1, 2. (a) Indi atubiña amuIsarela adiña nanyidimwinyi? (b) Indi anvwali ekala ñahi neyi atubiña?

 ATUBIÑA amuIsarela wakushankulu azatileña nakashinshi chikupu. Bayi neyi akuminineña dakuumika nkanza nimashika hohuku, ilaña akiñileña yimuna yawu kulonda abuli kuyidya kudi ayidanyi hela kuyiya kudi antu. Atubiña atalileña nyikoku mafuku ejima nikukwasha nyikoku yakata hela yadikatishileña. Adiña nakwakamena chikupu nyana kanyikoku muloña hiyekala nañovu neyi nyikoku yakula dehuku.—Kutach. 33:13.

² Munjila jikwawu, anvwali akwaKristu ekala neyi atubiña nawa ekala nayililu yekala nawatubiña ayimuna. Akweti mudimu wakulela anyanawu “nakuyibabesha nikuyikonkomwena mudi Mwanta.” (Efwes. 6:4) Komana iwu himudimu wapela? Inehi! Anyana ayimakena nankashi namakudi atandishañayi Satana nawa awanina wanyi. (2 Tim. 2:22; 1 Yow. 2:16) Neyi mukweti anyana, munateli kuyikwasha ñahi? Tushinshikenu yuma yisatu yimunateli kwila kulonda mubiñi anyanenu, kuyiluka, kuyitañisha nikuyilombola.

3. Indi anvwali anateli ‘kwiluka ñahi mwekalilawu’ anyanawu?

³ Kabiña wamuwahi washinshikaña mukoku wejima nakanañachima kulonda yeluki nindi wakola. Anenu nawa mwatela kwila mwenimu nawanyanenu. Bayibolu yahosha nawu: “Ilukaku chachiwahi mwekalila yimuna yeyi.” (Yish. 27:23) Hakwila mwili mwenimu, mwatela kushinshika yuma yelañawu anyanenu niyitoñojoka yawu. Munateli kwila ñahi mwenimu? Kuhanjeka nawanyanenu mpinji yejima hinjila yimu yazatikaña chiwahi.

4, 5. (a) Njilanyi jajiwahi jinateli kukwashana hakwila anyana aleji anvwali jawu yuma yinakutoñojokawu? (Talenu mwevulu wakutachikilahu.) (b) Yumanyi yimunakwila kulonda chiyipeleli kuhanjeka nawanyanenu?

⁴ Anvwali amakwawu elukaña nawu kuhanjeka nawanyanawu kwakalaña neyi anekali dehi atumpululu hela ansanda, muloña atiyaña nsonyi kushimuna yuma yatoñojokañawu. Neyi anyanenu dichi chekalawu, munateli kwiladi? Chatela mumukakeji mwanenu nakumushakamisha hamaseki kulonda muhanjeki mpinji yayilehi, fwilenu kuhanjeka nindi mumesu awunda. (Kuhit. 6:6, 7) Mwatela kuzata nañovu kulonda muzatileña hamu. Munateli kuya nawu nakwenda, kwendesha motoka, kuhema chisela hela kuzatila hamu nyidimu yikwawu yahetala. Kuhanjeka nawatwansi hampinji yamuchidiwu kunateli kuyikwasha kushimuna yuma yidi kumuchima.

⁵ Chumanyi chimwatela kwila neyi mwanenu hanakukeña kuhanjekaku? Mwatela kweseka njila yacheñi. Chakutalilahu, chatela mumwihuli mwanenu wamumbanda yuma yamonayi odu ifuku, mwatela kumuleja yuma yimwamona. Nateli kuhosha chiwahi hayuma yamonayi odu ifuku. Neyi munakukeña kwiluka chatoñojokañayi mwanenu hansañu yikwawu, ihulenu malwihu anabuli kumukundama. Munateli kumwihula chatoñojokañayi ibwambu dindi hanoyu nsañu. Kuhiñahu munateli kumwihula chinateli kumukwashayi ibwambu dindi.

6. Indi kwikala akasunuka nikwikala nampinji yakuhanjeka kwatalisha mudihi?

⁶ Kafwampi, hakwila chiyipeleli anyanenu kuyileja nsañu, atela kuyimona nawu mwakasunuka nawa mukweti mpinji yakuhanjeka nawu. Neyi anvwali amwekanaña nawu adana mpinji yakuhanjeka, anyana hiyavula kushimuna kukala kukwetuwuku. Chumanyi chimwatela kwila kulonda mwikali akasunuka? Yuma yayivulu yakeñekaña kubadika kuhosha hohu nenu, “Wunateli kunleja kukala kuwukweti kala mpinji.” Anyanenu bayi atoñojokaña nawu munateli kusekesha hela kutalumoka neyi ayileja kukala kwawuku. Anvwali amavulu emika chakutalilahu chachiwahi munsañu yamuchidiwu. Kayla wudi nayaaka 19 yakuvwalika wahosheli nindi: “Nateli kuhosha natata hakukala kudi kwejima kunukweti. Hankwataña kwizuku, hansompeshañaku; wakuminaña hohu dakutiyilila. Kuhiñahu wanfumbaña chachiwahi mpinji yejima.”

7. (a) Nvwali nateli kwesekeja ñahi yuma neyi nakuhosha nsañu yakudiluka kweyala namumbanda? (b) Indi anvwali anateli kuhilisha ñahi anyanawu chakadi kwiluka?

⁷ Hela tuhu munakuhanjeka nsañu yakala, yidi neyi kudiluka kweyala namumbanda mwatela kubabala kulonda mubuli kusweja kukonkomwena hayuma yatama hohu chatela mumuleji mwanenu njila yayiwahi yakuzata nanoku kukala. Chakutalilahu: Twili netu munayi kulesitilanti, dichi munawani hasonekañawu yakudya anasonekuhu hohu nawu mudi yakudya yafwana. Chakadi nikujina, mukufuma munoyu lesitilanti nakuya nakukeña yikwawu. Anyanenu niwena anateli kwila chochimu neyi enza nawu muyifumbi, ilaña nsañu yimukweti yakusoñamisha hohu. (Tañenu Akolosi 3:21.) Ilaña fwilenu kwesekeja yuma. Muhela wakansi wejina daEmily wahosheli nindi: “Neyi anvwali jami anakunleja nsañu jakudiluka kweyala namumbanda, hiyahoshaña haniyi nsañu neyi yatamaku. Akonkomwenaña hamuzañalu wekala hakwiluka muntu nikuwana muntu  wakudisumbula nindi. Chumichi chanleñela kwikala wakasunuka hakuhosha nawu iyi nsañu. Kafwampi nakeñaña kuyileja neyi kudi muntu inakukeña kudiluka nindi chatela niyisweki.”

8, 9. (a) Yumanyi yayiwahi yafumaña mukutiyila chakubula kuketwisha anyanenu? (b) Indi kutiyilila yuma yahoshañawu anyanenu kwayikwasha ñahi?

⁸ Kwesekeja nachahosheli Kayla, munateli kumwekesha nenu mwakasunuka neyi mudiwunjika nakutiyilila chinakuhoshayi mwanenu. (Tañenu Yakoba 1:19.) Mama yawantu mujiki wejina daKatia wetejeli nindi, “Hakusambila nadiwunjikileña wanyi neyi mwanami wamumbanda nakunleja nsañu. Hinamwinkeleña mpinji yakumanisha nsañu yahosheleñayuku. Mpinji yikwawu nazeyeleña chakwila nakeñeleña wanyi kutiya chinakuhoshayi nawa hinakeñeleña kunkabishaku. Chineli nahimpa yililu yami mwanami niyena wahimpa. Wantiyililaña chikupu.”

⁹ Tata yawantu wejina daRonald niyena wadiña nakukala kwokumu namwanindi wamumbanda. Wahosheli nindi, “Chanlejeliyi nindi hashikola yawu hadiña mukwenzi weyala wakeñeliyi, nasambilili kuzuwa hama. Ilaña chinatoñojokeli nami Yehova wekala wadiwunjika nawambuñindi nawa hayitalumokelañaku, nelukili nami chikuwaha neyi nimwinka mwanami mpinji yakushimuna yuma yidi kumuchima windi henohu kanda nimufumbi. Natiyaña kuwaha hakwila mwenimu. Diyi mpinji yatachi yinelukili chatoñojokeleñayi mwanami. Chamanishiliyi kuhosha champeleleli kuhanjeka nindi munjila yayiwahi. Chanhayamishili hakumona neyi watiyilili munamufumbili. Wamwekesheli chikupu nindi nakukeña kuhimpa yililu yindi.” Neyi muhanjekaña nawanyanenu mpinji yejima mukwiluka yuma yatoñojokañawu. Chimwela mwenimu, mukuyikwasha kulonda afuukuleña hayuma chiwahi. *

10, 11. Munateli kukwasha ñahi anyanenu kulonda abuli kupwapuka?

¹⁰ Kabiña wamuwahi weluka nindi hakachi kanyikoku yindi, wumu nateli kufuma hamutaña. Hadaha, mukoku nateli kufuma hamutaña neyi chakwila namoni heluña hadi matahu amawahi hahalehi chanti, kufumahu nateli kuswila hahalehi sampu nichikwambukayi hadi akwawu. Nimwana niyena nateli kutachika kufuma muchalala chovu-chovu neyi amweseka kulonda adikundi nawakwawu atama hela yisela  yatama. (Yish. 13:20) Munateli kwiladi kulonda mwanenu yabuli kupwapuka?

¹¹ Neyi munakutañisha anyanenu nyakalenu kwiluka yuma yimunamoni nenu atela kuzatilahu. Yikwashenu kulonda akoleshi yililu yayiwahi yikwetuwu. (2 Pet. 1:5-8) Kudifukula kwachisaka kwampinji yejima diyi mpinji yayiwahi yimwatela kwila mwenimu. Mudimu Wetu waWanta waOctober 2008 wakonkomweneni haniyi njila nawu: “Nyitu yayisaka yikweti mudimu wayinkawu kudi Yehova wakwiluka nawu anakulondela chikupu progiramu yakudiza Bayibolu kwachisaka mafuku ejima.” Komana munakuzatisha chikupu iyi ntanjikilu yayiwahi kulonda mubiñeña anyanenu? Ilukenu nenu anyanenu alemesha chikupu chimwazataña nañovu kulonda muyikwashi.—Mat. 5:3; Fwi. 1:10.

12. (a) Atwansi ahetelamu ñahi mukudifukula kwachisaka kwamafuku ejima? (Bombelenuhu nichikasha chinakwila nawu, “ Alemesha Kudifukula kwaChisaka.”) (b) Indenu nkawenu mwahetelañamu ñahi mukudifukula kwachisaka?

¹² Shinshikenu nsanda wejina daCarissa chahosheliyi hantanjikilu yaKudifukula kwaChisaka chiyakwashili chisaka chawu. “Natiyaña kuwaha chitwashakamaña wejima wetu nakuhanjeka. Kwila mwenimu kwakoleshaña mpanda yetu nawa twekalaña nayuma yayiwahi yitwatela kwanuka. Tata walombolaña Kudifukula kwaChisaka mafuku ejima. Chumichi chatukoleshaña muloña tata washa muchima hakudifukula kwachisaka nawa chankwashaña ninami kushaku muchima. Chankwashañaku cheñi kumulemesha tata yami nami diyi mutu watulombolaña muyuma yakuspiritu.” Muhela wakansi wejina daBrittney wahosheli nindi: “Kudifukula kwachisaka kwanleñela kudikunda nawanvwali jami. Chumichi chankwashaña kwiluka nami akeñaña kwiluka kukala kunukweti nawa añakamenaña nankashi. Kudifukula kwachisaka kwaleñela chisaka chetu kwikala chakola nawa chanuñañana.” Mwamweni, kudyisha anyanenu yuma yakuspiritu kuhitila mukudifukula kwachisaka diyi njila yalema yimwatela kwikalilamu atubiña amawahi. *

13. Munateli kumusañumuna ñahi mwanenu kwikala nampwila yakumuzatila Yehova?

¹³ Kabiña wamuwahi wazatishaña mbwechi hakulombola nikukiña yimuna yindi. Hanyidimu yindi yalema hekala nikulombola nyikoku yindi “kuwudiilu wawuwahi.” (Ezek. 34:13, 14) Enu anvwali, komana himwekala namudimu wowumu walema wakuspirituku? Mwafwilaña kuyilombola anyanenu kulonda amuzatilaña Yehova. Mwakeñaña anyanenu atiyeña neyi chatiyiliyi ñimbi yamasamu wasonekeli nindi: “Natiyi kuwaha nakwila muchima weyi, eyi Nzambi yami, mwalala, nshimbi jeyi jidi mukachi kamuchima wami.” (Mas. 40:8) Neyi anyanenu atiyaña muniyi njila akudihana kudi Yehova nawa akupapatishewa. Hela chochu, atela kwila mwenimu neyi anakuli dehi chakwila akufuukulahu nikwikala nampwila yalala yakumuzatila Yehova.

14, 15. (a) Mudimwinyi wukwetiyi nvwali mukwaKristu wudi wejima? (b) Indi kampululu hela nsanda nateli kutachika ñahi kujinoka kudifukula kwalala?

¹⁴ Munateli kwiladi, neyi chakwila anyanenu anakuyilaku hambidi wanyi, hadaha anakujinoka niyuma yakuhwelelawu? Zatenu nañovu hakuyikwasha anyanenu kulonda amukeñi Yehova Nzambi nikuhameka hayuma yejima yakoñayi. (Chim. 4:11) Nkumininaku, neyi anatweshi kufuukulahu aweni anateli kutachika kudifukula kudi Nzambi.

¹⁵ Chumanyi chimwatela kwila neyi chakwila anyanenu anakujinoka chayinu mpinji? Munateli kuyibiña nikuyikwasha ñahi kulonda eluki nawu kumuzatila Yehova dichi chuma chachiwahi muchihandilu nawa kwaletaña muzañalu  wahaya nyaka? Esekenu kwiluka chuma chinakukojeja ajinokeña. Chakutalilahu, komana chalala mwanenu weyala wakaanaña yuma yatañishaña Bayibolu, tahindi wudana wulobu wakuhakwilaku yuma yakuhwelelayi hakachi kawakwawu? Komana chalala mwanenu wamumbanda wajinokaña neyi chakwila nshimbi jaNzambi jaloña, indi kwiji watiyaña wuudi hohu hela kumona nindi kwosi wamwakamenaña?

16, 17. Anvwali anateli kukwasha ñahi anyanawu kwikala nawulunda naYehova awenawu?

¹⁶ Hichikweti muloña nakukala kukwetiyuku, munateli kumukwasha mwanenu kulonda yaleki kujinoka nsañu yalala. Mukumukwasha ñahi? Njila yimu yakwasha anvwali amavulu nawa yazatikaña chiwahi yekala yakwiluka yuma yidi mumuchima wamwana weyala hela wamumbanda kuhitila mukumwihula nawu: “Watiyaña ñahi hakwikala mukwaKristu? Indochi eyi, yumanyi yayiwahi yekalamu yiwamonaña? Yumanyi yiwukudibonda neyi wumuzatilaña Yehova? Komana yuma yiwunateli kudibonda hakumuzatila Nzambi yabadika kuwaha nkisu yayivulu yitwadiluñishaña makonu niyatushiikawu kumbidi? Munjilanyi?” Kafwampi mwatela kwihula awa malwihu mumazu enu, munjila yayiwahi nawa bayi mwihula neyi nsompeshuku. Hampinji yimunakuhanjeka, munateli kuhanjika hamukanda waMaku 10:29, 30. Atwansi amakwawu anateli kusoneka yuma yinakutoñojokawu hachipapilu, kabadika kamu asonekañaku yuma yadibondañawu, kukabadi kekwawu nkisu yafumañamu. Neyi mumona yumiyi chinateli kuyikwasha enu anvwali nianyanenu kwiluka kukala kukwetuwu nawa mukuwana njila yakumanishilamu. Neyi twatela kudiza mukanda waChatañisha Bayibolu nimukanda ‘waKukeña kwaNzambi’ nawantu akweti mpwila yakudiza, kwila tuyidizisha anyanetu nehi? Komana mwelaña mwenimu?

¹⁷ Mukuhita kwampinji anyanenu anateli kutondahu awenawu muntu atela kuzatilawu. Bayi mutoñojoka nenu anyanenu anateli kukuhwelela yuma yimwakuhwelela chakadi kuyidizishaku. Anyanenu atela kwikala nawulunda naYehova awenawu. (Yish. 3:1, 2) Neyi mwanenu wudi nakukala kwakwila mwenimu, kwila mutachika kumudizisha cheñi yuma yapela nehi? Mukwashenu kutoñojoka hamalwihu adiyi neyi awa: “Neluka ñahi nami Nzambi wekala kwoku? Chumanyi chanleñela kukuhwelela chikupu nami chalala Yehova Nzambi wanlemesha? Chumanyi chanleñela kukuhwelela nami chalala nshimbi jaYehova janheteshaña?” Ikalenu atubiña amawahi kuhitila mukulombola mwanenu hela anyanenu mumesu awunda kulonda eluki nawu kwosi chuma chalema kubadika kudifukula kudi Yehova.—Rom. 12:2.

18. Indi anvwali anateli kumwimbujola ñahi Yehova Kabiña Muneni?

¹⁸ AkwaKristu ejima akeñaña kwikala akwakumwimbujola Kabiña Muneni. (Efwes. 5:1; 1 Pet. 2:25) Sweje-e anvwali atela kwiluka chachiwahi mwekalila yimuna yawu, dikwila nawu anyanawu alemeshawu nawa atela kuzata nañovu kulonda ayilomboli kunkisu jayihembelayi Yehova. Dichi zatenu nañovu kulonda mubiñeña anyanenu nakutwalekahu kuyikulishila muchalala.