1, 2. Chumanyi cheliliyi Yesu hawufuku waNisani 14, 33 C.E.? (Talenu mwevulu wakutachikilahu.)

WUFUKU weyilili, ilaña muYerusalema mwadiña chejeji chakakweji. Wadiña wufuku waNisani 14, 33 C.E. Yesu niapostolu indi afumini hakudya Chipandakenu chakwanakana chayipulwishiluwu aIsarela muwuduñu muEjipitu henohu munahiti dehi yaaka 1,500. Yesu wadiña nawapostolu indi ashinshika 11, watachikili kudya kwadimena kwakwanakana kufwa kwadi kufwayi henohu idi ifuku kanda dikumi. *—Mat. 26:1, 2.

² Yesu hakukiswila nkisu nawa hakuhitishamu dinkendi dakadi iluñi kudi apostolu indi nakuhosha nindi: “Tambulenu mudyi.” Wanoneli lupasa lwavinyu, hakusakilila cheñi nakuhosha nindi: “Nwenumu wejima wenu.” (Mat. 26:26, 27) Yesu hayinkeli cheñi yakudya yikwawuku, ilaña wadiña nansañu yayivulu yakuyileja atumbanji twindi ashinshika hanidi ifuku dalema nampinji yawuku.

3. Ichi chibaaba chikuhosha hamalwihwinyi?

 ³ Dichi Yesu watachikili Chanukishu chakufwa kwindi chatenañawu cheñi nawu ‘Kudya kwaMwanta kwaMelela.’ (1 Kor. 11:20) Antu amakwawu anateli kwihula kutalisha haChanukishu nawu: Muloñadi chitwatelela kwanakana kufwa kwaYesu? Indi dinkendi nivinyu yemenañaku kwodi? Tunateli kudiloñesha ñahi hakwanakana Chanukishu? Anyi atela kudya nikunwa yifwikija? Indi akwaKristu alemesha ñahi kuchiñeja kwamuNsona kukwetuwu?

4. Kufwa kwaYesu kwaletesheli chumanyi kwikala chaswayi kudi etu?

⁴ Muloña twekala anyana kaAdama, twaswana nshidi nikufwa. (Rom. 5:12) Kwosi muntu wabula kuwanina wunateli kumwinka Nzambi ifutu dakukuula nachu wumi windi hela akwawuku. (Ps. 49:6-9) Hela chochu, kuhitila mukufwa kwindi Yesu wafweteli ifutu detejewa, mujimba windi wawanina nimashi apwekesheliyi. Hakuhana wuseya wefutu kudi Nzambi, Yesu waletesheli chikali chaswayi kutukuula kunshidi nikukufwa nikutambwila chawana chawumi wahaya nyaka.—Rom. 6:23; 1 Kor. 15:21, 22.

5. (a) Tweluka ñahi netu Nzambi niKristu akeña antu? (b) Muloñadi chitwatela kuya nakwanakana kufwa kwaYesu?

⁵ Chawana chefutu chamwekeshaña nawu Nzambi wakeña antu. (Yow. 3:16) Mulambu waYesu wamwekeshaña nawu niyena watukeña. Hakwikala ‘mukalawenu’ waNzambi henohu kanda yenzi hamaseki neyi muntu, Yesu ‘watiyileña kuwaha nawanyana kawantu.’ (Yish. 8:30, 31) Muloña wakumusakilila Nzambi niMwanindi twatela kuya kuchanukishu chakufwa kwaYesu, dikwila nawu tunakwovwahila lushimbi lwakwila nawu: “Ilenu mwenimu muñanukaña nachu.”—1 Kor. 11:23-25.

6. Twatela kumona ñahi dinkendi nivinyu yahaChanukishu?

⁶ Hampinji yatachikiliyi Chanukishu, Yesu habalumwini dinkendi nivinyu muchihayamisha nakwikala mujimba nimashi indi awenuku. Ilaña wahosheli kutalisha hadinkendi nindi: ‘Dinakwimenaku mujimba wami.’ Hakuhosha havinyu, wahosheli nindi: ‘Yinakwimenaku mashi ami achitiyañenu akupwekela antu amavulu.’ (Mark 14:22-24) Chakadi nikujina, dinkendi nivinyu yadiña yifwikija.

7. Indi mankendi azatishañawu haChanukishu emenañaku chumanyi?

⁷ Haniyi mpinji yasweja kulema mu 33 C.E., Yesu wazatishili mankendi ashaliluhu hakudya Chipandakenu. (Kwid. 12:8) Munyikanda Yajila mpinji yikwawu iluñi demenañaku kutoka hela nshidi. (Mat. 16:6, 11, 12; Luka 12:1) Dichi, Yesu chazatishiliyi mankendi akadi iluñi chadiña chalema muloña emenenuku chiwahi mujimba windi wakadi nshidi. (Heb. 7:26) Mankendi amuchidiwu ayizatishaña haChanukishu.

8. Indi lupasa lwavinyu yahaChanukishu yemenañaku chumanyi?

⁸ Vinyu yazatishiliyi Yesu haNisani 14, 33 C.E., yemenenuku mashi aYesu neyi chemenañaku lupasa lwavinyu yahaChanukishu makonu. Mashindi ayipwekesheli haGologota hanzi yamusumba waYerusalema ‘kulonda kwanakena nshidi.’ (Mat. 26:28; 27:33) Muloña mankendi nivinyu yahaChanukishu yemenañaku mulambu waYesu walema wahaniniyi kukola antu ovwahila nawa twalemesha ichi chawana, chikuwaha neyi tudiloñesha kulonda twakanakani Kudya kwaMwanta kwaMelela kwahachaaka.

9. (a) Muloñadi chichalemena kulondela ndandanda yakutaña Bayibolu mumpinji yaChanukishu? (b) Mwatiyaña ñahi hefutu?

⁹ Neyi tutwalekahu kulondela ndandanda yakutaña Bayibolu mumpinji yaChanukishu yekala muKutalatala muNsona Hefuku Hefuku, tunateli kutoñojoka chikupu hayuma yeliliyi Yesu henohu kanda yofwi. Chumichi chikutukwasha kuloñesha nyichima yetu kulonda twanakani Kudya kwaMwanta kwaMelela. * Muhela wumu wasonekeli nindi: “Twatalilaña mpinji yaChanukishu. Chekalaña chadimena chaaka nichaaka. Inakwanuka chinemeni mwitala mwadiña chipenji . . , iku inakumutala tata nawa nelukili chalema chikupu ifutu. . . . Nelukili nyikanda yajila yejima nichakuyilumbulula. Ilaña chinatiyili wushona wenzaña hamuloña wakufwa dihu hohu hinazañaleli chikupu kutalisha hachuma chikatuzatilawu nadina ifutu dalema.” Eñañi, neyi tunakudiloñesha kuya kuChanukishu, chikuwaha neyi tutoñojoka mulambu waYesu chiwatukuula kuchipupu chanshidi nikufwa.

10. Indi kudiloñesha kwanakana Chanukishu kunateli kutukwasha ñahi mumudimu wetu wakushimwina?

¹⁰ Kudiloñesha kwanakana Chanukishu hadaha kunakukeñeka kutoñojoka chakuzata chikupu mumudimu wetu wakushimwina, hekwawu nikuzataku wupayiniya wakukwasha muchilaaka chaChanukishu. Hampinji yitukutambikaña atudizi aBayibolu niantu amakwawu kuKudya kwaMwanta kwaMelela tukutiya muzañalu wafumaña hakuhosha hadi Nzambi, Mwanindi ninkisu yahembelawu antu amuzañaleshaña nikumuhameka Yehova.—Mas. 148:12, 13.

11. Indi Akorinda amakwawu adyili nikunwa ñahi yifwikija yahaChanukishu munjila yabula kutelela?

¹¹ Chimukuloñeshaña kwanakana Kudya kwaMwanta kwaMelela, toñojokenu yuma yasonekeleliyi kapostolu Pawulu akwaKristu amuchipompelu chamuKorinda. (Tañenu 1 Akorinda 11:27-34.) Pawulu washimwini nindi muntu wukudya dinkendi nikunwa mulupasa lwaMwanta chakadi kutela “wukumona muloña wamujimba namashi aMwanta,” Yesu Kristu. Dichi muntu wawayishewa watela ‘kudeseka yomweni’ kufumahu dinu wukudya nakunwa yifwikija. Neyi nehi, “wukudya nakunwa chakudiletela muloña.” Muloña wakwikala nayililu  yatama, Akorinda amavulu adiña ‘azeya, nikukatakata nawa antesha akamini mutulu twakufwa kwakuspiritu.’ Hadaha amakwawu adyili nikunwa chikupu henohu Chanukishu kanda hela hampinji yachanukishu chakwila hiyadiña asoñama muyitoñojoka hela kuspirituku. Hiyadiña nawuselewa waNzambuku muloña wakudya nikunwa yifwikija munjila yabula kutelela.

12. (a) Indi Pawulu wesekejeli Chanukishu nachumanyi, nawa wayisoñamishili adyaña nakunwa nindidi? (b) Chumanyi chatela kwilayi muntu wadyaña nakunwa yifwikija wunavulumuni nshidi yeneni?

¹² Pawulu wesekejeli Chanukishu nayakudya yakudya nawantu amakwawu nawa wasoñamishili adyileña nikunwa nindi: ‘Himukutwesha kwila munwa mulupasa lwaMwanta, munwa nawa mulupasa lwawandemonuku. Himukutwesha kwila mutambula kumesa yaMwanta, mutambula nawa kumesa yawandemonuku.’ (1 Kor. 10:16-21) Neyi muntu wadyaña nikunwa yifwikija haKudya kwaMwanta kwaMelela navulumuni nshidi yeneni, watela kukeña wukwashu wakuspiritu. (Tañenu Yakoba 5:14-16.) Neyi wawayishewa wamuchidiwu ‘yabalumuka mumuchima,’ hanakusawisha mulambu waYesu kuhitila mukudya nikunwa yifwikija yahaChanukishuku.—Luka 3:8.

13. Indi kulomba kutalisha hakuchiñeja kwatwinkayi Nzambi kunateli kutukwasha ñahi?

¹³ Chitukudiloñeshaña kwanakana Chanukishu, chikuwaha neyi tukulomba nakutoñojoka hakuchiñeja kwetu kwatwinkayi Nzambi. Kwosi kambuña Yehova wadihana nawa kambanji kaMwanindi washinshika wukukeña kubula kulemesha mulambu waYesu kuhitila mukudya nikunwa yifwikija yahaChanukishu neyi hakweti wunsahu walala wunakumwekesha nawu himukwaKristu wawayishewaku. Hanu dinu muntu nateli kwiluka ñahi neyi chakwila watela kudya nikunwa yifwikija hela nehi?

14. Indi chitiyañenu chachiha chaletesha antu adyaña nikunwa yifwikija yahaChanukishu kuhetelamu ñahi?

¹⁴ Antu adyaña nikunwa yifwikija yahaChanukishu eluka chikupu nawu ekala muchitiyañenu chachiha. Yesu wahosheli kutalisha havinyu nindi: ‘Lupasilu lunemenuku chitiyañenu chachiha chamashi ami.’ (1 Kor. 11:25) Kuhitila mudi kaprofwetu Yeremiya, Nzambi washimwineñahu dehi nindi Wakatiyañana chitiyañenu chachiha chambuka nachitiyañenu chaNshimbi chatiyañeniyi nawaIsarela. (Tañenu Yeremiya 31:31-34.) Nzambi watiyañana chitiyañenu chachiha nawaIsarela akuspiritu. (Ŋal. 6:15, 16) Ichi chitiyañenu achikolesha namulambu waKristu nawa chazatikaña namashi indi apwekeli. (Luka 22:20) Yesu diyi Ihaku wachitiyañenu chachiha nawa awayishewa ashinshika ekala munichi chitiyañenu atambwilaña wuswana wamwiwulu.—Heb. 8:6; 9:15.

15. Anyi ekala muchitiyañenu chaWanta, nawa akatambwila kukoolekanyi neyi ashinshika?

¹⁵ Antu atelela kudya nikunwa yifwikija yahaChanukishu eluka nawu ekala muchitiyañenu chaWanta. (Tañenu Luka 12:32.) Antu ekalili atumbanji twaYesu awayishewa nikumukakela Yesu nakashinshi mumakabi indi, akayuula nindi hamu mwiwulu. (Fwi. 3:10) Muloña wakwila ekala muchitiyañenu chaWanta, awayishewa ashinshika akayuula hamu naKristu neyi anyanta amwiwulu haya nyaka. (Chim. 22:5) Antu amuchidiwu atelela kudya nikunwa yifwikija haKudya kwaMwanta kwaMelela.

16. Lumbululenu chantesha mwatalisha Aroma 8:15-17.

¹⁶ Antu hohu akweti wunsahu waspiritu nawu hiyanyana kaNzambi diwu atela kudya nikunwa yifwikija yahaChanukishu. (Tañenu Aroma 8:15-17.) Ilukenu nenu Pawulu wazatishili izu dachiAramaic dakwila nawu, ‘Aba,’ datalisha mukwila nawu “Eyi  Tata!” Mwana nateli kuzatisha idi izu hakutambika tata yindi muloña dadiña izu damwekesheleña kukeña nikalemesha. Antu atambwila “spiritu yakwikala anyana” hiyanyana kaNzambi atondawu naspiritu. Spiritu yindi yashimunaña wunsahu naspiritu yawu nawa elukaña nawu hiyanyana kaYehova awayishewa. Bayi neyi azeya hohu kushakama hamasekuku. Eluka chikupu nawu akekala answana hamu naYesu muWanta wamwiwulu neyi ekala ashinshika nakushika kukufwa. Makonu, kudi hohu ashalahu awa 144,000 atumbanji twaKristu alondelaña mumahaji indi, diwu “awayishawu dehi kudi wajila,” Yehova. (1 Yow. 2:20; Chim. 14:1) Spiritu yindi diyi yayikojejaña kubidika nawu, ‘Aba, Tata!’ Akweti wubwambu wawuwahi chikupu naNzambi.

17. Indi awayishewa akweti kuchiñejanyi, nawa amonaña ñahi kuchiñeja kwawu?

¹⁷ Neyi wudi mukwaKristu wawayishewa, kuchiñeja kwakuya mwiwulu hinsañu yalema yiwatela kulombelahu. Neyi Bayibolu yinakuhosha ‘hakwota’ kudi iyala wamwiwulu, Yesu Kristu, yikunjiki iyi nsañu kudi eyi aweni nawa talilaku hakwikala hakachi ‘kansumbuki’ waKristu. (2 Kor. 11:2; Yow. 3:27-29; Chim. 21:2, 9-14) Neyi Nzambi nakuhosha Mwizu dindi nindi wakeña anyanindi awayishewa naspiritu, ilaku neyi, “Nakutena ami.” Nawa neyi Izu daYehova dinakuhana nshimbi kudi anyanindi awayishewa, spiritu yajila yakukwashaña kwovwahila nakuhosha mumuchima weyi neyi, “Iyi nsañu yinankundami.” Dichi spiritu yaNzambi naspiritu yeyi yashimunaña hamu wunsahu nawu wukweti kuchiñeja kwakuya mwiwulu.

18. Indi “anyikoku acheñi” akweti kuchiñejanyi, nawa watiyaña ñahi hakuchiñeja kweyi?

¹⁸ Munjila yikwawu, neyi wudi hakachi ‘kezaza deneni’ ‘danyikoku acheñi,’ Nzambi wakwinka kuchiñeja kwakushakama hamaseki. (Chim. 7:9; Yow. 10:16) Wakeñaña kushakama haya nyaka muParadisa nawa watiyaña kuwaha kutoñojoka chikupu hayuma yahosha Bayibolu kutalisha hachihandilu chichakekala hamaseki kumbidi. Watalilaña kushakama mukuwunda nachisaka cheyi niantu aloña. Wunakutalila chikupu mpinji yikela nzala, wuzweñi, makabi, yikatu, nikufwa hikunakukabisha cheñi antuku. (Mas. 37:10, 11, 29; 67:6; 72:7, 16; Isa. 33:24) Mwafwilaña kutambwila antu akasañulawu mudi afu nakuchiñeja kwakushakama haya nyaka hamaseki. (Yow. 5:28, 29) Wasakililaña nankashi muloña Yehova wakwinka kuchiñeja kwakushakama hamaseki. Hela chakwila wadyaña nikunwa wanyi yifwikija, wanakanaña Chanukishu muloña wakusakilila ifutu damulambu waYesu Kristu.

19, 20. (a) Indi kuchiñeja kwayinkayi Nzambi kunateli kushikijewa ñahi? (b) Muloñadi chimwakaya kuKudya kwaMwanta kwaMelela?

¹⁹ Hela mukweti kuchiñeja kwakushakama hamaseki indi kwiji kwakuya mwiwulu, kunateli kushikijewa hohu neyi mumukuhwelela Yehova Nzambi, Yesu Kristu niifutu. Kuhitila mukwanakana Chanukishu, mukwikala nakukooleka kwakutoñojoka hakuchiñeja kwenu nikulema kwakufwa kwaYesu. Dichi fwilenu kwikala hakachi kawantu amavulu akanakana Kudya kwaMwanta kwaMelela haChitanu, April 3, 2015 hanyima yakuhuma kwetañwa haMatala aWanta kunyeñumuka mukaayi kejima.

²⁰ Kuya kuChanukishu kunashindameni hachimwalemesha ifutu damulambu waYesu. Neyi mutiyilila nakanañachima kumpanji munateli kumwekeshela antuñi nenu kukeña kuhitila mukuyishimwina nsañu yimwadiza hakukeña kwaYehova niyuma yamaneni yafuukwilayi antu. (Mat. 22:34-40) Zatenu hakumina ñovu jenu jejima kulonda mwakayi kuKudya kwaMwanta kwaMelela.