Malwihu Kufuma Kudi Antañi
Yesu wayilejeli aSadusi nindi antu akasañulawu “hiyakasumbula hela kusumbukaku.” (Luka 20:34-36) Komana wateneneña kusañuka kwahamaseki?
Ilu lwihu lwalema nankashi, sweje-e kudi antu afwisha eni kwawu akeñawu. Antu wenawa akeñaña chikupu nawu akekali cheñi muwulu naweni kwawu akasañulawu mwituña dadiha. Ntuluwa wumu weyala wahosheli nindi: “Ami niñodami hitwafuukwiluhu kumanisha wulu wetuku. Twakeñeleña kutwalekahu kwikala anuñañana mukudifukula hamu neyi eyala namumbanda haya nyaka. Niyinu mpinji dichi chinatiyaña.” Kuduhu chuma chikutuleñela kukuhwelela netu antu akasañulawu akasumbulaña hela kusumbuka? Kuhosha hohu chalala, tuneluki wanyi.
Hayaaka yayivulu yinahituhu, nyikanda yetu yahosheleña nawu mazu ashimwiniyi Yesu hakusañuka nikusumbula hela kusumbuka hadaha washimwini hadi antu akasañwilawu hamaseki nawa nindi antu akasañulawu mwituña dadiha hiyakasumbula hela kusumbukaku. * (Mat. 22:29, 30; Maku 12:24, 25; Luka 20:34-36) Hela chakwila hitukushimuna jiikaku, komana Yesu watela wahosheleña hadi antu akasañwilawu mwiwulu? Tushinshikenu hamazu ahosheliyi Yesu.
Shinshikenu chadiñi yuma. (Tañenu Luka 20:27-33.) A Sadusi, abulili kukuhwelela mukusañuka, amwesekeli Yesu kuhitila mukumwihula lwihu lwakundama kukusañuka nikusumbula ntuluwa wunashiyi mana kwindi. * Yesu wakwili nindi: ‘Antu anyakiyi asumbulaña, asumbukaña; ilaña antu anafuukuluwu nawu anateli kushika kunyakoyu, nikukusañuka mudi afu, hiyakasumbula hela kusumbukaku. Muloña hela kufwa, hiyakafwa cheñuku; anabwambuli dehi nawañelu, hiyanyana kaNzambi anasañuki dehi.’—Luka 20:34-36.
Muloñadi nyikanda yetu chiyahoshela nawu hadaha Yesu wadiña nakutena kusañuka kwawantu akashakama hamaseki? Nyikanda yahosha muniyi njila hamuloña wayikuma yiyedi. Chikuma chatachi chidi chakwila nawu hadaha aSadusi atoñojokeleña hakusañuka kwawantu akashakama hamaseki nawa Yesu wayakwili kwesekeja nachatoñojokeleñawu. Chamuchiyedi, Yesu wakunkulwili ñakwilu yindi kuhitila mukutena hansañu yaAbarahama, Isaka niYakoba ankakulula ashinshika akasañulawu nakushakama hamaseki.—Luka 20:37, 38.
Hela chochu, Yesu watela watoñojokeleña hakusañuka kwawantu akaya mwiwulu. Muloñadi wutunahosheli muniyi njila? Tushinshikenu hanhoshelu yiyedi yalema.
‘Antu anafuukuluwu nawu anateli kushika . . . nikukusañuka mudi afu.’ Awayishewa ashinshika ‘ayimonaña nawu atelela wanta waNzambi.’ (2 Tesa. 1:5, 11) Dichi ayitena kwikala aloña hamuloña wefutu danyiloña, hiyafwaña neyi akwanshiduku. (Rom. 5:1, 18; 8:1) Antu wenawa ayitenaña nawu ‘akooleka nawa ajila’ muloña atelela kuyisañwila kuwumi wamwiwulu. (Chim. 20:5, 6) Ilaña antu akasañwilawu kuwumi wahamaseki hakekala ‘niantu abula kuloña.’ (Yil. 24:15) Komana tunateli kuhosha netu niwena ‘atelela’ kuyisañula?
‘Hiyakafwa cheñuku.’ Yesu wahosheli wanyi nindi: ‘Hiyanateli kufwa cheñuku.’ Ilaña wahosheli nindi: ‘Hiyakafwa cheñuku.’ Awayishewa amanishaña chihandilu chawu hanu hamaseki nakashinshi ayisañulaña nakuya mwiwulu nawa ayinkaña wumi wabulaña kufwa, wumi wahaya nyaka wabulaña kukisika. (1 Kor. 15:53, 54) Kufwa hikukweti cheñi ñovu hadi antu akasañulawu nakuya mwiwuluku. *
Kwesekeja nayuma yitunahoshi, tunateli kukunkulula netudi? Tunateli kukunkulula netu mazu aYesu ateneniyi hakusumbula hela hakusumbuka nikusañuka akundama kudi antu akasañulawu nakuya mwiwulu. Neyi dimu, mazu aYesu atulejaña yuma yayivulu hansañu yanana akasañulawu nakushakama mwiwulu: Hiyasumbulaña hela kusumbukaku, hiyafwañaku, munjila yikwawu adi neyi añelu muloña hiyileñaleña yakuspiritu yashakamaña mwiwulu. Hela chochu, iyi nsañu yaleñelaña kwihula malwihu amavulu.
Lwatachi, muloñadi Yesu chahosheliyi hakusañuka kwawantu akaya mwiwulu hampinji yayakwileñayi aSadusi, hadaha atoñojokeli hakusañuka kwawantu akashakama heseki? Yesu hakwileña antu amudimbulwileña kwesekeja nachatoñojokeleñawuku. Chakutalilahu, hakwakula aYudeya amwilili nawu yayileji chinjikijilu, Yesu wayilili nindi: “Sandenu tembeli iyi, mafuku asatu nakayituñulula cheñi.” Yesu welukili nindi adiña nakutoñojoka hatembeli yakutuña kudi antu, “Ilaña yena wadiñi nakutena tembeli yamujimba windi.” (Yow. 2:18-21) Hadaha Yesu wakeñeleña wanyi kuyakula ana aSadusi anfwikiji abulili kukuhwelela mukusañuka nikubula kukuhwelela nawu añelu ekala kwoku. (Yish. 23:9; Mat. 7:6; Yil. 23:8) Hekwawu wakeñeleña kushimuna walala kutalisha hakusañuka kwawantu akaya mwiwulu kulonda atumbanji twindi ashinshika akahetelumu muloña adiña nakuchiñeja kwakusañuka nakuya mwiwulu.
Lwamuchiyedi, muloñadi Yesu chakunkulwiliyi mpanji yindi nakutena hadi Abarahama, Isaka, niYakoba akasañulawu nakushakama hamaseki? (Tañenu Matewu 22:31, 32.) Ilukenu nenu Yesu watachikili kuhosha iyi nsañu yanana ankakulula namazu akwila nindi, “hakwila nsañu yakusañuka kwawafu.” Iyi nhoshelu yinateli kuhimpa mpanji yahosheleñayi kutalisha hakusañuka kwawantu akaya mwiwulu nakutena hakusañuka kwawantu akashakama hamaseki. Nkumininaku, Yesu wahosheli hansañu yasonekeliyi Mosi yatwambileñawu aSadusi nawu ayikuhweleleli, nakutena mazu aYehova amulejeluwu Mosi kuchiputa chakwatili kesi kulonda yashimuni chikupu nindi kusañuka kwawantu akashakama hamaseki kwalala nawa dichi chafuukulayi Nzambi.—Kwid. 3:1-6.
Lwamuchisatu, neyi chakwila mazu ahosheliyi Yesu hakusañuka nikusumbula hela kusumbuka akundama kudi antu akasañulawu nakuya mwiwulu, komana chumichi chinayi mukwila nawu antu akasañulawu nakushakama hamaseki akasumbulaña hela kusumbuka? Izu daNzambi hidakulaña jiika hanilu lwihuku. Neyi Yesu wateneneña hakusañuka kwawantu akaya mwiwulu, dikwila nawu mazwindi hiyashimunahu hansañu yawantu akasañulawu nakushakama hamaseki neyi chakwila akasumbulaña hela kusumbuka mwituña dadihaku.
Chayinu mpinji, tuneluki netu Izu daNzambi dashimuna nawu kufwa diku kwambulaña antu adisumbula. Dichi antuluwa awamayala niambanda hiyatela kudinka muloñaku neyi atondahu kusumbula hela kusumbuka. Iyi hinsañu yatela kuditondelahu muntu, nawa kwosi muntu watela kuyinka antu amuchidiwu muloña neyi atondahu kusumbula hela kusumbuka.—Rom. 7:2, 3; 1 Kor. 7:39.
Eñañi, tunateli kwikala namalwihu amavulu kutalisha hachihandilu chichakekala mwituña dadiha. Chatela tubokeña ñakwilu yanawa malwihu, twatela kuhembelela kulonda tukamoni chichakekala. Ilaña tweluka chikupu netu: Antu ovwahila akazañalala muloña Yehova wakatwinka yuma yitwakeñaña.—Mas. 145:16.
^ Talenu Kaposhi Kakutalila kachizungu, kaJune 1, 1987, mafu 30-31.
^ Kushankulu, antu adiñi nachaaku chakusumbula ntuluwa anashiyiwu kudi mana kwindi neyi yafwa chakubula kuvwala mwana weyala, ntuluwa wasumbukileña neshaku dindi nakuvwalilamu mwana kulonda ijina dachisaka dibuli kujiya.—Kutach. 38:8; Kuhit. 25:5, 6.
^ Antu akasañulawu nakushakama hamaseki akatambwila wumi wahaya nyaka bayi wumi wabulaña kufwaku. Neyi munakukeña kwiluka nsañu yayivulu hachaambu chekela hakachi kawumi wabulaña kufwa nawumi wahaya nyaka, talenu Kaposhi Kakutalila, kaChizungu kaApril 1, 1984, mafu 30-31.
