1, 2. Muloñadi antu amavulu atiyili chahosheleñayi Yesu chakañenyuwu kwiluka mwatalishili mazu indi?

 MUNTU nateli kutiya izu damuntu wunakuhoshayi nindi. Nateli nikwiluka izu chidinakutiyakana. Komana nateli kuhetelamu neyi chakwila natiyi wanyi munatalishi mazu anakuhoshayi owu muntu? (1 Kor. 14:9) Munjila yoyimu, antu amavulu atiyili chahosheleñayi Yesu. Wahosheleña nawu mwidimi datiyileñawu. Hela chochu, bayi neyi ejima wawu elukili mwatalishili mazu induku. Dimuloña waletesheli Yesu yaleji antiyilili jindi nindi: ‘Ntiyililenu wejima wenu kulonda mwiluki muchatalisha.’—Maku 7:14.

² Muloñadi antu amavulu chakañenyuwu kutiyisha mwatalishili mazu ahosheleñayi Yesu? Antu amakwawu adiña nayitoñojoka yatama. Yesu wayilejeli antu amuchidiwu nindi: ‘Chalala mwadiwula nshimbi jaNzambi kulonda muhembi chaaku chenu.’ (Maku 7:9) Awa antu hiyakeñeleña kwiluka mwatalishili mazu induku. Hiyakeñeleña kuhimpa yililu yawu niyitoñojoka yawuku. Kutiya adiña nakutiya, ilaña nyichima yawu yadiña yajika dehi. (Tañenu Matewu 13:13-15.) Tunateli kushinkula ñahi nyichima yetu kulonda tuheteli muntañishilu yaYesu?

3. Muloñadi atumbanji chatiyiluwu mazu aYesu?

³ Twatela kwimbujola chakutalilahu chawatumbanji twaYesu adiña adizoza. Wayilili nindi: “Mesu enwenu anakooleki, muloña amonaña; nimatu enu, muloña atiyaña.” (Mat. 13:16) Chumanyi chaletesheli wena atiyi ilaña amakwawu akañanyi kutiya? Chatachi, adiña nakwihula malwihu nawa akeñeleña kwiluka chikupu mwatalishili mazu aYesu. (Mat. 13:36; Maku 7:17) Chamuchiyedi, akeñeleña kudizilahu nsañu yikwawu hayuma yelukiluwu munyichima yawu. (Tañenu Matewu 13:11, 12.) Chamuchisatu, akeñeleña kuzatisha yuma yatiyiliwu nawa yelukiluwu muchihandilu chawu nikuzata nañovu kulonda alejuku akwawu.—Mat. 13:51, 52.

4. Hakwila tutiyi yishimu yaYesu, njilanyi yisatu yitwatela kulondela?

⁴ Neyi tunakukeña kutiya yishimu yaYesu, twatela kwimbujola chakutalilahu chawatumbanji ashinshika. Hakwila twili mwenimu twatela kulondela njila jisatu. Yatachi, twatela kwikala nampinji yakudiza nikutoñojoka chikupu hayuma yahosheliyi Yesu, kusandujola nikwihula malwihu atelela. Chumichi chaleñelaña muntu kwiluka yuma. (Yish. 2:4, 5) Yamuchiyedi, twatela kumona iyi yuma yituneluki chiyesekana nayuma yikwawu yitweluka dehi nikushinshika chiyatukwashaña halwetu. Chumichi chaleñelaña muntu kwikala nakashinshi. (Yish. 2:2, 3) Yamuchisatu, twatela kuzatisha yuma yitwadiza muchihandilu chetu. Chumichi chamwekeshaña nawu tukweti maana.—Yish. 2:6, 7.

5. Shimunenu chakutalilahu chinakumwekesha chaambu chidi hakachi kakwiluka, kashinshi nimaana.

⁵ Chaambwinyi chekala hakachi kakwiluka, kashinshi nimaana? Tunateli kulumbulula muniyi njila: Fwikijenu munemani hakachi kamukwakwa nawa basi yinakwinza himunemani. Chatachi, mukumona nenu hibasi, dakwila nawu muneluki. Kuhiñahu, mukwiluka nenu neyi mwimana basi yikuyihuma, dikwila mudi nakashinshi. Dichi mukufuma mumukwakwa kulonda basi yihiti, dikwila nawu mudi namaana. Dihu hafuma Bayibolu kutukonkomwena nawu twatela ‘kuhemba maana alala.’ Muloña akatuhandisha.—Yish. 3:21, 22; 1 Tim. 4:16.

6. Malwihwinyi awana itukwihula hampinji yitukudizaña hayishimu yaYesu yitanu nayiyedi? (Talenu  chikasha.)

⁶ Muchinu chibaaba nichikalondelahu, tukudiza hayishimu yitanu nayiyedi yazatishiliyi Yesu. Hampinji yitukudizaña haniyi yishimu, tukwihula awa malwihu analondeluhu: Indi ichi chishimu chinatalishi mudihi (Chumichi chikutukwasha kulonda twiluki.) Muloñadi Yesu chatwitililiyi ichi chishimu? (Chumichi chikutuleñela kwikala nakashinshi.) Tunateli kuzatisha ñahi iyi nsañu hakwila yitukwashi etu aweni nikukwasha amakwawu? (Iku dikwikala namaana.) Nkumininaku, indi iyi nsañu yatudizishañadi hadi Yehova niYesu?

7. Indi chishimu chalubutu lwamostadi chatalisha mudihi?

⁷ Tañenu Matewu 13:31, 32. Indi chishimu chaYesu chalubutu lwamostadi chatalisha mudihi? Lubutu lwemenañaku nsañu yaWanta ninsañu yafumaña hakushimwina iyi nsañu, chipompelu chawakwaKristu. Kafwana kalubutu kamostadi “kakuminamu kukeha hambutu jejima,” nichipompelu chawakwaKristu chadiña chanyanya nankashi muchaaka cha 33 C.E. Hela chochu, chimwahitili yaaka yantesha, chipompelu chakulileña chikupu. Antu amavulu hiyatoñojokeleña nawu chikukula swayuku. (Kol. 1:23) Ichi chipompelu chichakulili mwafumini yuma yayiwahi muloña Yesu watulejeli nindi “niatujila ahaluzwizu” atwesheli kuwana ‘hakutuñila yisakala yawu kunyitayi yindi.’ Awa atujila achifwikija emenañaku antu akweti nyichima yayiwahi  awanaña yakudya yakuspiritu, wulelu nimwakushakama mukachi kachipompelu chawakwaKristu.—Esekejenu Ezekeli 17:23.

8. Muloñadi Yesu chazatishililiyi chishimu chalubutu lwamostadi?

⁸ Muloñadi Yesu chazatishililiyi ichi chishimu? Wazatishili chakulaña lubutu lwamostadi munjila yakuhayamisha kulonda yalumbululi Wanta waNzambi chiwatohaña, kukiña nikufwomona yuma yakañeshaña. Kutachika tuhu muchaaka cha 1914, kuloñesha kwaNzambi kwahamaseki kunakukula munjila yakuhayamisha. (Isa. 60:22) Antu ekala muniku kuloñesha ayikwashaña kukundama kwakwihi naYehova. (Yish. 2:7; Isa. 32:1, 2) Cheñi nawa, kwosi muntu wunateli kukañesha mudimu waWanta wunakutwalekahu kukulaku.—Isa. 54:17.

9. (a) Chumanyi chitunateli kudizila kuchishimu chambutu yamostadi? (b) Indi ichi chishimu chatudizishaña chumanyi hadi Yehova niYesu?

⁹ Chumanyi chitunateli kudizila kuchishimu chambutu yamostadi? Hadaha twashakamaña mwiluña mwekala aYinsahu antesha nawa mudimu wakushimwina wayaña hambidi wanyi. Ilaña, neyi twanuka netu nsañu yaWanta yinateli kushinda kukala kudi kwejima, chumichi chikutukwasha kuumika. Chakutalilahu, Mana Kwetu Edwin Skinner chashikiliyi muIndia mu 1926, mwadiña hohu aYinsahu antesha munidi ituña. Hakusambila antu antesha chikupu diwu atejeleña nsañu yayiwahi nawa mudimu wakushimwina awumweneña nawu “wakala kuzata.” Ilaña watwelekeluhu nakushimwina nawa wamweni nsañu yaWanta chiyafwomweni kukala kweneni. Chayinu mpinji muIndia mudi aYinsahu akubadika 37,000 nawa antu akubadika 108,000 apompeli kuChanukishu chaaka chinamani. Shinshikenu cheñi mudimu waWanta chiwunakuya hambidi. Muchaaka chochimu chashikiliyi Mana Kwetu Skinner muIndia, dihu hatachikili nimudimu wakushimwina muZambia. Makonu akwakushimwina akubadika 170,000 ashimwinaña munidi ituña nawa antu 763,915 apompeli kuChanukishu mu 2013. Ichi chinayi mwikala nawu muntu wumu hadi antu 18 wapompeli kuChanukishu muZambia. Iwu mudimu wunayiluku hambidi chikupu.

10. Indi chishimu cheluñi chatalisha mudihi?

¹⁰ Tañenu Matewu 13:33. Indi chishimu  cheluñi chatalisha mudihi? Ichi chishimu chatalisha cheñi kunsañu yaWanta niyuma yafumañamu. “Wuña wejima” wemenañaku nyunza yejima nawa kututumuka kwawuña kwemenañaku nsañu yaWanta chiyatandaña kuhitila mumudimu wakushimwina. Hela chakwila mbutu yamostadi yamwekanaña chiyakulaña, ilaña kututumuka kweluñi hakusambila kwamwekanaña wanyi. Chimwahita mpinji dihu himukumona nenu wuña wunatutumuki.

11. Muloñadi Yesu chazatishililiyi ichi chishimu?

¹¹ Muloñadi Yesu chazatishililiyi ichi chishimu? Yesu wadiña nakushimuna nindi nsañu yaWanta yikweti ñovu yakutanda nankashi nikukojeja antu kuhimpa. Nsañu yaWanta yinashiki kwejima “nikwakumina maseki.” (Yil. 1:8) Hela chochu, nsañu yawanta chiyahimpaña antu chamwekanaña wanyi; nawa hakusambila hitunateli nikumona yuma yafumañamuku. Ilaña antu amavulu kudi kwejima anakwiteja nsañu yaWanta niñovu yamazu awanta kulonda yihimpi yililu yawu.—Rom. 12:2; Efwes. 4:22, 23.

12, 13. Shimunenu yakutalilahu yinakumwekesha mudimu wakushimwina Wanta chiwunakuyilaku hambidi neyi chashimunawu muchishimu cheluñi.

¹² Yuma yafumañamu mumudimu wakushimwina yavula kumwekana neyi munahiti yaaka yayivulu kufuma hatachikili mudimu. Chakutalilahu, Franz naMargit anakuzatila hamutayi wukwawu chayinu mpinji, azatilileña hakasanji kamutayi kamuBrazil mu 1982. Ashimwinini mumbaka yanyanya. Hakachi kawatudizi aBayibolu atachikiluwu kudizisha hadiña mama yawantu nianyanindi awana. Mwana weyala wamukulumpi wadiña nayaaka 12 yakusemuka hayina mpinji nawa wadiña nansonyi chikupu chakwila kakavulu wakeñeleña kuswama henohu kanda atachiki kudiza. Awa antu adisumbula hiyatwalekeluhu kudiza nanichi chisakaku muloña ayihimpili mudimu. Ilaña chimwahitili yaaka 25 ayili nakuhempula muniyi mbaka. Chumanyi chawenuwu? Awanini chipompelu chikweti akwakushimwina 69, apayiniya ampinji yejima 13 nawa wejima wawu apompeleleña Mwitala daWanta dadiha. Indi ona mwana weyala wadiña nansonyi? Chayinu mpinji nakukalakala neyi nloñeshi wezanvu dawaeluda. Kufwana iluñi damuchishimu chaYesu, nsañu yaWanta yinayiluku hambidi nawa yinahimpi yihandilu yawantu amavulu, chumichi chayizañaleshaña awa antu adisumbula ayili nakuhempula.

¹³ Ñovu yansañu yaWanta yabulaña kumwekana yahimpaña antu yamwekenaña mumatuña mwakañeshawu mudimu waWanta. Chakala kwiluka nsañu yaWanta chiyatandaña mumatuña amuchidiwu nawa kakavulu twahayamaña hayuma yafumañamu. Shinshikenu chakutalilahu chetuña daCuba. Nsañu yaWanta yashikili munidi ituña mu 1910, nawa Mana Kwetu Russell wayili nakuhempula kuCuba mu 1913. Hela chochu, iwu mudimu hakusambila hiwadiña nakwenda swayuku. Chumanyi chinakuzatika makonu muCuba? Mudi akwakushimwina nsañu yayiwahi akubadika 96,000 nawa antu 229,726 ayili nakupompa kuChanukishu mu 2013, dikwila nawu muntu wumu hadi antu 48 munidi ituña wapompeli. Nimumatuña mwabula kukaanishawu mudimu wetu, nsañu yaWanta yashikaña nimumaluña mwatoñojokañawu aYinsahu nawu anakushimwinamu wanyi. *—Mukwa. 8:7; 11:5.

14, 15. (a) Tunateli kuhetelamu ñahi muyuma yitwadizilaña muchishimu cheluñi? (b) Indi ichi chishimu chatudizishaña chumanyi hadi Yehova niYesu?

¹⁴ Tunateli kuhetelamu ñahi muyuma yatutañishiliyi Yesu muchishimu cheluñi? Neyi tutoñojoka chikupu mwatalisha chishimu chaYesu, chatuleteshaña kubula kusweja  kwakamena netu nsañu yaWanta yikushika ñahi kudi antu amavulu anabuli kuyitiya. Yehova diyi wunakulombola yuma yejima. Indi etu tukweti mudimwinyi? Izu daNzambi dakulaña nawu: ‘Habudidi tumbaña mbutu jeyi, nihamelela bayi wulekesha chikasa cheyuku, muloña hiwuneluki jakalumbulukaku, hela iji, hela jina, indi kwiji jejima jakawahila hamu.’ (Mukwa. 11:6) Dichi, bayi tulalamena kulombelaku mudimu wetu kulonda wendeña chiwahi, sweje-e mumatuña mwakañeshañawu mudimu wetu.—Efwes. 6:18-20.

¹⁵ Kubombelahu, bayi tuzeya neyi mudimu wetu wakushimwina hiwunakuyilaku hambiduku. Bayi tudiwula ‘ifuku dayuma yanyanyaku.’ (Zek. 4:10) Nkumininaku yuma yikufumamu yinateli kuwaha chikupu kubadika yitwakuhweleleli.—Mas. 40:5; Zek. 4:7.

16. Indi chishimu chamukwakulandisha wendaña nichachuma chalema wuseya chaswekawu chatalisha mudihi?

¹⁶ Tañenu Matewu 13:44-46. Indi chishimu chamukwakulandisha wendaña nichachuma chalema wuseya chaswekawu chatalisha mudihi? Mumafuku aYesu, akwakulandisha amakwawu endeleña maluña amalehi adi neyi Kaluñalwiji kaIndia nakulanda mperola yasweja kuwaha. Mukwakulandisha wendaña munichi chishimu nakwimenaku antu akweti nyichima yayiwahi adikitaña chikupu kulonda amanishi nzala yawu yakuspiritu. “Mperola yimu yasweja kulema wuseya” yemenañaku nsañu yalala yaWanta yalema. Mukwakwenda chelukiliyi kulema kwamperola wafuukwiluhu ‘swayi-swayi’ kulandisha yuma yejima yadiñiyi nayu kulonda yayilandi. Yesu wahosheli cheñi hadi muntu wazatileña mwiha nawa wawanini chuma chalema wuseya “chaswekawu.” Kwambukaku namukwakulandisha wendaña, iwu muntu hadiñi nakukeñakeña chuma chalema wuseyaku. Hela chochu, kufwana mukwakulandisha, iwu muntu wafuukwili kulandisha ‘yuma yejima’ kulonda yalandi chuma chalema wuseya.

17. Muloñadi Yesu chazatishililiyi chishimu chamukwakulandisha wendaña nichachuma chalema wuseya chaswekawu?

¹⁷ Muloñadi Yesu chazatishililiyi iyi yishimu yiyedi? Washimwineña nindi antu adizaña chalala munjila jashiyashana. Antu amakwawu achikeñakeñaña nawa adikitaña chikupu hakwila awani chalala. Amakwawu hela chakwila hiyakeñakeñaña chalalaku achiwanaña, hekwawu ayishimwinaña. Hichikweti muloña nanjila yinawaninumu muntu chalalaku, muntu wudi wejima welukaña kulema kwachuma chinawaniyi nawa wazataña nañovu kulonda yachikwati namakasa ayedi.

18. (a) Tunateli kuhetelamu ñahi muniyi yishimu yiyedi? (b) Indi iyi yishimu yatudizishaña yumanyi hadi Yehova niYesu?

¹⁸ Tunateli kuhetelamu ñahi muniyi yishimu yiyedi? (Mat. 6:19-21) Dihulenu nenu: ‘Komana nekala nayililu neyi yawantu amuniyi yishimu? Komana nalemesha chalala neyi awa antu? Komana nafwilaña kuzata nañovu kulonda nichikwati namakasa ayedi tahindi netejaña yuma yikwawu chidi neyi kukeñakeña yuma yamuchihandilu kulonda yinluwañesheña?’ (Mat. 6:22-24, 33; Luka 5:27, 28; Fwi. 3:8) Chitwasweja kukeña chalala chitwawana, tukuchilemesha chikupu muchihandilu chetu.

19. Yumanyi yitwakadiza muchibaaba chinalondeluhu?

¹⁹ Twatela kumwekesha chikupu muchihandilu chetu netu tunatiyi nikwiluka mwatalisha iyi yishimu yaWanta. Anukenu nenu, bayi neyi twelaña yumiyi kuhitila mukwiluka hohu muyatalishaku, ilaña twazatishaña yuma yitwadizilaña kuniyi yishimu. Muchibaaba chinalondeluhu, twakadiza cheñi yishimu yisatu kulonda tukamoni yuma yitwadizilaña kuniyi yishimu.