1, 2. Yumanyi yakeñañayi Nzambi kudi akwakudifukula indi, atwansi niakulumpi?

 KOMANA mudi atwansi? Neyi dimu, ilukenu chikupu nenu chineli mwekala muchipompelu chaYehova chamukaayi kejima, ayilemesha hama. Mumatuña amavulu, atwansi diwu anakupapatishewa nankashi. Twatiyaña muzañalu hakumona atwansi amavulu anakwikala hamukanka wawantu atondahu kumukalakela Yehova.

² Enu atwansi, komana mwatiyaña kuwaha kwikala hamu nawakwenu atwansi? Chakadi nikujina mwatiyaña kuwaha. Twatiyaña kuwaha kwikala hakachi kawantu akweti yaaka yimu nanetu. Hela tudi atwansi indi kwiji akulumpi nawa twafuma kuyitachi yashiyashana, Nzambi wakeñaña nindi twikali anuñañana hakudifukula kudi yena. Kapostolu Pawulu wasonekeli nindi nkeñelu yaNzambi yakwila nawu “antu ejima nindi ahandi, eluki nsañu yalala chikupu.” (1 Tim. 2:3, 4) Hamukanda waChimwekeshu 7:9, alumbululahu akwakudifukula aNzambi afuma ‘kunyunza yejima, akunyichidi yejima, akumatuña ejima, akumadimi ejima.’

3, 4. (a) Yililu yamuchidinyi yinatandi mudi atwansi amavulu makonu? (b) Yitoñojokanyi yesekana naNsona yaAefwesesa 4:25?

³ Hekala chaambu chikupu hakachi kawambuña Yehova awatwansi  niatwansi amukanu kaayi. Antu amavulu abulaña kumukalakela Yehova akeñaña hohu kuditiyisha awenawu kuwaha. Akwakusandujola amakwawu ahoshaña nawu atwansi amakonu adikeña aweni hohu. Nhoshelu yawu ninvwalilu yawu, yamwekeshaña nawu ahela akulumpi.

⁴ Atwansi amavulu dichi chatoñojokañawu. Dichi, ambuña Yehova atwansi eluka nawu atela kuzata nañovu kulonda ambuki kuyitoñojoka yatama hakwila amuhamekeña Nzambi. Muyaaka nkulakaji yakusambila, Pawulu welukili kulema kwakukolesha akwawu akwakwitiya kulonda aleki, ‘spiritu yakoñeshaña katataka mudi akwakujikwa’ nawa dimu ‘mwadiñi nakwendawu.’ (Tañenu Aefwesesa 2:1-3.) Twahamekaña atwansi eluka nawu atela kutondolwela spiritu yamukaayi nawa azatilaña hamu mukunuñañana nawamana kwawu ejima. Yitoñojoka yamuchidiwu yesekana hamu namazu aPawulu akwila nawu ‘twekala yidi yimu nawakwetu.’ (Efwes. 4:25) Chineli kanu kaayi kakakulu keña kakumi, kuzatila hamu mukunuñañana hichuma chalema nankashi. Tuhanjekenu hayakutalilahu yamuBayibolu yikutukwasha kwikala anuñañana.

5, 6. Chumanyi chitwadizilaña kunsañu yaLoti nianyanindi awambanda atwalekeluhu kwikala hamu?

⁵ Kushankulu, Yehova watiyileña kuwaha kukiña antu jindi neyi anuñañana nakudikwasha wumu namukwawu hampinji yinamonuwu kukala. Ambuña Nzambi amakonu, atwansi hela akulumpi anateli kudizila kuniyi yakutalilahu yamuBayibolu. Chakutalilahu chimu chahosha hadi Loti.

⁶ Loti nichisaka chindi adiña mukukala kweneni muloña musumba waSodoma mwashakamineñawu adiña kwakwihi nakuwujilumuna. Añelu jaNzambi amulejeli Loti kufuma muwuna musumba nakuya kwiluña damapidi nawu: “Temukaku kulonda wuhandi.” (Kutach. 19:12-22) Loti nianyanindi ayedi awambanda ovwahilili nakushiya musumba. Chawushona, antu amakwawu amuchisaka chawu hiyovwahililuku. Akwenzi otili anyana kaLoti awambanda amweneña neyi kwiji Loti nakuleta maleñu. Hamuloña wakubula kushaku maana, afwili. (Kutach. 19:14) Loti hohu nianyanindi atwalekeluhu kwikala hamu diwu ahandili.

7. Indi Yehova wayikwashili ñahi antu adiña anuñañana hampinji yafumineñawu aIsarela muEjipitu?

⁷ Shinshikenu chakutalilahu chikwawu. Hampinji yafumineñawu aIsarela muEjipitu, hiyadambwili mumazanvu adimena chakwila awa nakuya njila yawu amakwawu niwena nakuya njila yawuku. Chelili Mosi ‘yololi chikasa chindi hewulu dakaluñalwiji’ Yehova hakwambula kaluñalwiji hakachi, Mosi hazambukili nkawindi hela nawaIsarela antesha hohuku. Muloña wakwila Yehova wayikiñili, chipompelu chejima chazambukili. (Kwid. 14:21, 22, 29, 30) Ilaña adiña anuñañana nawa ayili hamu ‘naluntu lwalweni lwawantu acheñi’ niantu abulili kwikala aIsarela adibombeli nawu. (Kwid. 12:38) Adi kufuukulahu mwawusupi neyi chakwila antu antesha chidi neyi izanvu dawatwansi ditondahu kuya njila yakankawawu yakeñeluwu. Neyi elili mwenimu adi kufuukulahu mwawusupi nawa Yehova hadi kuyikiñaku.—1 Kor. 10:1.

8. Antu jaNzambi amwekesheli ñahi nawu adiña anuñañana mumafuku aYehoshafwati?

⁸ Mumafuku aMwanta Yehoshafwati, antu jaNzambi ayilukukili kudi ayilumbu asweja ñovu, “luntu lwalweni” lwafumini kumaluña adikumishaninuwu nawu. (2 Kushi. 20:1, 2) Chawahili muloña ambuña Nzambi hiyafwilileña kwimika mushindu ayilumbu jawu nañovu jawu awenuku. Ilaña antu alombeli wukwashi kudi Yehova. (Tañenu 2 Kushindulula 20:3, 4.) Hiyalombeli wukwashi hamuntu hamuntu kwesekeja  nanjila yamweniyi muntu nindi yayiwahuku. Bayibolu yatulejaña nawu: “A Yuda ejima emeni kumesu aYehova, nianyanawu anyanya, niañodi jawu, nianyanawu.” (2 Kushi. 20:13) Atwansi niakulumpi wejima wawu anuñañeni muchikuhwelelu nakulondela wunlomboli waYehova nawa Yehova wayikiñili kudi ayilumbu jawu. (2 Kushi. 20:20-27) Ichi hichakutalilahu chachiwahi chamwekeshaña nawu antu jaNzambi atela kwimikila mushindu hamu.

9. Chumanyi chitukudizila kukunuñañana niyililu yadiña nawakwaKristu akusambila?

⁹ AkwaKristu akusambila niwena ayilukili nawu azatilileña hamu. Chakutalilahu, chelili aYudeya amavulu niantu abalumukili nakwikala aYudeya ekali akwaKristu, akakeleleli ‘muntañishilu yawapostolu, nimukukundañana, nimukudiila hamu yakudya, nimukulomba.’ (Yil. 2:42) Amwekesheli nawu adiña anuñañana sweje-e hayikabishileñawu, haniyi mpinji ateleleli kudikwasha wumu namukwawu. (Yil. 4:23, 24) Komana himukwitejaku nenu hampinji yakala chalema kuzatila hamu?

10. Mpinjinyi yitwakakeña kwikala anuñañana?

¹⁰ Ifuku dakala chikupu muchihandilu chawantu keña dishiki. Kaprofwetu Yoweli washimwini idi ifuku nindi ‘hiifuku damwidima dakwiyila, ifuku damavu damwidima wakushishita.’ (Yoweli 2:1, 2; Zef. 1:14) Antu jaNzambi atela kwikala anuñañana haniyi mpinji. Anukenu mazu aYesu akwila nawu: “Mawanta ejima akudambula, akushala kwamahembi.”—Mat. 12:25.

11. Antu jaNzambi anateli kudizilaku kwodi kukunuñañana kwekala haMasamu 122:3, 4? (Talenu mwevulu wakutachikilahu.)

¹¹ Hampinji yikamwekana kukala mukanu kaayi twatela kwikala anuñañana chikupu. Kunuñañana kwakuspiritu kwakeñekaña hakachi ketu tunateli kukwesekeja namatala adikumashana atuñileñawu muYerusalema wakushankulu. Awa matala ayituñileña mukamwihi nankashi chakwila ñimbi yamasamu wateneni Yerusalema nindi ‘himukala wakunuñanuña chachiwahi.’ Chumichi chayikwashileña antu kudikwasha nikudikiña wumu namukwawu. Cheñi nawa, chatuñiluwu matala mukamwihi chamwekeshaña kunuñañana kwakuspiritu kwamunza wejima chelili “nyichidi yambala yaYehova” yipompi nakudifukula. (Tañenu Masamu 122:3, 4.) Ninetu twatela kutwalekahu kwikala ‘anuñañana’ makonu nimumafuku akala anakwinza.

12. Chumanyi chikatukwasha kupuluka chakalukukawu antu jaNzambi?

¹² Indi kwikala ‘anuñañana’ kukatukwasha ñahi hayina mpinji? Mukanda waEzekeli kapetulu 38 wahosha hawuprofwetu ‘waGogi wamwituña daMagogi’ chakalukukayi antu jaNzambi. Hitwatela kwiteja chuma chidi chejima kutwambula hayina mpinjuku. Hitwatela kulomba wukwashi kudi antu amukaayuku. Ilaña twatela kunuñañana nawamana kwetu. Kafwampi hitwamba kahanda muloña wakwikala hakachi kezanvuku. Hampinji yayihuñu, Yehova niMwanindi akapulwisha antu atambikaña hejina daYehova. (Yoweli 2:32; Mat. 28:20) Hela chochu, komana twatela kutoñojokaña netu antu abula kunuñañana nanyikoku yaNzambi, apwapuka aweni netu akayipulwisha?—Mika 2:12.

13. Atwansi amwakamaña Nzambi anateli kudizilaku yumanyi kunsañu yitunadizi?

¹³ Chinamwekani hatooka to-o nawu hitwatela kulondela yililu yawatwansi adambulaña awenuku. Mpinji yitwakakeña kudikwasha wumu namukwawu keña yishiki. Hela tudi atwansi hela akulumpi, wejima wetu twakakeña kudikwasha. Eñañi, ayinu diyi mpinji yitwatela kuzatila hamu nikwikala anuñañana kulonda tukapuluki hanawa mafuku anakwinza.

14, 15. (a) Yehova wadizishaña atwansi niakulumpi nankeñelwinyi makonu? (b) Yehova watufumbaña nindidi hakwila twikali anuñañana?

¹⁴ Yehova nakutukwasha ‘kulonda tumukalakeleña namuchima wumu.’ (Zef. 3:8, 9) Nakutudizisha kulonda twakamukalakeleña kumbidi. Yumanyi yakeñekaña? Wakeñaña ‘kupompesha yuma yejima mudi Kristu.’ (Tañenu Aefwesesa 1:9, 10.) Eñañi, wakeñaña kunuñañesha yuma yejima yamumawulu niyahamaseki nawa wakayinuñañesha. Komana chumichi chinayikwashi enu atwansi kwiluka kulema kwakuzatila hamu mukunuñañana nakuloñesha kwaYehova?

¹⁵ Yehova nakutudizisha chakwila anuñañana makonu kulonda tukekali anuñañana haya nyaka. Nyikanda Yajila yavula kutuleja nawu “yidi yejima yihembañani,” ‘kutiyila akwetu wushona,’ ‘kudikundeja’ ‘nikudikolesha wumu namukwawu.’ (1 Kor. 12:25; Rom. 12:10; 1 Tesa. 4:18; 5:11) Yehova weluka nindi akwaKristu hiyawaninaku nawa chayikalilaña kwikala anuñañana, dichi twatela ‘kudanakena muntu namukwawu.’—Efwes. 4:32.

16, 17. (a) Muloñanyi wumu wutwekalila nakupompa kwawuKristu? (b) Yumanyi yatela kudizawu atwansi kuchakutalilahu chaYesu hadiñayi kansi?

¹⁶ Yehova watwinka cheñi kupompa kwawakwaKristu kwatukwashaña kunuñañana. Twavula kutaña mazu atukoleshaña ekala haAheberu 10:24, 25. Muloña wumu wutwapompelaña wekala ‘wakuditoñojoka muntu himuntu, kulonda tusañumuni akwetu kukeñañana nakwila nyidimu yayiwahi.’ Iku kupompa kwekala kwalema muloña kwatukwashaña ‘kusweja kudikolesha wumu namukwawu, nanichi chitunamoni ifuku odu hidikwinza nakuswila kwakwihi.’

¹⁷ Hachidiñayi kansi, Yesu wemikili chakutalilahu chachiwahi chakulemesha kupompa. Hadiñayi nayaaka 12 yakusemuka, wayili nawanvwali jindi kukupompa kweneni kwakuspiritu. Ifuku dimu anvwali jindi amumweni wanyi, bayi neyi wayili nakuhema nawakwawu atwansuku. Ilaña, aYosefu naMariya amuwanini hatembeli nakuhanjeka nsañu yamuNyikanda Yajila nawantañishi.—Luka 2:45-47.

18. Indi kulomba kwetu kunateli kuleta ñahi kunuñañana?

¹⁸ Kubombela hakudikeña wumu namukwawu nikuya kukupompa kwawakwaKristu kwatukoleshaña kunuñañana, twatela kudilombelaku wumu namukwawu. Kulomba kutwalombaña kudi Yehova chakufuma hamuchima kutwalombelelañaku amana kwetu, kwamwekeshaña nawu  twadakamenaña wumu namukwawu. Akulumpi akwaKristu hidiwu atela kwila yuma yamuchidiwu hohuku. Enu atwansi, komana mwelaña yumiyi kulonda mwikali nawubwambu wakola nawamana kwenu niahela? Kwila mwenimu kukuyikwasha kulonda mubuli kukwata wubwambu nakanu kaayi kadi kwakwihi nakujilumuka.

19-21. (a) Munjilanyi yabadika mutwamwekeshelaña netu “twekala chidi chamuntu namukwawu”? Shimunenu yakutalilahu. (b) Yumanyi yimwadizilaña kuyuma yeliluwu amana kwetu hampinji yikwamwekeni wubanji wadimwekenaña?

¹⁹ Antu jaYehova alondelaña lushimbi lwekala hamukanda waAroma 12:5 muchihandilu chawu, lwakwila nawu: “Twekala chidi chamuntu namukwawu.” Twamonaña wunsahu wachumichi neyi kunamwekani wubanji wadimwekenaña. MuDecember 2011, mpepela yeneni yahitili hachitutu chaMindanao muPhilippine nawa yaleteli dibaji deneni. Hawufuku wumu hohu matala akubadika ha 40,000 akisikili, kushilahu nimatala amavulu awamana kwetu. Hela chochu, kasanji kamutayi kashimwini nawu “henohu komiti yakwasha antu adi mukukala kanda yitachiki kuzata, amana kwetu akwaKristu akumaluña amakwawu atemesheleña wukwashu.”

²⁰ Chochimu, chelili kumusela waJapan kuholoki mutentanshi weneni waleteli dinkanda deneni chikupu, amana kwetu niahela amavulu ajimbesheli maheta amavulu. Amakwawu ashalili makasakasa. Yoshiko washakamineña kwiluña kwekala makilomita 40 kufuma Hetala daWanta niyena itala dakisikili. Iwu muhela washimwini nindi: “Chimwahitili ifuku dimu kufuma hamwekeni mutentanshi, twahayamini hakumona mana kwetu ninkoñi wañinza enjili nakututala.” Wahosheli cheñi iku nakumwemweta nindi: “Twazañaleli chatwakamenenuwu chikupu hayuma yakuspiritu kuhitila muchipompelu. Kubombelahu, atwinkeli makoochi, nsapatu, yola niyakuvwala yakukama nachu.” Mana kwetu wekala mukomiti yakwashaña antu adi mukukala wahosheli nindi: “Amana kwetu akumaluña ejima amuJapan, adiña nakuzatila hamu nakudikwasha wumu namukwawu. Amana kwetu amakwawu afumini kuUnited States kulonda akwashani. Chitwayihwili muloña wafumininuwu kwakulehi, ahosheli nawu, ‘Twanuñañana nawamana kwetu amuJapan nawu tunakukeña kuyikwasha.’” Komana himwatiyaña kuwahaku hakwikala mukuloñesha kwakamenaña chikupu antu jawu? Kuhwelelenu chikupu nenu Yehova wazañalalaña hakumona kunuñañana kwamuchidiwu.

²¹ Kwikala anuñañana makonu kukatukwasha kumbidi hitwakamona kukala hela chakwila hitunakuhanjeka nawamana kwetu amumatuña amakwawuku. Kafwampi, kwikala anuñañana kunakutudizisha chakuzata nakukala kutukamona kumbidi chineli kanu kaayi keña kajilumuki. Muhela Fumiko, wapulukili kunvula yampepela yeneni muJapan, wahosheli nindi: “Kukuma keña kushiki. Twatela kutwalekahu kukwasha akwetu akwakwitiya chitunakutalila mpinji yakabula kwikalaku wubanji wadimwekenaña.”

22. Indi kunuñañana kwawakwaKristu kwakatukwasha ñahi kumbidi?

²² Akulumpi niatwansi anakufwila kwikala anuñañana chayinu mpinji anakudiloñesha kulonda akapuluki kujilumuka kwakanu kaayi kabula kunuñañana. Neyi chochichadiña kunyaka, Nzambi yetu wukamwina antu jindi. (Isa. 52:9, 10) Anukenuña mpinji yejima nenu neyi muzata nañovu munateli kwikala hakachi kawantu jaNzambi anuñañana. Chuma chikwawu chinateli kutukwasha, hikusakilila chikupu hayuma yitwadiza dehi. Muchibaaba chinalondeluhu twakadiza iyi nsañu.