Komana mwatañili nakanañachima yibaaba yakatataka yaKaposhi Kakutalila? Talenu neyi mukutwesha kwakula awa malwihu:

Komana chachiwahi akwaKristu kwocha Chibimbi?

Muntu yamweni nateli kufuukulahu kuchocha chibimbi hela nehi. Hela chakwila Bayibolu yahosha wanyi chikupu hanichi chaaku, twatela kwiluka netu yibimbi yaMwanta Sawulu namwanindi Jonatani ayocheli nkumininaku dinu ayijiikili. (1 Sam. 31:2, 8-13)—6/15, ifu 7.

Kukalanyi kunateli kumonayi muntu neyi nabuukili kwituña dacheñi nakukwasha kudi kukaankila kweneni?

Iku diku kukala kusatu (1) kuhimpa chihandilu, (2) kwanuka antaña, (3) nikukwata wubwambu nawamana kwetu. Antu amavulu ashinda iku kukala ayikiswila chikupu.—7/15, mafu 4-5.

Muloñadi matilakiti amaha chiyekalilawu aswayi kuhana?

Ejima ayisoneka munjila yoyimu. Matilakiti ejima atukwashaña kutaña nsona muBayibolu nawa akweti malwihu itwatela kumwihula mwiniitala. Hichikweti muloña nachakwakulayuku, bakulenu mukachi mumuleji chahosha Bayibolu. Twatela cheñi kushimuna lwihu lumwakahanjekahu hakufuntilaku.—8/15, mafu 13-14.

Chumanyi chatela kwilawu anvwali akwaKristu hakubiña anyanawu?

Chalema nankashi kutiyilila chinakuhosha anyana kulonda muyiluki. Fwilenu kutañisha anyanenu yuma yakuspiritu. Yilombolenuña anyanenu nakukeña, chakutalilahu, neyi nakufwila kujinoka nsañu yalala.—9/15, mafu 18-21.

Chitiyañenwinyi chamuBayibolu chaleñela antu amakwawu kuyuula naKristu?

Hanyima yakutachika Kudya kwaMwanta kwaMelela, Yesu watiyañeni chitiyañenu nawatumbanji twindi ashinshika, chavula kutenawu nawu chitiyañenu chaWanta. (Luka 22:28-30) Chayileñeleli akuhweleli chikupu nawu akekala hamu naYesu mwiwulu.—10/15, mafu 16-17.

Indi “antu ambala ejina dindi” ateneniyi Yakoba haYililu 15:14 hiyanyi?

Antu wenawa adiña aYudeya niakwakwitiya abulili kwikala aYudeya atondeliyi Nzambi kwikala munza ‘kulonda atiyakesheña kashinshi’ kaYena wayitambikili. (1 Pet. 2:9, 10)—11/15, mafu 24-25.