1, 2. Indi Yehova walombolaña ñahi ambuñindi?

 KUSHANKULU Yehova walombweleña antu jindi kuzatisha yuma yashiyashana. Nzambi wahosheleña nawantu amakwawu kuzatisha añelu hela yimwenu kulonda yashimuni yuma yikamwekana kumbidi. Yehova wayinkeli cheñi nyidimu yakuzata yambokamboka. (Kuch. 7:89; Ezek. 1:1; Dan. 2:19) Amakwawu atambwilileña wunlomboli kuhitila mudi antu amwimeneneñaku Yehova adiña nakuzatila mukuloñesha kwindi kwahamaseki. Antu ovwahilileña nshimbi jindi ayikiswilileña, hichikweti muloña nachatambwilileña antu jaYehova izu dinduku.

² Makonu, Yehova walombolaña antu jindi kuzatisha Bayibolu, spiritu yindi yajila nichipompelu. (Yil. 9:31; 15:28; 2 Tim. 3:16, 17) Wunlomboli wutwatambwilaña kufuma kudi Nzambi watiyakana chikupu neyi kwiji ‘matu etu anakutiya izu kunyima yetu nawu, Njila iyi, endenu mwomwenimu.’ (Isa. 30:21) Munjila yikwawu Yesu niyena watulejaña izu daYehova hampinji yalombolañayi chipompelu kuhitila mudi ‘nduñu wamaana nikashinshi.’ (Mat. 24:45) Twatela kwovwahila namuchima wejima yuma yatulejañawu muloña wumi wetu wahaya nyaka washindamena hakwovwahila.—Heb. 5:9.

3. Chumanyi chinateli kutukañesha kutiyilila wunlomboli waYehova? (Talenu mwevulu wakutachikilahu.)

³ Satana Diyabolu weluka nindi wunlomboli watwinkayi Yehova wukatuhandisha, dichi wafwilaña kutukañesha kulonda tubuli  kutiyilila. Kubombelahu, ‘muchima wetu wadimbanaña’ wunateli kutuleñela kudiwula wunlomboli wafumaña kudi Yehova. (Yere. 17:9) Dichi, tushinshikenu chitwatela kushinda yuma yinateli kutukañesha kutiyilila izu daNzambi. Tuhanjekenu cheñi kulomba kudi Yehova chikunateli kutukwasha kuhemba wubwambu wetu nayena, hichikweti muloña nayuma yikumwekanaku.

4. Indi Satana wafwilaña ñahi kuluwañesha yitoñojoka yawantu?

⁴ Satana wafwilaña kuluwañesha yitoñojoka yawantu kuhitila mukutandisha nsañu. (Tañenu 1 Yowanu 5:19.) Yipapilu yansañu, nyikanda, magazini, yikunzulemba, chisanji chanyivwimbimbi niIntaneti yumiyi yatiyakeshaña nsañu mukaayi kejima. Hela chakwila yumiyi yatukwashañaku kwiluka nsañu, kakavulu yatiyakeshaña nsañu yambukaku chikupu nanshimbi jaYehova. (Yere. 2:13) Chakutalilahu, akwayikunzulemba niakwakuhema yisela ahoshaña nawu wutumwa watama wanyi, nawa antu amavulu atoñojokaña nawu yuma yahosha Bayibolu hawutumwa yakala kulondela.—1 Kor. 6:9, 10.

5. Tunateli kutondolwela ñahi kutuhuñumuna nansañu yaSatana yakutwamba?

⁵ Indi antu akeña nshimbi jaNzambi jaloña anateli kutondolwela ñahi nsañu yakutwamba yatandishañayi Satana makonu? Anateli kwambula ñahi yuma yayiwahi nayatama? “Chiña nakusha muchima kukwila mwaya izu [daNzambi].” (Mas. 119:9) Izu daNzambi dikweti nshimbi jalema jinateli kutukwasha kwambula nsañu yalala niyakutwamba. (Yish. 23:23) Yesu washimwini chahosha Nsona nindi, ‘muntu wahandaña namazu ejima akufuma mukanwa kaYehova.’ (Mat. 4:4) Twatela kwiluka chakuzatisha nshimbi jamuBayibolu muchihandilu chetu. Chakutalilahu, henohu Mosi kanda yasoneki lushimbi lwaYehova lwahosha hawuvumbi, Yosefu wadiña kansi welukili nindi wuvumbi hinshidi kumesu aNzambi. Hakeñeleña kumuvulumuna Yehovaku chamudimbekeluwu kudi iñoda Potifwari nindi yeli wuvumbi. (Tañenu Kutachika 39:7-9.) Hela chakwila watwalekeluhu kumukakeja hampinji yayilehi, Yosefu watiyililili izu daNzambi bayi izu dañoda Potifwaruku. Kutiyilila izu daYehova dichi chuma chalema chikutukwasha kwambula yuma yaloña nayuma yaSatana yakutwamba yidi neyi ipumba dasweja.

6, 7. Twatela kwiladi kulonda tukañeshi kufumba kwaSatana kwatama?

⁶ Kaayi kanenzali nayililu yatama yidi neyi ntañishilu yakutwamba yamukwitiya yinakuleñela antu amavulu kutoñojoka nawu kukeñakeña kwitiya kwalala chamukukulwayi. Ilaña, neyi tunakukeña kutiyilila kudi Yehova, nateli kutukwasha kuwana chalala. Twatela kutondahu muntu wutunateli kutiyilila. Chineli hitunatweshi kutiyilila kumazu awantu ayedi hampinji yoyimuku, twatela ‘kwiluka izu’ daYesu nikumutiyilila. Yesu diyi atondeluwu kudi Yehova kulonda ataleña nyikoku Yindi.—Tañenu Yowanu 10:3-5.

⁷ Yesu wahosheli nindi, ‘Babelenu yuma  yimunakutiya.’ (Maku 4:24) Nshimbi jaYehova jatiyakana nawa jaloña, ilaña twatela kubabala nikutiyilila kufumba kwindi kuhitila mukuloñesha muchima wetu. Neyi tubula kubabala, tunateli kutiyilila kufumba kwaSatana kwatama chatela tutiyilileña nshimbi jaNzambi jajiwahi. Bayi mwiteja yuma yamukaayi yidi neyi tumina, mavidiyo, yisela yamwekeshañawu haTV, nyikanda, amabwambu, antañishi, hela antu amonañawu nawu ankuluñaña ayiyuuleña muchihandilu chenuku.—Kol. 2:8.

8. (a) Indi muchima wetu wunateli kutuleñela ñahi kwiñila mutufuta twaSatana? (b) Chumanyi chinateli kumwekana neyi tudiwula yinjikijilu yatusoñamishaña?

⁸ Satana weluka nindi twekala akwanshidi nawa wafwilaña kutudimba kulonda twileña yuma yatama. Neyi twila yuma yinakukeñayi Satana, chinateli kutukalila kutwalekahu kwikala ashinshika. (Yow. 8:44-47) Tunateli kukañesha ñahi tufuta twaSatana? Shinshikenu hadi muntu weñija mutu muchiseki chahakapinji kantesha, chakwila chimuleñeli kwila chuma chatama chabulili kutoñojokayi nindi wukachila. (Rom. 7:15) Chumanyi chamukojeja kwila chuma chatama? Hadaha, iwu muntu walekeli kutiyilila izu daYehova chovu-chovu. Indi kwiji wakañenyi kwiluka yinjikijilu yamwekesheleña nawu muchima windi wunahuñumuki hela wadiwili. Chakutalilahu, hekwawu walekeli kulomba, kuya nakushimwina chakamu nakamu, hela watachikila kujiña kukupompa. Nkumininaku, welili yuma yafwilileña muchima windi yelukiliyi nindi yatama. Tunateli kutondolwela kwila yuma yamuchidiwu neyi twiluka yinjikijilu yatusoñamishaña nikuzatilahu mukunyakashana kulonda tubuli kwila yuma yatama. Neyi tutiyililaña izu daYehova, hitukwiteja kutiyilila nsañu yahoshañawu akwakusekeshaku.—Yish. 11:9.

9. Indi kunyakala kwiluka yaaku yatama kwalemenadi?

⁹ Neyi musoñu awuwana swayi-swayi, muntu nateli kuhanda. Chochimu, tunateli kutondolwela kwila yuma yatama neyi tunyakala kwiluka yaaku yinateli kutuleñela kwiñila mukweseka. Neyi twiluka yaaku yamuchidiwu, twatela kunyakala kuzatilahu henohu ‘Satana kanda yatukwati mumuhetu windi nakwila mwakeñayi.’ (2 Tim. 2:26) Chumanyi chitwatela kwila neyi tumona netu yitoñojoka yetu niyuma yitwafwilaña yinakutufumisha kuyuma yakeñañayi Yehova nindi twileña? Chakadi kumanisha mpinji, twatela kufunta kudi Yehova nikwovwahila chikupu kufumba kwindi kulonda tumutiyilileña namuchima wetu wejima. (Isa. 44:22) Walala wudi wakwila nawu, neyi muntu yavulumuna, chumichi chikumuneñesha nankashi chakwila wukudifwishaña namuloña nihanyima yakufunta kudi  Yehova. Dichi chikuwaha neyi tutondolwela yuma yinateli kutuhuñumuna kuhitila mukuzatilahu swayi-swayi kulonda tubula kwiñila mukukala.

10, 11. (a) Muntu nateli kumwekesha ñahi nawu wadinka wanta? (b) Yumanyi yitwadizilaña kuyuma yatama yeliluwu aKora, Datani, niAbirami?

¹⁰ Twatela kwiluka netu muchima wetu wunateli kutuhuñumuna. Nshidi yitukweti yatuleñelaña kwila yuma yatama. Chakutalilahu, lwisu nikudinka wanta. Shinshikenu iyi yuma chiyinateli kutuluwañesha kulonda tubuleña kutiyilila izu daYehova nawa yinateli kutuleñela kwila yuma yatama. Muntu wadinka wanta wadimonaña neyi kwiji walema nankashi. Nateli kutoñojoka nindi wukweti wuswa wakwila yuma yejima yinakukeñayi nawa kwosi nimuntu wunateli kumuleja jakwila. Dichi wukutoñojoka nindi hatela kutiyilila wunlomboli nikufumba kwawakwawu akwaKristu, kwawaeluda, hela kwamukuloñesha kwaNzambuku. Muntu wamuchidiwu hanateli kutiyilila izu daYehovaku.

¹¹ Hampinji yadiñawu aIsarela muchinkalampata, Kora, Datani niAbirami akaanini kulondela wunlomboli waMosi naAroni. Hamuloña wakudinka wanta, akwakudikaña aloñesheli njila yankawawu yakudifukwilamu kudi Yehova. Indi Yehova welilidi? Wayijilumwini ejima. (Kuch. 26:8-10) Twadizilañaku yuma yalema kuniyi nsañu yakunyaka. Kudikaña naYehova kwaletaña kukala. Twatela kwanuka cheñi netu “kudinka wanta kwasambilaña, kujilumuka kwakumininaña.”—Yish. 16:18; Isa. 13:11.

12, 13. (a) Shimunenu chakutalilahu chamwekeshaña lwisu chilweñijaña muntu mukukala. (b) Lumbululenu lwisu chilunateli kusweja neyi kuzatilahu nehi.

¹² Shinshikenu cheñi hansañu yalwisu. Muntu walwisu kakavulu watoñojokaña nindi hatela kulondela nshimbi jaYehovaku nawa nindi nateli kusenda yuma yambala. Chelili mukulumpi wawamashidika wakuSiriya wejina daNayamani anamuuki dehi mbumba kudi kaprofwetu Elishi, wamwinkeli yawana, ilaña Elisha wakaanini kutabula iyi yawana. Hela chochu, Gehazi kalama kaElisha watiyilili ayina yawana lwisu. Gehazi wahosheli mumuchima windi nindi: “Chahandayi Yehova kwaamu, nukumulondela lufuchi nimutambuluhu yanti.” Elisha welukili wanyi, Gehazi wayili lufuchi nakumuwana Nayamani nawa washimwini wunsahu wakutwamba kulonda yatambuli ‘ntalenta yasiliva, niyikowelu yakuvwala yiyedi.’ Chumanyi chamwekeni hamuloña wakwila Gehazi watambwili yuma yawukombi nikumutwambila kaprofwetu kaYehova? Dichi, mbumba yaNayamani yamutuntulukilili Gehazi walwisu.—2 Anya. 5:20-27.

¹³ Muntu watachikaña kwikala nalwisu chovu-chovu, neyi kuzatilahu nehi, lunateli kuswejesha nikumukisañana. Nsañu yamuBayibolu yahosha hadi Akani yamwekeshaña chumichi. Shinshikenu lwisu chilwatandili swayi-swayi mumuchima waAkani. Wahosheli nindi: ‘Chinamweni mumaheta akunjita ihina dadiwahi dakuShinari, nijishekeli jasiliva makulakaji ayedi, nichishima chawuru pezu yachu jishekeli makumi atanu, niyifwila nikuyifwila, niyinona nikuyinona.’ Chatela yakañeshi lwisu lwadiñayi nalu, Akani weyili iyi yuma nawa wayiswekeli mwitenti dindi. Chelukiluwu yuma yatama yelili Akani, Yoshuwa wamulejeli nindi Yehova wukukumwesha yihuñu. Akani nichisaka chindi ayasili malola nawa afwili dodina ifuku. (Yosh. 7:11, 21, 24, 25) Lwisu hichuma chatama chinateli kutwiñija mukukala nimakonu. Dichi twatela ‘kudihemba kulonda tuleki lwisu lwejima.’ (Luka 12:15) Hela chakwila mpinji yikwawu tunateli kwikala nayitoñojoka yatama hela kutoñojoka hayuma yatama, chalema kuyuula yitoñojoka yetu nakubula kwiteja yuma yitwafwilaña yituleñeli kwila nshidi.—Tañenu Yakoba 1:14, 15.

14. Twatela kwiladi neyi tumona netu tukweti yaaku yalwisu nikudinka wanta?

 ¹⁴ Kudinka wanta nilwisu kwaletaña kukala. Kutoñojoka hayuma yafumañamu mukwila yuma yatama kunateli kutukwasha kukaana yaaku yatama yatukañeshaña kutiyilila izu daYehova. (Kuhit. 32:29) Nzambi wazatishaña Bayibolu hakutuleja njila yayiwahi, cheñi nawa watulubulwilaña nkisu yafumaña mukutiyilila izu dindi niyihuñu yafumañamu neyi tubula kumutiyilila. Neyi muchima wetu wutuhuñumuna nakwila yuma hamuloña walwisu nikudinka wanta, chikuwaha neyi tutoñojoka hayihuñu yikufumamu. Twatela kwiluka netu kwila chuma chatama kukutuneñesha etu aweni, antu itwakeña, sweje-e dinu tukuluwañesha wulunda wetu naYehova.

15. Yumanyi yitunateli kudizila kuchakutalilahu chemikili Yesu chakulomba?

¹⁵ Yehova wafwilaña kutukwasha. (Mas. 1:1-3) Watwinkaña nshimbi jaloña nawa hampinji yatelela. (Tañenu Aheberu 4:16.) Hela chakwila wadiña wawanina, Yesu washindameneni hakuhanjeka naYehova nikulomba chakubula kuleka. Yehova wamukwashili Yesu nikumulombola munjila jakuhayamisha. Watemesheli añelu kulonda amukalakeli, wamukwashili naspiritu yindi yajila, nikumulombola hakutonda apostolu 12. Izu daYehova datiyakeni kufuma mwiwulu nakumwekesha Nindi wamwitejeli Yesu nikumukwasha. (Mat. 3:17; 17:5; Maku 1:12, 13; Luka 6:12, 13; Yow. 12:28) Kufwana Yesu, twatela kumulomba Nzambi namuchima wetu wejima. (Mas. 62:7, 8; Heb. 5:7) Kulomba kunatweshi kutukwasha kutwalekahu kuhanjeka naYehova nikwila yuma yamulemeshaña Nzambi muchihandilu chetu.

16. Yehova nateli kutukwasha ñahi hakwila nawu twikali nawuswa wakutiyilila izu dindi?

¹⁶ Hela chakwila Yehova watwinkaña nshimbi jindi chawana, hakanjikijaña muntu wejima kujilondelaku. Twatela kulomba spiritu yindi yajila nawa wukutwinka namuchima wumu. (Tañenu Luka 11:10-13.) Hela chochu chalema nankashi ‘kwikala ababala chitukutiya.’ (Luka 8:18) Chakutalilahu, tukwikala anfwikiji neyi tukumulomba Yehova netu yatukwashi kuleka yililu yatama yawuvumbi, iku tunakutwalekahu nakutala nyevulu yanzekesi hela kutala mafilimu atama. Twatela kwikala kwiluña kudi spiritu yaYehova. Tweluka netu spiritu yaYehova yekalaña kuchipompelu. Ambuña Yehova amavulu atondolwelaña kudiñija mukukala kuhitila mukutiyilila kudi Yehova hakupompa. Chumichi chayileñelaña kwiluka kufwila kwatama kwekalaña munyichima yawu nikuwahisha yililu yawu.—Mas. 73:12-17; 143:10.

17. Muloñadi chichatamina kudishindamena etu aweni?

¹⁷ Shinshikenu hadi Mwanta Davidi wamuIsarela wakushankulu. Hachidiñayi kansi, wamushindili kaFwilistinu wasweja kutaluka Goliyati. Davidi wekalili mushidika, mwanta, mukwakukiña nikuyifuukwila aIsarela mwakwilila. Ilaña Davidi chadishindameneniyi yomweni, muchima windi wamudimbili nawa welili nshidi yahamesu bwi-i naBatisheba nawa waloñesheli njila yakujahilamu nfumwindi Uriya. Chamufumbiluwu, Davidi washikeneni dakwiteja yiluwa yindi nawa wekalili cheñi nawubwambu naYehova.—Mas. 51:4, 6, 10, 11.

18. Chumanyi chinateli kutukwasha kutwalekahu kutiyilila izu daYehova?

¹⁸ Dichi tutiyililenuña kufumba kwekala ha 1 Akorinda 10:12 kwakwila nawu bayi tusweja kudikuhwelelaku. Chineli hitunatweshi ‘kuyuula nyendu yetuku,’ nkumininaku tunateli kutiyilila izu daYehova hela izu daChilumbu chindi. (Yere. 10:23) Tutwalekenuhu nakulomba chakubula kuleka, kulondela wunlomboli waspiritu yajila nikutiyilila nakanañachima izu daYehova mpinji yejima.