1, 2. (a) Chumanyi chamwekeshaña nawu chipompelu chakushankulu chamuKolosi chadiña mukukala? (b) Kufumbanyi kwayifumbiluwu hakukwasha ana kwetu amuKolosi kulonda atwalekuhu kwikala ashinshika?

 CHIPOMPELU chakushankulu chawakwaKristu amuKolosi chadiña mukukala! Antu amakwawu muchipompelu aleteleña chaambu kuhitila mukukolesha akwawu nawu ovwahileña Nshimbi jamwinkeluwu Mosi. Amakwawu atañishileña maana awusenji akukeña kubula kudiluñisha, dikwila nawu chihandilu chakudibonda chikupu. Hakwila yakañeshi iyi ntañishilu yakutwamba, kapostolu Pawulu wasonekeli mukanda wakukolesha nikubabesha Akolosi nindi: “Babalenu hakenda kamwekana muntu wukuyipupa namaanindi namakasu amukunkulwayi, mwaya yaaku yawantu, mwaya yuma yampata yamunu mwishina yakuhemesha, himwaya Kristuku.”—Kol. 2:8.

² Neyi akwaKristu awayishewa atoñojokeleña “yuma yakuhemesha yamunu mwishina,” adi kudiwula yuma yayinkeleñayi Yehova yakuyipulwisha nachu. (Kol. 2:20-23) Hakwila yayikwashi kuhemba wubwambu wawu naNzambi, Pawulu wayikonkomweneni nindi: ‘Toñojokenuña yuma yamwiwulu, bayi yahamasekuku.’ (Kol. 3:2) Eñañi, ana kwaKristu ateleleli kutoñojokaña  hakuchiñeja kwakutambwila wuswana wabulaña kutoka ‘wayiswekeleluwu mwiwulu.’—Kol. 1:4, 5.

3. (a) Kuchiñejanyi kuyatoñojokañawu akwaKristu awayishewa? (b) Malwihwinyi itukudiza muchinu chibaaba?

³ Makonu, akwaKristu awayishewa niwena atoñojokaña haWanta waNzambi nihakuchiñeja kwawu kwakwikala ‘aswana chimu naKristu.’ (Rom. 8:14-17) Chumanyi chatela kwilawu antu akweti kuchiñeja kwakushakama hamaseki? Indi mazu aPawulu anateli kuyikwasha ñahi niwena? “Anyikoku acheñi” anateli kutoñojoka ñahi “yuma yamwiwulu”? (Yow. 10:16) Abarahama niMosi atwalekeluhu kutoñojoka yuma yamwiwulu hela chakwila amweneña kukala, indi etu tunateli kuhetelamu ñahi neyi twimbujola yakutalilahu yanawa antu ashinshika?

4. Indi anyikoku acheñi anateli kutoñojoka ñahi yuma yamwiwulu?

⁴ Hela chakwila anyikoku acheñi hiyachiñejaña wumi wamwiwuluku, niwena atela kutoñojoka yuma yamwiwulu. Munjilanyi? Kuhitila mukutwamijaku Yehova Nzambi niWanta windi muchihandilu chawu. (Luka 10:25-27) Dichi twatela kutala kudi Kristu neyi chakutalilahu chetu. (1 Pet. 2:21) Kufwana ana kwetu akushankulu, twekala nawantu atañishaña nsañu yakutwamba, maana awantu nikutandisha yililu yamukaayi kaSatana yakukeñesha yuma yakumujimba. (Tañenu 2 Akorinda 10:5.) Chineli twamwimbujolaña Yesu, twatela kushaku maana kulonda tudihembi kuyuma yinateli kutamisha wubwambu wetu naYehova.

5. Tunateli kudishinshika ñahi chitwatoñojokaña hansañu yamali?

⁵ Komana yitoñojoka yamukaayi yakufwila maheta yinakutuluwañesha? Yuma yitwatoñojokaña niyitwelaña yamwekeshaña yuma yitwakeña. Yesu wahosheli nindi: “Muloña kukwikala maheteyi, diku kuwukusha nimuchima weyi nawa.” (Mat. 6:21) Hakwila twiluki kunakututwala muchima wetu, twatela kudishinshika mumpinji mumpinji. Dihuli neyi: ‘Nazatishaña mpinji yishika hadi hakutoñojoka nsañu yamali? Komana naswejaña kutoñojoka hakwikala namali amavulu, kwikala namudimu wawuwahi nikwikala nachihandilu chachiwahi? Tahindi nafwilaña kupelesha chihandilu chami nakusha maana hawubwambu wami naYehova?’ (Mat. 6:22) Yesu washimwini nindi antu akeñaña ‘kudilumbikila maheta hamaseki’ ashaña wubwambu wawu naYehova hakatoña.—Mat. 6:19, 20, 24.

6. Chumanyi chitwatela kwila kulonda tubuleña kwila yuma yakeña mujimba?

⁶ Muloña wakwila twawanina wanyi twaswejaña kutoñojoka hayuma yinateli kutuzañalesha. (Tañenu Aroma 7:21-25.) Neyi spiritu yajila yaNzambi yatukwashileña wanyi, mutenowu twadi kwilaña “nyidimu yamwidima.” Yumiyi yabombelamu ‘yidika yamapumba nikusheta, wuvumbi niyililu yawukapwa nsonyi.’ (Rom. 13:12, 13) Hakwila tubuleña kushinshika ‘yuma yahamaseki,’ yuma yaletaña ikoku, twatela kutoñojokaña hayuma yamwiwulu. Chumichi chakeñekaña kuzata nañovu. Dihu hafumini kapostolu Pawulu kuhosha nindi: ‘Nafumbaña mujimba wami nakuwutwala muwuduñu.’ (1 Kor. 9:27) Chakadi nikujina, twatela kuzata nañovu kulonda tutwalekuhu kutemuka lufuchi lwawumi. Tutalenu cheliluwu antu ayedi ashinshika akushankulu hakwila ‘amutiyishi Nzambi kuwaha.’—Heb. 11:6.

7, 8. (a) Indi Abarahama naSara amweni kukalanyi? (b) Indi Abarahama watoñojokeleña hayumanyi?

⁷ Yehova chamulejeliyi Abarahama kuya  nachisaka chindi kwituña daKenani, washikeneni dakwiteja. Muloña wakwila Abarama wadiña nachikuhwelelu nawa wadiña wovwahila, Yehova watiyañeni nindi chitiyañenu nindi: ‘Nakakwila munza weneni, nakakukiswila nkisu.’ (Kutach. 12:2) Mwahitili yaaka yayivulu, ilaña Abarahama nañodindi Sara hiyadiña namwanaku. Komana Yehova walalameneni chikaninu chamukaniniyi Abarahama? Cheñi nawa, chihandilu muKenani chadiña chakala. Abarahama nichisaka chindi ashili mukala wawu niantaña jawu muUri, musumba wamaheta wamuMesopotamiya. Endeli lwendu lwamakilomita akubadika 1,600 hakwila ashiki kuKenani kwashakamineñawu mumatenti, kwafwileñawu nzala nawa kwadiña atupondu. (Kutach. 12:5, 10; 13:18; 14:10-16) Ilaña, hiyafwilileña kufunta kuUri kwadiña chihandilu chachiwahuku.—Tañenu Aheberu 11:8-12, 15.

⁸ Chatela yashi muchima ‘hayuma yahamaseki,’ Abarahama ‘wamukuhweleleli Yehova.’ (Kutach. 15:6) Eñañi, watoñojokeleña yuma yamwiwulu muloña washili maana hayikaninu yaNzambi. Abarahama amukiswilili muloña wachikuhwelelu chindi chelili Nzambi Wabadika yamwekani kudi yena nakuhosha nindi: ‘Talaku tuhu mwiwulu, wuchindi tutumbwa neyi wunatweshi kutuchinda; hakumwila nindi, Dichi chakekala anyaneyi chochina.’ (Kutach. 15:5) Chumichi chamukolesheli chikupu Abarahama. Mpinji yejima yatalileñayi Abarahama tutumbwa, wanukileña chikaninu chaYehova chakuvulisha anyanindi. Dichi hampinji yatoñweliyi Nzambi, Abarahama wavweli nswana neyi chochu chamukaninuwu.—Kutach. 21:1, 2.

9. Indi kwimbujola chakutalilahu chaAbarahama kukutukolesha ñahi kuzata nañovu mumudimu waNzambi?

⁹ Kufwana Abarahama, anetu nawa twatalilaña Nzambi chakashikijayi yikaninu yindi. (2 Pet. 3:13) Neyi tuleka kutoñojoka yuma yamwiwulu, iyi yikaninu yikumwekana neyi yinakulaba kushikijewa nawa chumichi chinateli kutufuntisha hanyima munyidimu yitwamuzatilaña Yehova. Chakutalilahu, komana mwadihanini kulonda muzatuku mudimu wawupayiniya hela kuzata chikupu munyidimu yikwawu? Neyi mwadihanahu dehi, tunayihameki. Indi chayinu mpinji munakwiladi? Anukenu nenu, Abarahama wadiña nakutalila ‘ñanda yikweti yikuku yayeni.’ (Heb. 11:10) Abarahama ‘wamukuhweleleli Nzambi, nawa amufuukwililichu nawu hikuloña.’—Rom. 4:3.

10. Chihandilu chamuchidinyi chahandileñayi Mosi kuwansi?

¹⁰ Muntu mukwawu watwalekeluhu kutoñojoka yuma yamwiwulu wadiña Mosi. Mosi hachidiñayi kansi ‘amutañishili mwaya maana amuEjipitu ejima.’ Iyi yadiña shikola yahewulu. Hiyana mpinji Ejipitu dadiña ituña dañovu nankashi mukaayi kejima nawa Mosi washakamineña mwitala daFwaro. Iyi shikola yahewulu yamuleñeleli Mosi kwikala ‘wasweja ñovu nikumazu indi nikunyidimu yindi.’ (Yil. 7:22) Mosi wadiña nakukooleka kwakuzata nyidimu yayivulu. Ilaña Mosi watoñojokeleña yuma yalema chikupu, kwila mwaya muchima waNzambi.

11, 12. Shikolanyi yalemesheli chikupu Mosi, nawa tweluka ñahi?

¹¹ Hachidiñayi kansi, chakadi nikujina Mosi amutañishili nsañu yaNzambi yawaHeberu kudi mama yindi Yokebedi. Mosi walemesheli chikupu nsañu yelukiliyi hadi Yehova nawa wayimweneña nindi yabadika maheta ejima. Dichi wakaanini kukooleka kwejima kwadi kwikalayi naku muloña washakamineña mwitala daFwaro. (Tañenu  Aheberu 11:24-27.) Eñañi, yuma yadiziliyi Mosi hadi Yehova nichamukuhweleleliyi chamukwashili kutoñojoka hayuma yamwiwulu.

¹² Mosi amutañishili shikola yakumujimba yabadika kuwaha yadiñaku munana mufuku, hanu dinu, wazatishili yuma yadiziliyi nakufwila kuzata nyidimu muEjipitu, kuya mpuhu hela kwikala namaheta? Inehi. Neyi welili mwenimu, hadi ‘kukaana kumutena nawu mwana kamwana kaFwaro wamumbandaku; hakutonda kumona ihuñu chimu nawantu aNzambi, hakuleka kuluña mpinji yantesha nachiseki chanshidi.’ Mwamweni, Mosi wazatishili yuma yadiziliyi hadi Nzambi nakutwala mudimu waYehova hambidi.

13, 14. (a) Chumanyi chamukwashili Mosi kushikahu kuzata mudimu wamuhembeleliyi Yehova? (b) Kufwana Mosi, chumanyi chitwatela kwila?

¹³ Mosi wamukeñeli Yehova niantu Jindi. Chashikijiliyi yaaka 40 yakuvwalika, Mosi watoñojokeli nindi watela kuyikwasha antu jaNzambi kulonda asubuki muwuduñu muEjipitu. (Yil. 7:23-25) Hela chochu, henohu Yehova kanda yamwinki iwu mudimu, Mosi wateleleli kwikala nayililu yikwawu. Wateleleli kwikala nayilili yidi neyi kudizoza, kudiwunjika, kuwunda nikudihemba. (Yish. 15:33) Mosi wateleleli kudiza yuma yadi kumukwasha kuumika kweseka nikukala kwadi kumonayi kumbidi. Yaaka 40 yazatiliyi mudimu wawukabiña yamukwashili kwikala naniyi yililu.

¹⁴ Komana yuma yadiziliyi Mosi hampinji yadiñayi kabiña yamukwashili? Eña, yamukwashili. Izu daNzambi dahosha nawu Mosi wekalili ‘wamwovu nankashi mumuchima, kubadika amayala ejima ekala heseki dejima.’ (Kuch. 12:3) Wekalili nachililu chakudizoza chamukwashili kwikala wadiwunjika hakuzata nawantu ashiyashana nikusompa nyiloña yawu yakala. (Kwid. 18:26) Anetu nawa twatela kwikala nayililu yinateli kutukwasha kupuluka ‘yihuñu yeneni’ hakwiñila mwituña dadiha daNzambi daloña. (Chim. 7:14) Komana twatiyañanaña nawantu kushilahu ninana itwamonaña netu asweja kukuma kumuchima? Chikuwaha neyi twovwahila mazu akapostolu Petulu wakonkomweneni akwawu akwakwitiya nindi: ‘Lemeshenu antu ejima. Keñenu ana kwenu ejima.’—1 Pet. 2:17.

15, 16. (a) Kutoñojoka hayuma yayiwahi kwalemenadi? (b) Muloñadi chichalemena kudi akwaKristu kwikala nayililu yayiwahi?

¹⁵ Twashakamaña ‘munyaka yakala.’ (2 Tim. 3:1) Dichi, hakwila tutwalekuhu kudikunda naNzambi twatela kutoñojokaña hayuma yayiwahi. (1 Tesa. 5:6-9) Shinshikenu yuma yisatu yamuchihandilu chetu yinateli kutukwasha kwila mwenimu.

¹⁶ Yililu yetu: Petulu welukili kulema kwakwikala nayililu yayiwahi. Wahosheli nindi: “Shakamenu chalumbuluka mukachi [kawakwamatuña]; kulonda chakumonawu nyidimu yenu yayiwahi akamulemeshi Nzambi.” (1 Pet. 2:12) Hela chakwila tudi hetala, kumudimu, kushikola, indi kwiji tunakuhema hela tudi mumudimu wakushimwina, twazataña hakumina ñovu jetu kulonda tumulemesheña Yehova nayililu yetu yayiwahi. Eña, chineli twekala abula kuwanina wejima wetu twavulumunaña. (Rom. 3:23) Hela chochu, neyi tutwalekahu ‘kulwa njita yayiwahi yachikuhwelelu,’ tunateli kushinda chiwahi njita yitwalwaña namujimba wetu wabula kuwanina.—1 Tim. 6:12.

17. Tunateli kwikala ñahi nayitoñojoka yadiña naKristu Yesu? (Talenu mwevulu wakutachikilahu.)

¹⁷ Yitoñojoka yetu: Hakwila twikali nayililu yayiwahi twatela kwikala nayitoñojoka yayiwahi. Kapostolu Pawulu wahosheli  nindi: “Yitoñojoka yadiñi mudi Kristu Yesu yiikali nimudenu nawa.” (Fwi. 2:5) Indi Yesu wadiña nayililu yamuchidinyi? Wadiña wadizoza. Kudizoza kwamuleñeleli yadihani kuzata mudimu wakushimwina. Chuma chalemesheliyi hikushimwina nsañu yayiwahi yaWanta waNzambi kudi antu. (Maku 1:38; 13:10) Yesu washindameneni Hezu daNzambi. (Yow. 7:16; 8:28) Wadizileña nakanañachima Nyikanda Yajila kulonda yahosheña nsañu yekalamu, kuyihakwilaku nikuyilumbulula. Neyi twikala adizoza nikudikita mumudimu wetu wakushimwina nikudiza Bayibolu nkawetu, tukutoñojokaña neyi chatoñojokeleñayi Kristu.

18. Munjilanyi yalema mutwatela kukwashila mudimu waYehova?

¹⁸ Wukwashu wetu: Yehova wafuukula nindi “mwijina daYesu manuñu ejima akafukami, niamwiwulu, niahamaseki.” (Fwi. 2:9-11) Hela chakwila amwinka chifulu cheneni, Yesu wakwovwahila nkeñelu yaTata yindi, anetu nawa twatela kwila mwomumu. (1 Kor. 15:28) Munjilanyi? Kuhitila mukudihana namuchima wetu wejima nakukwasha mudimu watwinkawu ‘wakwilisha atumbanji munyunza yejima.’ (Mat. 28:19) Cheñi nawa, twafwilaña ‘kwilila antu ejima chachiwahi’ kushilahu antuñi netu niamana kwetu.—Ŋal. 6:10.

19. Chumanyi chitwatela kufwila kwila?

¹⁹ Twamusakililaña Yehova muloña watwanukishaña kutoñojoka hayuma yamwiwulu. Dichi twatela ‘kutatakena nakutemuka njila yanatupiminuwu.’ (Heb. 12:1) Komana wejima wetu twatela ‘kumukalakela Yehova namuchima wejima,’ nawa Tata yetu wamwiwulu wakatukiswila chitwazataña nañovu.—Kol. 3:23, 24.