PETULU wadilili nankashi hanyima yakumukaana Yesu. Hela chakwila kapostolu waneñeli chikupu hakumukaana Yesu, ilaña Yesu wakeñeleña kumuzatisha kulonda yakwashi akwawu. Dichi Yesu wamulejeli nindi: ‘Chiwakafunta, wakakoleshaña ana kweyi.’ (Luka 22:32, 54-62) Petulu wekalili hakachi kwawantu adiña yishimi muchipompelu chawakwaKristu akushankulu. (Ŋal. 2:9) Chochimu, muntu wakalakeleña neyi eluda nateli kukalakala cheñi nikwikala namuzañalu wafumaña mukukolesha akwawu akwakwitiya kulonda ekali nawulunda wawuwahi naNzambi.

Antu amakwawu azatileña neyi aeluda ayifumishahu hawueluda, nawa chumichi chaleñelaña kudimona neyi ashikilamu wanyi. Julio, * wazatileña neyi eluda kuBolivia kubadika hadi yaaka 20 wahosheli nindi: “Kuloñesha jimpanji, kuhempula amana kwetu nikubiña antu amuchipompelu diyi nyidimu yinazatileña muchihandilu chami. Chawushona, iku kukooleka kwejima kwamanini. Kuhosha hohu chalala iyi mpinji yadiña yakala chikupu.” Makonu, Julio wakalakalaña cheñi neyi eluda.

Kambanji Yakoba wasonekeli nindi: “Enu ana kwami, tiyenu kuwaha nankashi chimukushika mukweseka kweñi nakweñi.” (Yak. 1:2) Yakoba wateneneña hakweseka kutwamonaña muloña wamakabi nikubula kuwanina. Wateneni hakufwila kwatama, kwakama antu kumesu niyuma yikwawu. (Yak. 1:14; 2:1; 4:1, 2, 11) Neyi Yehova yatubabesha, chumichi chinateli kutuneñesha nankashi. (Heb. 12:11) Ilaña bayi twiteja kweseka kwamuchidiwu kutuneñeshuku.

Hela chakwila anatutambuli nyidimu yitwakalakeleña muchipompelu, tukweti kukooleka kwakudishinshika kulonda tumoni neyi tukweti chikuhwelelu  chakola nikumwekesha netu twamukeña Yehova. Nawa tunateli kushinshika chuma chaletesheli tutachiki kukalakala neyi eluda. Komana twafwilileña netu atumoneña nawu tudi aeluda, tahindi kukeña kutwamukeña Nzambi diku kwatuleñeleli kukalakala? Indi kwiji twelukili netu hichipompelu chaNzambi nawa twatela kuhemba nyikoku yindi chiwahi? (Yil. 20:28-30) Antu adiñi nakukalakala neyi aeluda atwalekañahu kuzata mudimu wajila namuzañalu amwekeshaña kudi ejima kushilahu niSatana nawu amukeña Yehova namuchima wumu.

Mwanta Davidi chamufumbiluwu hanshidi yahamesu bwi-i yakoñeliyi, wetejeli chamubabesheluwu nawa amwanakeneni. Davidi wembili nindi: “Nakooleki yenowu anaanakenuwu muloña windi, anabutiluwu nshidi yindi. Nakooleki yenowu muntu akabula kwinkawu muloña wakuluwa kudi Yehova, hakweti makasu muspiritu yinduku.” (Mas. 32:1, 2) Chakadi nikujina, kufumba kwamukwashili Davidi nawa wekalili kabiña wamuwahi wawantu jaNzambi.

Kakavulu, amana kwetu akalakalaña cheñi neyi aeluda ekalaña atubiña amawahi kubadika chadiñawu. Mana kwetu wumu wafuntili cheñi hawueluda wahosheli nindi: “Ichi neluka chikupu chakwakamena antu elaña yiluwa.” Eluda mukwawu wahosheli nindi: “Chayinu mpinji nalemesha chikupu kukooleka kwami kwakukalakela amana kwami.”

Ñimbi yamasamu wasonekeli nindi: “[Yehova] hakahosholaña hosholee-ku.” (Mas. 103:9) Dichi bayi tutoñojokaña netu Nzambi hamba kamukuhwelela cheñi muntu wakoñeli chiluwa chahamesu bwii-ku. Ricardo ajiminuwu wueluda hanyima yakukalakala hayaaka yayivulu wahosheli nindi: “Naneñeli nankashi hayiluwa yinakoñeli. Chineli nadimweneña nami nashikilamu wanyi, hahitili mpinji yayilehi nankashi hakwila nitachiki kukalakela amana kwami neyi eluda. Nadikuhweleleli wanyi, dichi natoñojokeli nami hinakatwesha kuzata cheñi nakashinshuku. Ilaña chineli natiyileña kuwaha kukwasha amakwawu, nalombweleña atudizi aBayibolu, kukolesha amana kwetu Hetala daWanta nikuzata nawu mumudimu wakushimwina. Ichi chankolesheli nawa chayinu mpinji inakuzata cheñi neyi eluda.”

Neyi mana kwetu yatwalekahu kuhemba nkunyi chikumukañesha kukalakala cheñi neyi eluda.  Chikuwaha neyi muntu yekala neyi kambuña Yehova Davidi wamutemukili Mwanta Sawulu wamutiyilileña ichima. Davidi wakaanini kumutenda Sawulu hela chakwila wadiñi nakukooleka kwakwila mwenimu. (1 Sam. 24:4-7; 26:8-12) Chafwiliyi Sawulu munjita, Davidi wamudilili nakumutena yena nimwanindi Jonatani nindi hiyantu “akeñewa amawahi.” (2 Sam. 1:21-23) Davidi hahembeli nkunyuku.

Neyi mutoñojoka nenu anayinki muloña wakutwamba hela kuyikabisha, bayi muhembaña nkunyi mumuchima wenuku. Chakutalilahu, William chamujiminuwu wueluda hanyima yakuzata yaaka 30 muBritain, wayihembeleli aeluda amakwawu nkunyi. Chumanyi chamukwashili William kubula kwikala nankunyi mumuchima? Wahosheli nindi: “Kutaña mukanda waYoba kwankolesheli. Neyi chakwila Yehova wamukwashili Yoba kudanakena nawalunda nindi asatu, ninami Yehova nateli kunkwasha kutiyañana nawaeluda akwaKristu.”—Yoba 42:7-9.

Neyi mwafuukwiluhu kuleka mudimu wakubiña nyikoku yaNzambi, chikuwaha neyi mutoñojoka chimwalekeleli. Komana mwadiñi nakukala kwasweja? Tahindi mwalemesheluku nankashi yuma yikwawu muchihandilu chenu? Indi kwiji yiluwa yawakwenu yayizeyesheli? Hichikweti muloña nachimwalekeleluku, ilaña anukenu nenu mwadiña nakukwasha akwenu hampinji yimwazatileña neyi eluda. Mpanji jenu nichakutalilahu chenu chayikolesheleña, nawa mwayikwashileña kuumika kweseka chimwayileña nakuyibiña. Chimwazatileña mudimu wawueluda nakashinshi mwatiyishileña muchima waYehova kuwaha.—Yish. 27:11.

Yehova wakwashaña antu kwikala cheñi namuzañalu nimpwila yakulombola chipompelu. Neyi mwalekeli kukalakala neyi eluda hela neyi ayifumishiluhu, munateli ‘kushikahu cheñi hakukalakala neyi mukulumpi.’ (1 Tim. 3:1) Pawulu ‘halekeli kuyilombela’ akwaKristu amuKolosuku nindi asweji kwiluka mwaya kukeña kwaNzambi kulonda ‘endi nakumutelela Yehova, nikumutiyisha kuwaha kwakweni.’ (Kol. 1:9, 10) Neyi mwikala cheñi nakukooleka kwakukalakala neyi eluda, mulombenu Yehova kulonda mwikali nañovu, adiwunjika nawa amuzañalu. Munanu mafuku akukuminina antu jaNzambi akeñaña kuyikolesha kuspiritu kudi atubiña akweti kukeña. Komana munatweshi nawa mwadikeñelaña kukolesha amana kwenu?