1, 2. Indi mwana kamumbanda ateleleli kumukiña ñahi, nawa muloñadi?

 WUPROFWETU watachi wasonekawu muBayibolu walema nankashi muloña watukwashaña kwiluka chikashikijewa nkeñelu yaYehova. Hampinji yashimwineñayi chikaninu chamuEdeni, Nzambi walala wahosheli nindi: “Nukusha nkunyi mukachi keyeyi [Satana] namumbanda, nimukachi kawanyaneyi nawanyanindi.” Indi iwu wulumbu wadi kushika hadi? Yehova wahosheli nindi, ‘Yena [mwana kamumbanda] wakakuchika kumutu weyi [waSatana], nineyi wakamuchika kukatutu.’ (Kutach. 3:15) Wulumbu wekala hakachi kakapela namumbanda wukasweja nankashi chakwila Satana wakakeña kuzata hakumina ñovu jindi kulonda yakisañani mwana kamumbanda.

² Dihu hafumini ñimbi yamasamu hakumulembelela Nzambi mukulomba kutalisha hadi antu Indi atondayi nindi: ‘Tala, ayilumbu jeyi hiyakuleta ipumba, awa akuhelaña hiyakunyamuna nyitu yawu kwiwulu. Hiyakuyikasila kasila antu eyi mpuña yatama, hiyakuyitiyañena antu eyi wasweka. Aneli nawu, Tuyenu, tuyifumishuhu abuli kwikala munza.’ (Mas. 83:2-4) Chisaka mwadi kuvwalikilayi mwana kamumbanda ateleleli kuchikiña kulonda abuli kuchijilumuna nikuchitamisha. Hakwila chumichi  chizatiki, Yehova watiyañeni cheñi yitiyañenu yikwawu yadi kuleñela nkeñelu yindi kushikijewa.

3, 4. (a) Indi chitiyañenu chaNshimbi chatachikili kuzatika chaakanyi, nawa munza waIsarela wetejeli kwiladi? (b) Chitiyañenu chaNshimbi chakaanishileña yumanyi?

³ Anyana kaAbarahama, Isaka, niYakoba chavuliluwu nankashi, Yehova wayilishili kwikala munza wawaIsarela wakushankulu. Yehova watiyañeni nawu chitiyañenu chadimena kuhitila mudi Mosi nakuyinka Nshimbi nawa munza waIsarela wetejeli kwovwahila nshimbi yanichi chitiyañenu. Bayibolu yashimuna nawu: “[Mosi] wanoneni mukanda wachitiyañenu, wawutañili kulonda antu awutiyi; elili nawu, Yejima yanahoshiyi Yehova tukwila, tukwovwahila. Mosi wanoneni mashi [ayizamba yalambwiluwu], wayisampwilili antu, nindi, Talenu mashi achitiyañenu chanatiyañaniyi Yehova nanenu, namazu awa ejima.”—Kwid. 24:3-8.

⁴ Chitiyañenu chaNshimbi chatachikili kuzatika haMpidi yaSinayi mu 1513 B.C.E. Ichi chitiyañenu chaleñeleli munza wawaIsarela wakushankulu kwikala munza wambuka watondeliyi Nzambi. Yehova wekalili ‘nsompeshi yawu, mukwakuyinka Nshimbi nawa Mwanta wawu.’ (Isa. 33:22) Nsañu yawaIsarela yashimunaña yuma yamwekanaña neyi antu ovwahila nshimbi jaNzambi jaloña hela abula kujovwahila. Chineli Nshimbi yayikaanishili kusumbwañana nawasenji nikudifukula kwakutwamba, iyi nshimbi yayikwashileña anyana kaAbarahama kulonda abuli kuditamisha.—Kwid. 20:4-6; 34:12-16.

5. (a) Chitiyañenu chaNshimbi chayinkeli aIsarela kukoolekanyi? (b) Muloñadi Nzambi chayikaaniniyi aIsarela?

⁵ Chitiyañenu chaNshimbi chaleñeleli cheñi kutonda atupristu nawa chemeneneñaku yuma yalema yikamwekana kumbidi. (Heb. 7:11; 10:1) Kafwampi, ichi chitiyañenu chaleñeleli Isarela kwikala nakukooleka kwadimena kwakwikala ‘wanta wawatupristu,’ chikali hohu neyi ovwahila yuma yayilejeliyi Yehova munshimbi. (Tañenu Kwidika 19:5, 6.) Hela chochu, aIsarela akañenyi kwila chumichi. Chatela amwiteji Mesiya mwana kaAbarahama walema, munza waIsarela wamukaanini. Nzambi niyena wayikaanini.

6. Indi Nshimbi yazatili mudimwinyi?

⁶ A Isarela chabuliluwu kutwalekahu ashinshika kudi Yehova nikwikala wanta wawatupristu hichayili mukwila nawu Nshimbi yakañenyi kuzatikaku. Nshimbi yadiña nakukiña mwana nikukwasha antu kumwiluka Mesiya. Chelili Kristu yenzi nawa antu amwiluki, Nshimbi yazatikili. Bayibolu yahosha nawu ‘Kristu diyi kukuma kwaNshimbi.’ (Rom. 10:4) Hela chochu, tunateli kwihula netu: Anyi akekala nakukooleka kwakwikala wanta wawatupristu? Yehova Nzambi watiyañeni chitiyañenu chikwawu chakwikala namunza wawuha.

7. Chumanyi chashimwineñahu dehi Yehova kuhitila mudi Yeremiya kutalisha hachitiyañenu chachiha?

⁷ Henohu kuchidi yaaka yayivulu hakwila chitiyañenu chaNshimbi achijahi, Yehova washimwineñahu dehi kuhitila mudi kaprofwetu Yeremiya nindi wakatiyañana namunza waIsarela “chitiyañenu chachiha.” (Tañenu Yeremiya 31:31-33.) Chitiyañenu chachiha chikambukaku nachitiyañenu chaNshimbi muloña chikaleñela antu kuyanakena nshidi chakadi nyilambu yawatunyama. Indi ichi chitiyañenu chikafumishahu ñahi nyilambu yawatunyama?

8, 9. (a) Indi mashi apwekesheli Yesu azata mudimwinyi? (b) Antu amuchitiyañenu chachiha adiñi nakukoolekanyi? (Talenu mwevulu wakutachikilahu.)

⁸ Chimwahitili yaaka, Yesu watachikili Kudya kwaMwanta kwaMelela haNisani 14, 33 C.E. Hakuhosha havinyu yadiñi mulupasa, Yesu wayilejeli apostolu indi ashinshika nindi: “Lupasilu dichi chitiyañenu chachiha chamumashi ami, awa akuyipwekela.” (Luka 22:20) Nsañu yaMatewu yashimuna nawu Yesu wahosheli nindi: ‘Diwu mashi ami achitiyañenu, akupwekela antu amavulu kulonda kuyanakena nachu nshidi.’—Mat. 26:27, 28.

⁹ Mashi apwekesheliyi Yesu akolesha chitiyañenu chachiha. Mashi wenawa aleñela cheñi antu ayanakeni nshidi kamu nawa chahaya nyaka. Yesu hekala muchitiyañenu chachihaku. Chineli wudana nshidi, hakeñekaña kumwanakenaku. Ilaña Nzambi wazatishili kulema kwamashi apwekesheliyi Yesu kulonda yaheteshi nachu anyana kaAdama. Wayizatishaña cheñi hakutonda antu adihana kulonda ekali ‘anyanindi’ kuhitila mukuyiwayisha naspiritu yajila. (Tañenu Aroma 8:14-17.) Hamuloña wakwila Nzambi wayimonaña nindi adana nshidi, munjila yikwawu adi neyi Yesu, Mwana kaNzambi wakadi nshidi. Awa antu awayishewa ekala ‘answana chimu naKristu’ nawa akweti kukooleka kwakwikala ‘wanta wawatupristu.’ Iku hikukooleka kwadi kwikala namunza waIsarela adiñi nakwovwahila Nshimbi. Kapostolu Petulu wahosheli hadi ‘answana chimu naKristu’ nindi: ‘Enu mumunza watondewa, muwupristu wawanta, mumuchidi wajila, mumunza wambala waNzambi; kulonda mutiyakeshaña kashinshi kakeni kayena wayitambikili nindi mufumi mumwidima, mwiñili muchejeji chindi chakuhayama.’ (1 Pet. 2:9) Chitiyañenu chachiha chalema nankashi. Chaleñelaña atumbanji twaYesu kwikala anyana kaAbarahama amuchiyedi.

10. Indi chitiyañenu chachiha chatachikili kuzatiki mpinjinyi, nawa muloñadi chihahitilili mpinji?

¹⁰ Indi chitiyañenu chachiha chatachikili kuzatiki mpinjinyi? Bayi neyi hampinji yachiteneniyi Yesu hawufuku wakukumishaku kwikala hamasekuku. Hakwila nawu chitachiki kuzatika, mashi aYesu ateleli kupweka nikuhana mulambu wakulema kwamashi indi kudi Yehova mwiwulu. Kubombelahu, Nzambi wateleleli cheñi kwichila spiritu yajila hadi antu ‘akaswana hamu naKristu.’ Dichi chitiyañenu chachiha chatachikili kuzatika haPentekosta 33 C.E. hampinji yayiwayishiluwu atumbanji twaYesu ashinshika naspiritu yajila.

11. Indi chitiyañenu chachiha chaleñela ñahi aYudeya niaJentili kwikala aIsarela akuspiritu, nawa antu añahi akekala muchitiyañenu chachiha?

¹¹ Hela chakwila chitiyañenu chaNshimbi chayileña ‘nakunoña’ hampinji yahosheliyi Yehova kuhitila mudi Yeremiya nindi Wakatiyañana chitiyañenu chachiha nawaIsarela, hichamanini hayoyina mpinjuku, chatwalekeluhu sampu nimpinji yatachikili kuzatika chitiyañenu chachiha. (Heb. 8:13) Chatachikili chitiyañenu kuzatika, Nzambi wayimweneña aYudeya  niaJentili etiya abulili kwalama nindi wowamu, chineli ‘kwalama kwalala hichuma chakumuchima kuhitila mudi spiritu, bayi neyi chanshimbi yakusonekaku.’ (Rom. 2:29) Nzambi chatiyañeniyi nawu chitiyañenu, dikwila nawu washili nshimbi jindi ‘muyitoñojoka yawu, [Nzambi] wajisoneka munyichima yawu.’ (Heb. 8:10) Kuvula kwawantu ekala muchitiyañenu chachiha ekala 144,000, atuña munza wawuha, dikwila nawu ‘aIsarela aNzambi’ akuspiritu—Ŋal. 6:16; Chim. 14:1, 4.

12. Yumanyi yekala muchitiyañenu chaNshimbi yesekana nayuma yekala muchitiyañenu chachiha?

¹² Indi chitiyañenu chaNshimbi nichitiyañenu chachiha chesekana ñahi? Yehova nimunza wawaIsarela diwu adiña muchitiyañenu chaNshimbi; chitiyañenu chachiha mwekala Yehova niaIsarela akuspiritu. Mosi diyi wadiña ihaku muchitiyañenu chanoñeshawu, Yesu diyi Ihaku muchitiyañenu chachiha. Chitiyañenu chaNshimbi achikolesheli namashi akanyama; chitiyañenu chachiha achikolesheli namashi aYesu apwekeli. Nawa munza wawaIsarela awulombweleña nachitiyañenu chaNshimbi kuhitila mudi Mosi, antu ekala muchitiyañenu chachiha ayilombolaña kudi Yesu, Mutu wachipompelu.—Efwes. 1:22.

13, 14. (a) Indi chitiyañenu chachiha chendelaña ñahi hamu naWanta? (b) Chumanyi chakeñekaña hakwila aIsarela akuspiritu akayuuli hamu naKristu mwiwulu?

¹³ Chitiyañenu chachiha chendelaña hamu naWanta muloña chasema munza wajila wukweti kukooleka kwakwikala anyanta niatupristu muWanta wamwiwulu. Muniwu munza mwekala anyana kaAbarahama amuchiyedi. (Ŋal. 3:29) Dikwila nawu chitiyañenu chachiha chakolesha chitiyañenu chaAbarahama.

¹⁴ Kudi chuma chikwawu chakundama kuWanta chakeñekaña. Chitiyañenu chachiha mwafuma aIsarela akuspiritu nawa chaleñela antu ekala munichi chitiyañenu ‘kuswana hamu naKristu.’ Hela chochu, kwatelela kwikala cheñi chitiyañenu chakuyiteja nachu kuyuula hamu naYesu muWanta windi neyi anyanta niatupristu mwiwulu.

15. Chitiyañenwinyi chatiyañeniyi Yesu yomweni nawapostolu indi ashinshika?

¹⁵ Hanyima yakutachika Kudya kwaMwanta kwaMelela, Yesu watiyañeni chitiyañenu nawatumbanji twindi ashinshika, chavula kutenawu nawu chitiyañenu chaWanta. (Tañenu Luka 22:28-30.) Kwambukaku nayitiyañenu yikwawu mwekala Yehova nawantu amakwawu, ichi hichitiyañenu chatiyañeniyi Yesu yomweni nawatumbanji twindi awayishewa. Hakuhosha nindi, ‘neyi chatiyañeniyi Tata yami chitiyañenu nanami,’ hadaha Yesu wateneneña chitiyañenu chatiyañeniyi Yehova nayena chakumwilisha kwikala “kapristu wahayanyaka wafwana neyi Melekizedeki.”—Heb. 5:5, 6.

16. Indi chitiyañenu chaWanta chaleñela akwaKristu awayishewa kuheta chumanyi?

¹⁶ Apostolu ashinshika 11 diwu ‘akakeleli hamu naYesu mukweseka kwindi.’ Chitiyañenu chaWanta chayileñeleli akuhweleli chikupu nawu akekala hamu nindi mwiwulu nikushakama hamatanda kulonda akayuuli neyi anyanta nawa atupristu. Hela chochu, bayi neyi apostolu 11 hohu diwu akekala naniku kukooleka nkawawuku. Yesu alemesheluwu wamwekeni kudi kapostolu Yowanu muchimwenu nakuhosha nindi: “Yowu wukwimika mushindu, nakamwiteja kushakama nanami hetanda dami dawanta, neyi chinemikili ami mushindu, nashakama naTata yami hetanda dindi dawanta nawa.” (Chim. 3:21) Dichi, chitiyañenu chaWanta achitiyañeni nawakwaKristu awayishewa a 144,000. (Chim. 5:9, 10; 7:4) Ichi chitiyañenu achikolesheli kulonda  awayishewa akayuulili hamu naYesu mwiwulu. Chumichi chinadifwani nansumbuki anakusumbulawu kudi mwanta, neyi anadisumbuli dehi, mumbanda wukutachika kuyuula hamu namwanta. Kafwampi, Nyikanda yajila yatenaña akwaKristu awayishewa nawu “nsumbuki” waKristu, “chañadima walumbuluka wabulahu dehi iyala” otawu kudi Kristu.—Chim. 19:7, 8; 21:9; 2 Kor. 11:2.

17, 18. (a) Hitulukenu muyitiyañenu yitanu nachimu yitunadizi nawa yendelaña hamu nawanta. (b) Muloñadi chitwatela kukuhwelela chikupu muWanta?

¹⁷ Yitiyañenu yejima yitunahanjekuhu muniyi yibaaba yiyedi yendelaña hamu nachuma chimu hela yayivulu yalema yakundama kuWanta. (Talenu chati yinakwila nawu “Chakashikijayi Nzambi Nkeñelu Yindi” muchibaaba chinafumuhu.) Ichi chikuma chinakukonkomwena nawu ntanjikilu yaWanta yashindamena chikupu hayitiyañenu. Dichi twatela kukuhwelela chikupu netu Wanta wawuMesiya diwu wunakuzatishayi Nzambi hakushikija nkeñelu yindi yatachi yafuukwililiyi iseki niantu.—Chim. 11:15.

¹⁸ Komana tunateli kujinoka netu yuma yinakuzata Wanta yikaleta nkisu yahaya nyaka kudi antu? Tunateli kukuhwelela chikupu nakuhosha netu Wanta waNzambi diwu hohu wukafumishahu makabi ejima amonañawu antu. Dichi tushimwinenu iyi nsañu yalala kudi akwetu neyena!—Mat. 24:14.