NLEÑI yetu watulemesha nankashi hakutwinka wuswa wakudifuukwila. Kubombelahu, wakiswilaña antu azatishaña chawana chenichi kulonda atwali hambidi kudifukula kwalala nawa azataña nañovu hakulemesha ijina dindi dajila nikuhakwilaku nkeñelu yindi. Yehova hakanjikijaña antu nindi amwovwahileña kuhitila mukuyichinishaku. Ilaña walemesha antu adihanaña namuchima wumu wakukeña nikusakilila.

Chakutalilahu, hampinji yadiñawu aIsarela muchinkalampata chaSinayi, Yehova wayilejeli kuloñesha iluña dakudifukwila. Wayilejeli nindi: “Pompeshenu mukachi kenu mulambu waYehova; yowu wukweti muchima wakutiyamu kuwaha diwu wukuwuleta, himulambu waYehova.” (Kwid. 35:5) KaIsarela wudi wejima amulejeli kuhana chuma chidi chejima nawa ahanineña mukudikeñela hichikweti muloña nachuma chidiyi nachu muntu hela njila yakuchizatishilamu chiwahi hakwila nkeñelu yaNzambuku. Chumanyi cheliluwu?

“Ejima atiyili nyichima yawu hiyikuyibimbisha, atiyishiluwu kuwaha kuspiritu yawu” ahanini mulambu wakudikeñela, “ejima atiyili kuwaha munyichima yawu.” Amayala niambanda adikeñeleli kutwala yuma yakuzatisha kumudimu waYehova yidi neyi: nyibulu, niyingelingeli yakumatu, tuzeya twakunyinu, wuru, siliva, wuneñu, wanda wawuzeeli, wanda wawusombu, wanda wuchinana nge-e, nawanda wawuwahi, mavuji ampembi, yitembi yayizamba yanyikoku yakuloomba wulombu wuchinana, yitembi yayikayi, nyitondu yanyizenzi, malola alema wuseya, manji akunyitondu yamavumba amawahi nimanji. Kutwala muna, “yuma yadiñuwu nayu yawaninini mumudimu wejima wakutuña malala, yabadikilumu.”—Kwid. 35:21-24, 27-29; 36:7.

Bayi neyi yuma yahaninuwu diyi yamuzañalesheli Yehovaku, ilaña wazañaleli chahaninuwu namuchima wumu nakukwasha kudifukula kwalala. Adihanini cheñi kuzata mudimu. Bayibolu yahosha nawu “ambanda ejima adiñi namaana munyichima yawu, atuñili mahina namakasawu.” Eñañi, ‘ambanda ejima ahizumwishiluwu munyichima yawu namaana atuñili mahina amavuji ampembi.’ Kubombelahu, Yehova wamwinkeli Bezaleli ‘maana, kashinshi, kwiluka, niwukalawenu wejima.’ Kafwampi, Nzambi wamwinkeli Bezaleli niOholiyabi wukalawenu wakuzata nyidimu yejima yakeñekeleña.—Kwi. 35:25, 26, 30-35.

Yehova chayilejeliyi aIsarela nindi ahani yawana welukili chikupu nindi ‘ejima akutiya kuwaha munyichima yawu’ akukwasha kudifukula kwalala. Nawa wayikiswilili antu ejima ahanini namuchima wumu nawa azañaleli chikupu. Dichi Yehova wamwekesheli nindi wakiswilaña ambuñindi ahanaña namuchima wumu nawa wayinkaña yuma nikukwasha antu akuluka yitembi atela kuzata mudimu windi. (Mas. 34:9) Ilukenu chikupu nenu Yehova wakayikiswila chimwamukalakelaña namuchima wumu.