1. Indi Yehova watiyaña ñahi hamudimu, nawa chumichi chamuleñelaña kwiladi?

 YEHOVA himukwakukalakala wazañalalaña nayuma yelañayi. (Mas. 135:6; Yow. 5:17) Hakwila yakwashi antu niañelu kulonda azañalaleña nayuma yayiwahi yelañawu, Yehova wayinka mudimu wawuwahi wayizañaleshaña. Chakutalilahu, wazatishili Mwanindi mpinji Yaleñeleñayi yuma yejima. (Tañenu Akolosi 1:15, 16.) Bayibolu yashimuna nawu henohu kanda yenzi hamaseki, Yesu wadiña naNzambi mwiwulu ‘neyi mukwawukalawenu.’—Yish. 8:30.

2. Yumanyi yamwekeshaña nawu yileñaleña yakuspiritu yazataña mudimu walema nawa wawuwahi mpinji yejima?

² Kufuma tuhu kumatachikilu nakushika kumakumishilu, muBayibolu mwekala yakutalilahu yamwekeshaña nawu mpinji yejima Yehova wenkaña anyanindi akuspiritu nyidimu. Adama naEvu chavulumwinuwu, ayihañili mumukala wawu waParadisa, nawa ‘kwitempa daEdeni mbadi yadu yamusela [Nzambi] wemikiluku akerubi nimulañu wakesi wampoku yakabali wenda wubalumuka niniku niniku, kulonda ahembeña njila yamutondu wawumi.’ (Kutach. 3:24) Mukanda waChimwekeshu 22:6 washimunaña nawu Yehova ‘watemesheli kañelu kindi kulonda aleji ambuñindi yuma yikukeña kwinza swayi.’

3. Yesu wamwimbujoleli ñahi Tata yindi hampinji yadiñiyi hamaseki?

³ Chadiñayi heseki neyi muntu wawanina, Yesu wazatili namuzañalu mudimu wamwinkeluwu kudi Yehova. Yesu niyena wayinkeli atumbanji twindi mudimu walema muloña wamwimbujoleli Tata yindi. Hakwila yayisañumuni kwikala nampwila yakuzata mudimu wayinkeliyi, wayilejeli nindi: “Chalala chalala, nukuyileja nami, muntu wukunkuhwelela, nyidimu yinukukoña niyena wakayikoña; wakakoña niyakubadika iyi, nanichi chinukuya kudi Tata.” (Yow. 14:12) Hakwila yamwekeshi nindi iyi nyidimu atela kuyizata swayi-swayi, Yesu walumbulwili nindi: “Chiña tukalakalenu nyidimu yayena wantemesheli hikuchidi mwaana; wufuku keña winzi mwabulaña kukalakalawu nyidimu.”—Yow. 9:4.

4-6. (a) Chumanyi chatuleñelaña kusakilila muloña aNowa naMosi azatili nyidimu yayinkeluwu kudi Yehova? (b) Nyidimu yejima yayinkañawu antu kudi Nzambi yekala ñahi yadifwana?

⁴ Henohu Yesu kanda yenzi hamaseki, antu ayinkeli nyidimu yayiwahi yakuzata. Hela chakwila Adama naEvu akañenyi kuzata mudimu wayinkeluwu, antu amakwawu azatili neyi chochu chayilejeliyi Nzambi. (Kutach. 1:28) Nowa amulejeli nshimbi jateleleli kulondelayi hakutuña watu wakupulwishilamu antu haDibaji deneni. Wazatili chiwahi mudimu wamwinkeliyi Yehova. Anetu twekala kwoku muloña Nowa wovwahilili nshimbi jaYehova.—Kutach. 6:14-16, 22; 2 Pet. 2:5.

⁵ Mosi amulejeli nshimbi jateleleli kulondelayi hakutuña tabanaka nikupompesha atupristu nawa welili mwejima mwamulejeluwu. (Kwid. 39:32; 40:12-16) Nimakonu twahetelañamu muloña wakwila wazatili mudimu wamwinkeluwu nakashinshi. Munjilanyi? Kapostolu Pawulu walumbulwili nindi yina yuma yamuNshimbi yamwekesheleña ‘yuma yayiwahi yakenza.’—Heb. 9:1-5, 9; 10:1.

⁶ Nzambi wayinkaña ambuñindi nyidimu yambokamboka mumpinji mumpinji kwesekeja nachinakukeñayi kushikija nkeñelu yindi. Hela chochu, nyidimu yayinkawu mpinji yejima yamulemeshaña Yehova nawa yakwashaña antu amukuhwelela. Chakadi nikujina, nyidimu yeniyi yakundama kunyidimu yakalakeliyi Yesu henohu wuchidi mwiwulu nihampinji yenjiliyi hamaseki. (Yow. 4:34; 17:4) Munjila yoyimu, nyidimu yatwinkawu makonu yamulemeshaña Yehova. (Mat. 5:16; tañenu 1 Akorinda 15:58.) Muloñadi?

7, 8. (a) Lumbululenu mudimu wazatañawu akwaKristu makonu. (b) Twatela kwila ñahi nanshimbi jatwinkañayi Yehova?

⁷ Chakuhayamisha chikupu muloña Yehova weteja antu abula kuwanina kwikala nakukooleka kwakukalakala hamu nayena. (1 Kor. 3:9) Antu azataña mudimu wakutuña Matala Akupompelamu Kupompa Kwamaneni, Matala aWanta nitusanji twanyitayi azataña mudimu wudi neyi wazatiluwu aNowa naMosi. Chili munakuzata mudimu wakuwahisha Itala daWanta hela munakutuña kasanji ketu keneni kuWarwick, muNew York, lemeshenu kukooleka kwenu kumukweti kwakuzata iwu mudimu. (Talenu mwevulu wakutachikilahu wunakumwekesha kasanji keneni chikakekala.) Himudimu wajila. Hela chochu, akwaKristu ejima akalakalaña mudimu wakuspiritu wakutuña. Iwu mudimu niwena awuzataña kulonda wumulemesheña Yehova nikukwasha antu ovwahila. (Yil. 13:47-49) Kuloñesha kwaNzambi diku kwahanaña nshimbi jakulondela hakuzata iwu mudimu chachiwahi. Ichi chaya mukwila nawu mpinji yikwawu anateli kuyinka mudimu wacheñi.

⁸ Ambuña Yehova ashinshika mpinji yejima akeñaña kwovwahila nshimbi jaNzambi. (Tañenu Aheberu 13:7, 17.) Hakusambila tunateli kwiluka wanyi yuma yinaleñeli atuleji kuzata mudimu watwinkawu munoyu njila.  Hela chochu, tweluka chikupu netu Yehova diyi wahimpaña yuma nawa neyi twovwahila, mwafumaña yuma yayiwahi.

9. Aeluda emikilaña chipompelu chakutalilahwinyi kutalisha hakuzata mudimu?

⁹ Mpwila yakwila yuma yakeñañayi Yehova yamwekenaña mudi aeluda adikitaña hakulombola chipompelu. (2 Kor. 1:24; 1 Tesa. 5:12, 13) Adikeñelaña kuzata nañovu nawa neyi kudi yuma yinahimpuwu alondelaña. Afwilaña kulondela njila jajiha jakuzatilamu mudimu wetu wakushimwina Wanta waNzambi. Hela chakwila amakwawu hakusambila adiña nakushintajala hakwila atanjiki wunsahu wakushimwina hanshiña, kushimwina kwakuñikilañawu maatu, hela kushimwina kumaluña kudi antu amavulu, amweni yuma yayiwahi yafuminumu. Chakutalilahu, apayiniya awana akuGermany afuukwiluhu kuzatila mwiluña dakulanda nakulandulula dabuliluwu kuzatilamu hampinji yayilehi. Michael washimwini nindi: “Hahitili yaaka yayivulu chikupu nahitwazatilili mudimu wamuchidiwu, dichi twatiyili woma. Yehova watela welukili chumichi, muloña watukwashili kuzata chiwahi chikupu hadina ifuku nantetemena. Twazañaleli chikupu muloña twalondeleli nshimbi yekala muMudimu Wetu waWanta nawa twamushindameneni Yehova kulonda yatukwashi.” Komana munakufwila kuzatisha njila jajiha jakushimwinamu jinakuzatishawu mwiluña denu?

10. Yumanyi yinahimpuwu mukuloñesha kwetu makonu?

¹⁰ Mpinji yikwawu, kwekala yuma yahimpañawu mukuloñesha kwetu. Muyaka yantesha yinahituhu, tusanji twanyitayi twatuvulu anatubombi natukwawu. Hela chakwila kuhimpika kweniku kwaleñelaña amana kwetu niahela azatilaña hanitu tusanji kuhimpa, chimwahita mpinji ejima elukaña kuwaha kwafumaña muniku kuhimpa. (Mukwa. 7:8) Awa antu adihana atiyaña kuwaha hakuzata mudimu wunakukalakalawu antu jaYehova makonu.

11-13. Kukalanyi kwamonañawu amana kwetu niahela hamuloña wakuhimpika kunakumwekana mukuloñesha kwetu?

¹¹ Tunateli kudiza yuma yayivulu kudi antu azatilileña hanitu tusanji twabombawu. Amakwawu azatilili mudimu wampinji yejima haBeteli yawu hayaaka yayivulu. Antu adisumbula azatilileña haBeteli yanyanya muCentral America ayilejeli kudibomba nachisaka chaBeteli chamuMexico chadiña cheneni chikupu. Rogelio wahosheli nindi: “Kushiya chisaka chami niamabwambu chadiña chuma chakala hama.” Mana kwetu mukwawu wejina daJuan, alejeluwu kubuukila kuMexico, wahosheli nindi: “Chidi neyi kwiji kuvwalika kamuchiyedi; watela kukwata cheñi amabwambu amaha. Chakeñekaña kuhimpa kulonda winjilili tushidikilu twatuha nikutoñojoka munjila yacheñi.”

¹² AkaBeteli afumini kumatuña amakwawu amuEurope nakuya kukasanji kamutayi muGermany niwena amweni kukala. Antu adiluñishaña kushakama kumaluña amapidi anateli kwiteja nawu chayikalilili amana kwetu niahela akuSwitzerland kushiya ituña dawu dadiwahi daMapidi. Nawa amana kwetu niahela afumini kuAustria hakusambila chayikalili muloña enjilili kushakama nachisaka chaBeteli chanyanya.

¹³ Amana kwetu niahela ayili kumatuña acheñi ateleleli kwinjilila kushakama mumatala ambukaku, kuzatila hamu nawamana kwetu niahela abuliluwu kwiluka, hadaha nikudiza kuzata mudimu wacheñi. Chumichi chakeñekeleña cheñi kuhimpa kulonda enjilili muchipompelu nikushimwina mwiluña dadiha hekwawu nikudiza idimi dacheñi. Kuhimpa yuma yamuchidiwu kwakala nankashi. Ilaña, akaBeteli amavulu etejaña kuhimpa. Muloñadi?

14, 15. (a) Indi antu amavulu amwekeshaña ñahi nawu alemesha kukooleka kukwetuwu kwakuzatila hamu naYehova kudi kwejima kudi owu mudimu? (b) Munjilanyi mwekalilawu chakutalilahu chachiwahi kudi etu ejima?

¹⁴ Grethel wahosheli nindi: “Netejeli  muloña nakeñeleña kumuleja Yehova nami kukeña kunamukeña kwabadika chinakeña ituña detu, matala, hela mudimu wukwawu.” Dayska wahosheli nindi: “Chinanukili nami himutambi wafumini kudi Yehova netejeli chakufuma hamuchima.” André naGabriela niwena etejeli nakuhosha nawu: “Chumichi chatukwashili kumona netu tukweti kukooleka kukwawu kwakumuzatila Yehova kuhitila mukusha yuma yitwafwilaña hambadi. Twahosheli netu, ‘Neyi kuloñesha kwaYehova kunahimpi yuma, chikuwaha kwiteja kuhimpa kweniku namuchima wumu kubadika kudikaña.’”

¹⁵ Muloña wakwila tusanji twanyitayi anakutubomba, akaBeteli amakwawu ayinkaña cheñi mudimu wawupayiniya. Ichi dichi chuma chayimwekeneni akaBeteli amavulu adiña kumutayi waDenmark, Norway, nimuSweden, chayibombeluwu kulonda muScandinavia mwikali kasanji kamutayi kamu. A Florian naAnja ayitwalili kuBeteli yacheñi nawa ahosheli nawu: “Twamweni mudimu wetu wawuha netu hela wakala tunateli kuwuzata namuzañalu. Twatiyaña kuwaha nankashi kutuzatisha kudi Yehova hichikweti muloña neluña kutunakuzatilaku. Kuhosha hohu chalala, tunamoni netu tukweti kukooleka kweneni!” Hela chakwila etu amavulu hitunateli kuhimpa muniyi njilaku, komana kwila twimbujola awa amana kwetu niahela adihanaña hakutwamijaku mudimu waWanta nehi? (Isa. 6:8) Yehova wakiswilaña antu alemeshaña kukooleka kwawu kwakuzatila hamu nayena kudi kwejima kudi owu mudimu.

16. (a) Mukanda waAŋalija 6:4 watulejaña kwila chumanyi? (b) Kukoolekanyi kunateli kwikala namuntu wudi wejima?

¹⁶ Antu abula kuwanina ekala nachaaku chakudesekeja nawakwawu, ilaña Izu daNzambi datulejaña kushinshika hanyidimu yitwazataña hamuntu hamuntu. (Tañenu Aŋalija 6:4.) Etu amavulu hitwekala nayifulu mukuloñesha kwetuku. Cheñi nawa, wejima wetu hitunateli kwikala apayiniya, amishonali hela kuzatila haBeteluku. Iyi hinyidimu  yayiwahi hama! Ilaña bayi tulalamena netu wejima wetu tunateli kwikala nakukooleka kwenenuku. Iku hikukooleka kwakwikala akwakukalakala hamu naYehova mumudimu wawakwaKristu. Twatela kulemesha chikupu iku kukooleka!

17. Yumanyi yinateli kutukalila mukaayi kaSatana, nawa muloñadi yumiyi chiyatela kubula kusweja kutuneñesha?

¹⁷ Chineli tunakushakama mukaayi kaSatana, hitunateli kumuzatila Yehova neyi chitwakeñañaku. Kudi yuma yinateli kutukalila chidi neyi nyidimu yamuchisaka, yikatu hela yuma yikwawu. Hela chochu yumiyi bayi yisweja kutuneñeshaku. Bayi mudiwula wuswa wumukweti wakuzatila hamu naNzambi kuhitila mukushimwina wunsahu hejina dindi nikutiyakesha Wanta windi kala mpinji. Mukweti mudimu walema nankashi wakuzatila hamu naNzambi hakumina ñovu jenu jejima nikulomba kudi Nzambi nenu yakiswili amana kwenu anakuzata nañovu kubadika enu. Anukenu nenu muntu wejima wahamekaña ijina daYehova walema nankashi kumesu indi.

18. Yumanyi yitwatela kudikeñela kuleka nawa muloñadi?

¹⁸ Hela chakwila twawanina wanyi, Yehova wazañalala kutuzatisha neyi akwakukalakala hamu nindi. Tukweti kukooleka kweneni nankashi kwakukalakala hamu naNzambi munanu mafuku akukuminina! Dichi, twatela kudikeñela kuleka kwila yuma yitwafwilaña, muloña tweluka netu mwituña dindi dadiha, Yehova wakatwinka ‘wumi walala chikupu,’ dikwila nawu twakadiluñisha wumi wahaya nyaka mwituña dadiwahi mwakekala kuwunda.—1 Tim. 6:18, 19.

19. Chumanyi chakatwililayi Yehova kumbidi?

¹⁹ Chineli ituña dadiha dashiikayi Nzambi keña dishiki, twatela kutoñojoka hamazu ayilejeluwu aIsarela kudi Mosi henohu adi kwakwihi nakwiñila Mwituña daChikaninu nindi: “Yehova Nzambi yeyi wakakuvulishila nyidimu yakuchikasa cheyi yejima.” (Kuhit. 30:9) Chikahita Amagedoni, Yehova wakayinka antu akalakeleña hamu nindi iseki, neyi chochakaniniyi. Kuhiñahu, twakatachika kuzata mudimu wawuha wakwilisha iseki kwikala paradisa yayiwahi.