HENOHU kuchidi yaaka yiyedi hakwila iyi nsañu yidi hewulu yimwekani, ami niEvelyn Trabert, mutwazatilileña wumishonali twamanishili kutaña Shikola yaGileyadi yaWatchtower yaKudiza Bayibolu yamuchiwana, hayina mpinji iyi shikola yadiña kwakwihi naIthaca, muNew York. Atutemesheli nakuzatila muSanta Ana. Henohu kanda nitwalekuhu kushimuna nsañu yami yayihi yamudimu wawumishonali wunazatili kwakwihi nayaaka 29, nukusambila kuyileja chanleñeleli kutondahu iwu mudimu.

Anvwali jami aJohn naEva Olson ashakamineña muSpokane, Washington, U.S.A., mu 1923, chaaka chinavwalikili. Adiña etiya muLutheran ilaña etejeli wanyi ntañishilu yakaluña kachinana yamuchechi, muloña hiyaditejeli nayuma yakuhweleleluwu mudi Nzambi wakukeñaku. (1 Yow. 4:8) Tata wazatileña mudimu wakwocha mankendi, dichi ifuku dimu nampinji yawufuku mukwawu muyazatilileñawu wamulejeli chikupu nindi Bayibolu hiyatañishaña nawu kaluña hiluña dakukabishila antuku. Hashimbwili wanyi anvwali jami atachikili kudiza nawaYinsahu jaYehova nawa adizili chuma chacheni chatañishaña Bayibolu kutalisha hachuma chamwekenaña muntu neyi nafwi.

Nadiña hohu nayaaka yitanu nayiwana, ilaña nanukaña anvwali chahosheleñawu namuzañalu hansañu yalala yayiha yadiziluwu muBayibolu. Aswejeli kuzañalala  chadiziluwu ijina daNzambi walala, Yehova nawa asubukili kuntañishilu yabulaña kutiyakana Yawanzambi Asatu. Natachikili kwiluka iyi ntañishilu yayiwahi yamuNsona nawa nadizili ‘nsañu yalala yafumishaña muntu muwuduñu.’ (Yow. 8:32) Kufuma tuhu yina mpinji, hinatiyileña wuudi kudiza Bayiboluku, ilaña nadiluñishileña kudiza Izu daNzambi mpinji yejima. Hela chakwila nadiña nansonyi, nayileña nawanvwali jami mumudimu wakushimwina. Apapatisheweli mu 1934. Mu 1939, henohu nindi nayaaka 16 yakuvwalika, napapatisheweli nakwikala kambuña Yehova.

Mukakweji kaJuly 1940, anvwali jami alandishili itala dawu nawa wejima wetu asatu twatachikili mudimu wampinji yejima neyi apayiniya kuCoeur d’Alene, muIdaho. Twashakamineña mwitala dakufwetela dadiña hewulu detala dakuloñeshela nyotoka. Twapompeleleña cheñi mwitala detu. Hayina mpinji yipompelu yantesha hohu diyi yadiña naMatala aWanta, dichi amavulu adiña nakupompela mumatala awu hela mumatala akusonkela.

Mu 1941 ami nianvwali jami twayili kukupompa kwadiña kuSt. Louis, muMissouri. Ifuku daMulungu dadiña “Ifuku dawaNyana,” nawa anyana adiña nayaaka yakutachikila ha 5 nakushika ku 18 ashakamini kumbidi. Hakumanisha mpanji yindi, Manakwetu Joseph F. Rutherford wahosheli nanetu atwansi nindi: “Enu anyana . . . ejima . . . muneteji kumwovwahila Nzambi niMwanta windi imanenu!” Wejima wetu twemeni. Kuhiñahu, Manakwetu Rutherford wabidikili nindi: “Talenu ayinsahu amaha aneteji kushimwina Wanta akubadika 15,000!” Yina mpanji yankwashili kufuukulahu chikupu kuzata wupayiniya muchihandilu chami.

Chihahitili tukweji twantesha kufuma hitwapompeli kupompa kwadiña muSt. Louis, chisaka chetu chabuukilili kakabeta kachidiilu kaCalifornia. Mudimu wetu wadiña wakutachika chipompelu chachiha mumusumba waOxnard. Twashakamineña mwitala danyanya dakukoka namotoka mwadiña kadidi kamu hohu. Ifuku nifuku nalileña “kadidi” hewulu damesa yakudyila, yuma yahimpikili chikupu muloña hakusambila nadiña nakapeka kami.

Henohu kanda tushiki kuCalifornia, ituña daJapan dalukukili Pearl Harbor muHawaii, haDecember 7, 1941. Ifuku dalondeleluhu, aUnited States atachikili kulwa Njita Yakaayi Yamuchiyedi. Nfulumendi yahanini nshimbi yakujima malayiti, dichi twajimineña malayiti ejima nampinji yawufuku. Masabumarini awaJapan adiña nakuhitañana kuchikumu chaCalifornia, dichi akañenyeña kumona matala atela kulozawu nsañu yamwidima.

Chimwahitili tukweji, muSeptember 1942, twayili kukupompa kweneni kwadiña namutu wakwila nawu New World Theocratic Assembly kuCleveland, muOhio. Kuniku kupompa twatiyilili mpanji yahaniniyi Manakwetu Nathan H. Knorr yakwila nawu “Peace—Can It Last?” (Kuwunda, Komana Kunateli Kutwalekahu?) Wahosheli hamukanda waChimwekeshu kapetulu 17, walumbulula “kanyama” nindi “kadiñuku, katataka kwosi, keña katupuki mwikela.” (Chim. 17:8, 11) Manakwetu Knorr walumbulwili nindi “kanyama” kadiña nakwimenaku mutayi waLeague of Nations wadiñaku ilaña walekeli kuzatika mu 1939. Bayibolu yashimwineñahu dehi nawu mutayi waLeague akawusinsa kudi mutayi wacheñi, wukaleta kuwunda hakapinji kantesha. Chalala kwekalili kuwunda mu 1945 chamanini Njita Yakaayi Yamuchiyedi. Kuhiñahu, “kanyama” kamwekeneni cheñi mumutayi waUnited Nations. A Yinsahu jaYehova azatili chikupu mumudimu wawu wakushimwina mukaayi kejima nawa aYinsahu anakuvulilaku hama kufuma tuhu hayina mpinji.

 Iwu wuprofwetu wankwashili kwiluka yuma yikamwekana kumbidi. Chabidikiluwu nawu Shikola yaGileyadi yikatachika chaaka chinakwinza, mpwila yami yakwikala kamishonali yaswejeleluku. Mu 1943, antemesheli muPortland, kuOregon nakuzatilaku wupayiniya. Munana mafuku, twazatishileña fonogirafu hakuvumishila enimatala mpanji jakukwatila chadimu, kuhiñahu twayinkeleña nyikanda yashindamena haBayibolu yahosheleña haWanta waNzambi. China chaaka chejima natoñojokeleña hohu hamudimu wawumishonali.

Mu 1944, natiyili kuwaha chinatambwilili mukanda wakuntambika kuGileyadi nebwambu dami nadikunda nindi Evelyn Trabert. Antañishi etu atulejeli chitwatela kwikala namuzañalu hakudiza Bayibolu hatukweji tutanu tutwadiña kushikola. Kudizoza kwawu kwatuzañalesheli. Mpinji yikwawu, hakudya, awa amana kwetu adiña nakuletela yakudya. Twamanishili shikola haJanuary 22, 1945.

Ami, Evelyn, Leo niEsther Mahan, twayili nakuzatila kuEl Salvador muJune 1946. Twawanini iha ‘dinatookashani dehi to-o, dashika dehi hakumuna.’ (Yow. 4:35) Chuma chinashimuna kumatachikilu chinakumwekesha chahililuwu akulumpi jayipompelu. Hahitili hohu mulungu wumu kufuma hitwapompeli kupompa kwañinza kwatachi muSanta Ana. Twatiyakesheli chikupu mpanji yawantu amavulu nawa twazañaleli hama chelili antu kwakwihi na 500 enzi nakupompa. Chatela tutiyi woma nakufuma muniyi mbaka, twafuukwiluhu chikupu kushakama nakukwasha antu ashinshika. Hela chakwila akulumpi ayipompelu akonkomweneni antu nawu bayi atañeña Bayiboluku, nawa antesha hohu diwu adiñi najiBayibolu, antu amavulu akeñeleña kudiza chalala. Asakililili chitwadizileña Spanish kulonda tuyitañishi hadi Nzambi walala Yehova nikuyileja yikaninu yindi yakubalumuna iseki kwikala Paradisa.

Rosa Ascencio wadiña hakachi kawatudizi ami atachi muEl Salvador. Chatachikiliyi kudiza Bayibolu, wambukili neyala washakamineñayi nindi. Iwu iyala niyena watachikili kudiza Bayibolu. Adisumbwili, kuhiñahu apapatisheweli nakwikala aYinsahu jaYehova adikita. Hadi akwakushimwina amuSanta Ana, Rosa wadiña payiniya watachi. *

Rosa wadiña nasitolu yanyana. Neyi nayi nakushimwina washinkileña sitolu yindi nakukuhwelela nindi Yehova wukumukwasha kuwana yuma yakudikwasha nachu. Neyi nashinkuli cheñi sitolu yindi, akwakulanda adiña nakuhwila kulonda alandi yuma. Wamweni walala wekala hamukanda waMatewu 6:33 nawa wadiña washinshika sampu nichafwiliyi.

Ifuku dimu, kapristu wamunidi iluña wayili nakuwana mwiniitala ditwafweteleleña etu amishonali atanu nawumu nakumusoñamisha nindi neyi yatwalekahu kutwiteja kusonkela itala dindi, yena niñodindi akuyihaña muchipompelu. Mwiniitala wadiña mukwakuselujola waya mpuhu, nawa watiyileña kutama nayililu yawakulumpi jayipompelu, dichi hatiyili womaku. Wamulejeli kapristu nindi chili amuhañi muchipompelu wukwakama wanyi. Watulejeli chikupu  nindi tunateli kushakama kushika nimpinji yitukakeña kufumamu.

Mumusumba weneni waSan Salvador, mwadiña kamishonali mukwawu wadizileña Bayibolu nañoda injiniya wejina daBaltasar Perla. Ona iyala wadiña namuchima wawuwahi walekeli kumukuhwelela Nzambi muloña wamweneña yuma yatama yelileñawu anlomboli ayipompelu. Chashikili mpinji yakutuña kasanji kamutayi, hela chakwila Baltasar wachidiñi kanda yekali chinsahu, wadiheni kufunjijeka nikutuña kasanji kamutayi chakadi kumufweta hanyidimu yazatiliyi.

Chadikundiliyi nawantu jaYehova hampinji yatuñileñawu, Baltasar wakuhweleli chikupu nindi wawanini kwitiya kwalala. Wapapatisheweli haJuly 22, 1955, nawa hashimbwili wanyi niñodindi Paulina wapapatisheweli. Anyanawu ejima amukalakelaña Yehova nakashinshi. Mwanindi weyala, Baltasar nakalakali haBeteli yakuBrooklyn yaaka 49, hazatilañayi nakukwasha mudimu wakushimwina mukaayi kejima wunakuyilaku hambidi nawa chayinu mpinji wekala membala waKometi yaMutayi wakuUnited States. *

Chitwatachikili kupompa kwankambi muSan Salvador, Manakwetu Perla watukwashili kuwana itala deneni dakunyikila mujimba. Hakusambila twazatishileña hohu yitwamu yantesha; ilaña chelili Yehova yatukiswili, twatachikili kuvula chaaka nichaaka sampu nichitwatachikili kwinzala mwitala dejima kuhiñahu itala denidi dakeheli. Haniyi mpinji yayiwahi, namweneña antu inadizileña nawu Bayibolu. Natiyili kuwaha chikupu hakumona atudizi ami amakulu chanlejeleñawu “ezukulu ami,” dikwila nawu antu amaha apapatisheweli adiziluwu nawu.

Hakupompa kumu, mana kwetu wumu wenjili nakunleja nindi nakukeña kudanakena. Namwilukili wanyi nawa nakeñeleña kwiluka chankeñeleleñayi. Wahosheli nindi, “Nadiñi hakachi kawatwansi awamayala ayasili malola muSanta Ana.” Chayinu mpinji nakumuzatila Yehova hamu nanami. Nazañaleli nankashi. Akuna kupompa kwanleñeleli niluki nami mudimu wampinji yejima diwu mudimu waletaña nkisu.

Natwalekeluhu namudimu wawumishonali kwakwihi nayaaka 29 muEl Salvador, nasambilili kuzatila  mumusumba waSanta Ana, kuhiñahu muSonsonate, kulondelahu muSanta Tecla, nkumininaku muSan Salvador. Muchaaka cha 1975, hanyima yakulomba chikupu nafuukwiluhu kuleka mudimu wami wawumishonali nawa nafuntili kuSpokane. Anvwali jami ashinshika ashinakajili nawa nateleleli kuyikwasha.

Chafwiliyi Tata mu 1979, natwalekeluhu kumuhemba Mama niyena wadiña nakuyekela nayikatu. Kufuma hafwiliyi tata, mama washakamini yaaka yitanu nayisatu, wafwili nayaaka 94 yakusemuka. Haniyi mpinji yakala, nazeyeli kumujimba nawa naneñeli chikupu. Ichi chineñi chanleñeleli kukata chikatu chakata chamabobela. Chineli nalombeleña nankashi nawa chikasa chaYehova chanlombweleña, natwesheli kuumika iku kukala. Chidi neyi chahosheliyi Yehova nindi, ‘kushika nihakumena invu, nakakusendaña nikakwelekaña, nikukupulwisha.’—Isa. 46:4.

Mu 1990, nayili kuOmak, muWashington. Kweniku natachikilili cheñi kumona nami nateli kuzata chikupu mwiluña dazatishañawu idimi daSpanish, nawa atudizi ami aBayibolu amavulu apapatisheweli. Kufuma muNovember 2007, natwesheleña wanyi kuwahisha itala dami damumbaka yaOmak muloña wawushinakaji nikukatakata, dichi nabuukilili mwitala danyanya mumbaka yaChelan, muWashington. Chipompelu chazatisha idimi daSpanish chañakamenaña chiwahi nawa nayisakililaña chikupu. Chineli yami Chinsahu wakashinakaji nkawami, amana kwetu niahela “anhembaña” chiwahi neyi “nkaaka” yawu.

Hela chakwila nafuukwiluhu kubula kusumbuka nikwikala nanyana kulonda nizateña chiwahi mumudimu wakushimwina chakadi kunluwañesha, nikweti anyana amavulu amuchipompelu. (1 Kor. 7:34, 35) Natoñojokeleña nami hinateli kwikala nayuma yejima muchinu chihandiluku. Dichi natwamijaku chuma chalema hambidi, dikwila nawu kudihana nakumukalakela Yehova namuchima wejima. Mwituña dadiha mwakekala yuma yayivulu yitwakadiluñishaña. Nsona yami yinasweja kukeña hiMasamu 145:16, yatulejaña chikupu nawu Yehova wamba ‘katiyisha kuwaha yuma yejima yikweti wumi.’

Hela chakwila nidi nayaaka 91, nichidi nakola kumujimba chanti, dichi natwalekahu kuzata wupayiniya. Mudimu wawupayiniya wanleñelaña nidimoneña neyi nichidi chañadima nawa wanleñela kwikala nachihandilu chachiwahi. Chinashikili muEl Salvador, diyi mpinji yatachikiluwu mudimu wakushimwina. Hela chakwila Satana halekaña kudimbululaku, mudina ituña mudi akwakushimwina akubadika ha 39,000. Chumichi chakoleshaña chikuhwelelu chami chikupu. Chakadi nikujina spiritu yajila yaYehova yinakukwasha antu jindi chinakuzatawu nañovu!