YAAKA yantesha yinahituhu, Cesar nimwinikwindi Rocio, adiña nachihandilu chachiwahi muCalifornia mwazatileñayi Cesar mudimu wampinji yejima wakuloñesha makina atatishaña nikutuutisha mumatala nawa Rocio wazatileña mudimu wampinji yantesha mukasanji kandotolu. Adiña netala dawu nawa hiyadiña nawanyanaku. Hela chochu, kudi chuma chamwekeni chahimpili chihandilu chawu. Hichumanyi chenichi?

MuOctober 2009, kasanji kamutayi kaUnited States katemesheli mukanda muyipompelu yejima munidi ituña nakuleja akwakuzata mudimu wakudikeñela eluka nyidimu yashiyashana kulonda asonekeshi kuya nakuzatila haBeteli hakapinji kantesha hakwila akwashuku mudimu wakutohesha mutayi waWallkill, muNew York. Niantu apandakeni muyaaka yawantu atambikañawu muBeteli ayikolesheli niwena kusonekesha. A Cesar naRocio ashimwini nawu, “Chineli twadiña twakula dehi, twelukili netu iku hikukooleka kwabulaña kumwekana kayedi kwakuzatila haBeteli. Hitwakeñeleña kushalahu iku kukoolekaku.” Awa adisumbula ahanini yipapilu yawu yasonekeleluwu kuBeteli mukunyakashana.

Hahitili chaaka chimu, ilaña Cesar naRocio ayitambikili wanyi haBeteli. Hela chochu, kudi yuma yikwawu yeliluwu hakwila ashikiji chikonkwanyi chawu kuhitila mukupelesha chihandilu chawu. Cesar wahosheli nindi, “Twabalumwini garaji yetu kwikala kapeka kamu kulonda mwitala detu musonkeleña antu. Twafumini mwitala detu deneni ditwakeñeli chikupu mutwashakamini hohu yaaka yantesha nakwiñila mukaditala kanyanya. Chitwahimpili yumiyi chatukwashili kwikala adiloñesha kwiteja mutambi wakuya kuBeteli neyi anatutambiki.” Chumanyi chamwekeni cheñi? Rocio washimwini nindi, “Chimwahitili kakweji kamu kufuma hitweñilili mukaditala kanyanya, atutambikili kuya nakukalakala kuWallkill neyi akwakuzata mukudikeñela hamafuku antesha. Twamweni hatooka to-o netu Yehova watukiswilili muloña twapelesheli chihandilu chetu.”

Kufwana Cesar naRocio, amana kwetu niahela amavulu anadihani kulonda azatuku mudimu wakutuña  wunakuzatawu Kwituña daNew York. Amavulu anakukwashaku mudimu wakutohesha kasanji kaWallkill, amakwawu adi nakukooleka kwakuzataku mudimu wakutuña kasanji keneni kamukaayi kejima kuWarwick. * Adisumbula amavulu anashiyi matalawu amawahi, nyidimu yayiwahi kushilahu niyimuna yawu kulonda amuzatileña Yehova chikupu. Komana Yehova nakukiswila antu amuchidiwu adi namuchima wakudihana? Chakadi nikujina, nakuyikiswila.

Chakutalilahu, Way, weluka jamalayiti niñodindi Debra wejima wawu adi nayaaka yamuma 50 alandishili itala dawu niyuma yawu yikwawu muKansas nakuya kuWallkill nakuzata neyi akwaBeteli amenekaña. * Hela chakwila ahimpili yuma yayivulu muchihandilu chawu kulonda eli mwenimu, amonaña nawu kudihana kwawu hikwaya mumenjuku. Debra wahosheli kutalisha hamudimu wazatañayi muBeteli nindi: “Mpinji yikwawu natiyaña neyi nidi hakachi kawantu amwekeshañawu munyikanda yetu anakutuña muParadisa.”

Melvin niSharon alandishili itala dawu niyuma yawu yikwawu muSouth Carolina kulonda akwashuku mudimu kuWarwick. Hela chayikalilili kulandisha yuma yawu, awa adisumbula atiyaña kuwaha chikupu hakwikala hakachi kawantu azataña mudimu walema. Ahosheli nawu: “Muzañalu wafuma hakwiluka netu tunakuzata mudimu wukakwasha antu amavulu mukaayi kejima hichuma chachiwahi nankashi.”

Kenneth, walekeli dehi kuzata mudimu wakutuña matala niñodindi Maureen wejima wawu adi nayaaka yamuma 50 afumini muCalifornia nakuya kuWarwick kwadiña mudimu wakutuña. Hakwila nawu ayi, asambilili kuhanjeka namuhela wumu muchipompelu kulonda ayihembeleñaku itala dawu nawa alejeli ataña jawu kulonda amwakameneña tata yaKenneth wadiña wakula dehi. Komana adishonaña chadihaninuwu kuzatila haBeteli? Piñi! Kenneth wahosheli nindi, “Tunakuhetelamu chikupu. Komana hitunakumona kukalaku? Twamonaña kukala, ilaña twahandaña chiwahi hama nawa tunakukolesha antu amakwawu namuchima wumu netu niwena adihani muniyi njila.”

Antu amavulu adihana kuzata iwu mudimu akweti kukala kwashindawu. Chakutalilahu, William nañodindi Sandra adi muyaaka yawu yatachi yamuma 60 adiña nachihandilu chachiwahi muPennsylvania. Adiña nakampani yakutuña yikuñu yamakina yayileteleleña mali amavulu nawa eñijili akwanyidimu 17. Adiña muchipompelu mwakulililuwu kufuma tuhu kuwansi wawu nawa antaña jawu amavulu ashakamineña munidi iluña. Chelili ayitambiki kuya nakuzatila kuWallkill neyi akwakumeneka, elukili nawu iyi diyi mpinji yakushiya ataña, amabwambu niyuma yejima  yadiñawu nayu. William wahosheli nindi, “Chakadi nikujina, kukala kumu kweneni kutwadiña naku hikushiya iluña detu dadiwahi.” Hela chochu, chelili alombi nankashi, awa adisumbula atondeluhu kuya, nawa hiyaditoñeshaña hachuma cheliluwuku. William wahosheli nindi, “Muzañalu wekala hakuzatila hamu nachisaka chaBeteli, hichuma chitunateli kubula kuchesekeja nachuma chidi chejima. Ami naSandra twekala namuzañalu weneni kubadika hakusambila.”

Ricky, mukwakutala mudimu wakutuña muHawaii, amutambikili kuya nakuzatila haBeteli neyi mukwakumeneka kulonda yakwashaku mudimu wakutuña kuWarwick. Ñodindi Kendra, wakeñeleña nfwimwindi yeteji mutambi wakuya kuBeteli. Hela chochu, adiña nakwakamena chikahandañayi mwanawu Jacob wayaaka 11. Ajinokeleña neyi chachiwahi kubuukila Kwituña daNew York hamu nachisaka nawa neyi mwanawu weyala nateli kwinjilila iluña dacheñi.

Ricky wahosheli nindi, “Chuma chatachi chitwakeñeleña chadiña chakuwana chipompelu chadiñi nawatwansi elileña chiwahi kuspiritu. Twakeñeleña Jacob kwikala nawamabwambu amawahi amavulu.” Hela chochu, chipompelu chawaninuwu mwadiña atwansi atensha chikupu, ilaña mwadiña akaBeteli amavulu nankashi. Ricky wahosheli nindi, “Chitwakumishili kupompa, namwihwili Jacob chatiyiliyi muchipompelu chachiha sweje-e chelili mwadiña atwansi ayaaka yindi wanyi. Wanlejeli nindi, ‘Bayi mwakamaku Tata. Nikukwata wubwambu nawamana kwetu atwansi ahaBeteli.’”

Chakadi nikujina, atwansi ahaBeteli ekalili amabwambu jaJacob. Chumanyi chafuminumu? Ricky washimwini nindi, “Ifuku dimu nampinji yawufuku, nahitileña kukapeka kamwanami nawa nawanini kanda yajimi inoñu. Nakuhweleleli nami nikumuwana nakuhema yisela yahavidiyo, ilaña watañileña Bayibolu. Chinamwihwili chuma chelileñayi, Jacob wahosheli nindi, ‘Nekala dehi kaBeteli wakansi nawa nikumanisha kutaña Bayibolu yejima muchaaka chimu.’” Sweje-e dinu, Ricky naKendra atiyaña kuwaha, bayi neyi muloña Ricky nakuzataku mudimu wakutuña kuWarwick hohuku, ilaña akweti muzañalu cheñi muloña mwanawu nakukulilaku kuspiritu chelili abuuki.—Yish. 22:6.

Mudimu wukutuña haWallkill nihaWarwick keña wumani, dichi antu atambikiluwu kuzata eluka nawu mudimu wawu wahaBeteli wakapinji kantesha hohu. Komana awa amana kwetu niahela aswejaña kwakamena kutalisha hachuma chakelañawu nikwakayawu? Kwakulehi! Amavulu atiyaña neyi chatiyañawu antu ayedi nawañodi jawu adi muyaaka yawu  yamuma 50 afuma kuFlorida. John, mukwakutala mudimu wakutuña nañodindi Carmen, akwakuzata mukudikeñela akapinji kantesha haWarwick, ahosheli nawu: “Tunamoni Yehova chatwakamenañayi muyuma yitwakeñaña nakushika niyinu mpinji. Twatoñojokaña netu bayi neyi Yehova watuleta kunu chayinu mpinji kulonda akatunati chisayikila kumbiduku.” (Mas. 119:116) Luis, watuñaña yozelu yakujima nachu kesi akalakalaña haWallkill nañodindi Quenia. Ahosheli nawu: “Twamona dehi Yehova chatwinkañayi yuma yakumujimba yitwakeñaña. Hela chakwila tuneluki wanyi chakatukwashayi, mpinji yitukafuma haBeteli niiluña kutwakaya, twakuhwelela  chikupu netu wukatwalekahu kutwakamena.”—Mas. 34:10; 37:25.

Antu amavulu anazatuku mudimu watuña muNew York adi kukeña njila yakukaaninamu kudihana. Hela chochu, amwesekeli Yehova neyi chatulejawu wejima wetu kumweseka, wahosha nindi: “Muñeseki dinu nachu, mutali neyi nukubula kuyenzulwila njanina jamwiwulu, nakayihuñunwina nkisu yayivulu yakukañanya nihakuyitambwila.”—Mal. 3:10.

Komana ninenu munateli kumweseka Yehova kulonda mumoni nkisu yindi yasweja? Lombenu kulonda mumoni yuma yimwatela kwila hakwila muzatuku iwu mudimu waletaña muzañalu wudi kuNew York hela kuzataku nyidimu yikwawu yaNzambi yakutuña kulonda mumoni Yehova chakuyikiswilayi.—Maku 10:29, 30.

Dale, injiniya niCathy afumini kuAlabama akolesheli akwawu kuzata iwu mudimu. Iku anakuzatila haWallkill mukudikeñela, ahosheli nawu: “Neyi wikala nawulobu wakushiya iluña diwakeña, wukwikala nakukooleka kwakumona spiritu yaYehova chiyazataña.” Chumanyi chakeñekaña kulonda mudihani? Dale wahosheli nindi: “Peleshenu chihandilu, peleshenu chihandilu nawa peleshenu chikupu chihandilu chenu. Himwamba kaditoñeshaku!” Gary, wakuNorth Carolina nazati yaaka 30 hakutala mudimu wakutuña. Yena nañodindi Maureen ahosheli nawu nkisu yikwawu yinadiluñishuwu haWarwick “hikubulakana nikuzatila hamu nawamana kwetu niahela amawahi anashakami chihandilu chawu chejima muBeteli nakumukalakela Yehova.” Gary wabombeleluhu nindi: “Hakwila muzatili haBeteli, mwatela kwikala nachihandilu chapela, nawa dichi chihandilu chachiwahi chakuhanda munanu mafuku akukuminina.” Jason, wazatileña jamalayiti niJennifer afumini muIllinois ahosheli nawu kuzatila haWallkill hamudimu wakutuña Beteli “hichuma chikuyileñela kutiya chitwakashakamaña mwituña dadiha.” Jennifer niyena wabombeleluhu nindi: “Chatuzañaleshaña hakwiluka netu yuma yejima yitwazataña ayihamekaña kudi Yehova nawa hiyuma yatuhembelayi kumbidi. Yehova wukayikiswila chikupu.”