FERNANDO * wakameneneni. Aeluda ayedi amwilili nawu anakukeña kuhosha nindi kumbadi. Hanyima yakuyendela kakavulu kudi nkoñi wañinza, aeluda amulumbulwilili yuma yatela kwilayi kulonda yashikuhu kuzata nyidimu yikwawu muchipompelu. Henohu kanda amwendeli kudi aeluda, Fernando wadiñi nakujinoka neyi chakwila akamutonda wueluda. Ichi dinu anafumi nakuyendela kudi nkoñi wañinza. Indi aeluda akumulejadi cheñi?

Fernando watiyililili eluda wumu chahosheleñayi nindi. Mana kwetu wahosheli mazu ekala ha 1 Timotewu 3:1 nakumuleja nindi aeluda amuchipompelu chawu anayileji nawu anamutondi wueluda. Fernando wahayamini nakwihula nindi, “Munahoshi nenudi?” Mana kwetu wahosheli cheñi mazu amulejeliyi, nawa Fernando wamwemweteli. Nkumininaku, chabidikiluwu muchipompelu nawu anamutondi wueluda, ejima atiyili kuwaha.

Komana chatama kufwila kukalakala nyidimu muchipompelu? Inehi. Kwesekeja namukanda wa 1 Timotewu 3:1, “muntu nakeñi mudimu [wawueluda] nakeñi mudimu wawuwahi.” Amayala akwaKristu amavulu azatishaña iku kufumba ayilañaku hambidi kuspiritu kulonda ashikuhu kukalakala nyidimu muchipompelu. Chumichi chaleñela antu jaNzambi kwikala nawaeluda niankoñi akuzatila ashikahu amavulu. Muloña wakwila yipompelu yinakuvulilaku, kunakukeñeka amana kwetu amavulu kushikahu. Atela kushikahu ñahi chiwahi? Komana antu anakukeña kwikala aeluda atela kutwalekahu kutoñojoka hampinji yakekalawu aeluda neyi chatoñojokeleñayi Fernando?

Nhoshelu yamuBayibolu yakwila nawu ‘kukeña kushikahu,’ ayibalumuna mwizu dachiGriki dalumbulula nawu kufwila chikupu, kwolola. Chumichi chinateli kuyileñela kutoñojoka hadi muntu wunakunanama kulonda yakumuni mukabu wawuwahi wudi kumutondu. Ilaña kushikahu hikwaya mukwila nawu muntu yekali nalwisu lwakukeña mudimu ‘wawueludaku.’ Muloñadi? Muloña chikonkwanyi chawantu akeñaña kukalakala neyi eluda chekala chakuzata “mudimu wawuwahi” kubadika kwikala nachifulu.

 Yuma yayivulu yakeñekaña hakuzata iwu mudimu wawuwahi ayishimuna ha 1 Timotewu 3:2-7 nihaTitusa 1:5-9. Hakuhosha haniji nshimbi jalema, eluda wejina daRaymond wunakalakali hayaaka yayivulu wahosheli nindi: “Chuma chalema kudi ami, hikuzata mudimu. Kwikala nawuswa wakuhana mpanji nikudizisha hiyuma yalema, ilaña hiyatela kuhambakana yililu yidi neyi kashinshi, kudihemba, kuwundisha mumesu, kulumbuluka, kudiisha enyi nikwikala wawundaku.”

Mana kwetu wunakushikahu namuchima wumu wamwekeshaña nindi wukweti kashinshi neyi yatondolwela kwila yuma yawuzondu. Wawundisha mumesu, walumbuluka, nawa wekala wawunda, dichi akwawu akwakudifukula amukuhwelela nawu nateli kulombola nikuyikwasha nakukala kukwetuwu. Hamuloña wakwila wadishaña enyi, wayikoleshaña atwansi niantu amaha muchalala. Wayikundejaña nikukwasha antu akata niatushinakaji muloña wakwila wakeña yuma yayiwahi. Wekalaña naniyi yililu yakwashaña akwawu antu bayi neyi hamuloña wakwila nakukeña kwikala eludaku. *

Izanvu dawaeluda dinateli kufumba nikumukolesha muntu, ilaña muntu yomweni wunakushikahu diyi watela kuwanisha yuma yamuNsona yakeñekaña. Henry, eluda wakuluka yitembi wahosheli nindi: “Neyi wunakushikahu watela kuzata nañovu kulonda amakwawu amoni nawu wunashikuhu.” Hakuhosha hamukanda waMukwakutaŋisha 9:10, walumbulwili nindi: “‘Yuma yejima yinawani chikasa cheyi kwila, ilaku nañovu jeyi.’ Mudimu wejima wukukwinkawu aeluda wuzati nañovu jeyi. Keñaku nyidimu yejima yinakwinkuwu muchipompelu, kushilahu nikukomba. Mukuhita kwampinji, akamona mudimu wuwazataña nichiwadikitaña.” Neyi wunakukeña kuzata neyi eluda kumbidi, ikalaku nakashinshi muyuma yejima yamudimu wajila nawa wenda wudikita. Watela kwikala wadizoza muchihandilu cheyi, bayi wudinka wantaku.—Mat. 23:8-12.

Antu amakwawu akeñaña kuzata nyidimu muchipompelu anateli kwikala mukweseka kwakufwila kwikala eluda hela kufwila kuluwañesha izanvu dawaeluda.  Amakwawu atiyaña kutama neyi aeluda ayifumba. Antu amuchidiwu atela kudihula nawu, ‘Inakukeña kuya mpuhu tahindi nakeñaña kwakamena nyikoku yaYehova mukudizoza?’

Antu akeñaña kushikahu atela kwanuka cheñi chuma chikwawu chakeñekaña hakushika hawueluda, dikwila nawu “kwikala akutalilahu anyikoku.” (1 Pet. 5:1-3) Muntu wekala chakutalilahu muchipompelu watondolwelaña yitoñojoka niyililu yatama. Watwalekañahu kwikala wadiwunjika hela anamutondi chakatataka hela nehi. Bayi neyi muntu chekalayi eluda dikwila nawu nekali dehi wawaninaku. (Kuch. 12:3; Mas. 106:32, 33) Cheñi nawa, mana kwetu hanateli ‘kwilukahu chuma chidi chejima chakudinka nachu muloñaku,’ ilaña akwawu anateli kwiluka kukala kukwetiyi. (1 Kor. 4:4) Dichi, neyi aeluda anakufumbi chakufuma hamuchima kuzatisha Bayibolu, fwilaku kutiyilila chakubula kuhila. Kuhiñahu, zatilaku hayuma yinakufumbuwu.

Amana kwetu amavulu amonaña nawu ahembelelaña mpinji yayilehi hakwila ayitondi. Neyi chakwila hanahiti yaaka yayivulu kufuma hiwatachikili ‘kushikahu hawueluda,’ komana mpinji yikwawu wakamenaña? Neyi dimu, shinshikaku awa mazu onenawu akwila nawu: ‘Kuchiñeja kwakwila chiñeje-e kwaleteshaña muchima kukata, ilaña neyi yiwakeñaña yinenzi dehi chikwikala mutondu wawumi.’—Yish. 13:12.

Muntu nateli kukata kumuchima, neyi chikonkwanyi chinakufwilayi kushika swayi nehi. Abarahama niyena dichatiyiliyi. Yehova wamukanini nindi wakamwinka mwana, ilaña yena naSara ashakamini yaaka yayivulu chakubula kwikala namwana. (Kutach. 12:1-3, 7) Abarahama wadilili muwushinakaji windi nindi: “Eyi Mwanta Yehova, wukunyinkadi, ami nukwenda makasa, mwana hinikwetuku . . . Ami hiwunanyinki mwanaku.” Yehova wamulejeli chikupu nindi chikaninu Chindi chakumwinka mwana chikashikijewa. Ilaña hahitili yaaka kubadika 14 hakwila Nzambi yashikiji chikaninu chindi.—Kutach. 15:2-4; 16:16; 21:5.

Komana Abarahama walekeli kumuzatila Yehova namuzañalu hampinji yahembeleleñayi? Inehi. Wakuhweleli chikupu chikaninu chaNzambi. Watwalekeluhu kutalila chuma chachiwahi chamukaninuwu. Kapostolu Pawulu wasonekeli nindi: “Chadiwunjikiliyi [Abarahama] nakutatakena, hakutambula chikaninu.” (Heb. 6:15) Nkumininaku, Nzambi Wañovu yejima wamukiswilili ona muntu washinshika kubadika yuma yachiñejeleñayi. Wunateli kudizilaku kwodi kudi Abarahama?

Neyi wafwilaña kwikala eluda ilaña chumichi chinamwekani swayi wanyi hela chakwila munahiti yaaka yayivulu, twalekakuhu kumukuhwelela Yehova. Muzatileña Nzambi namuzañalu. Warren, wunakwashi amana kwetu amavulu kuyilaku hambidi kuspiritu, walumbulula nindi: “Hatelela kuhita mpinji chikupu hakwila mana kwetu yashikuhu chikupu hakumutonda. Chimwahita mpinji, mana kwetu wukumwekeshaña wuswa windi niyililu yindi chovu chovu nachadihembaña yomweni nichakamenañayi nyidimu yindi. Amakwawu atoñojokaña nawu anateli kutiya kuwaha hanyidimu yamuzatilañawu Yehova chiña hohu neyi ayitonda wueluda. Yitoñojoka  yamuchidiwu yatama nawa yinateli kumuleñela muntu kutoñojokaña hachumichi mpinji yejima. Neyi wumuzatilaña Yehova nakashinshi kwejima kuwudi nawa muyuma yejima yiwunakwila, wukuhetelamu chikupu.”

Mana kwetu wumu wahembeleleli hayaaka kubadika 10 hakwila nawu amutondi wueluda. Hakutena nsañu yelukewa chikupu, yasonekawu mumukanda waEzekeli kapetulu 1, washimwini chuma chadiziliyi nindi: “Yehova wendeshaña ikalu dindi, dikwila nawu kuloñesha kwindi, kwesekeja nachinatondiyi yomweni. Mpinji yaYehova dichi chuma chalema kubadika yetwetu. Munsañu yakukeña kukalakala neyi eluda, bayi neyi chuma chinafwilaña hela chinakeña kwikala dichi chuma chalemaku. Yuma yinafwilaña hadaha dichi chamonañayi Yehova wanyi.”

Neyi wafwilaña kuzata mudimu wawuwahi wakwikala nkoñi mukwaKristu, shikakuhu kulonda wuzateña namuzañalu muchipompelu. Neyi chakwila wunakumona neyi mpinji yinakuhita, zataku nañovu kulonda wubulaña kwakamena. Raymond, atenawu dehi wahosha nindi: “Kufunyikila chuma kwaleñelaña muntu kufwila chifulu. Antu aswejaña kwakamena hiyekalaña namuzañalu wafumaña mukumuzatila Yehovaku.” Ikalaku namukabu waspiritu yaNzambi, sweje-e chililu chakudiwunjika. Zataku nañovu kulonda wukoleshi wulunda weyi naNzambi kuhitila mukudiza Bayibolu. Zataña nañovu mumudimu wakushimwina nsañu yayiwahi nikudizisha antu akweti mpwila yakudiza Bayibolu. Lombolaña chisaka cheyi munyidimu yakuspiritu nihakudifukula kwachisaka. Watela kudiluñisha mpinji yejima yiwudi nawamana kweyi niaheleyi. Chiwunakuzata nañovu hakwila wushikiji chikonkwanyi cheyi, wukadiluñisha kumuzatila Yehova.

Kuzata nañovu hakwila nawu wushikuhu hakukalakala nyidimu yamuchipompelu, hikukoleka kwakufuma kudi Yehova; Yena nikuloñesha kwindi hiyakeñaña nawu wutiyeña kutama hakuzata mudimu winduku. Nzambi wakwashaña nikukiswila ejima amuzatilaña namuchima wumu. Eñañi, nkisu yindi yejima yaheteshaña nawa “habombelañaku kukalaku.”—Yish. 10:22.

Hela chakwila watachikili dehi kushikahu hayaaka, kwekala yuma yayivulu yiwatela kwila hakuwahisha wulunda weyi naYehova. Hampinji yiwunakufwila kwikala nayililu yakeñekaña, zataku nañovu muchipompelu chakadi kudiwula chisaka cheyi, Yehova hamba kavulamena yuma yejima yiwamukalakeleluku. Ikalaku namuzañalu chikupu mpinji yejima yiwunakumuzatila Yehova munyidimu yejima yinakwinkuwu.