KUFUMA mpinji yafuminuwu aChoong Keon naJulie adisumbula azatilileña wupayiniya wampinji yejima kuSydney muAustralia, hanahiti dehi yaaka yitanu. Choong Keon wahosheli nindi, “Twadiña namudimu wutwazatileña maora antesha nawa twadiña nachihandilu chachiwahi. Kwiluña kutwashakamineña kwadiña mpepela yayiwahi nawa chihandilu chadiña chachiwahi. Twatiyileña kuwaha kudikunda nachisaka chetu niamabwambu.” Hela chochu, chinleji chaChoong Keon naJulie chayikabishileña. Muloñadi? Elukili nawu ateleli kuzata nyidimu yayivulu mumudimu waYehova, ilaña adiña nakushintajala kuhimpa chihandilu chawu.

Kuhiñahu, atiyililili mpanji yayishikili chikupu hanyichima hakupompa kwankambi kwamu 2009. Nhoshi wahosheli hadi antu anateli kuzata chikupu mumudimu wawu wakushimwina. Wahosheli nindi: “Toñojokenu chumichi: Ñendeshi nateli kuteñulula motoka yindi nakubalumukila kuchimunswa hela kuchidiilu chiña neyi motoka yinakwenda. Munjila yoyimu, Yesu nateli kutulombola kuzata chikupu mumudimu wetu wakushimwina chiña neyi tushimwinaña, kuzata nañovu kulonda tushikiji chikonkwanyi chetu.” * Awa antu adisumbula amweni neyi nhoshi wadiña nakuyileja wena nkawawu. Hakupompa kwenakuna, ehujoleli amishonali adisumbula azatilileña kuTaiwan. Ahosheli nawu adiluñishileña mumudimu wakushimwina nawa ashimwini chikupu nawu kwakeñekeleña cheñi antu amakwawu akuzata. A Choong Keon naJulie atiyili cheñi neyi adiña nakuyileja awa mazu nkawawu.

Julie wahosheli nindi, “Hanyima yakuna kupompa twalombeli kudi Yehova kulonda yatwinki wulobu wakuya nakuzatila kuTaiwan.” Wahosheli cheñi nindi: “Ilaña twadiña nakwakamena. Twatiyili neyi kwiji tunakukeña kudumbila hejiya dakunama katachi.” Nsona yaMukwakutaŋisha 11:4 yayikwashili ‘kufuukulahu,’ yahosha nawu: “Washinshikaña mpepela hamba katumba mbutuku, watalaña mavu hamba kaañula  yakudya yinduku.” Choong Keon wahosheli nindi: “Twafuukwiluhu kuleka ‘kushinshika mpepela nikutala mavu’ nawa ‘twatachikili kutumba nikwaañula.’” Alombeli nankashi, atañili nsañu yayihandilu yawamishonali, adisonekeleleli nyikanda yayivulu mukapinji kantesha nawantu ayili dehi kuTaiwan, alandishili nyotoka yawu niyuma yamwitala nawa ayili kuTaiwan chimwahitili tukweji tusatu.

Amana kwetu niahela akubadika 100 afuma kumatuña acheñi anakukalakela kuTaiwan kumaluña kudi kukaankila kweneni kwawakwakushimwina aWanta. Afuma kuAustralia, Britain, Canada, France, Japan, Korea, Spain, nikuUnited States, nawa ashiyashana muyaaka, kutachikila ha 21 nakushika ku 73. Hakachi kawu hadi ahela ajiki akubadika ha 50. Chumanyi chayikwasha awa amana kwetu niahela adikita kutwalekahu kuzata mudimu wawu mwituña dacheñi? Twayenu tutali.

Laura, himuhela mujiki wafuma kuCanada, wakalakelaña wupayiniya kumujika waTaiwan. Hanahiti dehi yaaka ikumi kufuma hatachikiliyi kudiluñisha mumudimu wakushimwina, ilaña kunyima hatiyileña kuwaha kushimwinaku. Laura walumbulwili nindi, “Nayileña tuhu mumudimu wakushimwina ilaña hinawukeñeluku.” Kuhiñahu amabwambu jindi akuCanada amwilili nawu ayi nawu kuMexico nakushimwina kakweji kamu. “Diyi yadiña mpinji yatachi kuzata mpinji yeneni mumudimu wakushimwina nawa nadiluñishili chikupu.”

Chumichi chamusañumwini Laura kutoñojoka nsañu yakuya kuchipompelu chamuCanada chazatishaña idimi dakwituña dacheñi. Watachikili kudiza chiChinese, kupompa nezanvu dazatishileña chiChinese, nawa wemikili chikonkwanyi chakuya kuTaiwan, wayili muSeptember 2008. Laura wahosheli nindi, “Mwahitili chaaka hakwila ninjilili kushakama mwiluña dadiha, ilaña chayinu mpinji natoñojokaña wanyi jakufunta kuCanada.” Watiyaña ñahi hamudimu wakushimwina? Wahosheli nindi, “Ichi nadiluñishaña chikupu. Kwosi chuma chanzañaleshaña kubadika kumona atudizi aBayibolu anakuhimpa yihandilu yawu neyi hiyakumwiluka  Yehova. Kukalakela muTaiwan kwanleñelaña kwikala nakukooleka kwakutiya muzañalu wafumaña mukushimwina.”

Brian naMichelle adisumbula adi muyaaka yamuma 30 yakuvwalika akuUnited States, chayiluwu kuTaiwan kwakwihi nayaaka yitanu nasatu yinahituhu. Hakusambila amweneña nawu azatileña chikupu wanyi mumudimu wakushimwina. Ilaña kamishonali wakuluka yitembi wayilejeli nindi: “Hela chakwila mukuhana hohu tilakiti kudi muntu, mwatela kwanuka nenu hekwawu ona muntu nakutambula nsañu yaYehova katachi. Dikwila nawu munakuzata nañovu mumudimu wakushimwina.” Awa mazu akukolesha ayikwashili aBrian naMichelle kulonda atwalekuhu kuzata. Mana kwetu mukwawu wayilejeli nindi: “Hakwila mubuleña kuzeya, mwatela kushinshika hayuma yimunadizi muchiChinese hachaaka hachaaka, bayi hefuku hefukuku.” Eñañi, ayilaku hambidi nawa hiyapayiniya adikita makonu.

Chumanyi chinateli kukusañumuna kulonda wutachiki kudiza idimi dacheñi? Esekaku kwendela ituña diwunakukeña kuya nakuzatila. Chiwashika, yaku kukupompa, diluki nawamana kwetu niahela akwenoku nawa yaku nawu nakushimwina. Brian wahosheli nindi: “Chimweluka nenu antu amavulu anakutiyilila nsañu yaWanta, nikumona kukeña kwamwekeshañawu amana kwetu niahela, chikuyisañumuna kuya nakuzatila kwituña dacheñi.”

Antu amavulu aya nakuzatila kuTaiwan kudi kukaankila awanaña yuma yakudikwasha nachu kumujimba kuhitila mukutañisha English. Kristin naMichelle alandishaña inshi yamukaluñalwiji. Kristin nindi, “Nadiña kanda nileñahu dehi chumichi, ilaña iwu mudimu diwu wankwashaña kushakama mudinu ituña.” Mukuhita kwamafuku, Kristin wekalili nawantu alandileña inshi mpinji yejima. Iwu mudimu wazatañayi hamaora antesha wamukwashaña kuwana mali akudikwasha nachu nañodindi, dichi ekalaña nampinji yeneni yakuzata mudimu walemeshawu, mudimu wawupayiniya wakukwata antu neyi inshi.

Hanahiti dehi kwakwihi nayaaka yitanu nayiyedi kufuma hayiluwu kuTaiwan aWilliam naJennifer adisumbula akuUnited States. William wahosheli nindi, “Kudiza idimi, kukalakala neyi payiniya, kwakamena chipompelu nikuwana mali ashikila akukwasha nachu chisaka, hinyidimu yazeyeshaña mpinji yikwawu.” Chumanyi chinayikwashi kutwalekahu kuzata namuzañalu? Afwilaña kwimika yikonkwanyi yamweseka. Chakutalilahu, hiyaswejeli kukuhwelela yuma yahambakanaku hampinji yadizileñawu chiChinese, dichi hiyaswejeli kutiya kutama chabuliluwu kudizawu swayuku.

William wanukaña nindi nkoñi wendaña wamulejeli nindi, neyi wunemiki chikonkwanyi chakuspiritu, watela kudiluñisha yuma yiwunakwila yikukukwasha kushikija chikonkwanyi chenichi. William wahosheli nindi, nsañu yayifumbiluwu yayikwashili nañodindi kwikala adiloñesha kuhimpa, kutiyilila neyi anakuyifumba kudi aeluda amudina iluña, nikuhimpa njila yelilileñawu yuma kulonda atweshi kuzata chiwahi mumudimu wawu wakushimwina mwiluña dadiha. Wabombeleluhu nindi, “Chumichi chatukwashili kwiluka netu twatela kwikala nampinji yakudiluñisha yuma yayiwahi yahachitutu hitwazatilileña.”

Kufwana aWilliam naJennifer, Megan, muhela payiniya mujiki wakuUnited States, niyena ‘nakudiluñisha mudimu wazatañayi’ iku nakufwila kushikija chikonkwanyi chindi chakuhosha chiChinese chiwahi. Kunsa yanyilungu yejima Megan wayaña nezanvu dawapayiniya nakushimwina kuKaohsiung kuchikumu chakaluñalwiji, chikumu cheneni chakuñikilañawu maatu muTaiwan. Megan washimwinaña nsañu yayiwahi muwatu nimuwatu nikudi ayibinda anshi afumaña kuBangladesh, kuIndia, kuIndonesia, kuPhilippines, kuThailand nikuVanuatu. “Chineli ayibinda anshi ashimbulaña wanyi kuchikumu, twatachikaña kudiza nawu Bayibolu  hohenohu. Hakwila nitweshi kuyishimwina ejima, navula kudizisha antu awana hela atanu hampinji yimu.” Nadizi dehi chiChinese nakushika hadi? Wahosheli nindi, “Natoñaña nami kachi nadizili swayi, ilaña nanukaña chanlejeluwu kudi mana kwetu wumu nindi: ‘Zataku hakumina ñovu jeyi, nawa Yehova wukukukwasha.’”

Henohu kanda yayi kwituña dacheñi, Cathy wakuBritain, wakeñeli kwiluka ituña dacheñi dadiwahi datela kuzatila muhela mujiki. Wamulejeli Yehova mukulomba yuma yatoñojokeleñayi nawa wasonekeli nyikanda kutusanji twanyitayi nakwihula iluña dadiwahi kwatela kuya nakuzatila ahela ajiki. Hanyima yakushinshika nakanañachima hansañu yamwakwiluwu munyikanda yasonekeleñayi wafuukwiluhu kuya nakuzatila kuTaiwan.

Mu 2004 hadiñayi nayaaka 31, Cathy wayili kuTaiwan, kwapeleshayi chikupu chihandilu chindi. Washimuna nindi: “Nehwili amana kwetu niahela kulonda anleji kwiluña kunatela kulanda nyikabu nimafu apela wuseya. Nsañu yanfumbiluwu yankwashili kuhemba mali ami.” Chumanyi chamukwasha kwikala nachihandilu chapela? Cathy wahosheli nindi: “Navula kulomba kudi Yehova kulonda yankwashi kutiya kuwaha yakudya yapela wuseya yinadyaña niyakuvwala yapela wuseya yinavwalaña. Namonaña nami Yehova wakulaña kulomba kwami kuhitila mukundizisha kwiluka yuma yinakaankilaña nikunkwasha kulonda nitiyeña kuwaha hela hinukweti yuma yejima yinakeñañaku.” Cheñi nindi: “Natiyaña kuwaha kwikala nachihandilu chapela muloña chankwashaña kusha maana hawubwambu wami naYehova.”

Hela chochu, Cathy hekala hohu nachihandilu chapelaku ilaña wadiluñishaña. Walumbulwili chadiluñishilañayi nindi: “Nashimwinaña mumaluña mwekala antu atiyililaña nsañu yayiwahi. Chumichi chanzañaleshaña chikupu!” Chashikiliyi kuTaiwan, mwadiña yipompelu yiyedi yachiChinese mumusumba mwatachikililiyi kukalakela wupayiniya, ilaña makonu mudi yipompelu yitanu nayiyedi. Cathy wahosheli nindi: “Nazañalalaña chikupu hakumona namesu ami yipompelu chiyinakuvula nikuzataku mudimu wakumuna.”

Indi aChoong Keon naJulie, atenawu kumatachikilu anakuzata ñahi mudimu wawu chayinu mpinji? Choong Keon hakusambila watoñojokeleña nindi chineli welukili nankashi wanyi chiChinese hiyanateli kumuzatisha chikupu muchipompeluku. Ilaña amana kwetu munichi chipompelu dichi chatoñojokeleñawu wanyi. Choong Keon wahosheli nindi, “Chambwiluwu chipompelu chetu nakwikala yipompelu yiyedi, anyinkeleluhu nyidimu yikwawu yayivulu hamu neyi nkoñi wakuzatila. Hayina mpinji natoñojokeleña nami inakuzatila kudi kukaankila kweneni.” Wahosheli nakumwemweta nindi, “Chawahili chikupu muloña anami ankeñeleña.” Makonu wakalakalaña neyi eluda. Julie wabombeleluhu nindi: “Twatiyaña kuwaha nankashi muchihandilu chetu. Twenjili kunu nakukwasha mudimu wakushimwina, ilaña chuma chitwawana kunu chatukwasha. Twamusakililaña Yehova hakutwiteja kumukalakela kunu.”

Mumatuña amavulu muchidi kukaankila kwawakwakukalakala mumudimu wakumuna wakuspiritu. Komana keña wumanishi shikola yeyi yakumujimba nawa wunakutoñojoka chuma chiwatela kwila muchihandilu cheyi? Komana wuchidi mujiki nawa wunakukeña kudihana chikupu mukuloñesha kwaYehova? Wunakukeña chisaka cheyi chikali nayuma yayivulu yayiwahi yakanukañawu hakumukalakela Yehova? Komana waleka dehi kuzata mudimu wakumujimba nawa weluka yuma yayivulu yiwatela kukwasha akwenu? Ilukaku chikupu neyi Nzambi nateli kukukiswila nankashi neyi wutondahu kuzata chikupu mumudimu wakushimwina kuhitila mukuya nakuzatila kwiluña kudi kukaankila kweneni kwawakwakushimwina aWanta.