NKOÑI wendaña wakuUnited States wasemukilili muJapan wafuntili muJapan neyi kamishonali haSeptember 6, 1926. Adiña nakumuhembelela kudi muntu wumu wadiña nakutambwila magazini yaKaposhi Kakutalila watachikili izanvu dakudiza Bayibolu muKobe. Atudizi aBayibolu apompeli kupompa kweneni kwatachi haJanuary 2, 1927 mumusumba weniwu. Apompeli antu 36 nawa 8 apapatisheweli. Atachikili kuzata mudimu chiwahi, hanu dinu idi izanvu danyanya dadi kushimwina ñahi antu 60 miliyoni amuJapan akeñeleña kumona chejeji chansañu yalala yamuBayibolu?

MuMay 1927, Atudizi aBayibolu atachikili kampeni kakushimwina hatooka kulonda atiyakeshi mpanji jajivulu jamuBayibolu. Hakwila nawu atiyakeshi mpanji yatachi yadiña muOsaka, amana kwetu ashili yinjikijilu mutunyikwakwa twekala kunsa yanyikwakwa yamaneni niyipamba yamaneni mumusumba wejima nawa yipapilu yakutambika nachu antu 3,000 ayihanini kudi antu aya mpuhu. Ahanini jihandibilu jakushika ku 150,000 nikutiyakesha mpanji hayipapilu yansañu yamaneni yamuOsaka nihajitiketi jamasuwa 400,000. Hefuku dakuhana mpanji, ndeki jiyedi jayili nakuholola mahandibilu 100,000 mumusumba wejima. Antu akushika ku 2,300 apompeleli Mwitala deneni damuOsaka Asahi nakutiyilila kumpanji yahosheleña nawu ‘Wanta waNzambi Keña Wushiki.’ (“Kingdom of God Is at Hand”) Antu amakwawu amavulu ayifuntishili muloña iluña dakupompela dakeheli. Chamanini mpanji, antu akushika ku 600 apompeli ashalili kumpanji yikwawu yachibalu chakwihula malwihu niñakwilu. Hatukweji tukwawu twalondeleluhu, mpanji jaBayibolu jawantu amavulu ajihanini muKyoto nimunyisumba yikwawu yakumujika waJapan.

MuOctober 1927 Atudizi aBayibolu aloñesheli kuya nakuhana jimpanji muTokyo. Yipapilu yakutambika nachu antu ayihanini cheñi kudi antu aya mpuhu kushilahu nikana mpumba, mamembala amwitala danshimbi, akulumpi ayipompelu niawamashidika. Azatishili yipamba, yipapilu yansañu kushilahu nimahandibilu 710,000 nawa antu 4,800 apompeli nakutiyilila jimpanji jaBayibolu jisatu mumusumba weneni waJapan.

Akolopota (apayiniya) azatili mudimu walema chikupu hakushimwina nsañu yaWanta kumatala awantu. Matsue Ishii, wadiña hakachi kawakolopota atachi muJapan nanfumwindi Jizo, azatilili mwiluña deneni chikupu munidi ituña, kufuma kuSapporo kukabeta kachimunswa nakushika kuSendai, Tokyo, Yokohama, Nagoya, Osaka, Kyoto, Okayama, niTokushima. Muhela Ishii nimuhela wachikulumpi, Sakiko Tanaka, avwalili yakuvwala yatelela hakuya nakuhempula akulumpi anfulumendi. Wumu hakachi kanawa walombeli nyikanda 300 yadiña namutu wakwila nawu The Harp of God niDeliverance yakusha mulayibulali yamukaleya.

Katsuo niHagino Miura atambwili nyikanda  yayinkeluwu kudi Muhela Ishii, ayitañili nawa elukili nawu hichalala. Apapatisheweli mu 1931 nawa ekalili akolopota. Haruichi naTane Yamada, niantaña jawu amavulu adizili nsañu yaWanta henohu kanda ashiki muchaaka cha 1930. A Yamada nañodindi atachikili mudimu wawukolopota nawa mwanawu wamumbanda Yukiko, wayili nakuzatila haBeteli muTokyo.

Kunyaka nyotoka yadiña yalema wuseya nankashi nawa nyikwakwa yadiña yatama. Dichi aKazumi Minoura niakolopota awatwansi azatishileña matala adi neyi nyotoka mwabulili injini. Ijina danawa maYehu dafumini kudi muntu wakuluka yitembi hakwendesha makalu wejina daYehu, wekalili mwanta muIsarela. (2 Anya.10:15, 16) MaYehu asatu amaneni ejima adina najimita 2.2 muwihi, mukutoha jimita 1.9, nawa mukuleha adiña najimita 1.9 nawa mwikalu dimu mwakamenaña apayiniya atanu nawumu. Kubombelahu, kasanji kamutayi kamuJapan katuñili makinga 11 amaYehu anyanya endeshileñawu kudi amayala ayedi. Kiichi Iwasaki, wazatiluku mudimu wakutuña maYehu wanukaña nindi, “Yehu niYehu yadiña netenti nibatili yamotoka yakwambwilaku malayiti.” Akolopota adiña nakutoñeka chejeji chansañu yalala muJapan mwejima nawa adiña nakushinjika nikukoka maYehu mujimpidi nimuyinekineki yakukabeta kachimunswa chaHokkaido nakushika kukabeta kachidiilu kuKyushu.

Kolopota Ikumatsu Ota wahosheli nindi: “Chitwashikili mumbaka, twemikili maYehu etu kuchikumu chakaloña hela heluña habulili yuma. Twasambilili kuhempula amayala aya mpuhu mumbaka chidi neyi mwanta waboma, nkumininaku twayili kumatala awantu nakuyileja nyikanda yetu. Chitwamanishili kushimwina mwiluña dejima, twayili mumbaka yikwawu.”

Dadiña “ifuku dayuma yanyanya” chelili izanvu dawaTudizi aBayibolu 36 apompi kupompa kwawu kweneni kwatachi muKobe. (Zek. 4:10) Chimwahitili hohu yaaka yitanu mu 1932, chileji chawakolopota niakwakushimwina 103 amuJapan chamwekesheli nawu ahanini nyikanda yakubadika 14,000. Makonu, aloñesha chiwahi mudimu wakushimwina kumaluña kudi antu amavulu muJapan nawa kwakwihi nawakwakushimwina 220,000 anakutoñeka chejeji chawu muJapan mwejima.—Kufuma munkalaña jetu muJapan.