1, 2. (a) Chumanyi chakeñeleña kwilukawu anlomboli amakwawu amukwitiya, nawa Petulu wayakwili nindidi? (Talenu mwevulu wakutachikilahu.) (b) Chumanyi chamukwashili Petulu kwikala nawulobu hayina mpinji?

 CHIMWAHITILI mafuku antesha kufuma hafwiliyi Yesu, kapostolu Petulu wadimweni nezanvu dawantu awukatu. Adiña anlomboli asweja ñovu amukwitiya kwawaYudeya, akasili kafuta kakumujaha Yesu. Awa antu akeñeleña nawu ayilumbulwili chiwahi. Petulu wokili muntu wadiña chifwayi kufuma tuhu hasemukiliyi nawa akeñeleña kwiluka ñovu niijina dazatishiliyi Petulu hakwila chumichi. Kapostolu Petulu wakwili chakadi woma nindi: ‘Mwijina daYesu Kristu wakuNazareta, imwajahilili hamutondu, asañulawu dehi kudi Nzambi mudi afu, mudi yena dimu munakoleli iwu muntu nemani kunu kumesu enu.’—Yil. 4:5-10.

² Hakusambila Petulu wamukaanini Yesu kapampa kasatu muloña watiyili woma. (Maku 14:66-72) Chumanyi chamuleñeleli kwikala nawulobu wamuchidiwu chemeniyi kumesu awanlomboli amukwitiya? Petulu wakuhweleleli chikupu nindi Yesu amusañwili nawa spiritu yajila yamukwashili hama. Chumanyi chamukwashili kapostolu kukuhwelela chikupu nindi Yesu wamumi? Nawa muloñadi wutwatela kukuhwelela chumichi?

3, 4. (a) Anyi asañwiluwu henohu apostolu kanda asemuki? (b) Yesu wasañwili antu amuchidinyi?

³ Apostolu aYesu elukili nawu afu akayisañula; muloña antu  atachikili kuyisañula henohu apostolu kanda asemuki. Elukili nawu Nzambi wayinkeli atuprofwetu aElija naElisha ñovu yakukoña yihayamisha yamuchidiwu. (1 Anya. 17:17-24; 2 Anya. 4:32-37) Iyala wumu wasañukili chelili amuumbili mwijamu nakukunka kumafwaha aElisha. (2 Anya. 13:20, 21) AkwaKristu akusambila akuhweleleli iyi nsañu yamuNsona neyi chitwakuhwelela netu Izu daNzambi dalala.

⁴ Chakadi nikujina, wonsu wetu twatiyaña kuwaha nankashi kutaña nsañu yawantu asañwiliyi Yesu. Chasañwiliyi mwana weyala wasemuka nkawindi wamumbanda nfwila, ona mumbanda watela wahayamini nankashi. (Luka 7:11-15) Hampinji yikwawu, Yesu wasañwili kansi wamumbanda wayaaka 12 yakusemuka. Anvwali jindi aneñeli atela ahayamini nawa azañaleli chikupu chelili mwanawu amusañuli. (Luka 8:49-56) Antu atalileña atela atiyili kuwaha chelili amumoni Lazaru nakwidika mwijamu wamumi nawa wakola.—Yow. 11:38-44.

5. Indi kusañuka kwaYesu kwambukili ñahi nakusañuka kwawantu asambilili?

⁵ Apostolu elukili nawu kusañuka kwaYesu kwadiña kwambukaku nakusañuka kwasambilili. Antu asambililuwu kusañula, ayisañwili nanyijimba yawuntu nawa afwili cheñi. Yesu amusañwili namujimba wakuspiritu wakabulaña kufwa. (Tañenu Yililu 13:34.) Petulu wasonekeli nindi Yesu ‘amujahili namujimba wawuntu ilaña amusañwili namujimba wakuspiritu.’ Cheñi nawa ‘wekala kuchikasa chaNzambi chachidiilu; añelu niakwawanta niakwañovu anayileñeli kumwovwahila.’ (1 Pet. 3:18-22) Kusañuka kwakusambila kwadiña kwekomwesha nawa kwayihayamisha, ilaña kwosi kusañuka kunateli kwesekana nakusañuka kwaYesu kwachihayamisha chabadikaku.

6. Indi kusañuka kwaYesu kwayikwashili ñahi atumbanji twindi?

⁶ Kusañuka kwaYesu kwayikwashili chikupu atumbanji twindi. Hachidiñi wafwa neyi chakuhweleleluwu ayilumbu jinduku. Yesu amusañwili neyi muntu wakuspiritu wukweti ñovu nawa kwosi muntu wadi kumujaha. Kusañuka kwindi kwamwekesheli hatooka to-o nawu wadiña Mwana kaNzambi nawa chelukiluwu iyi nsañu, atumbanji azañaleli chikupu chatela aneñi nankashi. Kubombelahu, woma wamanini nawa ekalili nawulobu. Kusañuka kwaYesu dihu hashindamena nkeñelu yaYehova ninsañu yayiwahi yashimwinuwu chakadi woma kumaluña akwakulehi.

7. Yesu nakwiladi makonu, nawa malwihwinyi itwatela kudihula?

⁷ Hamu neyi ambuña Yehova, tweluka chikupu netu Yesu hadiña muntu walema hohuku. Makonu wamumi nawa nakulombola mudimu wunakukwasha antu ejima hamaseki. Chineli hiMwanta waWanta waNzambi wunakuyuula mwiwulu, Yesu Kristu keña yafumishi yuma yatama yejima heseki nikudibalumuna kwikala paradisa mwakashakama antu haya nyaka. (Luka 23:43) Neyi chakwila Yesu amusañwili wanyi, yumiyi hiyadi kuzatikaku. Hanu dinu, wunsahwinyi wutukweti wakukuhwelela netu Yesu amusañwili mudi afu? Indi kusañuka kwaYesu kwalema ñahi kudi etu?

8, 9. (a) Muloñadi anlomboli amukwitiya kwawaYudeya chalombeluwu nawu ijamu daYesu adihembi? (b) Chumanyi chamwekeni chelili ambanda enzi kwijamu?

⁸ Hanyima yakwila Yesu anamujahi dehi akulumpi awatupristu niAfwarisi ayili kudi Pilatu nakuhosha nawu: ‘Eyi Mwanta tunaanuki dehi netu iwu mukwakudimbana hadiñiyi wamumi welilaña nindi, Neyi munahiti dehi mafuku asatu akansañula mudi afu. Dichi lejenu antu akakoleshi kwijamu kushika  nikwifuku damuchisatu, mukunkulwayi atumbanji twindi akenza nakumwiyamu, akaleja antu nawu nasañuki mudi afu; kuluwañesha kwakukuminina kwakabadika kwakusambila. Pilatu hakuyila nindi, Mashidika akwakuhemba mudi nawu, yenu mwakakoleshuku mwonsu mumunatwesheli.’ Ichi dichi chuma cheliluwu.—Mat. 27:62-66.

⁹ Mujimba waYesu awushili mwijamu dapokweluwu mwilola nawa kwijamu ajikiluku nelola deneni. Anlomboli amukwitiya kwawaYudeya akeñeleña nawu Yesu yashakami mudina ijamu haya nyaka chakadi kumusañula. Ilaña Yehova wadiña nayitoñojoka yambukaku chikupu. Chenjiliyi Mariya Mandaleni niMariya mukwawu kwijamu hefuku damuchisatu, awanini ilola anadilañumunuku nawa kañelu washakaminuhu. Kañelu wayilejeli ambanda kutala mwijamu kulonda amoni nawu mwosiyi. Kañelu wahosheli nindi, ‘Hadi munuku, amusañula dehi.’ (Mat. 28:1-6) Yesu wadiña wamumi!

10. Wunsahwinyi wakusañuka kwaYesu washimwiniyi Pawulu?

¹⁰ Yuma yamwekeni hamafuku 40 alondeleluhu yamwekesheli chikupu nawu Yesu amusañwili. Kapostolu Pawulu washimwini mukwihihisha nsañu yamwekeni hakuyisonekela Akorinda nindi: ‘Nasambilili kuyileja nsañu yanlejeluwu ami, yeliluwu nawu, Kristu wafwili kukoola nyiloña yetu, mwomwaya nyikanda yajila; nawu, amujiikili, amusañwili mudi afu hefuku damuchisatu, mwomwaya nyikanda yajila; nawu, wamwekeni kudi Petulu, kulondelahu nikudi ikumi nayedi. Kulondelahu hakumwekana kudi ana kwetu apompeli hamu, kuyichinda abadikili nkulakaji jitanu; amavulu achidi kwoku nilelu, amakwawu anakami dehi tulu twakufwa. Kulondelahu hakumwekana kudi Yakoba, kulondelahu hakumwekana kudi apostolu ejima. Nkumininaku hakumwekana nikudami nawa, nafwana neyi mwana wavwalika wamwisu.’—1 Kor. 15:3-8.

11. Indi kusañuka kwaYesu kwamwekeni ñahi ‘mwomwaya Nyikanda Yajila’?

¹¹ Chikuma chatachi chaleñela twiluki netu Yesu amusañwili mudi afu chakwila nawu kusañuka kwindi kwamwekeni ‘mwomwaya Nyikanda Yajila.’ Izu daNzambi dashimwineñahu dehi nawu Yesu akamusañula. Chakutalilahu, Davidi wasonekeli nindi ‘washinshika’ waNzambi hiyakamushiya Mwijamuku. (Tañenu Masamu 16:10.) Hefuku daPentakosta 33 C.E., kapostolu Petulu wakunjikili iwu wuprofwetu hadi Yesu nindi: “[Davidi] chamwenañahu dehi chumichi, hakutena nsañu yakusañuka kwaKristu kwamudi afu, nindi hiyamushiyili mukaluñaku, hela mujimba windi hiwamweni kutokaku.”—Yil. 2:23-27, 31.

12. Anyi amumweni Yesu asañwiluwu?

¹² Chikuma chamuchiyedi chaleñela twiluki netu Yesu amusañwili chakwila nawu, tukweti wunsahu wawayinsahu amavulu amweni namesu. Kubadika hadi mafuku 40, Yesu asañwiluwu wamwekeni kudi atumbanji twindi mwitempa mwadiña ijamu, munjila yaya kuEmawusi nikumaluña amakwawu. (Luka 24:13-15) Wahosheli nawantu hamuntu hamuntu, kushilahu niPetulu nimazanvu awantu. Hampinji yimu, Yesu asañwiluwu wamwekeni kudi izaza dawantu akubadika ha 500. Kwosi muntu wunateli kukaana wunsahu wakushimuna kudi ayinsahu amavulu amweni namesuku.

13. Indi iyena dawatumbanji damwekesheli ñahi nawu Yesu amusañwili?

¹³ Chikuma chamuchisatu chaleñela twiluki netu Yesu amusañwili chakwila nawu, atumbanji twindi ashimwinineña iyi nsañu neyena. Ayikabishileña nikuyijaha muloña wakushimwina nsañu yakusañuka kwaKristu neyena. Neyi Yesu amusañwili wanyi, hela neyi nsañu yakusañuka yadiña yakutwamba, muloñadi Petulu chashililiyi wumi windi hakatoña nakushimwina nsañu  yakwila nawu Kristu amusañwili mudi afu kudi anlomboli amukwitiya amuheleli Yesu nawa akasili kafuta kakumujaha? Muloña Petulu niatumbanji amakwawu akuhweleleli chikupu nawu Yesu wadiña wamumi nawa walombweleña mudimu wakeñeleñayi Nzambi nindi awuzati. Cheñi nawa, kusañuka kwaYesu kwaleñeleli atumbanji twindi kukuhwelela nawu niwena akayisañula. Chakutalilahu, Setefwanu wafwili nakukuhwelela nindi akamusañula mudi afu.—Yil. 7:55-60.

14. Muloñadi chimwakuhwelela nenu Yesu wamumi?

¹⁴ Chikuma chamuchiwana chaleñela twiluki netu Yesu amusañwili chakwila nawu, tukweti wunsahu wunakumwekesha nawu nakuyuula neyi Mwanta nawa hiMutu wachipompelu chawakwaKristu. AkwaKristu alala anakuvulilaku. Komana chumichi chadi kuzatika neyi chakwila Yesu hiyamusañwiluku? Kafwampi hitwadi kutiyahu nsañu yinduku neyi amusañwili wanyi. Ilaña tukweti yikuma yatuleñelaña kukuhwelela chikupu netu Yesu wamumi nawa nakutulombola hakushimwina nsañu yayiwahi mukaayi kejima.

15. Muloñadi kusañuka kwaYesu chikwatwinkaña wulobu wakushimwina?

¹⁵ Kusañuka kwaKristu kwatwinkaña wulobu wakushimwina. Kufuma tuhu mumafuku aYesu, ayilumbu jaNzambi aneseki kuzatisha yitwa yejima hakufwila kulekesha mudimu wakushimwina nsañu yayiwahi, chidi neyi akwakusekesha, madombu, kulekesha mudimu wetu, kukabisha nikujahana. Ilaña ‘kwosi chitwa chatuchililawu’ chinakañeshi mudimu wetu wakushimwina Wanta nikwilisha atumbanjuku. (Isa. 54:17) Hitwachiinaña antu azatishañayi Satana hela añamba jinduku. Yesu wudi nanetu nakutukwasha neyi chochatukaniniyi. (Mat. 28:20) Hitwatela kuchiinaku, chili akuzata hakumina ñovu jawu, ayilumbu jetu hiyakatwesha kutulekeshaku.

16, 17. (a) Indi kusañuka kwamwekeshaña ñahi nawu yuma yatañishileñayi Yesu yalala? (b) Kwesekeja naYowanu 11:25, Nzambi wamwinka Yesu ñovu yamuchidinyi?

¹⁶ Kusañuka kwaYesu kwamwekeshaña chikupu nawu yuma yejima yatañishileñayi yalala. Pawulu wasonekeli nindi neyi chakwila Kristu hiyamusañwili mudi afuku, chikuhwelelu chawakwaKristu nimudimu wakushimwina wadi kwikala wamukunkulwayi. Muntu wumu wadiza jaBayibolu wasonekeli nindi: “Neyi Kristu amusañwili wanyi, . . . AkwaKristu adi kuyidimba nankashi nawa chakadi kumonañahu dehi.” Neyi chakwila Yesu amusañwili wanyi, dikwila nawu Nsañu yayiwahi yadikwikala hohu neyi mpanji yakuneñesha yahosha hadi muntu wamuwahi nawa wamaana ajahiluwu kudi ayilumbu jindi. Ilaña Kristu amusañwili, chumichi chamwekeshaña nawu yuma yejima yatañishiliyi niyahosheliyi nindi yakamwekana kumbidi yalala.—Tañenu 1 Akorinda 15:14, 15, 20.

¹⁷ Yesu wahosheli nindi: “Yami kusañuka; Yami kuhanda. Muntu wankuhwelelami, hela wukufwa wakahanda.” (Yow. 11:25) Awa mazu amawahi amba kashikijewa. Yehova wamwinka Yesu ñovu yakusañula afu bayi neyi akasañukila kuwumi wakuspiritu nakuya mwiwulu hohuku, ilaña niantu amavulu akasañulawu nakuchiñeja kwawumi wahaya nyaka hamaseki. Mulambu waYesu watookeshaña nawa chamusañwiluwu chaya mukwila nawu hikwamba kekala cheñi kufwaku. Iyi nsañu yatela kutukolesha hakwila tuumiki kweseka kwejima nikwikala nawulobu kulonda tubuleña kuchiina kufwa.

18. Kusañuka kwaYesu kwamwekeshaña chumanyi?

¹⁸ Kusañuka kwaYesu kwatuleñelaña tukuhweleli chikupu netu antu ahamaseki akayisompesha kwesekeja nanshimbi jaYehova  jajiwahi. Hampinji yahosheleñayi nezanvu dawamayala niambanda apompeli muAtenisi wakushankulu, Pawulu wahosheli nindi: ‘[Nzambi] wakasompesha matuña mwaloña, neyala anafuukuliyi dehi. Mwenomu nakoleshumu dehi kudi antu ejima, nanochu chanamusañuliyi mudi afu.’ (Yil. 17:31) Mwamweni, Yesu diyi Nsompeshi atondawu kudi Nzambi, nawa tunateli kukuhwelela chikupu netu wamba kasompesha choloka nawa mukukeña.—Tañenu Isaya 11:2-4.

19. Kukuhwelela mukusañuka kwaKristu kwatuleñelaña kwiladi?

¹⁹ Kukuhwelela mukusañuka kwaYesu kwatusañumunaña kwila nkeñelu yaNzambi. Neyi chakwila wadihanini wanyi nakufwa hela neyi amusañwili wanyi, mutenowu twadi kwikala muwuduñu wanshidi nikufwa. (Rom. 5:12; 6:23) Neyi Yesu amusañwili wanyi anetu nawa twadi kuhoshaña netu: “Tukumini dakudya nakunwa, muloña kumadiki tukufwa.” (1 Kor. 15:32) Hela chochu hitweñija mutu muchisekuku. Ilaña, twalemesha nsañu yitwakuhwelela yakusañuka nawa twafwilaña kumwovwahila Yehova muyuma yejima.

20. Indi kusañuka kwaYesu kwamwekeshaña ñahi nawu Nzambi wukweti ñovu?

²⁰ Kusañuka kwaKristu kwamwekeshaña nawu Yehova wukweti ñovu nankashi nawa diyi ‘wasomwenaña antu amukeñakeñaña.’ (Heb. 11:6) Yehova wazatishili ñovu nimaana hakumusañwila Yesu kuwumi wamwiwulu wabulaña kufwa. Dichi, Nzambi wamwekesheli wuswa windi wakushikija yikaninu Yindi yejima. Ichi chabombelamu chikaninu chaNzambi chawuprofwetu chamwekeshaña nawu ‘mwana’ wadimena wakazata mudimu weneni chikupu hakumanisha kukala kwakundama kuwanta waNzambi. Hakwila nawu chumichi chizatiki, Yesu wateleleli kufwa nikumusañula.—Kutach. 3:15.

21. Indi kuchiñeja kwakusañuka kwalemenadi kudi enu?

²¹ Komana mwamusakililaña wanyi Yehova watwinkeli kuchiñeja kwalala kwakusañuka? Nsona yatuleja chikupu nawu: “Tiya, tabanaka yaNzambi hiyidi nawantu; yena wakashakama nawu, niwena akekala antu indi; Nzambi yomweni wakekala nawu, wakekala Nzambi yawu. Wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku. Yuma yakusambila yinahiti dehi.” Kapostolu Yowanu washinshika diyi alejeluwu iku kuchiñeja kwakuwahi nawa amwilili nawu: ‘Sonekaku, muloña mazu awa atela kuyikuhwelela, alala.’ Yowanu watambwilili ichi chimwenu chonenewa kudinyi? Ichi chimwenu chafumini kudi Yesu Kristu asañwiluwu.—Chim. 1:1; 21:3-5.