1, 2. Indi Adama naEvu adiñi nachihandilu chamuchidinyi hayileñeluwu nawa malwihwinyi itwatela kwihula?

 HAMPINJI yayileñeluwu, Adama naEvu hiyadiña nachilumbu hela wumuku. Adiñi antu awanina ashakamineña muParadisa. Adiñi adikunda naNleñi yawu neyi mwanindi weyala niwamumbanda. (Kutach. 2:7-9; Luka 3:38) Mudimu wayinkeliyi Nzambi wamwekesheli chadi kuhandañawu kwaya mbidi. (Tañenu Kutachika 1:28.) Mwadi kuhita mpinji hakwila ‘awanini heseki nikudovwahisha.’ Ilaña hakwila ‘ekali anyanta ayuma yayumi yejima yendaña hamaseki,’ Adama naEvu ateleleli kuhanda haya nyaka, nawa kufwa hikwadi kumukañesha Adama kwikala mwantaku.

² Muloñadi yuma chiyahimpikila makonu? Muloñadi antu chekalilawu nawayilumbu amavulu, chidi neyi kufwa chilumbu wabadika? Chumanyi chikelayi Nzambi hakunoñesha awa ayilumbu? Tunateli kuwana ñakwilu yanawa malwihu nimalwihu amakwawu muBayibolu. Tushinshikenu mavasi alema ahosha haniyi nsañu.

3, 4. (a) Nzambi wayinkeli Adama naEvu lushimbinyi? (b) Indi kwovwahila ilu lushimbi kwadiña kwalema ñahi?

³ Hela chakwila ayileñeli nawu ashakameña haya nyaka, Adama naEvu hiyadiñi nawumi wabulaña kufwaku. Hakwila atwalekuhu kwikala amomi, ateleleli kwona, kunwa menji, kukama nikudya. Ilaña chuma chaswejeli kulema hikwikala nawulunda naNzambi, Mukwakuhana Wumi. (Kuhit. 8:3) Ateleleli kwovwahila wunlomboli waNzambi hakwila nawu atwalekuhu kudiluñisha wumi wahaya nyaka. Yehova wamulejeli Adama chumichi hatooka henohu Evu kanda amuleñi. Munjilanyi? “Yehova Nzambi wamulejeli muntu, nindi, Nyitondu yamwitempa yejima wukudya tuhu; ilaña mutondu wakwiluka nachu niyayiwahi niyatama eyi bayi wakawidyaku; muloña ifuku diwakadya chalala wakafwa.”—Kutach. 2:16, 17.

⁴ “Mutondu wakwiluka nachu niyayiwahi niyatama” wamwekesheleña nawu Nzambi wadiña nawuswa wakufuukula yuma yatama niyayiwahi. Kafwampi, Adama wadiña weluka dehi yuma yayiwahi niyatama muloña amuleñeli neyi chekalayi Nzambi nawa wadiña nachinleji. Wuna mutondu wayanukishileña Adama naEvu nawu Yehova diyi wateleleli kuyilombola mpinji yejima. Chadiiluwu iwu mutondu amwekesheli hatooka to-o nawu hiyakeñeleña kuyilombola kudi Nzambuku, chumichi chayileteleli kukala kweneni hamu nawanyanawu avwaliluwu. Atachikili kufwa neyi chashimwiniyi Nzambi mulushimbi lwayinkeliyi.

5. Indi Adama naEvu adikañili ñahi naYehova?

⁵ Chamuleñeluwu Evu, Adama wamulejeli nshimbi yaNzambi. Evu wayilukili chiwahi muloña wahosheli mazu ejima neyi chochu chamulejeluwu. (Kutach. 3:1-3) Wamulejeli muntu wadifwikijili neyi kapela, chileñaleña wababala. Mwana kaNzambi wumu wakuspiritu Satana Diyabolu diyi wahosheleli mudi kapela muloña wafwilileña kudimena nikwikala nañovu. (Esekejenu Yakoba 1:14, 15.) Hakwila yatweshi kwila chuma chatama chafwilileñayi, kapela wahosheli nindi Nzambi watwambili. Wamulejeli chikupu Evu nindi neyi adikaña naNzambi hiyakafwaku, ilaña adi kwikala neyi Nzambi. (Kutach. 3:4, 5) Evu wamukuhweleleli, nawa chadyiliyi kumukabu wamwekesheli chikupu nindi wakeñeleña kudimena nawa wamukakejeli Adama kulonda niyena yadyi. (Kutach. 3:6, 17) Diyabolu watwambili. (Tañenu 1 Timotewu 2:14.) Hela chochu, Adama ‘watiyilili mwizu dañodindi.’ Hela chakwila kapela wamwekeni neyi hibwambu, Satana Diyabolu wadiña chilumbu wakadi luwi welukili nindi mwakafuma yuma yatama munsañu yamulejeliyi Evu.

6, 7. Indi Yehova wayisompesheli ñahi ayiluwañimbi?

⁶ Adama naEvu afuukwiluhu aweni kudikaña naNzambi wayinkeli wumi niyuma yejima. Kafwampi, Yehova welukili yuma yejima yamwekeni. (1 Kushi. 28:9; tañenu Yishimu 15:3.) Wayitejeli Adama, Evu niSatana amwekeshi chamumweneñawu. Chineli diyi wadiña Tata yawu, Yehova watiyili kutama hama. (Esekejenu Kutachika 6:6.) Nkumininaku wayisompesheli nakuyileja yuma yatama yikamonawu yashimwiniyi mulushimbi lwayilejeliyi.

⁷ Nzambi wamulejeli Adama nindi: “Ifuku diwakadya [mutondu wakwiluka nachu niyayiwahi niyatama] chalala wakafwa.” Adama watela watoñojokeleña nindi idi “ifuku” dadiñi ifuku damaora 24. Hanyima yakufumpa nshimbi yaNzambi, Adama watela watoñojokeleña nindi Yehova  wukuyibabesha henohu itañwa kanda dihumi. Yehova wayiwanini eyala namumbanda ‘chawundili itañwa.’ (Kutach. 3:8) Wayisompesheli nakuwana wunsahu walala kwesekeja nachakwileñawu Adama naEvu. (Kutach. 3:9-13) Dichi waketwili muloña nakuyileja ayiluwañimbi nindi akafwa. (Kutach. 3:14-19) Neyi wayijahili hohenahana dikwila nawu nkeñelu yindi yayileñeleliyi Adama, Evu nianyanawu yadi kushikijewa wanyi. (Isa. 55:11) Hela chakwila wayilejeli nindi akafwa nawa atachikili kumona yuma yatama yenzaña hamuloña wanshidi, ilaña Nzambi wayitejeli Adama naEvu kuvwala anyana akahetela muyuma yikwawu Yaloñesheliyi. Dichi, kwesekeja nachamonañayi Nzambi yuma, Adama naEvu afwili hefuku davulumwinuwu, nawa afwili ‘hefuku’ dimu dayaaka 1,000.—2 Pet. 3:8.

8, 9. Chumanyi chamwenuwu anyana kaAdama hamuloña wanshidi? (Talenu mwevulu wakutachikilahu.)

⁸ Komana anyana kaAdama naEvu adi kumona kukala hanshidi yavulumwini anvwali jawu? Eña. Mukanda waAroma 5:12 walumbulula nawu: “Kudi iyala wumu nshidi yeñilili mumpata yamunu mwishina, ninshidi yaleteli kufwa; chochenochu nawa nikufwa kwashikeneni antu ejima, muloña wejima wawu avulumwini.” Abeli washinshika diyi wadiñi watachi kufwa. (Kutach. 4:8) Anyana kaAdama amakwawu ashinakajili nakufwa. Komana aswanini nshimbi nikufwa? Kapostolu Pawulu wakwili nindi: ‘Hamuloña wakujikwa kwamuntu wumu amavulu ekalili akwanshidi.’ (Rom. 5:19) Dichi nshidi nikufwa kutwaswanini kudi Adama kwekalili chilumbu watama wawantu, wakadi kutwesha kutemuka kudi antu. Hitunatweshi kulumbulula chikupu chichadiña hakwila anyana kaAdama aswani nshidi nikufwaku, ilaña aswanini yumiyi.

⁹ Dichi Bayibolu yahosha chiwahi hakutena nshidi nikufwa kutwaswana nawu ‘chifwiku chabuta nyunza yawantu yejima niihina datanjikawu hanyunza yejima.’ (Isa. 25:7) Idi ihina hela chifwiku chakuhisha nachu, chabuta antu ejima. Dichi walala wakwila nawu ‘antu ejima afwaña muloña waAdama.’ (1 Kor. 15:22) Lwihu lutunateli kwihula ludi neyi lwehwiliyi Pawulu nindi: “Wukuñamwina kumujimbiwu wakufwa, hinyi?” Kuduhu muntu wateleli kumwamwina Pawulu? *—Aroma 7:24.

10. (a) Mavasinyi amuBayibolu ashimunaña nawu Yehova wakanoñesha kufwa? (b) Indi awa mavasi atudizishañadi hadi Yehova niMwanindi?

¹⁰ Eña, Yehova watela kumwamwina Pawulu. Chafuminiyi hakutena “chifwiku,” Isaya wasonekeli nindi: “Naminyi dehi kufwa chahaya nyaka; Yehova wakakombola madilu mumesu awantu ejima, wakafumisha kusawuka kwawantu.” (Isa. 25:8) Kufwana tata yawantu wafumishaña yuma yaleñelaña anyanindi kukabakana nikukombwela madilu mumesu awu, Yehova watiyaña kuwaha kufumishahu kufwa. Wukweti muntu wakalakalañayi nindi. Hamukanda waAkorinda wamuchimu 15:22 twatañañahu nawu: “Chafwañawu antu ejima mudi Adama, dichi nawa antu ejima akayihandishila mudi Kristu.” Chochimu, chelili Pawulu yehuli nindi ‘Wukuñamwina hinyi?’ watwalekeluhu nindi: “Nasakilili Nzambi nami Yesu Kristu Mwanta wetu diyi natweshi.” (Rom. 7:25) Mwamweni, kukeña kwamuleñeleli  Yehova kuleña antu hikwamaninuku chelili Adama naEvu adikañi. Nimuntu wazatili hamu naYehova hakuleña eyala namumbanda atachi halekeli kukeña chikupu anyana kaAdama naEvuku. (Yish. 8:30, 31) Indi antu adi kuyamwina ñahi kunshidi nikufwa?

11. Chumanyi chaheniyi Yehova hakukwasha antu?

¹¹ Chelili Adama avulumuni, Yehova wamuhishili nindi wakafwa nawa antu ejima aswana nshidi nikubula kuwanina. (Rom. 5:12, 16) Twatañaña hamukanda waAroma 5:18 nawu: “Muloña wumu waleteli kuhisha kudi antu ejima.” Indi Yehova wadi kwila ñahi hakwila yafumishuhu iku kukala chakadi kufumpa nshimbi jindi jaloña? Twawanaña ñakwilu mumazu aYesu akwila nawu: ‘Mwana kamuntu wenjili nakuhana wumi windi wakukuula nachu antu amavulu.’ (Mat. 20:28) Mwana kaYehova watachi wakuspiritu washimwini hatooka to-o chineli wavwalikili hamaseki neyi muntu wawanina nindi waheni ifutu danyiloña. Indi idi ifutu danyiloña dikaleta ñahi wuñaji?—1 Tim. 2:5, 6.

12. Indi ifutu danyiloña desekana daletaña wuñaji hichumanyi?

¹² Chineli wadiña muntu wawanina, Yesu wadi kushakama haya nyaka hamaseki. Yehova wakeñeli nindi iseki dinzali nawanyana kaAdama awanina. Yesu waheni wumi windi neyi ifutu danyiloña muloña wamukeñili nankashi Tata yindi nianyana kaAdama. Eñañi, Yesu waheni wumi windi wawanina wesekana nawumi wajimbesheliyi Adama. Kufumahu Yehova wamwinkeli cheñi Mwanindi wumi neyi muntu wakuspiritu. (1 Pet. 3:18) Yehova wetejeli chiwahi mulambu waheniyi Yesu muntu wawanina neyi ifutu danyiloña hela wuseya wakulanda nachu anyana kaAdama nawa wayinkeli kuchiñeja kwawumi wajimbesheliyi Adama. Munjila yikwawu tunateli kuhosha netu Yesu wasinsili mudi Adama. Pawulu walumbulwili nindi: ‘Dichi anasoneki nawa nawu, Adama watachi wekalili muntu wawumi; Adama wakukuminina wekalili spiritu yahanaña wumi.’—1 Kor. 15:45.

13. Indi “Adama wakukuminina” wakeladi hadi afu?

¹³ “Adama wakukuminina” keña yayinki anyana kaAdama wumi wahaya nyaka. Anyana kaAdama amavulu akayisañula. Muloñadi? Muloña hakachi kawu hadi antu afwili dehi kushankulu. Atela kuyisañula kulonda akadiluñisheña wumi hamaseki.—Yow. 5:28, 29.

14. Indi antu akayisubula ñahi kuwuduñu wakubula kuwanina waswaninuwu kudi Adama?

¹⁴ Indi antu akayisubula ñahi kuwuduñu wakubula kuwanina? Yehova waloñesha Wanta wamwiwulu wayuulañawu kudi “Adama wakukuminina” nialunda nindi atondawu mukachi kawantu. (Tañenu Chimwekeshu 5:9, 10.) Antu akayuula naYesu mwiwulu eluka dehi chichatiyakanaña kwikala muntu wabula kuwanina. Hayaaka 1,000, Yesu niakwawu mwakayuulilawu akakwasha antu kwikala awanina.—Chim. 20:6.

15, 16. (a) Indi kufwa akakunoñesha mpinjinyi? (b) Kwesekeja na 1 Akorinda 15:28, indi Yesu wakela chumanyi?

¹⁵ Chikamana yaaka 1,000 yachiyuulu chaWanta, antu ovwahila akayikuula kudi ayilumbu ejima ayiyandishaña hamuloña wakudikaña kwaAdama. Bayibolu yahosha nawu: ‘Chafwañawu antu ejima mudi Adama, dichi nawa antu ejima akayihandishila mudi Kristu. Chiña muntu nachendu chindi, muntu nachendu chindi; Kristu diyi nyikabu yatachi, nkumininaku niantu ambala aKristu [akayuulayi nawu] hakenzayi. Henohu dihu hakenza kukumisha, hakalubulayi Kristu Wanta kudi Nzambi,  yowu Tata; hamba kela nanoñeshi dehi chiyuulu chejima, niwanta wejima, niñovu jejima. Chiña akayuula yuule-e, nichamba kadatayi ayilumbu jindi ejima. Chilumbu chakukuminina akanoñeshayi, yowu kufwa.’ (1 Kor. 15:22-26) Eñañi, kufwa kutwaswanini kudi Adama amba kakunoñesha. “Chifwiku” chabuta antu ejima amba kachifumishahu haya nyaka.—Isa. 25:7, 8.

¹⁶ Kapostolu Pawulu wakunkulwili mazu indi onenewa nindi: “Chakela yuma yejima yinamwovwahili dehi yena, henohu niyomweni Mwana nawa wakamwovwahila Mukwakwovwahisha yuma yejima; kulonda Nzambi akekali diyi hohu kanka windi chikupu, mwejima.” (1 Kor. 15:28) Nkeñelu yachiyuulu chaMwana yikashikijewa. Kuhiñahu, wukatiya kuwaha kulubula wanta windi kudi Yehova nawa wukahana chisaka chawantu awanina kudi Nzambi.

17. Chumanyi chakamwilawu Satana?

¹⁷ Indochu Satana, wasambilili kukojeja antu ayandeña akamwiladi? Mukanda waChimwekeshu 20:7-15 watulejaña ñakwilu. Hampinji yakayesekawu antu awanina kakukumishaku, Satana akamwiteja kuyidimba cheñi antu. Diyabolu niantu jindi akayijilumuna haya nyaka, iku ‘hikufwa kwamuchiyedi.’ (Chim. 21:8) Kufwa kwamuchiyedi akakunoñesha wanyi muloña antu akafwa mukufwa kwamuchiyedi hiyamba kahanda cheñuku. Hela chochu, bayi neyi “kufwa kwamuchiyedi” hichilumbu chawantu amukeña nawa amuzatilaña Nleñi yawuku.

18. Indi mudimu wamwinkeluwu Adama kudi Nzambi wakashikijewa ñahi?

¹⁸ Antu ejima akekala awanina nawa Yehova wakatiya kuwaha kuyinka wumi wahaya nyaka, hiyakekala nachilumbu wudi wejimaku. Mudimu wamwinkeluwu Adama amba kawuzata chakubula yena. Heseki hakenzala anyana kaAdama akatiya kuwaha kuhemba iseki nikwakamena yileñeleña yejima. Komana twatela kutwalekahu nakulemesha njila yayiwahi yinakuzatishayi Yehova hakunoñesha chilumbu chakukumishaku, kufwa.