GUY HOLLIS PIERCE, membala waMwizanvu Dalombolaña dawaYinsahu jaYehova wamanishili chihandilu chindi chaheseki haChiyedi, March 18, 2014. Kuchiñeja kwindi kwakumusañula nakwikala mana kwaKristu kwashikijeweli henohu wudi nayaaka 79 yakusemuka.—Heb. 2:10-12; 1 Pet. 3:18.

Mana kwetu Guy Pierce wasemukilili muAuburn, California, United States of America haNovember 6, 1934, nawa wapapatisheweli mu 1955. Wasumbwili ñodindi akeñeliyi wejina daPenny mu 1977, nawa avweli anyana. Chineli wadiña nawanyana, chumichi chamuletesheli kwikala nakukeña neyi nvwali. Mu 1982 adiña nakudikita mumudimu wawupayiniya naPenny nawa muchaaka 1986 watachikili mudimu wawunkoñi wañinza wazatiliyi hadi yaaka 11 muUnited States.

Mu 1997, aGuy naPenny Pierce atachikili kuzatila haBeteli muUnited States. Mana Kwetu Pierce wazatileña kuDipatimenti yaMudimu, mu 1998 amutondeli kwikala nkwashi yaKomiti Yatalaña akaBeteli Yezanvu Dalombolaña. Mana Kwetu Pierce amubidikili nawu himembala Wezanvu Dalombolaña haOctober 2, 1999, hakupompa kwahachaaka kwaWatch Tower Bible and Tract Society of Pennsylvania. Muyaaka yakatataka, wakalakeleña mukomiti Yatalaña akaBeteli, Yasonekaña, Yalandaña Yozelu yamunyitayi, nimukomiti yaNloñeshi.

Antu akuyisemwa yejima adiña amukeña Mana Kwetu Pierce muloña wadiñi waseha nawa wakeña antu. Hela chochu, kukeña, kudizoza, kulemesha nshimbi jaloña nikumukuhwelela chikupu Yehova diyi yililu yaletesheli antu asweji kumukeña. Mana kwetu Guy Pierce, wakuhweleleli chikupu nindi hadaha itena hidinateli kuselaku, ilaña yikaninu yaYehova yakashikijewa nawa wakeñeleña kuleja antu ejima iyi nsañu yalala.

Mana Kwetu Pierce wadikitileña mumudimu waYehova, wamenekeleña budidi chikupu nawa kakavulu wazatileña niwufuku. Wendeleña nakukolesha amana kwindi niahela akwaKristu ejima mumatuña amavulu amukaayi kejima, wadiña nampinji yakuhanjeka nawantu amuchisaka chaBeteli niantu amakwawu akeñeleña kuhanjeka nindi, kuyilejaku mwakwilila nikuyikwasha. Hela chakwila munahiti yaaka, akwawu akwakwitiya anukaña chisambu chindi, chayikeñeliyi nichayikolesheleñayi naNyikanda Yajila.

Mana kwetu nawa ibwambu itwakeña nashiyi mumbanda nianyana atanu nawumu, ezukulu nianyana kawezukulwindi. Wadiña cheñi nawanyana amavulu amuchipompelu. Mpanji yakwanuka chihandilu chaMana Kwetu Pierce ayihanini muBeteli yakuBrooklyn haMposu, March 22, 2014, kudi mana kwetu Mark Sanderson, mukwawu membala waMwizanvu Dalombolaña. Hakachi kansañu yikwawu yahosheliyi, wateneni hakuchiñeja kwaMana Kwetu Pierce kwakuya mwiwulu nawa watañili mazu aYesu akwila nawu: ‘Mwitala daTata yami mwakushakama mwekala mwamuvulu. . . . Nukuya nakuyiloñeshela mwakushakama, ami aweni nakenza cheñi nakuyitambula; kulonda kunakekalami, diku mwakekali ninenu nawa. Kunukuyami, njila mwayiluka dehi.’—Yow. 14:2-4.

Mwamweni, tukumwanukaña chikupu Mana Kwetu Pierce. Hela chochu, tukweti muzañalu muloña ‘welukili njila’ yaya kwindi ‘kwakushakama’ haya nyaka.