1. Antu afwilañadi, nawa muntwinyi itwatela kudikunda nindi chikupu?

 ANTU afwilaña chikupu kukundama kwakwihi nawakwawu antu. Antu ayitenaña nawu “adikunda nawakwawu neyi adikeña nankashi nawa neyi adiluka chikupu wejima wawu.” Kafwampi twatiyaña kuwaha kudikunda nachisaka niamabwambu atukeña, atulemesha nawa atwiluka. Hela chochu, Muntu itwatela kudikunda nindi chikupu hakachi kawantu ejima hiNleñi yetu Wabadika.—Mukwa. 12:1.

2. Chumanyi chatushiikayi Yehova, hanu dinu antu amakwawu abulilañadi kukuhwelela ichi chikaninu?

² Yehova watukonkomwenaña Mwizu dindi nindi ‘tukundami kwakwihi’ nayena, nawa watushiika nindi neyi tukundama kwakwihi nayena, “niyena wukukundama kwakwihi” nanetu. (Yak. 4:8) Awa mazu atukoleshaña chikupu. Ilaña, antu amavulu atoñojokaña nawu hiyatela kukuhwelela nawu Nzambi wakeñaña kukundama kwakwihi nawuku; adimonaña nawu ashikilamu wanyi kudikunda nindi hela nawu wekala kwakulehi nankashi. Komana chaswayi kukundama kwakwihi naYehova?

3. Nsañwinyi yalala yitwatela kwiluka hadi Yehova?

³ Walala wakwila nawu, Yehova ‘hekala kwakulehuku nawantu ejima’ akeñeña kumuwana nawa chaswayi kumwiluka.  (Tañenu Yililu 17:26, 27; Masamu 145:18.) Nzambi wakeñaña nindi antu abula kuwanina akundami kudi yena nawa wadiloñesha kuyimwekeshela wuselewa windi neyi amabwambu jindi adikundayi nawu. (Isa. 41:8; 55:6) Yuma yamweniyi yamuleñeleli ñimbi yamasamu kusoneka hadi Yehova nindi: ‘Yeyi watiyaña mwalombañawu antu, antu ejima akwinza kudeyi. Nakooleki muntu wukutondeyi, wukumushikija kwakwihi naneyi.’ (Mas. 65:2, 4) Nsañu yamuBayibolu yahosha hadi Mwanta Asa wamuYuda yatulejaña chakutalilahu chamuntu wakundamini kwakwihi naNzambi, nawa yashimunaña cheliliyi Yehova. *

4. Indi Mwanta Asa wemikilili antu amuYuda chakutalilahwinyi?

⁴ Mwanta Asa wamwekesheli iyena dakudifukula kwalala hakufumisha ayivumbi ahatembeli nikupesha kwatandili mwituña hayaaka yayivulu. (1 Anya. 15:9-13) Wakonkomweneni antu chakadi woma ‘kukeñakeña Yehova Nzambi yawankakulula jawu nikuhemba Nshimbi nikuleja.’ Asa wayuulili mukuwunda yaaka ikumi yakusambila muchiyuulu chindi muloña Yehova wamukiswilili. Indi Asa wahosheli nindi iku kuwunda kwafumini kudihi? Walejeli antu nindi: “Hohanu hituchidi netuña nanichi chitunamukeñakeñi Yehova Nzambi yetu; tunamukeñakeñi dehi, niyena natunookeshi dehi mbadi jejima.” (2 Kushi. 14:1-7) Talenu yuma yalondeleluhu.

5. Kukalanyi kwamweniyi Asa kwamwekesheli nawu wamukuhweleleli Nzambi, nawa chumanyi chafuminumu?

⁵ Fwikijaku neyi iyeyi Asa. KaEtiyopiya Zera nenzi nakulwa naYuda nawamayala 1,000,000 nimakalu 300. (2 Kushi. 14:8-10) Wukwiladi neyi wumona amashidika amavulu amuchidiwu anakwinza mwituña deyi? Amashidika eyi ejima adi 580,000 hohu! Amashidika eyi akwiñilamu kwakwihi nakayedi namashidika indi, wukwihula chinetejeliyi Nzambi nindi ayilukuki? Komana wukushindamena hamaana eyi hakumanisha kukala kwamuchidiwu? Chuma cheliliyi Asa chamwekeshaña nawu wadikundili chikupu naYehova nawa wamukuhweleleli. Walombeli chakufuma hamuchima nindi: “Tukwashuku eyi Yehova Nzambi yetu, muloña tunashindameni hadeyi, chitunenzi nakulwa naluntu ilu, tunenzi mwijina deyi. Eyi Yehova, yeyi Nzambi yetu; bayi akwimika mushindu kudi muntu wafwañaku.” Indi Nzambi welilidi nakulomba kwaAsa kwakufuma hamuchima? ‘Yehova watapili aEtiyopiya.’ Ayilumbu ejima ayijahili muyina njita.—2 Kushi. 14:11-13.

6. Twatela kumwimbujola ñahi Asa?

⁶ Chumanyi chamukwashili Asa kumukuhwelela Nzambi nindi wukumukiña nikumulombola? Bayibolu yahosha nawu “Asa welili chachiwahi kumesu aYehova” nawa “muchima [windi] wayili chikupu kudi Yehova.” (1 Anya. 15:11, 14) Anetu nawa twatela kumukalakela Nzambi namuchima wumu. Chumichi chalema nankashi neyi tunakukeña kudikunda chikupu naNzambi makonu nikumbidi. Twatela kumusakilila Yehova muloña watukundamisha kudi yena nawa watukwashaña kukwata nikukolesha wulunda wetu nayena. Shinshikenu njila jiyedi jatukundamishilayi Nzambi kwakwihi nayena.

7. (a) Chumanyi chelayi Yehova hakutukundamisha kudi yena? (b) Njilanyi yalema yamwekeshelañayi Nzambi nindi watukundamisha kudi yena?

⁷ Yehova wamwekesheli nindi watukeña chaleñeliyi iseki dadiwahi hitwashakamaña. Wamwekeshaña cheñi nindi  watukeña hakutwinka yuma yayiwahi yatukwashaña muchihandilu chetu. (Yil. 17:28; Chim. 4:11) Sweje-e dinu, Yehova watwinkaña yuma yakoleshaña wulunda wetu nayena. (Luka 12:42) Watulejaña chikupu nindi watutiyaña neyi tulomba kudi yena. (1 Yow. 5:14) Hela chochu, kukeña kwamwekeshayi hakutwinka ifutu danyiloña, diyi njila yalema yatukundamishilañayi Nzambi kudi yena ninetu twakundamaña kudi yena. (Tañenu 1 Yowanu 4:9, 10, 19.) Yehova watemesheli “Mwanindi wumu hohu” hamaseki kulonda atukuuli kunshidi nikukufwa.—Yow. 3:16.

8, 9. Indi Yesu wazataña mudimwinyi munkeñelu yaYehova?

⁸ Yehova wakeñeleña nindi ifutu danyiloña diheteshi antu ejima, kushilahu niantu adiñaku henohu Kristu kanda yahani ifutu. Kufuma hampinji yaprofweteliyi Yehova nindi wakahana Chamwinu chawantu, ifutu danyiloña dadiña neyi adihana dehi kwesekeja nachamonañayi yuma; muloña welukili nindi nkeñelu yindi yikashikijewa. (Kutach. 3:15) Chihahitili yaaka yayivulu, kapostolu Pawulu wamuhamekeli Nzambi ‘hakukuula [antu] nefutu danyiloña dahaniniyi Kristu Yesu.’ Pawulu wabombeleluhu nindi: ‘Nzambi wadiña nakwanakena nshidi yavulumwinuwu kushankulu muloña wakudiwunjika kwindi.’ (Rom. 3:21-26) Yesu wazatili mudimu weneni chikupu hakutukundamisha kudi Nzambi!

⁹ Kuhitila mudi Yesu, antu adizoza anateli kumwiluka Yehova nikwikala nawulunda wawuwahi nayena. Indi Nsona yakonkomwena ñahi ichi chikuma? Pawulu wasonekeli nindi: “Nzambi wamwekeshaña kukeña kwindi yomweni kudetu, hohitwachidiñi akwanshidi Kristu watufwilili.” (Rom. 5:6-8) Ifutu danyiloña adihanini muloña wakwila Yehova niYesu atukeña chikupu, bayi neyi datutelelaku. Yesu wahosheli nindi, ‘Kwosi muntu natweshi kwinza kudami chakadi kumukoka kudi Tata wantemesheluku.’ Wahosheli cheñi nindi: “Kwosi muntu niwumu wukwinza kudi Tata chiña hadami.” (Yow. 6:44; 14:6) Yehova wazatishaña spiritu yajila hakukoka antu kudi yomwenindi kuhitila mudi Yesu nawa wayikwashaña kushakama mukukeña Kwindi kulonda akaheti wumi wahaya nyaka kumbidi. (Tañenu Yuda 20, 21.) Shinshikenu njila yikwawu yatukundamishilañayi Yehova kudi yomweni.

10. Yumanyi yatudizishaña Bayibolu yatukwashaña kukundama kwakwihi naNzambi?

¹⁰ Munichi chibaaba, tunazatishi dehi nsona yamunyikanda 14 yamuBayibolu. Chakadi Bayibolu, twadi kwiluka ñahi netu tunateli kukundama kwakwihi naNleñi yetu? Chakadi Bayibolu, twadi kudiza ñahi nsañu yefutu danyiloña nichitwatela kukundama kudi Yehova kuhitila mudi Yesu? Yehova wazatishili spiritu yindi hakwonena antu asonekeli Bayibolu yashimunaña yililu yindi yayiwahi ninkeñelu yindi. Chakutalilahu, haKwidika 34:6, 7, Yehova wadilumbulwili kudi Mosi hamu neyi “Nzambi, wenzala nawushona, watoñaña antu, hazuwaña swayuku, wasweja niluwi, wavulisha ninsañu yalala; wahembaña luwi lwindi lwamakombakaji awantu, wayanakenaña nikuluwa, ninyiloña, ninshidi.” Hinyi wukubula kukeña kudikunda namuntu wamuchidiwu? Yehova weluka nindi neyi tudiza nsañu yayivulu hadi yena kuzatisha Bayibolu, tukusweja kumwiluka nawa tukukundama kwakwihi nayena.

11. Muloñadi wutwatelela kudiza yililu yaNzambi? (Talenu mwevulu wakutachikilahu.)

¹¹ Hakulumbulula chitunateli kwikala nawulunda naNzambi, mukanda wetu wumu wahosha kumatachikilu nawu: “Hawulunda wejima wutwakwataña namuntu, mpanda yashindamenaña hakumwiluka  muntu, kukomoka nikulemesha yililu yindi yayiwahi. Dichi yililu yaNzambi yamwekeshawu muBayibolu hiyuma yalema chikupu yitwatela kudiza.” (Draw Close to Jehovah) Dichi twamusakililaña chikupu Yehova muloña Izu dindi adisonekeli munjila yitwatela kutiyishisha etu antu.

12. Muloñadi Yehova chazatishililiyi antu kusoneka Bayibolu?

¹² Yehova wadi kuzatisha añelu kulonda asoneki Bayibolu. Muloña asha muchima hadi etu nihanyidimu yetu. (1 Pet. 1:12) Chakadi nikujina, añelu adi kuyisonekela antu mazu afumini kudi Nzambi. Hanu dinu añelu adi kumona yuma neyi chamonañawu antu? Komana adi kwiluka yuma yitwakeñaña, kuzeyazeya kwetu niyitoñojoka yetu? Inehi, Yehova welukili nindi añelu hiyadi kutwesha kwiluka yumiyuku. Chineli antu diwu asonekeli Bayibolu, Yehova wayisonekeli munjila yakwila tuyitiyishisheña. Tunateli kwiluka chatoñojokeleñawu ansoneki, niantu amakwawu atenawu muBayibolu. Tunateli kuyitiyishisha chadiña nakwakamenawu, kujinoka, kutiya woma, yiluwa yakoñeleñawu nichazañaleleñawu nayuma yazatileñawu. Kufwana kaprofwetu Elija, ansoneki aBayibolu ejima ‘atiyileña mutwatiyañetu.’—Yak. 5:17.

13. Indi kulomba kwaYona kwayileñelaña kutiya ñahi?

¹³ Chakutalilahu, shinshikenu neyi chakwila kañelu wadi kutwesha kushimuna chikupu chatoñojokeleñayi Yona hampinji yatemukiliyi ona kaprofwetu mudimu wamwinkeluwu kudi Nzambi. Yehova welili chiwahi hakumwila Yona yasoneki nsañu yindi kushilahu nikulomba kwakufuma hamuchima kwalombeliyi kudi Nzambi hampinji yadiñayi kwishina dakaluñalwiji. Yona wahosheli nindi: “Muchima wami mukachi kami wafwili chinzeya, ami hinukumwanuka niYehova.”—Yona 1:3, 10; 2:1-9.

14. Muloñadi wumunateleli kutiyishisha yuma yasonekeliyi Isaya?

 ¹⁴ Shinshikenu cheñi nsañu yamulejeluwu Isaya kusoneka kudi Yehova. Hanyima yakumona kulema kwaNzambi muchimwenu, kaprofwetu wahosheli hanshidi yindi nindi: “Yayo, ami! Jinankumi; ami muntu wanyivumbu yamajilu, nashakama hamu nawantu anyivumbu yamajilu, mesu ami anamoni Mwanta, Yehova wamazaza.” (Isa. 6:5) Kwosi kañelu wadi kuhosha mazu amuchidiwuku. Ilaña Isaya wahosheli, nawa tunateli kutiyishisha chatiyiliyi.

15, 16. (a) Muloñadi wutunateleli kutiyishisha yuma yatiyileñawu akwetu antu? Shimunenu yakutalilahu. (b) Yumanyi yikutukwasha kukundama kwakwihi naYehova?

¹⁵ Komana añelu adi kuhosha nawu ‘hiyashikila mwokuku’ neyi chahosheliyi Yakoba, hela neyi chahosheliyi Petulu nindi “nimukwanshidi”? (Kutach. 32:10; Luka 5:8) Komana añelu aloña adi ‘kufwa mutentu’ neyi atumbanji twaYesu, hela ‘kuumika’ neyi chomikiliyi Pawulu niakwawu hampinji yayikabishiluwu muloña wakushimwina nsañu yayiwahi? (Yow. 6:19; 1 Tesa. 2:2) Inehi, añelu awanina muyuma yejima nawa abadika antu. Hela chochu, neyi antu abula kuwanina ahosha muniyi njila, twatiyishaña yitoñojoka yawu muloña ninetu tudi antu hohu. Neyi tunakutaña Izu daNzambi, chalala tunateli ‘kuzañalala nawakwakuzañalala; kudila nawakwakudila.’—Rom. 12:15.

¹⁶ Neyi tutoñojoka chikupu chahosha Bayibolu kutalisha hansañu yahanjekeleñayi Yehova nawambuñindi ashinshika akushankulu, tukudiza nsañu yayivulu yayiwahi hadi Nzambi yetu, wukweti kukeña nawa wadiwunjikili nikudikunda nanana antu abula kuwanina. Chitwela mwenimu, tukumwiluka nankashi Yehova nawa tukumukeña chikupu. Nawa tukukundama kwakwihi naNzambi.—Tañenu Masamu 25:14.

17. (a) Kufumbanyi kwakuwahi kwamufumbiluwu Asa kudi Azariya? (b) Indi Asa wadiwili ñahi kufumba kwaAzariya, nawa chumanyi chamwekeni?

¹⁷ Chelili Mwanta Asa yashindi chikupu amashidika akuEtiyopiya kaprofwetu kaNzambi Azariya wamulejeli Asa niantu jindi mazu amaana. Azariya wahosheli nindi: “Mwonsu mumukwikala naYehova, yena wukwikala nanenu; neyi mukumukeñakeña mwakamuwana; neyi mukumuleka niyena wakayileka.” (2 Kushi. 15:1, 2) Hela chochu, chimwahitili yaaka, Asa wakañenyi kwovwahila akuna kufumba kwakuwahi. Chayilukukiluwu kudi ayilumbu akuwanta wakukabeta kaluwunda wawaIsarela, Asa wakeñeli nindi amukwashi kudi aSiriya. Chatela yalombi cheñi kudi Yehova kulonda yamukwashi, watiyañeni nawasenji. Dichi Asa amulejeli nawu: “Chumichi chiwunakoñi wunakoñi chawusupi; dichi kufumisha henahanu wakamona majita hohu.” Yaaka yamakumishilu yachiyuulu chaAsa yadiña yamajita hohu. (2 Kushi. 16:1-9) Chumanyi chitwatela kudizilaku?

18, 19. (a) Twatela kwiladi neyi kudi yuma yaletesha twambuki kudi Nzambi? (b) Tunateli kukundama ñahi kwakwihi naYehova?

¹⁸ Hitwatela kumufutalela Yehovaku. Neyi kudi yuma yaletesha twambuki kudi Nzambi, twatela kwovwahila chahosha mukanda waHoseya 12:6 nawu: “Funtaku kudi Nzambi yeyi. Kakelaku luwi nawuñaji, muchiñilili Nzambi yeyi mafuku ejima.” Dichi tutwalekenuhu kukundama chikupu kudi Yehova kuhitila mukutoñojoka chikupu hefutu danyiloña nikudiza Izu dindi Bayibolu.—Tañenu Kuhituluka 13:4.

¹⁹ Ñimbi yamasamu wasonekeli nindi, “Ami kwami chachiwahi kukundama kwakwihi naNzambi.” (Mas. 73:28) Dichi wejima wetu tutwalekuhu nakudiza yuma yayiha yahosha hadi Yehova nikwiluka chikupu yuma yaleñela tumukeñi. Nawa Yehova yatukundamishi kudi yena chayinu mpinji nihaya nyaka.