Muyaaka nkulakaji yakusambila C.E., kapostolu Pawulu walejeli aeluda akalakeleña muchipompelu chamuEfwesesa nindi: ‘Dihembenu enu aweni, hembenu ninyikoku yejima yanayikunjikuwu kudi spiritu yajila kwikala atubiña, mudiishi chachiwahi chipompelu chaNzambi chalandiliyi namashi indi yomweni.’ (Yil. 20:28) Mudimwinyi wazataña spiritu yajila hakutonda aeluda niankoñi akuzatila makonu?

Chatachi, spiritu yajila yakwashili ansoneki aBayibolu kusoneka yuma yakeñekaña kudi aeluda niankoñi akuzatila hakwila ashikuhu. Yuma 16 yakeñekaña hakwila aeluda ashikuhu ayisoneka ha 1 Timotewu 3:1-7. Yuma yikwawu ayisoneka cheñi hansona jidi neyi Titusa 1:5-9 niYakoba 3:17, 18. Yuma yakeñekaña kudi ankoñi akuzatila ayisoneka ha 1 Timotewu 3:8-10, 12, 13. Chamuchiyedi, antu ahamekaña nikutonda alombaña kulonda spiritu yajila yaYehova yiyikwashi kwiluka neyi mana kwetu nashikiji yuma yatelela yashimunawu muNsona yakeñekaña. Chamuchisatu, muntu anakuhamekawu watela kumwekesha yililu yanyikabu yaspiritu yajila yaNzambi muchihandilu chindi. (Ŋal. 5:22, 23) Spiritu yaNzambi yayilombolaña mumbadi jejima jakutonda aeluda niankoñi akuzatila.

Hinyi watondaña awa amana kwetu? Kunyima, nsañu yejima yakuhameka nikutonda aeluda niankoñi akuzatila ayitemesheleña kukasanji kamutayi kamunodu ituña. Hanitu tusanji, amana kwetu atondawu kudi Izanvu Dalombolaña diwu adiña nakuhituluka munsañu yakuhameka nikutonda amana kwetu. Kuhiñahu, kasanji kamutayi kadiña nakuleja izanvu dawaeluda. Cheñi aeluda alejeleña amana kwetu amaha anatonduwu nakuyihula neyi aneteji nawa anashikuhu kuzata mudimu weniwu. Nkumininaku, abidikileña kuchipompelu.

Indi muyaaka nkulakaji yakusambila antu ayitondeleña ñahi? Mpinji yikwawu apostolu adiña nakutonda antu awenawu chidi neyi mpinji yatondeluwu amayala atanu nayedi kulonda ataleña mudimu wakwanzañena anfwila yakudya yahefuku nifuku. (Yil. 6:1-6) Hela chochu, awa amayala adiña nakukalakala neyi aeluda henohu kanda ayinki iwu mudimu wukwawu.

Hela chakwila Nyikanda yajila hiyashimuna nsañu yejima kutalisha hachatondeleñawu antu kunyakaku, tukweti wunsahu wantesha wunakumwekesha chatondeleñawu. Bayibolu yatuleja nawu chafuntileñawu aPawulu naBaranaba  kumukala wawu halwendu lwatachi lwawumishonali, ‘Chanayitondeluwu akulumpi mwahita yipompelu yejima nakulomba nakuleka kudya, hiyakuyikunjika kudi Mwanta akuhweleleluwu.’ (Yil. 14:23) Chimwahitili yaaka, Pawulu wamusonekeleli mukwawu Titusa muyendeleleñawu nindi: ‘Diyi nsañu nakushiyilili muKereta, kulonda wuloñeshi yuma yasheli, wukunjiki akulumpi kumudimu wakutala akwawu munyikala yejima, neyi chinakulejeli.’ (Tit. 1:5) Chamwekana neyi Timotewu wendeli chikupu nakapostolu Pawulu niyena amwinkeli mudimu wowumu. (1 Tim. 5:22) Chakadi nikujina, ankoñi endaña diwu adiña namudimu wakutonda bayi neyi apostolu niakulumpi amuYerusalemaku.

Chineli tuneluki dehi iyi nsañu yamuBayibolu, Izanvu Dalombolaña dawaYinsahu jaYehova dinahimpi njila yakutondelamu aeluda niankoñi akuzatila. Kufuma haSeptember 1, 2014, amana kwetu anakuyitonda muniyi njila: Ankoñi añinza ejima akuhitulukaña nakanañachima munsañu yakuhameka amana kwetu amuñinza yawu. Hampinji yikwendelañawu yipompelu, akufwilaña kwiluka ana kwetu anahamekuwu nikuzata nawu mumudimu wakushimwina neyi chinatwesheki. Hanyima yakuhanjeka nezanvu dawaeluda hadi amana kwetu anahamekuwu, ankoñi añinza akwikalaña namudimu wakutonda aeluda niankoñi akuzatila amuyipompelu yamuñinza yawu. Muniyi njila, iyi ntanjikilu yesekanaku nantanjikilu yazatishileñawu muyaaka nkulakaji yakusambila.

Anyi azataña nyidimu yashiyashana hakutonda? Neyi dikalu, ‘nduñu wamaana nikashinshi’ diyi wukweti mudimu weneni wakudyisha akwetala. (Mat. 24:45-47) Chumichi chabombelamu kusandujola Nyikanda Yajila nawukwashu waspiritu yajila hakwila ahani nshimbi yayiwahi yashindamena haBayibolu yakwashaña yipompelu yamukaayi kejima. Nduñu washinshika watondaña cheñi ankoñi añinza ejima nimamembala aKomiti yaMutayi. Kasanji kamutayi nikena kakwashaña hakwila iyi nshimbi ayizatishi. Mazanvu awaeluda niwena akweti mudimu wakuhituluka chikupu muyuma yamuNsona yakeñekaña hakwila amana kwetu ashikuhu hakuyihameka kulonda ayitondi muchipompelu chaNzambi. Ankoñi añinza niwena akweti mudimu weneni chikupu wakushinshika nakanañachima nikulomba wukwashu waNzambi kutalisha hansañu yawana kwetu anahamekuwu kudi aeluda, kuhiñahu akutonda anashikuhu.

Neyi tutiyisha chiwahi chayitondañawu amana kwetu, tukwiluka chikupu mudimu wazataña spiritu yajila hakutonda. Tukuyikuhwelela chikupu nikuyilemesha amana kwetu atondañawu muchipompelu chawakwaKristu.—Heb. 13:7, 17.

Mukanda waChimwekeshu 11:3 watena ayinsahu ayedi akaprofweta hadi mafuku 1,260. Iyi nsañu yashimuna cheñi nawu kanyama “wakayimika mushindu, wakayijaha.” Ilaña hanyima ‘yamafuku asatu nachibalu,’ awa ayinsahu ayedi akayisañula nawa chumichi chikahayamisha antu akamonaña.—Chim. 11:7, 11.

Indi awa ayinsahu ayedi hiyanyi? Nsañu yashimunawu muniwu mukanda yatukwashaña kuyiluka. Chatachi, atuleja nawu ‘emenañaku nyiolive yiyedi nimanoñu ayedi.’ (Chim. 11:4) Chumichi chatwanukishaña manoñu ninyiolive yiyedi yashimunawu muwuprofwetu waZekariya. Iyi nyiolive yadiña nakwimenaku Nguvulu Zerubabeli niKapristu Muneni Yoshuwa, antu “ayedi awayishawu,” ‘emeni kwakwihi naMwanta weseki dejima.’ (Zek. 4:1-3, 14) Chamuchiyedi, ayinsahu ayedi ayishimuna nawu akoñeleña yinjikijilu yadifwana nayakoñeluwu aMosi naElija.—Esekejenu Chimwekeshu 11:5, 6 naKuchinda 16:1-7, 28-35 ni 1 Anyanta 17:1; 18:41-45.

Indi nsañu yekala muniyi nyikanda yiyedi yadifwanina hamu hadihi? Nsona yejima yinashimuni hadi awayishewa aNzambi alombweleña hampinji yakala yayesekeluwu. Hakushikijewa kwamukanda waChimwekeshu kapetulu 11, amana kwetu awayishewa adiña nakulombola hampinji yatachikili Wanta waNzambi kuyuula mwiwulu mu 1914 adiña nakushimwina ‘muyikeleyi’ hayaaka yisatu nachibalu.

Hanyima yakushimwina iku saña avwala yikeleyi, awa awayishewa ayijahili muchifwikija hampinji yayinatililuwu mukaleya hakapinji kantesha, mafuku asatu nachibalu achifwikija. Ayilumbu jawantu jaNzambi amweneña nawu mudimu wawu wunajiyi nawa atiyili kuwaha chikupu.—Chim. 11:8-10.

Hela chochu, neyi chashimwinuwu muwuprofwetu, chimwahitili mafuku asatu nachibalu awa ayinsahu ayedi ayisañwili. Bayi neyi awa awayishewa ayifumishili hohu mukaleyaku, ilaña ana atwalekeluhu kwikala ashinshika ayinkeli mudimu walema kudi Nzambi kuhitila mudi Mwanta wawu, Yesu Kristu. Mu 1919 adiña hakachi kawantu atondeluwu kukalakala neyi ‘nduñu wamaana nikashinshi’ kulonda akameneña yuma yakuspiritu yawantu jaNzambi munanu mafuku akukuminina.—Mat. 24:45-47; Chim. 11:11, 12.

Kafwampi mukanda waChimwekeshu 11:1, 2 wesekeja iyi yuma nampinji yapiminuwu tembeli yakuspiritu. Mukanda waMalaki kapetulu 3 washimuna nsañu yoyimu yakutala tembeli yakuspiritu nawa halondeleli mpinji yakutookesha. (Mal. 3:1-4) Hahitili mpinji yishika hadi hakwila mudimu wakutala nikutookesha wuzatewi? Iwu mudimu watwalekeluhu kufuma mu 1914 nakushika nikumatachikilu a 1919. Iyi mpinji yinabombelumu mafuku 1,260 (tukweji 42) nimafuku asatu nachibalu achifwikija ashimunawu muChimwekeshu kapetulu 11.

Tukweti muzañalu muloña Yehova waloñesheli mudimu wakuspiritu wakutookesha antu adimena akuzata nyidimu yayiwahi. (Tit. 2:14) Kubombelahu, twasakililaña hachakutalilahu chatwimikilawu kudi ana awayishewa ashinshika adiña nakulombola hampinji yakweseka nawa azatili neyi ayinsahu ayedi achifwikija. *