1, 2. Yehova wamwinkeli Mosi mudimwinyi, nawa Wamukolesheli ñahi?

 FWIKIJENU chimukutiya neyi mwimana kumesu anyuuli wasweja ñovu hanu hamaseki kulonda muhosheluku antu jaYehova? Chakadi nikujina, mukwakamena nankashi, mukutiya woma nawa mukudimona nenu mwashikilamu wanyi. Mukuloñesha ñahi mazwenu? Chumanyi chimukwila hakwila mazu imukuhosha atiyakani nawu munakumwimenaku Nzambi Wabadika ñovu?

² Chumichi dichi chamweniyi Mosi. Yehova wamulejeli Mosi ‘wadiñi wamwovu nankashi mumuchima, kubadika amayala ejima ekala heseki dejima,’ nindi wukumutemesha yakadimoni naFwaro kulonda yakapulwishi antu jaNzambi kumakabi awu nimuwuduñu muEjipitu. (Kuch. 12:3) Nsañu yamwekeni yamwekeshaña nawu Fwaro wadiña muntu wakasawuntu nawa wadinka wanta. (Kwid. 5:1, 2) Ilaña Yehova wakeñeleña Mosi yamuleji Fwaro nindi yombuku anduñu jindi amavulu kulonda afumi muEjipitu. Tunateli kwiluka chaletesheli Mosi yamwihuli Yehova nindi: “Ami yaminyi mwaka niyi kudi Fwaro nakufumisha anyana kaIsarela muEjipitu?” Mosi wadimweni nindi hashikilamuku. Ilaña Nzambi wamukolesheli nindi wakamukwasha. Yehova wahosheli nindi, “Chalala ami nikwikala neyi.”—Kwid. 3:9-12.

3, 4. (a) Indi Mosi wachinineñadi? (b) Kukalanyi kumunateli kumona kwadifwana nakwamweniyi Mosi?

 ³ Indi Mosi wachinineñadi? Chakadi nikujina, wachinineña nindi Fwaro hakumutambwila hela kumutiyilila ñimenu waYehova Nzambuku. Mosi wachinineña cheñi nindi antu jindi akukuhwelela wanyi nawu Yehova namutemeshi yena kulonda yayilomboli hakufuma muEjipitu. Dichi Mosi wahosheli naYehova nindi: “Wena kwawu hiyakañitiyaku, hiyakatiya mwizu damuku, akela nawu, Yehova hanadimwekeshi kudeyuku.”—Kwid. 3:15-18; 4:1.

⁴ Yehova chamwakwiliyi Mosi niyuma yikwawu yamwekeni yinateli kutudizisha wonsu wetu chuma chalema. Eñani, hadaha himukemana kumesu amuntu wasweja kulemaku. Komana chayikalilaña kuhanjeka nsañu yaNzambi niyaWanta windi kudi antu imwawanaña mafuku ejima? Neyi chayikalilaña, shinshikenu hayuma yimwatela kudizila kudi Mosi.

5. Yehova wamwinkeli Mosi chumanyi muchisaka chindi, nawa chumichi chamanishili ñahi woma watiyileñayi? (Talenu mwevulu wakutachikilahu.)

⁵ Chelili Mosi yashimuni woma watiyileñayi nindi akumutiyilila wanyi, Nzambi wamukolesheli kulonda akatweshi kuzata chiwahi. Nsañu yekala mumukanda waKwidika yahosha nawu: “Yehova wamwilili [Mosi] nindi, Chumanyi chidi muchikasa cheyi? Nindi, Mbwechi. Nindi, Yinati heseki. Wayinatili heseki, yabalumukili kapela, Mosi hakukatemuka. Yehova hakumwila Mosi, nindi, Ololaku chikasa cheyi wukakwati kumukila. Yena wolweli chikasa chindi wakakwatili, kabalumukili cheñi mbwechi muchikasa chindi. Yehova nindi, Kulonda aketiyi nawu Yehova . . . nadimwekeshi kudeyi.” (Kwid. 4:2-5) Eñañi, Nzambi wamwinkeli Mosi chuma chakumwekesha nawu amutemesheli kudi Yehova. Chuma chamweneñawu nawu himbwechi yamukunkulwayi chabalumukili kapela nañovu yaNzambi. Ichi chihayamisha chaleñeleli antu kumona nawu Mosi amukwashileña kudi Yehova. Dichi Yehova wamulejeli nindi: “Wakasendi muchikasa cheyi mbwechi oyu, wakeli nachu yinjikijilu.” (Kwid. 4:17) Chelili Nzambi yamwinki ñovu muchikasha chindi, Mosi wayili nakumwimenaku Nzambi walala kudi aIsarela nikudi Fwaro.—Kwid. 4:29-31; 7:8-13.

6. (a) Chumanyi chatela kwikala muchikasa chetu neyi tunakushimwina, nawa muloñadi? (b) Lumbululenu ‘Izu daNzambi’ chidekalila ‘dadumi’ ‘nichidekalila nañovu.’

⁶ Anetu anateli kutwihula lwihu lwolumu neyi tunayi nakushimwina nsañu yamuBayibolu nawu: “Chumanyi chidi muchikasa cheyi?” Twavula kusenda Bayibolu muchikasa chetu kulonda tuyizatisheña. Hela chakwila antu amakwawu amonaña Bayibolu nawu himukanda wamukunkulwayi, Yehova wahoshaña nanetu kuhitila Mwizu dindi donenawu. (2 Pet. 1:21) Mwekala yikaninu yaNzambi yahosha hayuma yikamwekana muchiyuulu chaWanta windi. Dihafumini kapostolu Pawulu kusoneka nindi: ‘Izu daNzambi dadumi, dikweti ñovu.’ (Tañenu Aheberu 4:12.) Yikaninu yejima yakanayi Yehova yamba kashikijewa chachiwahi. (Isa. 46:10; 55:11) Neyi muntu yeluka chumichi Hezu daYehova, yuma yatañañayi muBayibolu yinateli kwikala nañovu muchihandilu chindi.

7. Tunateli ‘kulumbulula ñahi izu dansañu yalala mudaya mudaya’?

⁷ Eñañi, Yehova washa muchikasa chetu Izu dindi dasonekawu ditunateli kumwekesha nachu netu nsañu yetu yalala nawa yafuma kudi yena. Hanyima yakuyisonekela aHeberu, Pawulu wamukonkomweneni Timotewu wadizishileñayi nindi ‘yakabili kulumbulula izu dansañu yalala mudaya mudaya.’ (2 Tim. 2:15) Tunateli kuzatisha ñahi kufumba kwaPawulu? Kuhitila mukutaña nezu datiyakana, nsona yatelela yinateli kushika hanyichima yawantu atutiyililaña. Matilakiti edikili mu 2013 ayisonekeli kulonda atukwasheña kwila mwenimu.

8. Indi nkoñi wamudimu wumu wahosheli nindidi hamatilakiti?

⁸ Matilakiti ejima amaha ayisoneka munjila yoyimu. Dichi neyi tunadizi kuzatisha yimu, dikwila nawu tunadizi chakuzatisha ejima. Komana awa matilakiti aswayi kuzatisha? Nkoñi wamudimu wumu wakuHawaii, U.S.A., wasonekeli nindi: “Twelukili wanyi netu awa matilakili amaha akutukwashaña chikupu hakushimwina kwitala nikwitala nihakushimwina hatooka.” Wawana nindi matilakiti ayisoneka munjila yakwila antu ashikeneña dakwakula lwihu, nawa chumichi chatukwashaña kutwalekahu kuhanjeka nawu. Wamonaña nindi muloña wakwila hewulu datilakiti asonekahu lwihu niñakwilu yinateli kutondayi muntu, mwiniitala hatela kwakama nindi wukuhana ñakwilu yaloñaku.

9, 10. (a) Indi matilakiti etu atukwashaña ñahi kutaña Bayibolu? (b) Matilakiti amu adihi imwahanaña chiwahi, nawa muloñadi?

⁹ Matilakiti ejima atukwashaña kutaña nsona yatelela. Chakutalilahu, talenu tilakiti yinakwila nawu Komana Makabi Amba Kamana? Chili mwiniitala yahosha nindi, “eña, “inehi,” hela “hekwawu” hakwakula lwihu, bakulenu mukachi nawa bayi muhosha chuma chidi chejimaku, ilaña hoshenu nenu “Bayibolu yahoshaña nawu.” Kuhiñahu tañenu Chimwekeshu 21:3, 4.

¹⁰ Chochimu, neyi tunakuhana tilakiti yinakwila nawu Indi Bayibolu Mwayimonaña Ñahi? hichikweti muloña nachakwakulayi mwiniitala hañakwilu yikutondayi yidi hatilakituku. Bakulenu hohu mukachi nakuhosha nenu, “Bayibolu yahoshaña nawu ‘Nyikanda yajila yejima ayonena dehi kudi Nzambi.’” Munateli kubombelahu nenu, “Kafwampi iyi nsona yahosha nsañu yayivulu.” Kuhiñahu bakulenu Bayibolu yenu, nawa tañenu nsona yejima ya 2 Timotewu 3:16, 17.

11, 12. (a) Munateli kuzatisha ñahi matilakiti kulonda mudiluñishi mumudimu wakushimwina? (b) Matilakiti anateli kuyikwasha ñahi kudiloñesha hakufuntila kudi antu?

¹¹ Chikwakulayi mwiniitala chikuyikwasha kwiluka nsañu yikwawu yidi mutilakiti yimukutaña nikuhanjekahu. Kubombela hakuyinka antu matilakiti, mukutiya kuwaha muloña mwayitañila Izu daNzambi hela chakwila mwataña vasi yimu hohu hela ayedi halwendu lwatachi. Munateli kutwalekahu kuhanjeka ifuku dikwawu.

¹² Chipapilu chakunyima chatilakiti yidi yejima chikweti lwihu hamutu wakwila nawu “Lwihu Lutwatela Kutoñojokahu” nijinsona  jimunateli kuhanjekahu hakufuntilaku. Neyi mwahanjekeli hatilakiti yakwila nawu Komana Mwatoñojokaña Nenu Chihandilu Chakekala Ñahi Kumbidi? hakufuntilaku munateli kuhanjeka halwihu lwakwila nawu “Indi Nzambi wakawahisha ñahi yuma yinakumwekana mukaayi?” Hadi ninsona yaMatewu 6:9, 10 niDanyeli 2:44.” Tilakiti yakwila nawu Komana afu Amba Kahanda Cheñi? hekala lwihu lwakwila nawu “Muloñadi chitwashinakajilaña nikufwa?” Hadi ninsona yaKutachika 3:17-19 niAroma 5:12.

13. Lumbululenu chakuzatisha matilakiti hakutachika kudizisha antu Bayibolu.

¹³ Awa matilakiti ayisoneka munjila yakwila ayikwasheña kutachika kudiza Bayibolu nawantu. Muntu nateli kuzatisha koodi yekala kuchipapilu chakunyima yatilakiti nawa yikumutwala haWebu sayiti yetu, hekala nsañu yikumukolesha kudiza Bayibolu. Hamatilakiti hekala cheñi buloshuwa yaNsañu Yayiwahi Yinafumi kudi Nzambi nawa yashimunaña hakudiza kunakundami kunoyu nsañu. Chakutalilahu, tilakiti yakwila nawu Hinyi Wayuulaña Kanu Kaayi? yikumutwala hakudiza 5 yaniyi buloshuwa. Tilakiti yakwila nawu Chumanyi Chinateli Kuleta Muzañalu muChisaka? yikumutwala hakudiza 9 yaniyi buloshuwa. Neyi muzatishaña awa matilakiti munjila yatelela, mukwikala nachaaku chachiwahi chakuzatisha Bayibolu halwendu lwatachi nihakufuntilaku. Chumichi chikuyikwasha kutachika kudizisha atudizi amavulu. Chumanyi chikwawu chimwatela kwila kulonda muzatisheña Izu daNzambi chiwahi mumudimu wenu?

14, 15. Munateli kwimbujola ñahi yililu yaPawulu mumudimu wenu wakushimwina?

¹⁴ Pawulu wadiña nampwila yakushimwina ‘antu amavulu chikupu’ mumudimu windi wakushimwina. (Tañenu 1 Akorinda 9:19-23.) Ilukenu nenu Pawulu wafwilileña ‘kukokola aYudeya . . . , kukokola antu adiña kunshimbi . . . , kukokola antu abulili nshimbi . . . , nikukokola antu azeya.’ Eña, wakeñeleña kushimwina ‘antu ejima kulonda mwejimimu yatweshi kuhandisha nachu amakwawu.’ (Yil. 20:21) Tunateli kwimbujola ñahi yililu yaPawulu neyi tunakudiloñesha kushimwina nsañu yalala kudi “antu ejima” amwiluña detu dakushimwina?—1 Tim. 2:3, 4.

¹⁵ Njila jitunateli kulondela jekalaña muMudimu Wetu waWanta kakweji nikakweji. Esekenu kujizatisha. Ilaña neyi kudi nsañu jikwawu jinakutoñojokawu antu mwiluña denu, loñeshenu nsañu yinateli kushika hanyichima yawantu. Toñojokenu mwiluña mumwashakamaña, antu ashakamañamu niyuma yakamenañawu chikupu. Kuhiñahu, toñojokenu hansona yashimunaña yuma yinakwakamenawu. Nkoñi wañinza walumbulwili chazatishañawu Bayibolu nañodindi mumudimu wakushimwina nindi: “Enimatala amavulu atwitejaña kutaña vasi yimu neyi tuhosha mazu antesha nakushimuna chikuma. Hanyima yakudimusha iku tunabakuli maBayibolu etu, twatañaña nsona.” Shinshikenu yakutalilahu yantesha yansañu, malwihu nijinsona jazatikaña chiwahi jimunateli kuzatisha mwiluña denu.

16. Lumbululenu chimunateli kuzatisha Isaya 14:7 mumudimu wakushimwina.

¹⁶ Neyi mwashakamaña mwiluña mwabulaña kushakamawu kumatelu amwena, munateli kumwihula muntu nenu: “Komana munateli kufwikija nenu iyi nsañu anakuyihosha hayikunzulemba yejima nawu: ‘Ichi dinu antu hamaseki adi mukuwunda, kwosi yuma yinakuyikabisha. Antu anazañalali chikupu’? Dichi chahosha Bayibolu haIsaya 14:7. Kafwampi, muBayibolu mwekala yikaninu yayivulu yashiikayi Nzambi nindi hamaseki keña hekali kuwunda.” Kufumahu tañenu chikaninu chimu muBayibolu.

17. Munateli kuzatisha ñahi mukanda waMatewu 5:3 hakuhanjeka nawantu?

¹⁷ Komana chihandilu chayikalila amayala  amavulu mwiluña denu? Neyi chayikalila, munateli kutachika kuhanjeka kuhitila mukwihula nenu: “Komana iyala watela kukwata mali añahi kulonda chisaka chindi chikali namuzañalu?” Chakulayi munateli kuhosha nenu: “Amayala akwataña mali amavulu kubadika owu, ilaña yisaka yawu hiyekala namuzañaluku. Hanu dinu chumanyi chakeñekaña?” Kuhiñahu tañenu Matewu 5:3 nawa mwihulenu neyi wukukeña kudiza Bayibolu.

18. Hakwila nawu mukundeji antu, munateli kuzatisha ñahi Yeremiya 29:11?

¹⁸ Komana antu amwiluña denu anakukabakana muloña wawubanji wamwekana katataka? Munateli kutachika kuhanjeka kuhitila mukuhosha nenu: “Nayendeleña kulonda niyileji nsañu yakukundeja. (Tañenu Yeremiya 29:11.) Munamoni yuma yisatu yakeñaña kutwililayi Nzambi? ‘Kumwena,’ ‘nyaka yakumbidi,’ ‘nichikuhwelelu.’ Komana ichi hichuma chachiwahuku kwiluka nenu wakeñaña nindi tukahandeña chiwahi? Indi chumichi chinateli kuzatika ñahi?” Kufumahu mulejenu hakudiza hadi nsañu yatelela mubuloshuwa yaNsañu Yayiwahi.

19. Lumbululenu chimunateli kuzatisha mukanda waChimwekeshu 14:6, 7 hakuhanjeka nawantu akeña nsañu yaNzambi.

¹⁹ Komana mwashakamaña mwiluña mwekala antu akeña nsañu yaNzambi? Neyi mwekala antu amuchidiwu, munateli kutachika kuhanjeka nawu kuhitila mukuyihula nenu: “Neyi chakwila kañelu nakuhosha nanenu, mukutiyilila nsañu yinakuhoshayi? (Tañenu Chimwekeshu 14:6, 7.) Chineli iwu kañelu nakuhosha nindi ‘mwakamenu Nzambi,’ komana hichikuwahaku neyi mwiluka Nzambi wunakutenayi? Iwu kañelu watukwashaña kwiluka Nzambi wunakutenayi hakuhosha nindi, ‘Waleñeli niiwulu nimaseki.’ Nakutena Nzambinyi yeniwu?” Kufumahu tañenu mukanda waMasamu 124:8, wahosha nawu: ‘Wukwashi wetu wekala mwijina daYehova, Welili niiwulu niiseki.’ Mulejenu nenu munakukeña kulumbulula nsañu yayivulu yahosha hadi Yehova Nzambi.

20. (a) Munateli kuzatisha ñahi Yishimu 30:4 hakumuleja muntu ijina daNzambi? (b) Kuduhu nsona yazatikaña chiwahi?

²⁰ Munateli kutachika kuhanjeka nakansi kuhitila mukuhosha nenu: “Inakukeña kukutañila nsona yehula lwihu lwalema nankashi. (Tañenu Yishimu 30:4.) Kwosi muntu anateli kulumbululawu muniyi njila, dichi iyi nsona yinakutena Nleñi yetu. Tunateli kwiluka ñahi ijina dindi? Nateli kukuleja ijina dindi muBayibolu.”

21, 22. (a) Indi kutaña nsona yatelela kunateli kuhimpa ñahi chihandilu chamuntu? (b) Munakufwila kwiladi chimukuzataña mudimu wenu wakushimwina?

²¹ Mukwiluka wanyi chakwilawu antu neyi mutaña nsona yatelela. Chakutalilahu, aYinsahu ayedi muAustralia adondomweneni kwitala dachañadima. Wumu wamwihwili ona mumbanda nindi, “Mweluka ijina daNzambi?” nawa watañili nsona yaMasamu 83:18. Ona mumbanda wahosheli nindi, “Nahayamini! Chafuminuwu hetala, nendeli namotoka lwendu lwamakilomita 56 hakuya kusitolu yalandishañawu nyikanda kulonda nimoni maBayibolu amakwawu nidikishonari chiyahosha hejina daNzambi. Chinelukili nami Nzambi ijina dindi diyi Yehova, namweni nami kudi yuma yikwawu yinabula kwiluka.” Chimwahitili mpinji yantesha, yena niyala wamwoteli atachikili kudiza Bayibolu nawa mukuhita kwampinji apapatisheweli.

²² Izu daNzambi dahimpaña yihandilu yawantu aditañaña nawa akuhwelelaña yikaninu yalala yaYehova. (Tañenu 1 Atesalonika 2:13.) Nsañu yekala muBayibolu yikweti ñovu chikupu kubadika yuma yejima yitunateli kuhosha hakushika hamuchima wamuntu. Dichi neyi chinatwesheki, twatela kuzatisha Izu daNzambi mumudimu wetu wakushimwina. Dadumi.