1. Akulumpi aKristendomu elilidi hampinji yanjita?

 KOMANA Nzambi wakeñaña nindi akwaKristu alala alweña njita nakujaha antu akumatuña acheñi? Hayaaka 100 yinahituhu, antu amavulu aditenaña nawu akwaKristu anajahi antu munjita. Atupristu amuKatolika awamashidika akiswilaña amashidika niyitwa yawu neyi anakulwa njita nawaKatolika amwituña dacheñi. Dichi chuma chelañawu niatupristu awaProtestanti awamashidika. Adijahili chikupu muNjita Yakaayi Yamuchiyedi.

2, 3. Chumanyi cheliluwu aYinsahu jaYehova hampinji yaNjita Yakaayi Yamuchiyedi niyaaka yalondeleluhu, nawa muloñadi?

² Indi aYinsahu jaYehova elilidi hayina mpinji yanjita? Nsañu yanyaka yasonekawu yamwekeshaña nawu atwalekeluhu kubula kudiñija munsañu yamatuña nachiyuulu. Chumanyi chabulililuwu kudiñija munsañu yamuchidiwu? Muloña alondeleli chakutalilahu nintañishilu yaYesu. Wahosheli nindi: “Neyi mukukeñañana, dihu hakayilukilawu antu ejima nawu mudi atumbanji twami.” (Yow. 13:35) Alemesheli cheñi nsañu yayisonekeleliyi kapostolu Pawulu akwaKristu amuKorinda.—Tañenu 2 Akorinda 10:3, 4.

 ³ Dichi, akwaKristu alala afumba yinleji yawu naBayibolu, hiyadizaña chakulwa njita hela kudiñija munsañu yamajitaku. Muloña wakubula kudiñija munsañu yamajita, aYinsahu amavulu, atwansi niakulumpi, amayala niambanda ayikabishaña. Amavulu ayikabishaña muyilombu nimutuleya mwayikakejañawu kuzata. Amavulu ayijahili muchiyuulu chawaNazi muGermany. Hela chakwila ayikabishili chikupu muEurope, aYinsahu hiyalalameneni mudimu wawu wakushimwina nsañu yayiwahi yaWanta waYehovaku. Ashimwinini nakashinshi, mutuleya, muyilombu yakuyandishila nimumatuña acheñi mwayitwalileñawu. * Chimwahitili yaaka, aYinsahu adiñijili wanyi munjita yakujaha antu edimi dacheñi yadiñaku muRwanda mu 1994. Adiñijili cheñi wanyi munsañu yamatuña nachiyuulu chadijahileñawu hampinji yambukileña ituña dateneneñawu nawu Yugoslavia.

4. Chumanyi chelawu antu amonaña aYinsahu jaYehova muloña wakubula kudiñija munsañu yamatuña nachiyuulu?

⁴ Muloña wakwila aYinsahu jaYehova hiyadiñijaña hela chantesha munsañu yamatuña nachiyuuluku, antu amavulu mukaayi eluka chikupu nawu aYinsahu amukeña Nzambi chikupu niakwawu antu. Dikwila nawu hiyakwaKristu alala. Kwekala cheñi yuma yikwawu yitwelaña mukudifukula kwetu yaleñela antu amavulu kukuhwelela chikupu nawu aYinsahu jaYehova hiyakwaKristu alala.

5. Indi atumbanji aKristu akusambila amweni kuhimpikanyi?

⁵ Yesu washimwini kulema kwakushimwina nsañu yayiwahi yaWanta waNzambi hampinji yatachikiliyi mudimu windi. Watondeli atumbanji 12 kulonda amukwashi mudimu wakushimwina iseki dejima; kuhiñahu wadizishili atumbanji amakwawu 70. (Luka 6:13; 10:1) Awa atumbanji ayidizishili kulonda ashimwini nsañu yayiwahi kudi antu acheñi, nawa ateleleli kusambila kutañisha aYudeya. Kuhiñahu, amweni chuma chekomwesha! Atumbanji aYesu ayilejeli kushimwina kudi akwamatuña abula kwalama. Atumbanji adiña aYudeya ahimpili chikupu hakushimwina kudi akwamatuña.—Yil. 1:8.

6. Chumanyi chaleñeleli Petulu yeluki nindi Yehova hakweti chaambuku?

⁶ Kapostolu Petulu amutemesheli kwitala daKonelisu, kaJentili wabulili kwalama. Dichi Petulu welukili nindi Nzambi hakweti chaambuku. Konelisu niamwitala dindi apapatisheweli. Chipompelu chawakwaKristu chatandili kumaluña amaha; antu amunyunza yejima atachikili kutiya nsañu yayiwahi yalala nakuyitambwila. (Yil. 10:9-48) Atachikili kushimwina iseki dejima.

7, 8. Kuloñesha kwaYehova kunakuzata mudimwinyi? (Talenu mwevulu wakutachikilahu.)

⁷ Makonu, antu alombolaña mudimu mukuloñesha kwaYehova anakudikita chikupu hakuloñesha mudimu wakushimwina nikutañisha nsañu yayiwahi mukaayi kejima. Chayinu mpinji, aYinsahu adikita akushika kwakwihi na 8,000,000 anakuzata chikupu hakushimwina nsañu yaKristu mumadimi akubadika 600, nawa madimi achidi kuvulilaku. A Yinsahu jaYehova ayilukila kumudimu wawu wakushimwina kwitala nikwitala, munyikwakwa nawa mpinji yikwawu azatishaña jimesa nijingolofwana hakusha nyikanda.

⁸ Akwakubalumuna akubadika ha 2,900 ayidizisha chiwahi kulonda abalumuneña Bayibolu ninyikanda yashindamena haBayibolu. Hiyabalumunaña hohu mumadimi amonañawu antu nawu madimi amanenuku. Azataña nañovu hakubalumuna nimumadimi amavulu abula kuya mpuhu ilaña ayihoshaña kudi antu  amavulu. Chakutalilahu, muSpain antu amavulu amuCatalonia ahoshaña idimi dawu daCatalan mafuku ejima. Muyaaka yamakonu, antu anatachiki cheñi kuhosha idimi daCatalan nimunyisumba yashiyashana yidi neyi muAndorra, muAlicante, Yitutu yaBalearic, nimuValencia. A Yinsahu jaYehova asonekaña nyikanda yashindamena haBayibolu mwidimi daCatalan nawa alombolaña kupompa kwawakwaKristu mwidimi dashikaña hanyichima yawantu akuCatalonia.

9, 10. Chumanyi chamwekeshaña nawu kuloñesha kwaNzambi kwakeñaña antu ejima amwiluki Nzambi?

⁹ Mudimu wakubalumuna nikutañisha antu mumadimi awu anakuwuzata mukaayi kejima. Hela chakwila muMexico ahoshaña Spanish, ilaña mwekala antu amavulu ahoshaña madimi amakwawu. Idimi daMaya dekala hakachi kanawa madimi. Kasanji kamutayi kakuMexico katemesha izanvu dawakwakubalumuna idimi daMaya kwiluña kwekala antu ahoshaña idi idimi mafuku ejima. Nepali hidimi dikwawu dahoshañawu mwituña daNepal, mwekala antu akubadika ha 29,000,000. Munidi ituña ahoshañamu madimi 120, ilaña antu akubadika 10,000,000 ahoshaña idimi daNepali nawa amavulu ahoshaña idi idimi neyi idimi dawu damuchiyedi. Nyikanda yetu yashindamena haBayibolu anakuyibalumuna mwidimi daNepali.

¹⁰ Kuloñesha kwaYehova kwalemesha chikupu mudimu wakushimwina nsañu yayiwahi yaWanta mukaayi kejima neyi chinakumwekeshawu namudimu wazataña mazanvu awakwakubalumuna mukaayi kejima. Matilakiti amavulu chikupu, mabuloshuwa nimagazini ayihanaña kudi antu mujikampeni mukaayi kejima chakadi kuyifwetesha. A Yinsahu jaYehova ahanaña yawana yakudikeñela hakukwasha iwu mudimu, muloña alondelaña nshimbi yaYesu yakwila nawu: “Kutambula, munatambuli chamukunkulu; kuhana, kahanenu nawa chamukunkulu.”—Mat. 10:8.

11, 12. Indi mudimu wakushimwina mukaayi kejima wazatañawu aYinsahu jaYehova wunakwashi ñahi amavulu?

¹¹ Hakwikala akwaKristu asha muchima hakushimwina nikutañisha, aYinsahu jaYehova akuhwelela chikupu nawu akweti chalala nawa adihanaña chikupu hakwila nawu ashimwini iyi nsañu kudi antu akunyunza niakumadimi acheñi. A Yinsahu amavulu apelesha chihandilu chawu, adiza idimi nichisemwa chacheñi kulonda azatuku iwu mudimu walema wawakwaKristu. Iwu mudimu wakushimwina nikutañisha antu wunakuzatawu  mukaayi kejima hichuma chikwawu chaleñela antu amavulu kukuhwelela chikupu nawu aYinsahu jaYehova hiyatumbanji aKristu Yesu alala.

¹² A Yinsahu azataña nyidimu yejimiyi muloña akuhwelela chikupu nawu akweti chalala. Chumanyi chikwawu chaleñela antu amavulu kukuhwelela chikupu nawu aYinsahu jaYehova akweti chalala?—Tañenu Aroma 14:17, 18.

13. Indi aYinsahu ahembeña ñahi kuloñesha kwaNzambi nawunyonji?

¹³ Tunateli kuhetela muyuma yahoshawu akwaKristu adihana amakonu akuhwelela chikupu nawu akweti chalala. Kambuña Yehova wumu wunashimbuli muchalala wahosheli nindi, “Azataña nañovu kulonda kuloñesha kwaYehova kwikali kwawunyonji kuspiritu, hichikweti muloña namuntu anakufumbawu hela anakubabeshawuku.” Twatweshaña ñahi kwikala nawunyonji wamuchidiwu? Twelaña mwenimu kuhitila mukwovwahila nshimbi jekala Mwizu daNzambi nikwimbujola chakutalilahu chaYesu nichawatumbanji twindi. Makonu, hakachi kawaYinsahu jaYehova, antu antesha hohu diwu abulaña kwovwahila nshimbi jaNzambi nawa ayihañaña muchipompelu. Antu amavulu chikupu, kushilahu niantu adiñi nakwila yuma yahelayi Nzambi ahimpa chihandilu chawu nawa amwovwahila Nzambi.—Tañenu 1 Akorinda 6:9-11.

14. Chumanyi chelawu antu amavulu ahañawu muchipompelu, nawa chumanyi chafumañamu?

¹⁴ Chumanyi chelañawu antu ahañañawu muchipompelu muloña wakubula kwovwahila nshimbi yamuBayibolu? Antu amavulu abalumukaña munyichima ayifuntishaña cheñi muchipompelu. (Tañenu 2 Akorinda 2:6-8.) Kwovwahila nshimbi jamuBayibolu jajiwahi kwaleñelaña chipompelu chawakwaKristu kwikala chawunyonji nawa tunateli kukuhwelela netu hichipompelu chikweti wuselewa waNzambi. Muloña wakwila aYinsahu jaYehova ovwahilaña nshimbi jaNzambi nawa ambukaku namachechi amavulu etejaña antu jawu kwila yuma yatama, chumichi chaleñela antu amavulu kukuhwelela chikupu nawu aYinsahu akweti chalala.

15. Chumanyi chaleñela mana kwetu wumu kukuhwelela chikupu nindi wukweti chalala?

¹⁵ Muloñadi aYinsahu anashimbuli muchipompelu chakuhwelelawu nawu akweti chalala? Mana kwetu wumu wukweti yaaka 54 yakuvwalika washimwini nindi: “Kufuma tuhu kuwansi wami nakuhweleleli nami chikuhwelelu chami chashindamena hayikuma yisatu yalema: (1) nami Nzambi wekala kwoku; (2) wonena Bayibolu; nawa (3) wazatishaña nikukiswila chipompelu chawakwaKristu chawaYinsahu jaYehova makonu. Hayaaka yayivulu yinnadizi, mpinji yejima nafwilaña kweseka iyi yikuma nawa nadihulaña ami aweni neyi chakwila yashindamena hachalala. Wunsahu waniyi yikuma wakolelañaku chaaka nichaaka nawa chumichi chakoleshaña chikuhwelelu chami chikupu nami, tukweti chalala.”

16. Muloñadi muhela wumu chakuhwelelayi chikupu nindi wukweti chalala?

 ¹⁶ Muhela wasumbuka wakalakelaña hakasanji keneni kamukaayi kejima muNew York, wahosheli hakuloñesha kwaYehova nindi: “Iku kuloñesha diku hohu kwashimwinaña ijina daYehova chakadi kujinoka. Awa mazu ekala alala neyi twanuka netu ijina daNzambi damwekanaña kwakwihi namapampa 7,000 muBayibolu. Nalemesha mazu akukolesha ekala ha 2 Kushindulula 16:9 ahosha nawu: ‘Mesu aYehova adi nakutalatala mwahita iseki dejima, kulonda akwashuku nañovu adi nanyichima yalala, yindi chikupu.’” Watwalekeluhu nindi: “Chalala chankwasha kwiluka chakwikala namuchima walala kulonda Yehova yankwashi nañovu yindi. Wubwambu wami naYehova dichi chuma chinalemesha hama. Nawa nalemesha mudimu wazatañayi Yesu hakutudizisha nsañu yaNzambi yankwashaña.”

17. Chumanyi chakuhweleleliyi muntu wakaanineña nindi hikwekala Nzambuku, nawa muloñadi?

¹⁷ Muntu wadiña nakukaana nindi hikwekala Nzambuku wetejeli nindi: “Yileñaleña yankwasha kukuhwelela nami Nzambi wakeñaña nindi antu adiluñisheña, dichi hamba keteja makabi kutwalekahu haya nyakaku. Hela chakwila antu mukaayi anakusweja kumusekesha Nzambi, ilaña antu jaYehova anakutwalekahu kwikala nachikuhwelelu, iyena nikukeña. Spiritu yaYehova hohu diyi yinateli kukoña yuma yamuchidiwu makonu.”—Tañenu 1 Petulu 4:1-4.

18. Munatiyi ñahi nsañu yashimunawu amana kwetu amakwawu ayedi?

¹⁸ Chinsahu mukwawu wunashimbuli muchalala washimwini yuma yamuleñela yakuhweleli nsañu yalala yitwashimwinaña nindi: “Yuma yinnadizi hayaaka yayivulu yanleñela kukuhwelela chikupu nami aYinsahu azata nañovu hakulondela chakutalilahu chawakwaKristu akushankulu. Nadimweni ami aweni kunuñañana kwekala hakachi kawaYinsahu jaYehova kumaluña kwejima kunayaña mukanu kaayi. Chalala chamuBayibolu chanleñela kwikala namuzañalu.” Mana kwetu wudi nayaaka yakubadika 60 yakuvwalika chamwihwiluwu nawu yashimuni chuma chamuleñela kukuhwelela chikupu nindi wukweti chalala, washimwini hadi Yesu Kristu nakulumbulula nindi: “Twadiza nakanañachima chihandilu nimudimu waYesu nawa twalemesha chakutalilahu chindi. Twahimpa chihandilu chetu kulonda tukundami kwakwihi naNzambi kuhitila mudi Kristu Yesu. Tweteja chikupu netu wamwinu wetu washindamena hamulambu wefutu danyiloña daKristu. Nawa tweluka netu amusañwili mudi afu. Tukweti wunsahu wawayinsahu alala amweni namesu ashimwini iyi nsañu.”—Tañenu 1 Akorinda 15:3-8.

19, 20. (a) Mudimwinyi wakonkomweneniyi Pawulu kuchipompelu chakuRoma? (b) Chineli twekala akwaKristu adihana, tukweti kukoolekanyi?

¹⁹ Hakwikala akwaKristu akeña atuñi netu, hitwatela kuhemba iyi nsañu yalala yalemaku. Pawulu wayilejeli amana kwindi amuchipompelu chamuRoma nindi: ‘Neyi wukwiteja nakanwa keyi neyi Yesu diyi Mwanta, nakukuhwelela mumuchima weyi neyi Nzambi wamusañwili mudi afu, eyi wukuhanda. Muloña namuchima muntu wakuhwelelaña nakutambula kuloña; nakanwa wetejaña nakumona kuhanda.’—Rom. 10:9, 10.

²⁰ Chineli twekala aYinsahu jaYehova adihana, twakuhwelela chikupu netu tukweti chalala nawa tweluka netu tukweti kukooleka kwakudizisha antu amakwawu nsañu yayiwahi yaWanta waNzambi. Dichi, chitukuzataña mudimu wetu wakushimwina, chikuwaha neyi antu amakwawu akwiluka nawu twakuhwelela chikupu netu tukweti chalala kubadika kuyitañisha hohu nsañu yamuBayibolu.