IZANVU dawatwansi akwaKristu ayili nawu atali fwilimu. Atiyili nawu akwawu amavulu hashikola adiluñishili kuyitala. Chashikiluwu hetala datalishilañawu jifwilimu, atalili hayipamba nakumona yitwa yañovu niambanda anavwali yakuvwala yakukojeja antu kutiya wuvumbi. Akwiladi? Komana akwiñila nakutala iyi fwilimu tahindi?

Ichi chuma chinakumwesha nawu twamonaña yuma yayivulu yitwatela kwila hakutondahu yuma yayiwahi hela yatama nawa neyi tutondahu yatama tukuluwañesha wubwambu wetu naYehova. Mpinji yikwawu, mwakeñaña kwila yuma, ilaña chimwatalamu swi-i mwahimpaña yitoñojoka yenu. Komana ichi chamwekeshaña nawu mudi nanyichima yiyedi tahindi hichuma chachiwahi?

Kukeña kutwamukeña Yehova kwatukojejaña kudihana kudi yena nikupapatishewa. Twafwilaña kutwalekahu kwikala ashinshika kudi Nzambi. Hela chochu, chilumbu chetu Satana Diyabolu nakufwila kutuluwañesha kulonda tufumpi kashinshi ketu. (Chim. 12:17) Twafuukulahu kumuzatila Yehova nikuhemba nshimbi jindi. Twalemeshaña kudihana kwetu kudi Yehova, chawushona neyi tuhimpa yitoñojoka yetu. Tukujimbesha wumi wetu.

Kubadika hadi yaaka 2,600 yinahituhu, Mwanta waBabiloni Nebukaneza welili nkishi wawuru nawa wabidikili nindi muntu wudi wejima watela kudifukula kuniwu mukishi. Yowu wukubula kudifukula, akumuumbila muluteñi ludi nakubidima kesi. A Shadaraki, Meshaki niAbedinego amwakamineña Nzambi nawa adifukwileña kudi Yehova, hiyovwahilili ilu lushimbuku. Hamuloña wakwila akaanini kudifukula kudi ona mukishi, ayinatilili muluteñi lwadiña nakubidima kesi. Ayipulwishili muchihayamisha kudi Yehova, ilaña ashili wumi wawu hakatoña kubadika  kudikaña naNzambi akalakeleleñawu.—Dan. 3:1-27.

Chimwahitili yaaka, kaprofwetu Danyeli niyena watwalekeluhu nakulomba hela chakwila amutiyishili woma nawu akumuumbila muwina wawanyitupa. Eñañi, watwalekeluhu nachaaku chindi chakulomba kudi Yehova kapampa kasatu hefuku. Danyeli halekeli kudifukula kudi Nzambi walalaku. Chafuminumu, iwu kaprofwetu amwamwinini ‘kuñovu jawanyitupa.’—Dan. 6:1-27.

Ambuña Nzambi amakonu niwena ekala ashinshika muloña adihana kudi yena. Hashikola yimu yamuAfrica, izanvu dawaYinsahu jaYehova dawakashikola akaanini kubuzwila mpandela. Ayitiyishili woma nawu akuyihaña hashikola neyi abula kubuzwila mpandela hamu nawakwawu. Chimwahitili mafuku antesha, mukulumpi wamashikola wahempwili iwu musumba nawa wahanjekeli nawaYinsahu akashikola. Awa atwansi aYinsahu alumbulwili yuma yakuhwelelawu chakadi woma nawa nakalemesha. Kufuma tuhu hayina mpinji, kwosi wahoshañahu cheñi haniyi nsañuku. Amana kwetu niahela atwansi ayaña kushikola chakadi muntu wakuyitiyisha woma kulonda aluwañeshi wubwambu wawu naYehova.

Shinshikenu cheñi chuma chamweniyi Joseph, wukweti ñodindi wakatili kansa nawa wafwili chakukasumwisha. Chisaka chaJoseph chelukili nawa chalemesheli yuma yakuhwelelayi kutalisha hayidika yahachipenji. Ilaña, chisaka chañodindi hiyekala muchalalaku nawa akeñeleña kwila tushidikilu tukwawu twalondelañawu hakujiika niyaaku yahelayi Nzambi. Joseph wahosheli nindi: “Chinakaanini, atachikili kudimbeka anyanami, ilaña niwena akaanini. Antaña niwena akeñelaña kuchiishila hachipenji hetala dami neyi chekala chisemwa, ilaña nayilejeli nami neyi anakukeña kuchiishila hachipenji atela kuya kwacheñi. Elukili nawu kuchiishila hachipenji kwesekana wanyi nayuma yinakuhwelela hela yakuhweleleliyi ñodami, dichi chitwahanjekeli chikupu ayili nakuchiishila kwitala dacheñi.

“Haniyi mpinji yakala yitwadilileña, namulembeleleli Yehova nami yatukwashi tubuli kufumpa nshimbi jindi. Watiyili kulomba kwami nawa watukwashili kuumika hela chakwila atukanjikijileña.” Joseph nianyanindi hiyatoñojokeluhu jakuhimpa yitoñojoka yawu kutalisha hakudifukula kwawuku.

Haleheli wanyi kufuma hefuku daChipandakenu mu 32 C.E., mumbanda wakuSirofwenisa wamuwanini Yesu Kristu kwiluña daZidoni. Wamulembeleli Yesu nindi yafumishi ndemoni wadiña mudi mwanindi wamumbanda. Hatachi, Yesu hamwakwiluhu izu nidimuku. Walejeli atumbanji twindi nindi: “Antemesheli kunyikoku yajimbala yetala daIsarela hohu.” Chaswejeliyi kumukanjikijayi, Yesu wamwakwili nindi: “Hichinawahi kunona mankendi awanyana nakunatila tutuwaku.” Mumbanda chamwekesheliyi chikuhwelelu chasweja, wamwakwili nindi: “Mwamweni Mwanta, hela tutuwa twadyaña nkuuku jaholokaña kumesa yawankaka jawu.” Yesu wetejeli chalembeliyi iwu mumbanda nawa wamuukilili mwanindi.—Mat. 15:21-28.

Kwila mwenimu, Yesu wamwekesheli nindi wamwimbujolileña Yehova wahimpaña mwatoñolañayi neyi kudi yuma yinakukeñeka. Chakutalilahu, Nzambi wakeñeleña kuyijilumuna aIsarela ejima hampinji yatuñiliwu mwana kañombi wawuru, ilaña wamwitejeli Mosi kuyilembelelaku kulonda Yatoñojokuhu cheñi hayuma Yakeñeleñayi kwila.—Kwid. 32:7-14.

Kapostolu Pawulu wamwimbujoleli Yehova niYesu. Pawulu watoñojokeli nindi hateleleli kumusenda Yowanu Maku halwendu lwawu lwawumishonaluku, muloña wamutemukili Pawulu niBaranaba halwendu lwawu lwawumishonali lwatachi. Mukuhita kwamafuku, Pawulu welukili nindi Maku nahimpi nawa nateli kuzata mudimu chiwahi. Dichi Pawulu wamulejeli Timotewu nindi: “Inzaku  naMaku muloña wankwashaña kumudimu.”—2 Tim. 4:11.

Tunateli kudizilaku chumanyi? Neyi tumwimbujolaña Tata yetu wamwiwulu wukweti kukeña, luwi nawa wadiwunjika, tunateli kuhimpa yitoñojoka yetu neyi chinatwesheki. Chakutalilahu, tunateli kuhimpa yitoñojoka yawakwetu. Kwambukaku naYehova niYesu, hitwekala awaninaku. Neyi hadi hanakukeñeka kuhimpa, komana hitunateli kushinshika yuma chiyidi kulonda tuhimpi yitoñojoka yetuku?

Kuhimpa yitoñojoka yetu chinateli kwikala chuma chachiwahi neyi tushinshika hayikonkwanyi yetu yakuspiritu. Antu amakwawu adizaña Bayibolu nawa apompaña mpinji yejima, mukuhita kwampinji hiyanateli kukeña kupapatishewaku. Amana kwetu amakwawu anateli kushintajala kutachika mudimu wawupayiniya hela chakwila akweti ñovu yakuzata chikupu mumudimu wakushimwina. Amana kwetu amakwawu hiyakeñaña kushikahu hakuzata nyidimu yamuchipompeluku. (1 Tim. 3:1) Komana ninenu mpinji yikwawu mwatiyaña neyi awa amana kwetu? Yehova nakuyitambika nindi mwikali nakukooleka kwamuchidiwu. Komana kwila muhimpa yitoñojoka yenu kulonda mudihani nakumukalakela Nzambi niakwenu nehi?

Ella wahosheli hamudimu windi wazatañayi hakasanji kamutayi kawaYinsahu jaYehova muAfrica nindi: “Hampinji yinashikili haBeteli katachi, nelukili wanyi neyi nikatwalekahu kushakama. Nadiña nampwila yakumuzatila Yehova namuchima wami wejima, ilaña nakeñeleña wanyi kushiya chisaka chami. Hakusambila, nanukileña nankashi chisaka chami. Ilaña, mukwetu mutwakaminineña hamu wankolesheli, dichi natiyilili nawa nashakamini. Hanyima yakuzatila haBeteli yaaka ikumi, namweni nami nateli kutwalekahu nakuzatila amana kwami niahela mudimu wami wahaBeteli.”

Munakwanuka chuma chamumwekeneni Kena hampinji yamutiyililiyi mana kwindi ichima nakumuhela chikupu? Nzambi wamulejeli iwu iyala wazuwili nindi neyi yela yuma yayiwahi akumutiyila luwi. Nzambi wamulejeli Kena kulonda yaleki nshidi ‘yafukamini kuchisu chindi.’ Kena wateleleli kuhimpa yililu niyitoñojoka yindi, ilaña watondeluhu kudiwula kufumba kwaNzambi. Chawushona, Kena wajahili mana kwindi nawa diyi wekalili muntu watachi kujahana.—Kutach. 4:2-8.

Shinshikenu cheñi chakutalilahu chaMwanta Uziya. Hatachi, welileña yuma yayiwahi kumesu aYehova nawa watwalekeluhu nakumukeñakeña Nzambi. Chawushona, Uziya watamishili ijina dindi dadiwahi kuhitila mukudinka wanta. Weñilili muTembeli nakwocha insensi, henohu hadiña kapristuku. Atupristu chamukaanishiluwu kubula kumotoka lushimbi, komana wahimpili yitoñojoka yindi? Inehi. Uziya ‘wazuwili’ nawa wadiwili mwamulejeluwu. Chuma chafuminimu, Yehova wamukatishili nambumba.—2 Kushi. 26:3-5, 16-20.

Eñañi, mpinji yikwawu chakeñekaña kuhimpa yitoñojoka yetu chikupu. Talenu chakutalilahu chamakonu. Joachim amupapatishili mu 1955, kushika mu 1978 amuhañili muchipompelu. Chimwahitili yaaka 20, wabalumukili mumuchima nawa amufuntishili nakwikala Chinsahu chaYehova. Chakatataka, eluda wumu wamwihwili nindi muloñadi chiwabulilili kusoneka mukanda kulonda wufunti. Joachim wakwili nindi: “Nahilili nawa nadinkeli wanta. Nanukaña nami naluwañesheleña. Chanhañiluwu, nelukili nami aYinsahu jaYehova atañishaña chalala.” Wateleleli kuhimpa yililu yindi nikubalumuka mumuchima.

Tunateli kwikala mukukala kwakeñekaña kuhimpa yitoñojoka niyililu yetu. Twatela kuhimpa yitoñojoka yetu kulonda Yehova yotutiyi kuwaha.—Mas. 34:8.