“EUREKA!” Idi izu datalisha mukwila nawu “Nayiwani!” Dichi chabidikileñawu akwakupunda malola neyi awana wuru, muyaaka yamuma 1800 mumbaka yaCalifornia U.S.A., hampinji yimwadiña wuru. Hela chochu, Charles Taze Russell niakwawu Atudizi aBayibolu awanini chuma chasweja kubadika kulema, chalala chamuBayibolu. Nawa afwilileña kulejaku akwawu.

Muchaaka cha 1914, antu amavulu nankashi afumini munyisumba yamaneni kulonda ayi nakutala “Photo-Drama of Creation,” (Chimwenu chaNyevulu Yayileñaleña) yamwekesheleñawu hadi maora atanu nasatu yedishiluwu kudi (Atudizi aBayibolu) International Bible Students Association (I.B.S.A.). Ichi chimwenu chadiña nanyevulu yawulombu wawuwahi, nsañu yakulumbulula chiwahi nitumina twatuwahi nawa chashindameneni hansañu yamuBayibolu yahosheleña hansañu yakuleña kwejima nakushika kunsañu yachihandilu chawantu nihakukuma kwaYaaka Ikombakaji yaChiyuulu chaYesu Kristu.—Chim. 20:4. *

Indi antu ashakamineña mujimbaka janyanya nimunyikala ahetelelumu ñahi? Hakwila nawu antu akweti nzala yachalala abuli kushalahu, muAugust 1914 a I.B.S.A. edishili “Eureka Drama,” hela netu “Photo-Drama” yakusenda kumakasa yakadi nyivwimbimbi. Kwadiña nyitapu yisatu nawa yejima yadiña mumadimi amavulu: “Eureka X” yadiña namazu ejima nitumina. “Eureka Y” yadiña namazu ejima ninyevulu yayiwahi. “Eureka Family Drama,” yakuzatisha hetala yadiña namazu antesha nitumina. Alandileña cheñi nimakina akuvumishilahu apela wuseya.

Atudizi aBayibolu atwalileña iyi yimwenu munyikala nakutwala nsañu yaWanta mumaluña amaha chakadi kusenda projekita hela sikilini yeneni. “Eureka X” yamazu hohu adiña nakuyivumisha namwaana hela nawufuku. Projekita yanyevulu yakuzatisha nachu “Eureka Y” adiña nakuyizatisha hela chakadi kesi kawuneñu, azatishileña carbide lamp. Muchileji chimu chafumini kukasanji kamutayi kuFinland ahosheli nawu, “Tunateli kutalisha antu iyi nyevulu kudi kwejima. Chalala atalishileña antu kudi kwejima!

Chatela afweteleña matala amaneni akuhemenamu yisela, Atudizi aBayibolu adiña nakuzatisha chiwahi mali kuhitila mukuzatisha maluña akadi kufwetela adi neyi jishikola, yota yanyiloña, shitesheni yamasuwa nimatala awantu adiña natupeka twakuhanjekela twamaneni. Antu amavulu adiña nakutalila iyi nyivwimbimbi hanzi hehina ditooka deneni  dakukudika kumbañu. Anthony Hambuch wasonekeli nindi: “Andimi adiña nakusañula tumabulu twanyanya mumatempa awu anyikabu nakwinkamu jiñowa hakushakama antu hakutiyilila progiramu.” Idi izanvu “daEureka” dazatishileña itemba dakukoka natuwalu hakusenda yozelu yawu, yiteli, niyuma yakukamahu niyakutelekelahu.

Antu enjileña nakutala “Eureka” ashikileña kumakumi antesha nakushika kumakulakaji. MuUnited States, mumbaka yanyanya mwekala antu kwakwihi na 150 atalishilumu chimwenu kakavulu hashikola nawa antu ejima enjili nakutala chimwenu kuyibomba ashikili 400. Kwiluña dikwawu, antu amakwawu endeli makilomita 8 njila yimu kulonda ayi nakutala “Eureka Drama.” MuSweden, antuñi jaCharlotte Ahlberg ayili kwitala dindi danyanya nakutiyilila chimwenu, nsañu yatiyiluwu “yayishikili chikupu hamuchima.” Antu akushika ku 1,500 amumusumba wanyanya mwekala mungochi muAustralia ayili nakutala chimwenu. Kaposhi Kakutalila kashimwini nawu hajishikola jamaneni nihajikoleji “ankuluñaña niatudizi atiyili kuwaha nyevulu nimazu etu akukwata.” “Eureka Drama” yayili mpuhu nimumaluña mwadiña matala akutalila jifwilimu.

Atudizi aBayibolu hela yipompelu yatemesheleña anhoshi kumaluña ashiyashana atachikileña kupompesha mazanvu amakwawu nakuyitañisha kuhitila mukuhana jimpanji nikuyitalisha “Eureka Drama.” Kuhosha hohu chalala, tuneluki wanyi kuvula kwawantu atalili “Eureka Drama.” Azatishileña ‘jiDrama’ jajivulu mpinji yejima. Ilaña, mu 1915 hamazanvu 86 ‘aDrama,’ mazanvu 14 hohu diwu atemesheleña yileji mpinji yejima. Hakuhosha hanaambala yabula kuwanina, chileji chakumakumishilu achaaka chashimwini nawu antu akubadika ku 1,000,000 atalili “Drama.” Antu atalili akushika ku 30,000 alombeli nyikanda yashindamena haBayibolu.

Hela chakwila “Eureka Drama” yaya mpuhu wanyi muchihandilu chawantu, ilaña kumatuña adi neyi Australia, Argentina, South Africa, British Isles, India, niCaribbean, antu amavulu amweni ichi chimwenu chadimena. Hakachi kawantu wenawa, amavulu awanini chalala chamuBayibolu, chasweja kulema wuseya kubadika wuru, nawa adiñi nakubidika nawu “Eureka!”