Komana Watambwilaña ‘Yakudya Hampinji Yatelela’?
TUNAKUSHAKAMA mumafuku akala nankashi muchihandilu chawantu. (2 Tim. 3:1-5) Atwesekaña mafuku ejima muloña twamukeña Yehova nawa twafwilaña kwovwahila nshimbi jindi jaloña. Yesu welukili nindi anu mafuku akekala akala, dichi wayilejeli atumbanji twindi nindi akatambwila wukwashu kulonda akakakeli nikunsa. (Mat. 24:3, 13; 28:20) Hakwila ayikoleshi, Yesu watondeli nduñu washinshika kulonda yayinkeña ‘yakudya hampinji yatelela.’—Mat. 24:45, 46.
Kufuma tuhu hampinji yamutondeluwu nduñu washinshika mu 1919, nakupompesha mukuloñesha kwaNzambi “akwetala” amavulu nankashi akumadimi ejima nawa nakuyidiisha chalala chaMwizu daNzambi. (Mat. 24:14; Chim. 22:17) Hela chochu, madimi amavulu adi nanyikanda yantesha hohu, nawa bayi neyi antu ejima ekala naIntaneti hakwila nawu atañeña nyikanda yetuku. Chakutalilahu, antu amavulu adana mavidiyo niyibaaba yashañawu hohu ha jw.org. Komana chumichi chamwekeshaña nawu ana kwetu amakwawu atambwilaña wanyi yakudya yakuspiritu yakeñekaña kulonda akoleshi wulunda wawu naYehova? Hakwila tuwani ñakwilu yayeni, tuhanjekenu hamalwihu awana alema.
1. Chumanyi chalema chekala muyakudya yaloñeshañayi Yehova?
Satana chamwesekeliyi Yesu nindi yabalumuni malola ekala mankendi, Yesu wamwakwili nindi: “Anasoneki nawu, Muntu hakuhanda namankendi hohuku, chiña namazu ejima akufuma mukanwa kaNzambi.” (Mat. 4:3, 4) Mazu aYehova ayisoneka muBayibolu. (2 Pet. 1:20, 21) Bayibolu dichi chuma chalema chekala muyakudya yakuspiritu.—2 Tim. 3:16, 17.
Kuloñesha kwaYehova kwabalumuna Bayibolu yaNew World Translation of the Holy Scriptures yamukuma hela yachibalu kubadika mumadimi akushika ku 120, nawa anakuyibalumuna mumadimi amavulu hachaaka nichaaka. Kubombela haBayibolu yaNew World Translation, kudi cheñi maBayibolu amavulu amukuma hela achibalu mumadimi amavulu nankashi. Iwu mudimu weneni wunakuzatewa wunesekani nankeñelu yaYehova yakwila nindi, ‘antu ejima ahandi, eluki nsañu yalala chikupu.’ (1 Tim. 2:3, 4) Chineli “kwosi chuma chaleñeluwu chinabuli kumwekana kumesu [aYehova],” tunateli kukuhwelela netu nateli kukoka ‘antu akeñaña kumwiluka Nzambi’ mukuloñesha kwindi nikuyinka yakudya yakuspiritu.—Heb. 4:13; Mat. 5:3, 6; Yow. 6:44; 10:14.
2. Nyikanda yetu yazataña mudimwinyi hakutwinka yakudya yakuspiritu?
Hakwila nawu muntu yekali nachikuhwelelu chakola, watela kwila yuma yayivulu kubadika kutaña Bayibolu. Watela kutiyishisha yuma yinakutañayi nikwilamu. (Yak. 1:22-25) Kalama wakuEtiyopiya wakushankulu welukili kulema kwachumichi. Watañileña Izu daNzambi hampinji yamwihwiluwu kudi Fwilipu mukwakushimwina nindi: “Chiwudi nakutaña chinakulumbulukili, tahindi?” Iwu kalama wamwakwili nindi: “Chikunlumbulukila ñahi chakadi muntu kunleja?” (Yil. 8:26-31) Fwilipu wamwakwili ona kalama kuhitila mukumukwasha kulonda yeluki nsañu yalala Yezu daNzambi. Yuma yadiziliyi iwu kalama yamushikili hamuchima chakwila wafuukwiluhu kupapatishewa. (Yil. 8:32-38) Chochimu, nyikanda yetu yashindamena haBayibolu yatukwashaña kwiluka chalala Chezu daNzambi. Yuma yitwadizaña yatushikaña hamuchima nawa yatusañumunaña kuyizatisha.—Kol. 1:9, 10.
Kuhitila muniyi nyikanda, ambuña Yehova ayinkaña yakudya yayivulu niyakunwa yakuspiritu. (Isa. 65:13) Chakutalilahu, Kaposhi Kakutalila, akisonekaña mumadimi akubadika ha 210 kalumbululaña wuprofwetu wamuBayibolu, katukwashaña kutiyishisha chalala chaNzambi nikutusañumuna kulonda tuzatisheña nshimbi jamuBayibolu. Magazini yaAwake!, yedishañawu mumadimi akushika ku 100, yatuleñelaña kwiluka yileñaleña yaYehova nikutukwasha kwiluka chitwatela kuzatisha kufumba kwakuwahi kwamuBayibolu. (Yish. 3:21-23; Rom. 1:20) Nduñu washinshika waloñeshaña nyikanda yashindamena haBayibolu mumadimi akubadika ha 680. Komana mwekalaña nampinji yakutaña Bayibolu ifuku niifuku? Komana mwatañaña magazini ejima amaha ninyikanda yayiha yasonekañawu mwidimi denu chaaka nichaaka?
Kubombela hakusoneka nyikanda, kuloñesha kwaYehova kwaloñeshaña cheñi jimpanji jashindamena haBayibolu jahanañawu hakupompa kwachipompelu, kupompa kwanyanya nihakupompa kwamaneni. Komana mwadiluñishaña kutiyilila jimpanji, yimwenu yamaneni, yimwenu yanyanya nikwihujola kwekalaña haniku kupompa? Chakubula nikujina, Yehova watuloñeshelaña chawija cheneni chakuspiritu.—Isa. 25:6.
3. Neyi mwidimi denu mudana nyikanda yejima yasonekañawu, komana mukufwaña nanzala yakuspiritu?
Inehi, himukufwaña nanzalaku. Hichinateli kutuhayamishaku hakuwana neyi ambuña Yehova amakwawu ekalaña nanyikanda yayivulu yakudizamu kubadika amakwawu. Muloñadi? Shinshikenu chakutalilahu chawapostolu. Atambwilili nshimbi jajivulu kubadika atumbanji amakwawu akushankulu. (Maku 4:10; 9:35-37) Hela chochu, atumbanji amakwawu hiyadiña nanzala yakuspirituku; atambwilileña yakudya yakeñekeleña.—Efwes. 4:20-24; 1 Pet. 1:8.
Twatela kwiluka cheñi netu yuma yayivulu yeliliyi Yesu hampinji yadiñayi hanu hamaseki ayisoneka wanyi muBayibolu. Kapostolu Yowanu wasonekeli nindi: “Kudi niyuma yayivulu yikwawu yeliliyi Yesu, yenoyu nayitoñojoki nami neyi ayisoneka yejima, mpata yamunu mwishina hiyadi kumona hakutenteka nyikanda yadi kusonekawuku.” (Yow. 21:25) Hela chakwila atumbanji twaYesu akushankulu elukili nsañu yayivulu hadi Yesu muntu wawanina kubadika yitweluka etu, ilaña hitwafwaña nanzalaku. Yehova watukwasha kwiluka nsañu yayivulu chikupu hadi Yesu kulonda tulondeleña mumahaji indi hamu neyi atumbanji twindi.—1 Pet. 2:21.
Toñojokenu cheñi hanyikanda yatemesheluwu apostolu kuyipompelu yakushankulu. Hanyikanda yejima yasonekeliyi Pawulu, mukanda wumu wekala wanyi muBayibolu. (Kol. 4:16) Komana twafwaña nanzala yakuspiritu muloña wakwila hitukweti iwu mukandaku? Inehi. Yehova weluka yuma yitwakeñaña nawa watwinka yuma yayivulu yakukolesha chikuhwelelu chetu.—Mat. 6:8.
Yehova weluka yuma yitwakeñaña nawa watwinka yuma yayivulu yakukolesha wulunda wetu nayena
Makonu, mazanvu amakwawu awambuña Yehova akweti nyikanda yayivulu yakudizamu kubadika amakwawu. Komana mwekala nanyikanda yantesha hohu mwidimi denu? Neyi dimu, ilukenu nenu Yehova wayakamenaña. Dizenuña nyikanda yimukweti, nawa neyi chinatwesheki yenuña kukupompa kwamwidimi denu. Kuhwelelenu nenu Yehova wukuyikwashaña kulonda mwikali nachikuhwelelu chakola.—Mas. 1:2; Heb. 10:24, 25.
4. Neyi mudana njila yakutañilamu nyikanda yekalaña ha jw.org, komana chikuhwelelu chenu chikuzeya?
HaWebu sayiti yetu hekalaña magazini ninyikanda yikwawu yashindamena haBayibolu. Haniyi Webu sayiti hekalaña cheñi nsañu yakwashaña antu adisumbula, atwansi, niantu akweti anyana anyanya. Yisaka yahetelañamu neyi adiza iyi nsañu hampinji yaKudifukula kwaChisaka. Kubombelahu, Webu sayiti yetu yatulejaña cheñi hadi amana kwetu amanishaña shikola yaGileyadi nichileji chakupompa kwahachaaka, nawa yalejeña amana kwetu amukaayi kejima hawubanji wadimwekenaña waweni nikushimuna nyiloña yayitwikañawu antu jaYehova. (1 Pet. 5:8, 9) Iyi Webu sayiti yekala cheñi chozelu chalema nankashi muloña chatukwashaña kushimwina nsañu yayiwahi nimumatuña mwakaanishawu mudimu wetu wakushimwina.
Hela chochu, munateli kutwalekahu kwikala nachikuhwelelu chakola chili mwatañaña haWebu sayiti yetu hela nehi. Nduñu natwalekuhu kuzata nañovu chikupu hakuloñesha nyikanda yakukwasha akwetala ejima kukolesha chikuhwelelu chawu. Dichi, bayi mudikakeja kulanda chozelu kulonda musandujoleña nachu ha jw.org. Amakwawu anateli kupulinta nyikanda yikwawu yekalaña haWebu sayiti nakuyinka antu abulaña kutaña haIntaneti, ilaña yipompelu hiyatela kwila mwenimuku.
Twamusakililaña Yesu hakuhemba chikaninu chindi chakutwinka yakudya yakoleshaña wubwambu wetu naNzambi. Chineli awa mafuku akala hiyakuswila kwakwihi nakukuma, tunateli kukuhwelela netu Yehova wukutwalekahu kutuloñeshela ‘yakudya yakuspiritu hampinji yatelela.’
