1, 2. Yumanyi yahimpikili hefuku daPentekosta 33 C.E., nawa hiyanyi ekalili antu jaYehova amaha? (Talenu mwevulu wakutachikilahu.)

 IFUKU daPentekosta 33 C.E. dadiña ifuku dalema nankashi muchihandilu chawantu jaYehova hamaseki. Kwadiña yuma yalema yahimpikili. Yehova wazatishili spiritu yindi hakutuña munza wawuha, Isarela wakuspiritu dikwila nawu ‘aIsarela aNzambi.’ (Ŋal. 6:16) Antu jaNzambi ayilukilileña kuhitila mukuyalamisha amayala kufuma tuhu mumafuku aAbarahama, ilaña yuma yahimpikili hanidi ifuku. Hela chochu, Pawulu wasonekeli kutalisha hadi antu amuniwu munza wawuha nindi: “Kwalama kwalala hichuma chakumuchima, muspiritu.”—Rom. 2:29.

² Apostolu niatumbanji aKristu amakwawu akubadika nkulakaji apompeleli mwitala dahewulu muYerusalema diwu adiña atachi kwikala mumunza wawuha waNzambi. (Yil. 1:12-15) Atambwilili spiritu yajila nawa ekalili anyana kaNzambi akuspiritu. (Rom. 8:15, 16; 2 Kor. 1:21) Chumichi chamwekesheli nawu Yehova wetejeli mulambu waKristu nawa chitiyañenu chachiha chasinsili hachitiyañenu chaNshimbi. (Luka 22:20; tañenu Aheberu 9:15.) Awa atumbanji ekalili munza waYehova wawuha, antu jindi amaha. Spiritu yajila yayikwashili kushimwina mumadimi ashiyashana ahosheleñawu aYudeya niantu  abalumukili nakwikala aYudeya, antu wenawa afumini muWanta wejima wawaRoma nakuya kuYerusalema nakwanakana Chawija chawaYudeya chaNyilungu, hela Pentekosta. Antu wenawa atiyili mumadimi awu “nyidimu yaNzambi yañovu” yashimwinineña akwaKristu awayishewa naspiritu.—Yil. 2:1-11.

3-5. (a) Indi Petulu wayilejeli aYudeya chumanyi hefuku daPentekosta? (b) Yumanyi yayiwahi yazatiluwu yaleñeleli munza wawantu jaYehova wawuha wutwalekuhu kutohelaku muyaaka yakusambila?

³ Yehova wazatishili kapostolu Petulu hakulombola aYudeya niantu abalumukili nakwikala aYudeya kulonda ekali antu amumunza wawuha, chipompelu chawakwaKristu. Hefuku daPentekosta, Petulu wayilejeli aYudeya chakadi woma nindi atela kumukuhwelela Yesu, iyala ‘apopeleluwu hamutondu’ muloña ‘Nzambi namubalumuni dehi kwikala niMwanta nawa diyi Kristu.’ Chelili izaza dihuli chuma chatela kwilawu Petulu wakwili nindi: ‘Balumukenu munyichima yenu, ayipapatishi wejima wenu mwijina daYesu Kristu, kulonda kuyanakena nyiloña yenu; mutambuli chamukunkulu chaspiritu yajila.’ (Yil. 2:22, 23, 36-38) Hadina ifuku, antu akushika ku 3,000 ayibombeleleli kumunza wawuha wawaIsarela akuspiritu. (Yil. 2:41) Kuhiñahu, mwafumini yuma yayiwahi chelili apostolu atwalekuhu kushimwina neyena. (Yil. 6:7) Munza wawuha watwalekeluhu nakutoha.

⁴ Mukuhita kwamafuku, mudimu wakushimwina washikili nimuSamariya nawa mwafumini yuma yayiwahi. Antu amavulu ayipapatishili kudi Fwilipu mukwakushimwina nsañu yayiwahi, ilaña hiyatambwilili spiritu yajila hohenohuku. Izanvu dalombolaña dadiña muYerusalema datemesheli apostolu Petulu niYowanu kudi aSamariya etiyili nawa ‘chayinañikiluwu makasa, atambwilili spiritu yajila.’ (Yil. 8:5, 6, 14-17) Dichi, ana aSamariya niwena ayiwayishili naspiritu nawa ekalili aIsarela akuspiritu.

⁵ Muchaaka cha 36 C.E., Petulu amuzatishili cheñi kulonda yakwashi antu amakwawu kwikala mumunza wawuha wawaIsarela akuspiritu. Chumichi chamwekeni hampinji yamushimwininuwu mukulumpi wawamashidika awaRoma Konelisu niantaña jindi niamabwambu jindi. (Yil. 10:22, 24, 34, 35) Bayibolu yashimuna nawu: ‘Iku Petulu wuchidi kuhosha . . . , spiritu yajila hiyikuholokela hadi antu ejima [abulili kwikala aYudeya] adiñi nakutiya. Niakwakwalama enjili naPetulu adiñi etiya, chanachimonuwu, hiyakuhayama wejima wawu nawu, Komana hadi aJentili nihena nawa anechiluhu chawana chaspiritu yajila.’ (Yil. 10:44, 45) Dichi, akwakwitiya adiña aJentili abulili kwalama niwena ekalili antu amumunza wawuha wawaIsarela akuspiritu.

6, 7. Munjilanyi mwateleleli kuzatawu antu amumunza wawuha neyi ‘antu ejina daYehova,’ nawa elili ñahi mwenimu?

⁶ Hakupompa kwezanvu dalombolaña  dawakwaKristu amuyaaka nkulakaji yakusambila kwadiña mu 49 C.E., kambanji Yakoba wahosheli nindi: ‘Shimona [Petulu] nashimuni dehi chasambililiyi Nzambi kuhempula aJentili, kulonda kutambwilamu antu ejina dindi.’ (Yil. 15:14) Hakachi kanawa antu amaha ateneneñawu hejina daYehova hadiña aYudeya niakwakwitiya abulili kwikala aYudeya. (Rom. 11:25, 26a) Chimwahitili yaaka, Petulu wasonekeli nindi: ‘Enu hamwaka himwadiñi munzaku, ilaña katataka mwekala dehi antu jaNzambi.’ Petulu wateneni mudimu wayinkeluwu nindi: ‘Hakwila enu mumunza watondewa, muwupristu wawanta, mumuchidi wajila, mumunza wambala waNzambi; kulonda mutiyakeshaña kashinshi kakeni kayena wayitambikili nindi mufumi mumwidima, mwiñili muchejeji chindi chakuhayama.’ (1 Pet. 2:9, 10) Ateleleli kuhameka Muntu emeneneñaku nikulemesha ijina dindi hatooka. Ateleleli kwikala ahamuka muloña adiña ayinsahu jaYehova, Mwanta Wakuleña Kwejima.

⁷ Neyi chochadiña kudi aIsarela akumujimba, aIsarela akuspiritu diwu ateneniyi Yehova nindi “antu ami nadiwumbilili ami aweni, nami ashimunaña jakunshimeka.” (Isa. 43:21) Hakumwekesha nawu anzambi ejima adifukwileñawu antu hayina mpinji adiña akutwamba, akwaKristu akusambila ashimwini chakadi woma nawu Yehova diyi Nzambi wumu hohu walala. (1 Tesa. 1:9) Ashimwinini wunsahu hadi Yehova niYesu “nimuYerusalema, nimwahita Yudeya mwejima, nimuSamariya, nikwakumina maseki.”—Yil. 1:8; Kol. 1:23.

8. Indi Pawulu wayisoñamishili nindidi antu jaNzambi amuyaaka nkulakaji yakusambila?

⁸ Kapostolu Pawulu wadiña ‘muntu wejina daYehova’ wahamuka wamuyaaka nkulakaji yakusambila. Wahakwililuku wanta waYehova chakadi woma hampinji yemeniyi kumesu awakwamaana asenji nakuhosha nindi “yowu Nzambi waleñeli mpata yamunu mwishina niyuma yejima yidumu, diyi Mwanta wamwiwulu niweseki.” (Yil.17:18, 23-25) Kwakwihi nakumanisha njila yindi yamuchisatu yawumishonali, Pawulu wasoñamishili antu ejina daNzambi nindi: “Ami neluki nami chinakafumahu, atuñwidi azuwa akeñila mukachi kenu, hiyakaanakena nyikokuku. Hela mukachi kenwenu aweni mwakanyamuka antu akuhosha yuma yaheña, akadikokela atumbanji awenawu.” (Yil. 20:29, 30) Awa akwakusekesha amwekeni hakumana kwayaaka nkulakaji yakusambila.—1 Yow. 2:18, 19.

9. Chumanyi chayimwekeneni ‘antu ejina daYehova’ chafwiluwu apostolu?

⁹ Chelili apostolu anafwi dehi, akwakusekesha avulili nawa atuñili machechi aKristendomu. Chatela amwekesheña nawu ‘hiyantu ejina daYehova,’ awa akwaKristu akwakusekesha afumisha niijina daNzambi mumaBayibolu awu amavulu abalumunañawu. Alondelaña tushidikilu twawusenji nawa amusawula Nzambi kuhitila mukutañisha yuma yabula kwikala munsona, kulwa njita yamonañawu nawu yajila nikwikala nayililu yatama. Dichi hayaaka yayivulu yahitiluhu, Yehova wadiña nawakwakudifukula ashinshika antesha hohu hamaseki, ilaña hikwadiña ‘antu ejina dindi’ adiloñesha neyi izanvuku.

10, 11. (a) Yumanyi yashimwineñahu dehi Yesu muchishimu chindi chatidiku namatahu? (b) Chishimu chaYesu chashikijeweli ñahi mu 1914, nawa mwafumini chumanyi?

¹⁰ Muchishimu chindi chatidiku namatahu, Yesu washimwineñahu dehi nindi kukekala mpinji yikakamawu antu tulu twakuspiritu twaletesheli kwikali akwakusekesha. Wahosheli nindi ‘antu chakakamawu tulu,’ Diyabolu wakakuwa matahu mwiha mwakuwiliyi Mwana kamuntu  mbutu yatidiku. Tidiku nimatahu akulilili hamu kushika ‘nimpinji yakukuma kwanyaka yinu.’ Yesu walumbulwili nindi “mbutu yayiwahi” yemenañaku ‘anyana kaWanta’ nawa “matahu” diwu “anyana kawatama.” Kumafuku akukuminina, Mwana kamuntu wakatemesha “akwakumuna” indi, añelu, kulonda akambuli tidiku yachifwikija namatahu. Anyana kaWanta akayipompesha. (Mat. 13:24-30, 36-43) Indi chumichi chamwekeni ñahi nawa chayikundama ñahi antu jaYehova hanu hamaseki?

¹¹ ‘Kukuma kwanyaka yinu’ kwatachikili mu 1914. Hampinji yikwadiña njita muchaaka chenichi akwaKristu awayishewa antesha ‘anyana kaWanta,’ adiña muwuduñu wakuspiritu muBabiloni Muneni. Muchaaka cha 1919, Yehova wayikuulili, chumichi chamwekesheli chaambu hakachi kawu ‘namatahu’ hela akwaKristu akulumbisha. Wapompesheli ‘anyana kaWanta’ kulonda ekali mwizanvu dawantu hakushikija wuprofwetu waIsaya wakwila nawu: ‘Ituña divwaliki ifuku dimu? Munza wuvwaliki hohenohu? Muloña chafunyishiliyi Ziyona, hakuvwala ninyanindi.’ (Isa. 66:8) Ziyona, kuloñesha kwaYehova kwayileñaleña yakuspiritu kwavweli anyana awayishewa naspiritu nawa kwayipompesha nakwikala munza.

12. Indi awayishewa amwekeshaña ñahi nawu ‘hiyantu ejina daYehova’ makonu?

¹² Kufwana akwaKristu akusambila, ‘anyana kaWanta’ awayishewa niwena ekalili ayinsahu jaYehova. (Tañenu Isaya 43:1, 10, 11.) Chumichi chayileñeleli kwikala ambukaku hamuloña wayililu yawu yawakwaKristu nimudimu wawu wakushimwina ‘iyi nsañu yayiwahi yaWanta . . . kulonda yakayilili nyunza yejima wunsahu.’ (Mat. 24:14; Fwi. 2:15) Muniyi njila, anakwashi antu amavulu kwikala nawubwambu wawuwahi naYehova.—Tañenu Danyeli 12:3.

13, 14. Hakwila adifukuli nikumuzatila Yehova munjila yatelela, antu abula kwikala aIsarela akuspiritu atela kwiladi, nawa chumichi achishimwineñahu dehi ñahi muwuprofwetu wamuBayibolu?

¹³ Neyi chitwadizili muchibaaba chinafumuhu,  muIsarela wakushankulu, enyi adifukwileña kudi Yehova munjila yatelela, ilaña enyi wenawa ateleleli kudikunda nawantu jaYehova atiyañeniyi nawu chitiyañenu. (1 Anya. 8:41-43) Munjila yoyimu, makonu antu abula kwikala aIsarela akuspiritu atela kudikunda nawantu jaYehova, ‘anyana kaWanta’ dikwila nawu aYinsahu jaYehova awayishewa.

¹⁴ Atuprofwetu ayedi adiñaku kunyaka ashimwineñahu dehi nawu munanu mafuku akukuminina antu amavulu akenza nakudifukula kudi Yehova hamu nawantu jindi. Isaya waprofweteli nindi: ‘Nyunza yayivulu yakaya nakuhosha nawu, Tuyenu twakakanduki kumpidi yaYehova, kwitala daNzambi yaYakoba; akatutañishi mwendelañayi, kulonda twakendaña munjila jindi; muloña muZiyona mwakafuma nshimbi, kuYerusalema kwakafuma izu daYehova.’ (Isa. 2:2, 3) Chochimu, kaprofwetu Zekariya washimwineñahu dehi nindi ‘antu amavulu, ninyunza yañovu, yakenza nakukeñakeña Yehova wamazaza muYerusalema, nakulembelela wuselewa wakudi Yehova.’ Wayimweni neyi ‘ikumi dawamayala akunyunza yamadimi ejima,’ akakwata kwihina daIsarela wakuspiritu nakuhosha nawu: ‘Tunakukeña kuya nenu, muloña tunatiyi nawu Nzambi wekala nanenu.’—Zek. 8:20-23.

15. Mumudimwinyi ‘mwayañawu’ “anyikoku acheñi” hamu nawaIsarela akuspiritu?

¹⁵ “Anyikoku acheñi” ‘ayaña’ nawaIsarela akuspiritu mumudimu wakushimwina nsañu yayiwahi yaWanta. (Maku 13:10) Ekala hakachi kawantu jaNzambi akweti “kabiña wumu” hamu nawawayishewa, alombolañawu kudi “kabiña walala,” Kristu Yesu.—Tañenu Yowanu 10:14-16.

16. Yumanyi yikelayi Yehova hakuleta “lukadi lwasweja”?

¹⁶ Hanyima yakumujilumuna Babiloni Muneni, antu jaYehova ejima akayilukuka nawu ayijilumuni nawa haniyi mpinji twakakeña kwikala muchiswamu chikaloñeshelayi Yehova ambuñindi. Chineli iku kulukuka kwakasañumuna “lukadi lwasweja,” Yehova yomweni diyi wakalombola yuma hampinji yakatachika njita yindi yatoñolayi. (Mat. 24:21; Ezek. 38:2-4) Hayina mpinji, Gogi wakalukuka ‘antu apompeshawu dehi afumishawu dehi munyunza,’ dikwila nawu antu jaYehova. (Ezek. 38:10-12) Chikamwekana chumichi, Yehova wakamwina antu jindi nawa wakalwa njita naGogi niamashidika indi. Yehova wakatohesha wanta windi nikujilika ijina dindi muloña wahosha nindi: ‘Akañiluka kumesu anyunza yayivulu. Akeluka nawu yami Yehova.’—Ezek. 38:18-23.

17, 18. (a) Nshimbinyi yikatambwilawu antu jaYehova chakayilukukawu kudi Gogi? (b) Neyi tunakukeña netu Yehova yakatukiñi, twatela kwiladi?

¹⁷ Gogi chakatachikayi kulukuka, Yehova wakaleja ambuñindi nindi: ‘Enu antu ami inzenu, mwiñili mumatalenu mwakadenzelelumu; batamenu kapinji kanti ndombu yihiti.’ (Isa. 26:20) Hayina mpinji yakala, Yehova wakahana nshimbi yakutupulwisha nachu, nawa ‘mumatala’ mwatela kwikala muyipompelu yetu.

¹⁸ Dichi neyi tunakufwila netu Yehova yakatukiñi hampinji yalukadi lwasweja, twatela kwiluka netu Yehova wukweti antu hamaseki adiloñesha muyipompelu. Twatela kutwalekahu kwikala nawantu jindi nikutwalekahu kudikunda chikupu nayipompelu yetu. Tushimwineña namuchima wejima neyi chashimwiniyi ñimbi yamasamu nindi: “Wamwinu wambala waYehova; nkisu yeyi yiikali hadi antu eyi.”—Mas. 3:8.