1. Indi Pawulu watiyili ñahi nawantu amukalakeleli Yehova nañovu?

 KAPOSTOLU Pawulu wanukili antu akalakeleña nañovu hakushimwina nsañu yayiwahi. Pawulu wasonekeli nindi: ‘Twenda twanuka mudimu wenu wachikuhwelelu kumesu aNzambi, yowu Tata yetu, nikukalakala kwenu kwakukeña, nikutatakena kwenu kwenzaña nakuchiñeja kwekala mudi Mwanta wetu Yesu Kristu.’ (1 Tesa. 1:3) Eñañi, Yehova wanukaña antu amukalakelaña nakashinshi muloña wakukeña chili azataña nañovu hela azataña kwesekeja nachidi chihandilu chawu.—Heb. 6:10.

2. Yumanyi yitukudiza muchinu chibaaba?

² AkwaKristu akushankulu niamakonu adihana chikupu hakwila amuzatili Yehova mumudimu wampinji yejima. Tushinshikenu antu amakwawu akalakeleña kushankulu. Tukushinshika cheñi nyidimu yinakuzatawu antu adi mumudimu wampinji yejima makonu kulonda twiluki chitwatela kuyikwasha.

3, 4. (a) Indi antu amakwawu azatileña ñahi kushankulu? (b) Awanineña ñahi yuma yakumujimba yakeñeleñawu?

³ Hanyima yakumupapatisha, Yesu watachikili mudimu washika mukaayi kejima. (Luka 3:21-23; 4:14, 15, 43) Chayiliyi mwiwulu, apostolu indi atwalekeluhu kutandisha mudimu wakushimwina.  (Yil. 5:42; 6:7) AkwaKristu amakwawu, adi neyi Fwilipu, azatileña neyi akwakushimwina niamishonali muPalestine. (Yil. 8:5, 40; 21:8) Pawulu niakwawu ayileña nakushimwina nikumaluña akwakulehi. (Yil. 13:2-4; 14:26; 2 Kor. 1:19) Chakutalilahu, Silasi, Maku, niLuka, azatileña neyi ansoneki. (1 Pet. 5:12) Ahela akwaKristu akalakeleña hamu nanawa amana kwetu ashinshika. (Yil. 18:26; Rom. 16:1, 2) Yakutalilahu yawu yayiwahi yatuleñelaña kutiya kuwaha kutaña Nyikanda yawakwaKristu yachiGriki nawa yamwekeshaña nawu Yehova wanukaña ambuñindi ashinshika.

⁴ Indi akwakristu akushankulu azatileña mudimu wampinji yejima ayikwashileña ñahi kumujimba? Mpinji yikwawu ayitambwilileña kumatala nikuyikwasha munjila jikwawu kudi akwawu akwakristu, ilaña hiyadiña nakulomba yumiyuku. (1 Kor. 9:11-15) Antu niyipompelu yikwawu yadiña nakuhana mukudikeñela. (Tañenu Yililu 16:14, 15; Afwilipi 4:15-18.) Pawulu nialunda nindi muyendeleleñawu mpinji yikwawu azatileña tunyidimu twakudikwasha nachu muyuma yikwawu yakeñekeleña.

5. Indi antu adisumbula ahosheli nawudi hamudimu wawu wampinji yejima wazatañawu?

⁵ Makonu, antu amavulu azataña nañovu munyidimu yashiyashana yampinji yejima. (Talenu chikasha chinakwila nawu “ Nyitapu yanyidimu yampinji yejima.”) Atiyaña ñahi hamudimu watondawu? Ilu dilu lwihu lumwatela kuyihula, nawa munateli kuhetelamu neyi muyihula. Shinshikenu chakutalilahu: Mana kwetu wunazati neyi payiniya wampinji yejima, payiniya wadimena, kamishonali, nawa wekala membala wamuchisaka chaBeteli mwituña dacheñi wahosheli nindi: “Neluka nami mudimu wampinji yejima wunatondeli diwu mudimu wawuwahi wunatonda. Chinashikijili yaaka 18 yakusemuka, chankalilili kutondahu shikola yamuñoñi, nikuzata mudimu wampinji yejima wakumujimba, hela kwikala payiniya. Yuma yinamona muchihandilu yankwasha kwiluka nami Yehova havulamenaña antu adihanaña nakuzata mudimu wampinji yejimaku. Nazatishaña yawana hela wuswa wudi wejima wanyinkayi Yehova munjila yinadi kukañanya kuzatisha neyi natondeluhu mudimu wakumujimba.” Ñodindi niyena wahosheli nindi: “Mudimu wejima wunazataña wankwasha kupama. Tunadimweni Yehova chatukiñañayi nikutulombola kapampa kakavulu munjila yitwadi kubula kumona neyi chakwila twatondeluhu nyidimu yakumujimba. Twamusakililaña Yehova hakutwiteja kumuzatila mumudimu wampinji yejima.” Anenu komana mwakeñaña kwikala nachihandilu chamuchidiwu?

6. Indi Yehova watiyaña ñahi hamudimu wutwamuzatilaña?

⁶ Kafwampi, antu amakwawu chihandilu chawu hichinateli kuyiteja kuzata mudimu wakushimwina mpinji yejimaku. Tunateli kukuhwelela netu Yehova walemesha chamuzatilañawu namuchima wumu. Toñojokenu antu ateneniyi Pawulu mumukanda waFwilemoni 1-3, kushilahu niantu ejima adiña muchipompelu chamuKolosi. (Tañenu.) Pawulu wayihamekeli, neyi chayihamekeliyi Yehova. Munjila yoyimu, Tata yetu wamwiwulu wahamekaña mudimu wumwamuzatilaña. Hanu dinu, munateli kukwasha ñahi antu azataña mudimu wampinji yejima makonu?

7, 8. Indi mudimu wawupayiniya wakeñekañadi, nawa amakwawu muchipompelu anateli kukwasha ñahi apayiniya?

⁷ Kufwana akwakushimwina akushankulu, apayiniya adikita makonu akoleshaña yipompelu. Amavulu afwilaña kuzata maora 70 kakweji nikakweji mumudimu wakushimwina. Munateli kuyikwasha ñahi?

⁸ Muhela wumu payiniya wejina daShari wahosheli nindi: “Apayiniya amwekenaña neyi  kwiji akola nankashi chazatañawu mumudimu wakushimwina ifuku niifuku. Hela chochu, akeñaña kuyikolesha.” (Rom. 1:11, 12) Muhela mukwawu wazatili mudimu wawupayiniya hayaaka yayivulu wahosheli hadi apayiniya amuchipompelu chawu nindi: “Azataña nañovu chikupu nawa chakubula kuleka. Neyi ayitwala nakushimwina namotoka, kuyitambika nakudya, kuyinka mali akulanda nachu manji amumotoka hela mali akudikwasha nachu muyuma yikwawu, akusakilila hama. Chumichi chamwekeshaña nawu mwayakamenaña.”

9, 10. Chumanyi chelawu antu amakwawu hakukwasha apayiniya amuchipompelu chawu?

⁹ Komana munakukeña kukwasha apayiniya mumudimu wakushimwina? Payiniya wejina daBobbi walembeli nindi: “Twakeñaña antu amavulu akuzata nawu mukachi kamulungu.” Payiniya mukwawu muchipompelu chochimu wabombeleluhu nindi: “Twamonaña kukala chikupu hakuwana antu akuzata nawu namwana.” Muhela wunakuzatila haBeteli yakuBrooklyn wanukaña mpinji yazatileñayi wupayiniya nakuhosha namuzañalu nindi: “Muhela wumu wadiña namotoka wanlejeli nindi, ‘Neyi wukañanya muntu wakuzata nindi, wunateli kuntambika, nawa nukuya nakushimwina neyi.’ Wankwashili hakwila nitwalekuhu kuzata wupayiniya.” Shari niyena wahosheli ichi chikuma chalala nindi: “Chamanishawu kushimwina, apayiniya ajiki ekalaña kankawawu kakavulu. Munateli kutambika amana kwetu hela ahela ajiki hakudifukula kwachisaka mumpinji mumpinji. Munateli cheñi kuyikolesha neyi muyitambika hampinji yimunakwila yuma yikwawu.”

¹⁰ Muhela wumu wunazati mudimu wampinji yejima kwakwihi nayaaka 50, wanukaña chazatileñawu wupayiniya nawakwawu ahela ajiki nindi: “Aeluda amuchipompelu chetu ahempwileña apayiniya chimwahita tukweji. Adiña nakwihula chitwadiña nakuhanda, nyidimu yetu yakumujimba nikwihula neyi tukweti kukala kudi kwejima. Atukwashileña hama. Enjileña mwitala detu kulonda amoni neyi kudi yuma yitunakaankili.” Ichi chatela kuyanukisha mazu aPawulu akuhameka muntu wakuEfwesesa wadiña nachisaka wamukalakeleli.—2 Tim. 1:18.

11. Yumanyi yakeñekaña hakuzata mudimu wawupayiniya wadimena?

¹¹ Yipompelu yikwawu yakooleka hakwikala  nawapayiniya adimena. Awa amana kwetu niahela amavulu azataña maora 130 hañondu hañondu mumudimu wakushimwina. Muloña wakwila azataña mpinji yeneni mumudimu wakushimwina nikukwasha akwawu munjila jamboka, amakwawu ekala nampinji yantesha amakwawu hiyekalaña nampinji yakuzata mudimu wakumujimbaku. Kasanji kamutayi kayinkaña mali antesha kakweji nikakweji kulonda ashi muchima hakushimwina.

12. Indi aeluda niantu amakwawu anateli kukwasha ñahi apayiniya adimena?

¹² Tunateli kuyikwasha ñahi apayiniya adimena? Eluda wahakasanji kamutayi wahanjekaña nawapayiniya adimena walumbulwili nindi: “Aeluda atela kuhanjeka nawu, kwiluka chinakuhandawu kulonda eluki chatela kuyikwashawu. A Yinsahu amakwawu atoñojokaña nawu apayiniya adimena hiyakeñaña wukwashuku muloña ayinkaña mali, ilaña ana kwetu amuyipompelu yawu atela kuyikwasha munjila jajivulu.” Kufwana apayiniya ampinji yejima, apayiniya adimena niwena akeñaña antu akuzata nawu mumudimu wakushimwina. Komana munateli kuyikwasha muniyi njila?

13, 14. (a) Chumanyi chitwatela kwanuka hadi ankoñi añinza? (b) Chumanyi chimwatela kwila kulonda mukwashi ankoñi añinza?

¹³ Ankoñi añinza niañodijawu ayimonaña nawu hiyamana kwetu niahela akuluka yitembi akweti chikuhwelelu chakola nawa atukoleshaña. Dimu tuhu, ilaña niwena akeñaña kuyikolesha, kuzata nawu mumudimu wakushimwina nikuhema nawu yisela yatelela. Chumanyi chitwatela kwila neyi akata nawa anayitenteki muchipatela, indi kwiji anakukeñeka kuyiladika hela neyi akweti yikatu yikwawu? Atiyaña kuwaha hama neyi amana kwetu niahela amuyipompelu ayikwasha nikuyakamena muyuma yakeñekaña. Luka, ‘ndotolu twakeña,’ wasonekeli mukanda waYililu, wamwakameneni Pawulu niakwawu muyendeleleña.—Kol. 4:14; Yil. 20:5–21:18.

¹⁴ Akoñi añinza niañodijawu niwena akeñaña kuyikolesha kudi amabwambu. Nkoñi wañinza wumu wasonekeli nindi: “Amabwambu jami eluka dehi mpinji yinakeñaña kunkolesha. Ehulaña malwihu amawahi nawa chankwashaña kuyileja yuma yinakunkabisha. Ankwashaña chikupu muloña antiyililaña.” Ankoñi añinza niañodijawu ahamekaña chikupu chayakamenañawu kudi amana kwetu niahela.

15, 16. Indi amuchisaka chaBeteli niantu ekala haMatala Akupompela kupompa kwamaneni azataña nyidimwinyi, nawa tunateli kuyikwasha ñahi?

¹⁵ Mukaayi kejima, antu azatilaña haBeteli, hela haMatala Akupompela kupompa kwamaneni azataña mudimu walema hakukwasha mudimu waWanta mumatuña mwazatilaña kasanji kawu kamutayi. Neyi muchipompelu chenu hela muñinza yenu mwekala akaBeteli, munateli kumwekesha ñahi nenu mwayanukaña?

¹⁶ Chashikawu haBeteli, anateli kutiya wuudi muloña anashiyi chisaka chawu niamabwambu jawu. Akusakilila nankashi neyi akwawu anawanuwu haBeteli nimuchipompelu adikunda nawu. (Maku 10:29, 30) Mudimu wazatañawu mpinji yejima wayinkaña mpinji yakuya nakupompa nikuya mumudimu wakushimwina mulungu nimulungu. Hela chochu, mpinji yikwawu akaBeteli ekalaña nanyidimu yikwawu. Neyi yipompelu yiluka chumichi nikumwekesha nawu alemeshaña akaBeteli ninyidimu yazatañawu, ejima akuhetelamu.—Tañenu 1 Atesalonika 2:9.

17, 18. Nyidimwinyi yazatañawu antu afuma kumatuña acheñi?

¹⁷ Antu etejaña kuya nakuzatila kwituña dacheñi anateli kuwana yakudya, idimi, chisemwa niyuma yikwawu yambukaku chikupu.  Muloñadi chetejelañawu kumona kukala kwamuchidiwu?

¹⁸ Amishonali amakwawu azata mudimu wakushimwina nakukwasha amana kwawu amavulu kuhetela muyuma yadizawu. Kasanji kamutayi kayiloñeshelaña amishonali matala atelela nawa ayinkaña mali akulanda tuyuma twakeñekaña. Amakwawu afuma kumatuña acheñi azatilaña hakasanji kamutayi hela kukwasha mudimu wakutuña tusanji twanyitayi, tusanji twawakwakubalumuna, Matala Akupompela kupompa kwamaneni hela Matala aWanta. Ayiloñeshelaña hakukama, yakudya niyuma yikwawu. Kufwana amuchisaka chaBeteli, niwena apompaña mpinji yejima nikushimwina, dichi akwashaña antu muyuma yayivulu.

19. Twatela kuyikwasha ñahi antu afuma kumatuña acheñi?

¹⁹ Tunateli kuyikwasha ñahi awa antu azataña mudimu wampinji yejima? Anukenu nenu hakusambila chikuyikalila kudya yakudya yabula kwinjililawu. Mwatela kwanuka chumichi neyi muyitambika kwitala denu nakudya; munateli kusambila kuyihula yakudya yikukeñawu kudya hela yikukeñawu kweseka. Ilukenu nenu hiyakushikena kwiluka idimi denu hela tushidikilu twenuku. Mukuhita mpinji hakwila nawu eluki yuma yejima yimunakuhosha, ilaña munateli kuyikwasha kulonda eluki chakutena mazu. Afwilaña kudiza.

20. Munjilanyi yayiwahi yitunateli kukwashilamu anvwali jawantu ekala mumudimu wampinji yejima?

²⁰ Antu ekala mumudimu wampinji yejima ashinakajaña nianvwali jawu niwena ashinakajaña. Neyi anvwali hiyaYinsahu akeñaña nawu anyanawu atwalekuhu mumudimu wampinji yejima. (3 Yow. 4) Hela chochu, antu ekala mumudimu wampinji yejima azataña hakumina ñovu jawu kulonda akwashi anvwali jawu neyi anakukeña kuyikwasha mumpinji mumpinji. Ilaña, antu ashakamaña kukamwihi nawanvwali jawu anateli kukwashaku antu ekala mumudimu wampinji yejima kuhitila mukuyakamena anvwali jawu ashinakaja dehi. Ilukenu nenu antu azataña mudimu wampinji yejima akweti mudimu walema nankashi mukanu kaayi. (Mat. 28:19, 20) Komana enu hela chipompelu chenu chinateli kukwasha anvwali jawu neyi anakukeña wukwashu?

21. Antu azataña mudimu wampinji yejima atiyaña ñahi chayikwashañawu nikuyikolesha kudi amakwawu?

²¹ Bayi neyi antu azataña mudimu wampinji yejima akeñaña maluku, ilaña amuzatilaña Yehova niakwawu antu. Asakililaña wukwashu wudi wejima wumunateli kuyinka. Muhela wazatilaña kwituña dacheñi wahosheli neyi chahoshañawu akwawu amavulu nindi: “Hela akusonekela mukanda wakusakilila chamwekeshaña nawu antu amakwawu akwanukaña nawa alemesha mudimu wuwazataña.”

22. Mwatiyaña ñahi hamudimu wampinji yejima?

²² Kumuzatila Yehova mumudimu wampinji yejima kwaletaña muzañalu chikupu muchihandilu. Antu azataña iwu mudimu adizaña yuma yayivulu hela chakwila wapela wanyi. Iyi nyidimu yayikwashaña kudiloñesha hanyidimu yayiwahi yakazatañawu ambuña aYehova ejima ashinshika haya nyaka muchiyuulu chaWanta waNzambi. Dichi wejima wetu ‘tutwalekuhu kwanuka mudimu wachikuhwelelu wazatañawu’ antu adi mumudimu wampinji yejima.—1 Tesa. 1:3.