1. Mukanda waAlevi wunateli kutukwasha ñahi?

 KUJILA akutena mapampa kakavulu mumukanda waAlevi kubadika munyikanda yikwawu yamuBayibolu. Chineli akwakudifukula aYehova alala ejima atela kwikala nanichi chililu, kwiluka nikutiyisha mukanda waAlevi kukutukwasha kwikala ajila.

2. Nsanwinyi yekala mumukanda waAlevi?

² Mukanda waAlevi wasonekeluwu kudi kaprofwetu Mosi, wekala hakachi ‘kaNyikanda yejima’ yawaha kutañisha nachu. (2 Tim. 3:16) Ijina daYehova damwekanaña kwakwihi namapampa ikumi mukapetulu kadi kejima kaniwu mukanda. Neyi twiluka nsañu yekala mumukanda waAlevi chikutukwasha kubula kwila yuma yejima yinateli kusawula ijina daNzambi. (Lev. 22:32) Chineli iwu mukanda wavula kuzatisha nhoshelu yakwila nawu “yami Yehova,” chumichi chatwanukishaña nawu twatela kumwovwahila Nzambi. Muchinu chibaaba nichinalondeluhu, tukudiluñisha nsañu yalema yekala mumukanda waAlevi, chawana chakufuma kudi Nzambi chatukwashaña kwikala ajila mukudifukula.

3, 4. Aroni nianyanindi chayiwelesheleñawu chemenañaku chumanyi? (Talenu mwevulu wakutachikilahu.)

³ Tañenu Alevi 8:5, 6. Yehova wamutondeli Aroni kuzata neyi kapristu muneni wawaIsarela nawa anyanindi ayitondeli kwikala atupristu akukwasha munza. Aroni wemenañaku Yesu Kristu, anyanindi niwena emenañaku atumbanji twaYesu awayishewa. Komana Aroni chamuwelesheluwu chamwekeshaña nawu Yesu niyena ateleleli kumutookesha? Inehi, muloña Yesu wadiña wudana nshidi ‘wakadi hataminayi,’ dichi hakeñekeleña kumutookeshaku. (Heb. 7:26; 9:14) Aroni chamuwelesheleñawu chamwekesheleña nawu Yesu wadiña wutooka nawa waloña. Indi anyana kaAroni chayiwelesheleñawu chemenañaku chumanyi?

⁴ Anyana kaAroni chayiwelesheleñawu chemeneneñaku kutookesha antu akatondawu kwikala atupristu mwiwulu. Komana chipapatishu chawawayishewa chemenañaku kutookesha kwayitookesheleñawu anyana kaAroni? Inehi, chipapatishu hichatookeshaña nshiduku; ilaña chamwekeshaña nawu muntu nadihani chakufuma hamuchima kudi Yehova Nzambi. Awayishewa ayiweleshaña kuhitila ‘mumazu,’ chumichi chakeñekaña nawu eleña yuma yatañishileñayi Kristu muchihandilu chawu. (Efwes. 5:25-27) Dikwila nawu ayijilikaña nikuyitookesha. Ndochu “anyikoku acheñi”?—Yow. 10:16.

5. Muloñadi chitukuhoshela netu anyikoku acheñi ayitookesha Nezu daNzambi?

⁵ Anyana kaAroni hiyemeneneñaku ‘izaza deneni’ dawanyikoku acheñi aYesuku. (Chim. 7:9) Komana antu wenawa apapatishewaña ayijilikaña hela kuyitookesha Nezu daNzambi? Eña. Antu achiñejaña kushakama hamaseki neyi ataña nsañu yamuBayibolu yahosha hamashi aYesu apwekesheliyi alema nichatookeshañawu, akuhwelelaña awa mazu nawa akalakalaña ‘mudimu wajila mwaana niwufuku.’ (Chim. 7:13-15) Awayishewa nianyikoku acheñi amwekeshaña nawu ayitookesha kuhitila ‘muyililu yawu yayiwahi.’ (1 Pet. 2:12) Yehova wazañalalaña chikupu hakumona awayishewa nianyikoku acheñi, atiyililaña nikwovwahila Kabiña wawu Yesu, chekalawu atooka nawa anuñañana.

6. Kudishinshika kwamuchidinyi kunateli kutukwasha?

⁶ Nshimbi yayilejeluwu atupristu amuIsarela nawu atela kwikala atooka kumujimba yayidizishaña chumanyi antu jaYehova makonu? Antu itwadizaña nawu Bayibolu kakavulu amonaña nawu maluña etu akudifukwilamu awunyoji nawa amonaña chitwavwalaña chiwahi. Ilaña, atupristu chiyadiñawu awunyoji chatukwashaña kwiluka netu muntu wejima wunakukeña kukandama kumpidi yaYehova yakudifuukwila watela kwikala ‘namuchima wutooka.’ (Tañenu Masamu 24:3, 4; Isa. 2:2, 3.) Mudimu wetu wajila wutwamukalakelaña Nzambi twatela kuwuzata namuchima niyitoñojoka yitooka nikwikala atooka kumujimba. Chumichi chakeñekaña kudishinshika kapampa kakavulu, amakwawu atela tuhu kuhimpa chikupu hakwila nawu ekali ajila. (2 Kor. 13:5) Chakutalilahu, muntu wapapatishewa watalaña nyevulu yanzekesi mumushikila watela kudihula nindi, ‘Komana namwekeshaña nami najila?’ Kuhiñahu watela kulomba wukwashu kulonda yaleki yililu yatama.—Yak. 5:14.

7. Kwesekeja nansona yaAlevi 8:22-24, chakutalilahwinyi chatwishililiyi Yesu?

⁷ Hampinji yatondeleñawu kapristu wawaIsarela, Kapristu Muneni Aroni nianyanindi ayilambileña mashi amukoku kumatu awu achidiilu nikunyinu yedimbanu yakuchikasa chawu chachidiilu, nikunyinu yedimbanu yakunyendu yawu yachidiilu. (Tañenu Alevi 8:22-24.) Mashi azatishileñawu amwekesheleña nawu  atupristu akwovwahilaña nakuzata nyidimu hakumina ñovu yawu. Munjila yoyimu, Kapristu Muneni Yesu wayishilili awayishewa ninyikoku acheñi chakutalilahu chachiwahi. Wadiña nakutiyilila wunlomboli waNzambi. Yesu wazatishili makasindi hakuzata mwaya muchima waYehova nawa nyendu yindi hiyalekeleña kuya munjila yaloñaku.—Yow. 4:31-34.

8. Chumanyi chatela kwilawu akwakudifukula aYehova ejima?

⁸ AkwaKristu awayishewa nianyikoku acheñi aYesu atela kwimbujola kashinshi kaKapristu wawu Muneni. Akwakudifukula aYehova ejima atela kwovwahila wunlomboli wejima waMwizu daNzambi kulonda abuli kuneñesha spiritu yindi. (Efwes. 4:30) Atela ‘kwolola njila jakunyendu yawu.’—Heb. 12:13.

9. Indi amana kwetu asatu anazati nawantu aMwizanvu Dalombolaña ahosheli nawudi nawa mazu ahosheluwu anateli kuyikwasha ñahi kwikala ajila?

⁹ Talenu chahosheluwu amana kwetu asatu achiñejaña kushakama hamaseki nawa anazati yaaka yayivulu nawantu aMwizanvu Dalombolaña. Mana kwetu wumu wahosheli nindi: “Hela chakwila kuzatila hamu nawu hikukooleka kwakweni, kudikunda nawu chikupu mpinji yikwawu kwamwekeshaña nawu awa amana kwetu hiyawaninaku chili ayiwayisha naspiritu. Ilaña, hayaaka yejimiyi nafuukulahu kwovwahila antu anakulombola.” Mana kwetu wamuchiyedi wahosheli nindi: “Nsona yidi neyi 2 Akorinda 10:5, yahosha ‘hakumwovwahila Kristu,’ yankwasha kwovwahila nikutiyañana nawantu anakulombola. Novwahilaña chakufuma hamuchima.” Mana kwetu wamuchisatu wahosheli nindi: “Kukeña yuma yakeñayi Yehova nikuhela yuma yahelayi, kushilahu tuhu nikulondela wunlomboli windi nikwila yuma yamuzañaleshaña chaya mukwila nawu tunakwovwahila kuloñesha kwindi niantu azatishañayi hakutwala hambidi yuma yafuukwilayi iseki.” Iwu mana kwetu welukili nindi Nathan Knorr, wekalili membala waMwizanvu Dalombolaña, wetejeli yikuma yadiña muchibaaba chaKaposhi Kakutalila kamu 1925 chahosheleña nawu “Birth of the Nation,” (Kusemuka kwaMunza) hela chakwila antu amakwawu akaanini yikuma yeniyi. Kwovwahila kwamuchidiwu kwazañalesheli amana kwetu. Kutoñojoka chikupu hanawa mazu ahosheluwu amana kwetu asatu itunateni kunateli kuyikwasha kwikala ajila kuhitila mukwovwahila.

10. Indi kwovwahila nshimbi jaNzambi jahosha hamashi kwalemenadi?

¹⁰ Tañenu Alevi 17:10, 14. Yehova wayilejeli aIsarela kubula kudya “mashi ambiji himbiji.” AkwaKristu ayikaanisha kudya mashi akanyama hela kwiteja kuyisha mashi mumujimba. (Yil. 15:28, 29) Twatiyaña woma hamuloña wakwila nawu Nzambi nateli ‘kututala nakuhila’ nikutuhaña muchipompelu chindi. Twamukeña nawa twafwilaña kumwovwahila. Hela chakwila wumi wetu wudi hakatoña, hitwakeñaña kutiyilila chinakutulejawu kudi antu abula kumwiluka Yehova nawa abulaña kukeña kumwovwahilaku. Eñañi, tweluka netu antu anateli kutuseha hamuloña wakukaana mashi, ilaña twatondahu kumwovwahila Nzambi. (Yuda 17, 18) Chumanyi chinateli kutukwasha haniyi nsañu kulonda ‘tushinshiki’ nakubula kudya mashi hela kubula kwiteja kutwisha mashi mumujimba?—Kuhit. 12:23.

11. Muloñadi chitukuhoshela netu yuma yelileñawu Hefuku Dakubuta Nshidi hiyadiña yamukunkulwayuku?

¹¹ Chazatishileñawu mashi akanyama kudi kapristu muneni muIsarela wakushankulu Hefuku daKubuta Nshidi hachaaka nichaaka kwatukwashaña kwiluka Nzambi chamonañayi mashi. Mashi ayihembeleña kulonda ayizatishi munjila yalema.  Ayizatishileña hakubuta nshidi yawantu akeñeleña kuyanakena kudi Yehova. Mashi achizamba chañombi nichizamba champembi ayisampwilileña hewulu dachimbañu chachitiyañenu. (Lev. 16:14, 15, 19) Chumichi chaleñeleleña Yehova kwanakena nshidi yakoñeleñawu aIsarela. Kubombelahu, Yehova wayilejeli cheñi nindi neyi muntu yajaha kanyama kakudya, wateleli kumwaña mashi hamaseki nakushikilahu, “muloña wumi wamujimba wejima wowu mashi awu.” (Lev. 17:11-14) Komana iyi yuma yejima yelileñawu yadiña yamukunkulwayi? Inehi. Mashi azatishileñawu Hefuku daKubuta Nshidi, kushilahu nilushimbi lwakumwaña mashi hamaseki, lwesekana nalushimbi lwaYehova lwamwinkeliyi Nowa nianyanindi lwakubula kudya mashi. (Kutach. 9:3-6) Yehova Nzambi wakaanishili kudya mashi muloña wumi wekala mumashi. Chumichi chalumbulukadi kudi akwaKristu?

12. Indi mukanda wasonekeleliyi Pawulu akwaKristu Aheberu wakunjika ñahi mashi nansañu yakwanakena?

¹² Kapostolu Pawulu chayisonekeleliyi akwaKristu aHeberu kutalisha hañovu yamashi atookeshaña walumbulwili nindi: ‘Mwaya Nshimbi hanashali hanti nakutookesha yuma yejima namashi. Chakadi kupwekesha mashi kwosi kwanakenaku.’ (Heb. 9:22) Pawulu washimwini cheñi nindi hela chakwila nyilambu yawatunyama yadiña yalema, yayanukishileña aIsarela nawu achidiñi akwanshidi nawa akeñeleña chuma chabadika chinateli kufumisha nshidi chikupu. Chalala, Nshimbi yadiña “mwevulu wayuma yayiwahi yikwinza, hidiyi yuma yayeni muyekalilaku.” (Heb. 10:1-4) Indi muntu anateli kumwanakena ñahi nshidi?

13. Mwatiyaña ñahi chineli Yesu wahanini mashi indi alema kudi Yehova?

¹³ Tañenu Aefwesesa 1:7. Kufwa kwaYesu Kristu kwafwiliyi neyi mulambu ‘wakudihana kukoola etu’ kwekala kwalema nankashi kudi antu ejima amukeña yena niTata yindi. (Ŋal. 2:20) Ilaña, chuma cheliliyi Yesu hanyima yakufwa nichamusañwiluwu, dichi chuma chatukuulili chikupu nawa chaletesha atwanakeni nshidi jetu. Yesu washikijili yuma yelileñawu Hefuku Dakubuta Nshidi yashimwinuwu muNshimbi jaMosi.  Hanidi ifuku, kapristu muneni wanoneleña mashi atunyama twanyilambu nakuyitwala Mwamweni Mwajila mutabanaka, kuhiñahu wayitwalileña mutembeli yaSolomoni nakuyihana kumesu aNzambi kulonda yamwekeshi nawu Nzambi wudi mukachi kawu. (Lev. 16:11-15) Munjila yoyimu, Yesu weñilili mwiwulu mwamweni namashi indi alema nakuyihana kudi Yehova. (Heb. 9:6, 7, 11-14, 24-28) Twakooleka chikupu hakutwanakena nshidi jetu nawa tukweti chinleji chamuchima chitooka muloña twakuhwelela mumashi aYesu.

14, 15. Muloñadi chichalemena kwiluka nikwovwahila nshimbi jaYehova jahosha hamashi?

¹⁴ Komana ichi muneluki muloña watukaanishilayi Yehova kudya ‘mashi adi ejima’? (Lev. 17:10) Muneluki chuma chaletesha Nzambi yamoneña mashi nindi ajila? Wamonaña mashi nindi hohamu nawumi. (Kutach. 9:4) Komana mweteja nenu twatela kumona mashi neyi chayimonañayi Nzambi nikwovwahila nshimbi yindi yahosha hakuleka mashi? Kukuhwelela mumulambu wefutu daYesu nikwiluka netu Nleñi yetu walemesha mashi chikupu diyi njila yimu hohu yakwikalilamu nawubwambu wawuwahi naNzambi.—Kol. 1:19, 20.

¹⁵ Wejima wetu tunateli kukata mukukasumwisha chakwila hiyakukeña kutwisha mashi mumujimba. Indi kwiji muntu wamuchisaka hela ibwambu detu nateli kumona kukala kukumuleñela kwiteja kumusha mashi hela kukaana. Hampinji yimunamoni kukala kwamuchidiwu, mwatela cheñi kufuukulahu kutalisha hatuyuma twanti twamumashi ninjila jakuukilamu. Chalema chikupu kudiloñeshela chadimu nikukeñakeña njila yakutuukilamu neyi kumwekana kukala. Neyi tulomba kudi Nzambi nikudiloñeshela chadimu, yumiyi yikutukwasha kuumika nikubula kwiteja kutwisha mashi mumujimba. Hitwakeñaña kumuneñesha Yehova kuhitila mukwiteja yuma yakaanisha Izu dinduku. Andotolu niantu amakwawu atiyakeshaña nsañu yamashi akanjikijaña antu nawu ahaneña mashi kulonda ahandishi nachu antu amakwawu. Hela chochu, antu jaYehova ajila eluka nawu Nleñi yawu wukweti wuswa wakuyileja chiyatela kuzatishawu mashi. Nzambi wamonaña ‘mashi amuchidi wejima’ nindi ajila. Twatela kufuukulahu chikupu kwovwahila nshimbi jindi jahosha hamashi. Twamwekeshaña kudi Nzambi nayililu yetu yayiwahi netu twalemesha nankashi mashi aYesu ahandishaña antu, diwu mashi hohu aleñelaña atwanakeni nshidi nikwikala nawumi wahaya nyaka.—Yow. 3:16.

16. Muloñadi antu jaYehova chiyatelela kwikala ajila?

¹⁶ Nzambi chayifumishiliyi aIsarela muwuduñu muEjipitu, wayilejeli nindi: “Yami Yehova nayifumishili mwituña daEjipitu niikali Nzambi yenu; dichi dinu chiña mwakekalaña ajila, muloña ami najila.” (Lev. 11:45) Antu amuIsarela ateleleli kwikala ajila muloña Yehova wajila. Chineli twekala aYinsahu jaYehova, twatela kwikala ajila. Mukanda waAlevi washimuna chikupu nawu twatela kwikala ajila.

17. Munakutiya ñahi hansañu yitunadizi mumukanda wamuBayibolu waAlevi?

¹⁷ Chalala nsañu yitunadizi mutupetulu tukwawu mumukanda waAlevi yinatukwashi. Chakadi nikujina, iyi nsañu yinayikwashi kulemesha chikupu iwu mukanda wonenawu wamuBayibolu. Kutoñojoka chikupu haniyi nsañu yalema yekala mumukanda waAlevi yinayikwashi kwiluka chikupu muloña wutwatela kwikala ajila. Hela chochu, yumanyi yikwawu yalema yakuspiritu yitukudiza muniwu mukanda Wezu daNzambi donenawu? Yumanyi yikwawu yitunateli kudiza muniwu mukanda kutalisha hakumuzatila Yehova mudimu wajila? Twakadiza iyi nsañu muchibaaba chinalondeluhu.