulawu anyanenu nawu, Indi chimukwila mudimu iwu munatwali mudihi? Enu kwenu mwakeli nenu, Tukuketula chimuna chaPaseka yaYehova, wawutaminini hamatala awanyana kaIsarela muEjipitu, hatapiliyi aEjipitu, hapulwishiliyi mataletu.’ (Kwid. 12:26, 27) Ana anvwali atela ayilejeleña anyanawu nawu Mosi chayiliyi katachi kudi mwanta wamuEjipitu nakulomba lusesa nindi aIsarela ayi muchinkalampata nakudifukula kudi Yehova, Fwaro wakwili nindi: “Yehova hinyi mwaka nitiyi mwizu dindi, ninzi niyumbuku aIsarela?” (Kwid. 5:2) Hadaha alejeleña cheñi anyanawu nawu hanyima yayipupu ikumi yakisañeni ituña nawa chelili Nzambi yapulwishi aIsarela kudi amashidika awaEjipitu haKaluñalwiji Kachinana, ejima elukili nawu wukweti ñovu. Yehova wadiña nawa diyi Wabadika ñovu. Munza waIsarela wekalili cheñi ayinsahu amweni nawu Yehova hiNzambi walala nawa Mukwakushikija yikaninu yindi.
6 Chakadi nikujina, aIsarela alemesheli kukooleka kwakuyitena ijina daYehova ashimwineña iyi nsañu yakuhayamisha kudi anyanawu nikudi añinza ekalili anduñu mumatalawu. A Isarela ayilejeli cheñi chuma chikwawu chalema chakudizisha anyanawu kwovwahila nshimbi jaNzambi jajila. Yehova wahosheli nindi: “Mwakekalaña ajila muloña ami Yehova Nzambi yenu najila.” (Lev. 19:2; Kuhit. 6:6, 7) Emikila anvwali akwaKristu chakutalilahu chachiwahi makonu, muloña niwena atela kudizisha anyanawu nshimbi jaNzambi jajila, nawa chumichi chikuyikwasha kulemesha ijina daNzambi dalema.—Tañenu Yishimu 1:8; Aefwesesa 6:4.
Kuyitañisha anyanetu nsañu yaYehova kwalemeshaña ijina dindi (Talenu maparakalafu 5, 6)
7. (a) A Isarela chadiñawu ashinshika kudi Yehova, chumanyi chelileña nyunza yikwawu? (b) Antu atenañawu ijina daNzambi akweti kukoolekanyi?
7 Dichi aIsarela hampinji yadiñawu ashinshika, ahanineña wunsahu wawuwahi hejina daNzambi. Ayilejeli nawu: ‘Nyunza yahamaseki yejima akamona nawu anakukutena ijina daYehova, nawa akakutiya woma.’ (Kuhit. 28:10) Chawushona, aIsarela hiyadiña ashinshika mukuhanda kwawu kwejimaku. Mumpinji mumpinji avulileña kudifuukula kudi ankishi. Kufwana anzambi awaKenani adifukwileñawu, aIsarela ekalili nalukambu, ajahileña anyanawu nakuyilambula nawa akabishileña atuzweñi. Iyi nsañu yatudizishaña chuma chalema chakwila nawu twatela kwikala ajila mpinji yejima hakumwimbujola Muntu Wasweja Kujila, wukweti ijina datutenañawu.
“TIYENU, NUKWILA CHUMA CHACHIHA”
8. Mudimwinyi wamwinkeluwu Isaya kudi Yehova, nawa Isaya welili ñahi?
8 Yehova washimwineñahu dehi chuma chachiwahi chakupulwisha antu indi muwuduñu nawa munza waIsarela wakamona iwu wunsahu. (Isa. 43:19) Tupetulu twakusambila tutanu nakamu twamukanda waIsaya twashimuna chikupu hayihuñu yamweni Yerusalema ninyisumba yadiña kwakwihi. Yehova welukaña yuma yidi munyichima, wamulejeli Isaya nindi yatwalekuhu kubidika nsañu yakusoñamisha antu hela chakwila amakwawu akaanineña kutiyilila. Isaya wahayamini nawa wakeñeleña kwiluka mpinji yakabalumuka antu jaNzambi munyichima. Nzambi wakwili nindidi? Nindi, “Chiña nyikala yineli dehi kwamahembi hohu yakadi niniwu wukushakamamu, nimatala nawa chochu nimuntu wukwikalamu nehi, niituña dinabalumuki kwachihembi hohu.”—Tañenu Isaya 6:8-11.
9. (a) Indi wuprofwetu waIsaya wahosheli hadi Yerusalema washikijeweli mpinjinyi? (b) Kusoñamishanyi kutwatela kushaku muchima makonu?
9 Isaya amwinkeli iwu mudimu kumakumishilu achiyuulu chaMwanta Uziya hela kwakwihi nachaaka cha 778 B.C.E. Watwalekeluhu kuzata mudimu windi wawukaprofwetu kwakwihi nayaaka 46 sampu nihanyima yachaaka cha 732 B.C.E., muchiyuulu chaMwanta Hezekiya. Kwachidiña yaaka 125 hakwila nawu Yerusalema akamujilumuni mu 607 B.C.E. Dichi, antu jaNzambi ayisoñamishili henohu kuchidi mpinji hachuma chadi kumwekena munza wawu kumbidi. Nimakonu, Yehova nakuzatisha antu jindi kusoñamisha antu hayuma yikamwekana kumbidi henohu kuchidi mpinji. Hanahiti dehi yaaka 135, kufuma hatachikiluwu kusoneka Kaposhi Kakutalila katachi nawa akisonekaña kulonda kasoñamisheña antañi eluki nawu chiyuulu chaSatana chatama keña chikumi nawa Chiyuulu chaYesu Kristu Chayaaka Ikombakaji keña chishiki.—Chim. 20:1-3, 6.
10, 11. Wuprofwetwinyi waIsaya washikijeweli wamwenuwu aIsarela muBabiloni?
10 A Yudeya amavulu ashinshika adihanini kudi akwaBabiloni apulukili hampinji yajilumwinuwu Yerusalema nawa ayitwalili muwuduñu kuBabiloni. (Yere. 27:11, 12) Chimwahitili yaaka 70, antu jaNzambi adimweneni chashikijeweli wuprofwetu wakuhayamisha wakwila nawu: “Yehova nkuuli yenu, Wajila waIsarela, nindi, Natemeshi njita kuBabiloni hamujimba wenu, nakayitemuna wejima wawu.”—Isa. 43:14.
11 Kwesekeja naniwu wuprofwetu, ifuku dimu nampinji yawufuku kumatachikilu aOctober 539 B.C.E., mukaayi mwamwekeni chuma chomisha mbaña. Henohu mwanta wakuBabiloni niayilolu jindi anakunwa vinyu kuzatisha malupasa apupiluwu mutembeli yamuYerusalema nikuhameka anzambi jawu akusoña, amashidika awaMidiyani niPeresi alukukili Babiloni. Mu 538 hela 537 B.C.E., Kirusi washindili Babiloni, wayilejeli aYudeya kufunta kuYerusalema nakutuñulula cheñi tembeli yaNzambi. Isaya diyi waprofweteli yuma yejimiyi, kushilahu nichikaninu chaYehova chakwila nindi wakakamena nikukiña antu jindi abalumukili mumuchima hampinji yafuntileñawu kuYerusalema. Nzambi wayiteneni nindi “antu ami nadiwumbilili ami aweni, nami ashimunaña jakunshimeka.” (Isa. 43:21; 44:26-28) Awa antu atwaliluwu muwuduñu chafuntiluwu nakutuña tembeli yaYehova muYerusalema, ekalili ayinsahu elukili nawu Yehova, Nzambi walala wumu hohu, washikijaña izu dindi.
12, 13. (a) Anyi adiña hakachi kawaIsarela hatachikiluwu cheñi kudifukula kudi Yehova? (b) Chumanyi chakeñekaña kudi “anyikoku acheñi” hampinji yakwashañawu ‘aIsarela aNzambi,’ nawa achiñejaña chumanyi?
12 Antu amavulu abulili kwikala aIsarela adibombeli naniwu munza wafumini muwuduñu, nawa chimwahitili mpinji, aJentili amakwawu abalumukili nakwikala aYudeya. (Ezera 2:58, 64, 65; Esita 8:17) Makonu, “izaza deneni” ‘danyikoku yacheñi’ yaYesu dakwashaña namuchima wumu akwaKristu awayishewa ekala ‘aIsarela aNzambi.’ (Chim. 7:9, 10; Yow. 10:16; Ŋal. 6:16) Izaza deneni nidena aditumba ijina daNzambi dakwila nawa aYinsahu jaYehova.
13 Hampinji yaChiyuulu Chayaaka Ikombakaji yaKristu, izaza deneni dikekala nakukooleka kwakulumbulwila antu akasañulawu, chichadiñi hakwikala aYinsahu jaYehova mumafuku akukuminina akanu kaayi. Ilaña tunateli kwikala naniku kukooleka chiña neyi twikala ashinshika nawa ajila. Hela chakwila twazataña nañovu, tweluka netu twekala akwanshidi, dichi twatela kulomba kwanakena mafuku ejima muloña twajila wanyi nawa tukweti kukooleka kwakweni kwakututena hejina daNzambi dajila.—Tañenu 1 Yowanu 1:8, 9.
MWATALISHA IJINA DANZAMBI
14. Indi ijina daYehova datalisha mudihi?
14 Hakwila tusweji kulemesha kukooleka kutukweti kwakututena hejina daNzambi, chikuwaha neyi tutoñojoka chikupu mudatalisha. Ijina daNzambi davula kutuntululawu nawu “Yehova,” dafuma kwizu dachiHeberu dashimunaña yuma yinakuzatika nawa anateli kudituntulula nawu ‘kwikala.’ Dichi, ijina daYehova delukewa nawu dalumbuluka nawu “Wakojejaña Yuma Kwikalaku.” Iwu mukuku wamazu wamutelela chikupu Yehova muloña diyi Nleñi wayuma yejima nawa diyi Mukwakushikija yikaninu yindi. Yehova natwalekuhu kushikija nkeñelu yindi nawa kwosi mukwakudimbulula wudi wejima wunateli kumukañesha, chidi neyi Satana wafwilaña kukañesha yuma yakeñaña kushikijayi Nzambi chovu-chovu.
15. Yehova wamwekesheli ñahi chililu chindi hakulumbulula mwatalisha ijina dindi? (Talenu chikasha chinakwila nawu “ Ijina Dalema Chikupu.”)
15 Chamwinkeliyi Mosi mudimu wakuyifumisha antu jaNzambi muEjipitu, Yehova wamulejeli chililu chindi chimu kuzatisha nhoshelu yadifwana hakulumbulula ijina dindi, hayina mpinji wayizatishili hakuditena yomweni. Bayibolu yashimuna nawu: ‘Nzambi wamwilili Mosi, nindi, Ami Yami Mwomunekalila Kwami. Wamwilili cheñi nindi, Wakayili aIsarela, neyi, Nukwikala diyi nantemeshi kudenu.’ (Kwid. 3:14) Dichi, muyuma yejima Yehova nateli kwikala mwejima munakukeñayi hakwila yashikiji nkeñelu yindi. Kudi aIsarela adiña muwuduñu, Yehova wekalili Mukwakwamwina, Mukwakukiña, Nlomboli, niMukwakuhana yuma yakumujimba niyakuspiritu.
TUMUHAMEKENUÑA NZAMBI
16, 17. (a) Tukumwekesha ñahi netu twasakililaña hakukooleka kwakututena hejina daNzambi? (b) Tukahanjeka hansañwinyi muchibaaba chinalondeluhu?
16 Makonu, Yehova watwalekahu kutwinka yuma yakukolesha chikuhwelelu chetu niyuma yakumujimba neyi mwatalisha ijina dindi. Hela chochu, ijina daNzambi hidatalisha hohu hayuma yatondañayi yomweni kwikalakuku. Datalisha cheñi hayuma yakojejañayi kuzatika kutalisha hamudimu wawaYinsahu jindi hakwila nawu yashikiji nkeñelu yindi. Neyi tutoñojokaña chikupu hayumiyi chikutuleñela kutwalekahu kushakama kwesekeja nejina dindi. Kåre wukweti yaaka 84 yakusemuka, wunakalakali neyi Chinsahu wadikita muNorway hadi yaaka 70, wahosheli nindi, “Namonaña nami hikukooleka kwakweni hakumukalakela Yehova, Mwanta wahaya nyaka nikwikala hakachi kawantu atambikañawu hejina dindi dajila. Hikukooleka kweneni kwakulumbulula chalala chamuBayibolu nikumona antu chazañalalañawu nakwiluka yuma. Chakutalilahu, nazañalalaña chikupu neyi niyitañisha chazatikaña mulambu wefutu daKristu danyiloña, nichatela kuhetawu wumi wahaya nyaka mwituña dadiha daloña neyi akuhwelela mwifutu.”
17 Kafwampi, mumaluña amakwawu chinakukala kuwana antu akweti mpwila yakudiza hadi Nzambi. Hela chochu, kufwana Kåre, komana himwazañalalaña neyi muwana muntu wukuyitiyilila nawa mutachika nikumudizisha hejina daYehovaku? Hanu dinu, tunateli kwikala ñahi aYinsahu jaYehova hampinji yoyimu nikwikala ayinsahu jaYesu? Tukahanjeka hanilu lwihu muchibaaba chinalondeluhu.