1. Muloñadi chitwatela kumusakilila Yehova?

TWATELA kumusakilila Yehova, Mukwakuhana ‘yuma yayiwahi yahanañawu yejima, niyawana yalala yejima.’ (Yak. 1:17) Chineli hiKabiña wetu wukweti kukeña, watwakamenaña chiwahi muyuma yejima yitwakeñaña yakumujimba niyakuspiritu. (Mas. 23:1-3) Wadimwekesha kwikala ‘chiswamu chetu niñovu yetu,’ sweje-e mumpinji yakala. (Mas. 46:1) Chalala tukweti nyiloña yayivulu yikuletesha twiteji namuchima wumu chasonekeliyi ñimbi yamasamu nindi: “Musakililenu Yehova, himuwahi; luwi lwindi lwahaya nyaka.”—Mas. 106:1.

2, 3. (a) Kukalanyi kwekala hakubula kulemesha nkisu jetu? (b) Malwihwinyi itukuhanjeka munichi chibaaba?

² Muloñadi chichalemena kudiza iyi nsañu yakusakilila? Neyi chashimwineñahu dehi, antu amavulu munanu mafuku akukuminina hiyasakililañaku. (2 Tim. 3:2) Amavulu hiyalemesha nkisu jawuku. Muloña wakwila anakuyiluwañesha kudi akwakuselujola niakwakutiyakesha yuma, antu amavulu anakufwila kulanda yuma yayivulu chatela atiyeña kuwaha nayuma yikwetuwu. Ninetu tunateli kwikala nayililu yakubula kusakilila. Kufwana aIsarela  akushankulu, tunateli kwikala abulaña kusakilila nikubula kulemesha wubwambu wetu naYehova nikujimbesha nkisu yitwatambwila kudi yena.—Mas. 106:7, 11-13.

³ Shinshikenu cheñi chuma chamwekanaña neyi tunakumona kweseka? Hampinji yamuchidiwu tunateli kuzeya nakuvulamena nkisu jetu. (Mas. 116:3) Hanu dinu, tunateli kwikala ñahi namuchima wakusakilila nikutwalekahu kusakilila? Nawa chumanyi chinateli kutukwasha kwikala namuzañalu hela tunakumona kweseka kwasweja? Twayenu tumoni.

4. Tunateli kutwalekahu ñahi kwikala namuchima wakusakilila?

⁴ Neyi tunakukeña kwikala namuchima wakusakilila nikutwalekahu kusakilila, twatela kwiteja nikutoñojoka chikupu chatukiswilayi Yehova nikutoñojoka nakanañachima chatukeñayi. Ñimbi yamasamu cheliliyi mwenimu, wahayamini chikupu hakumona yuma yayivulu yamwililiyi Yehova.—Tañenu Masamu 40:5; 107:43.

5. Chumanyi chitunateli kudizila kudi kapostolu Pawulu hakwikala namuchima wakusakilila?

⁵ Tunateli kudizila jajivulu kudi kapostolu Pawulu hakwikala namuchima wakusakilila. Mwamweni, watoñojokeli hankisu jindi muloña kakavulu wadiña nakusakilila chakufuma hamuchima. Pawulu welukili nindi wadiña ‘mukwakutukana, mukwakukabisha akwawu nawa mukwawinyi.’ Dichi wasakililili hela chakwila hakusambila wadiña mukwanshidi, Nzambi niKristu amutiyilili luwi nawa amukunjikili mudimu. (Tañenu 1 Timotewu 1:12-14.) Pawulu walemesheli cheñi chikupu akwawu akwaKristu nawa kakavulu wadiña nakumusakilila Yehova hayililu yawakwawu yayiwahi nichazatileñawu nakashinshi. (Fwi. 1:3-5, 7; 1 Tesa. 1:2, 3) Neyi wudi mukweseka, Pawulu wadiña nakumusakilila Yehova chakadi kuumba mpinji hawukwashu watambwilileñayi kufuma kudi ana kwindi akuspiritu hampinji yatelela. (Yil. 28:15; 2 Kor. 7:5-7) Dichi hichakuhayamishaku hakumona neyi nyikanda yasonekeliyi Pawulu yakoleshaña akwaKristu nawu: “Ikalenu akwakusakilila nawa . . . , mudikonkomwenaña muntu namukwawu namasamu, natumina, nitumina twawuspiritu.”—Kol. 3:15-17.

6. Chumanyi chayikoñelayi Yehova chimwamusakililaña?

⁶ Tunateli kwimbujola ñahi chakutalilahu chaPawulu chakusakilila nikwikala namuchima wakusakilila? Kufwana Pawulu, twatela kutoñojoka chikupu hayuma yatukoñelayi Yehova halwetu. (Mas. 116:12) Neyi ayihula nawu, ‘Nkiswinyi yimwatambwila kudi Yehova yimwamusakililaña?’ mukwakula nenudi? Mukuhosha hawubwambu wenu wawuwahi naYehova? Tahindi hakuyanakena kwayanakenawu muloña wakukuhwelela mumulambu wefutu daKristu? Munateli kutena majina awamana kwetu niahela ayikwashaña hampinji yimwamonaña kweseka kwakala kwashiyashana? Kafwampi munateli kutena mwinikwenu imwakeña hela anyanenu. Neyi mwikala nampinji yakutoñojoka chikupu hankisu jajiwahi jamuchidiwu jimwatambwila kudi Tata yenu wukweti kukeña Yehova, mukwikala namuchima wakusakilila nawa mukumusakililaña mafuku ejima.—Tañenu Masamu 92:1, 2.

7. (a) Muloñadi chitwatela kulombela kulomba kwakusakilila? (b) Munateli kuhetelamu ñahi neyi musakilila mukulomba kwenu?

⁷ Neyi tuneluki chikupu nkisu jetu, tukulomba kudi Yehova nikumusakilila. (Mas. 95:2; 100:4, 5) Antu amavulu amonaña  kulomba neyi hinjila hohu yakulombelamu yuma kudi Nzambi. Hela chochu, tweluka netu Yehova watiyaña kuwaha neyi tumusakilila hayuma yitukweti. MuBayibolu mwekala kulomba kwakuvulu kwakufuma hamuchima kwakusakilila kushilahu nikwalombeluwu kudi Hana niHezekiya. (1 Sam. 2:1-10; Isa. 38:9-20) Dichi mwatela kwimbujola ana ambuña Nzambi ashinshika adiña namuchima wakusakilila. Eñañi, musakililenuña Yehova mukulomba hankisu jimukweti. (1 Tesa. 5:17, 18) Nkisu jafumaña mukusakilila jajivulu. Mukuzañalala, mukumukeña Yehova nawa mukukundama kwakwihi nindi.—Yak. 4:8.

8. Chumanyi chikuletesha tubuli kulemesha yuma yejima yatukoñelayi Yehova?

⁸ Muloñadi chitwatela kwikala asoñama kulonda tutwalekuhu kusakilila hayuma yayiwahi yatwinkañayi Yehova? Muloña twaswanini chaaku chakubula kusakilila. Toñojokenu chumichi: Anvwali jetu atachi, aAdama niEvu ayishili mwitempa daparadisa. Adiña nayuma yejima yakeñeleñawu, nawa adiña nakuchiñeja kwakuhanda haya nyaka mukuwunda. (Kutach. 1:28) Ilaña hiyasakililili nkisu jawuku. Adiña nalwisu nawa afwilileña yuma yayivulu. Dichi ajimbesheli yuma yejima. (Kutach. 3:6, 7, 17-19) Chineli twashakamaña nawantu abulaña kusakilila, ninetu tunateli kutachika kuvulamena yuma yejima yatwililayi Yehova. Tunateli kudiwula wubwambu wetu naYehova. Tukuleka kulemesha kukooleka kwetu kutukweti kwakwikala hakachi kawana kwetu amukaayi kejima. Tunateli kudiñija chikupu muyuma yamukanu kaayi kadi kwakwihi nakuhita. (1 Yow. 2:15-17) Hakwila tubuli kuholokela mukukala kwamuchidiwu, twatela kutoñojoka chikupu hankisu jetu nikumusakilila Yehova mpinji yejima hakukooleka kutukweti kwakwikala antu jindi.—Tañenu Masamu 27:4.

9. Muloñadi wutwatelela kutoñojoka hankisu jetu neyi tumona kweseka kwasweja?

⁹ Kwikala namuchima wakusakilila kunateli kutukwasha kuumika kweseka kwasweja. Tunateli kuzeya neyi tumona kukala kunateli kuhimpa chihandilu chetu mukukasumwisha chidi neyi, mwinikwetu yela wuvumbi, yikatu yasweja, kufwa kwantaña hela yuma yatama yenzaña hamuloña wawubanji wadimwekenaña. Tunateli kukoleshewa nikukundejewa hampinji yamuchidiwu neyi tutoñojoka hankisu jetu. Talenu yuma yamwekeni yinalondeluhu.

10. Indi Irina wahetelelumu ñahi hakuchinda nkisu jindi?

 ¹⁰ Irina *, payiniya wampinji yejima wakuNorth America, wadiña wasumbuka kudi eluda watachikili kwila yuma yatama nawa wamushili nawanyana. Chumanyi chamukwashili Irina kutwalekahu kumuzatila Yehova nakashinshi? Wahosheli nindi: “Namusakililaña Yehova hakuñakemena. Muloña wakwila natondahu kuchinda nkisu jami mafuku ejima, namonaña nami nikweti kukooleka kwakuñiluka nikunkeña kudi Tata yetu wamwiwulu watukiñaña. Neluka nami hamba kanshiyaku.” Hela chakwila Irina wamweni yuma yatama muchihandilu chindi, watwalekañahu kuumika kweseka muloña wakwikala namuzañalu nawa wakoleshaña niantu amakwawu.

11. Chumanyi chamukwashili Kyung-sook kuumika yikatu yasweja?

¹¹ Kyung-sook, washakamaña muAsia, wazatileña wupayiniya nanfumwindi hadi yaaka yakubadika 20. Amuwanini nakansa yakumapwapwa nawa amulejeli nawu washalili natukweji tusatu hela tutanu nakamu hakwila yafwi. Hela chakwila yena nanfumwindi amweni kweseka kweneni nikwanyanya, adimweneña mpinji yejima nawu akola kumujimba. Kyung-sook wahosheli nindi: “Ichi chikatu chanzeyesha hama. Natiyili neyi najimbeshi yuma yejima nawa natiyili woma chikupu.” Chumanyi chamukwashili Kyung-sook kuumika? Wahosheli nindi: “Mafuku ejima nampinji yawufuku henohu kanda niyi nakukama, nayaña hewulu detala detu nakulomba nezu datiyakana hayuma yitanu yinamusakililaña Nzambi hanodu ifuku. Kuhiñahu, hinakamenañaku nawa chumichi chankwashaña kumwekesha nami namukeña Yehova.” Indi Kyung-sook wahetelamu ñahi muniku kulomba kwalombañayi nampinji yawufuku? Wahosheli nindi: “Ichi neluki nami Yehova watukwashaña hampinji yitwamonaña kukala nawa nami tukweti nkisu jajivulu jabadika kukala kutwamonaña muchihandilu chetu.”

12. Indi Jason wakundejelewi ñahi hanyima yakufwisha iñodindi?

¹² Jason, wazatilaña hakasanji kamutayi muAfrica nazati dehi mudimu wampinji yejima hadi yaaka yakubadika 30. Wahosheli nindi: “Munahiti dehi yaaka yitanu nayiyedi kufuma hafwili iñodami nawa chankataña chikupu. Neyi nisweja kwanuka hayuma yamweniyi hampinji yakatileñayi kansa channeñeshaña hama.” Chumanyi chamukwasha Jason kuumika? Wahosheli nindi, “Mpinji yimu nanukileña hayuma yayiwahi yitwadiluñishili nañodami nawa namusakililili Yehova mukulomba chinanukili yumiyi. Nawundishili muchima nawa kufuma yina mpinji natachikili kumusakilila Yehova mpinji yejima hayuma yayiwahi yinanukileña. Kusakilila kwankwasha chikupu kutalisha hachinatoñojokaña. Nichidi nachineñi chakufwisha, ilaña kumusakilila Yehova hamuloña wakwikala nawuluwi wawuwahi nikukooleka kwakumuzatila hamu namuntu wamukeñeli chikupu, kwankwasha hama.”

13. Chumanyi chamukwashili Sheryl kuumika chafwishiliyi amuchisaka chindi amavulu?

¹³ Chelili nvula yeneni chikupu yampepela yatenañawu nawu Super Typhoon Haiyan yinoki muPhilippines kumakumishilu a 2013, Sheryl, wadiña hohu nayaaka yakusemuka 13 wajimbesheli yuma yejima. Wahosheli nindi: “Najimbesheli itala detu niamuchisaka chami amavulu.” Tata yindi nimama yindi niahelindi ayedi nimana kwindi wumu afwili nanvula yeneni chikupu. Chumanyi chamukwasha Sheryl kuumika iku kukala chakubula kuhila? Wukweti muchima wakusakilila  nawa watwalekahu kwiluka nkisu jikwetiyi. Wabombeleluhu nindi, “Namweni yuma yejima yeliluwu amana kwetu niahela hakuleta yuma yakutukwasha nikukolesha ejima akeñeleña wukwashu. Nelukili nami amana kwetu kunyeñumuka kaayi kejima adiña nakunlombelelaku. Nasakililaña nankashi muloña Yehova diyi Nzambi yami. Mpinji yejima watwinkaña yuma yitwakeñaña.” Eñañi, kwiluka nkisu jetu hichuma chinateli kutukwasha nankashi neyi tunaneñi hama. Kwikala namuchima wakusakilila kukutukwasha kutwalekahu kwikala namuzañalu hela chakwila tunakumona yuma yakala.—Efwes. 5:20; tañenu Afwilipi 4:6, 7.

14. Yumanyi yayiwahi yitwachiñejaña? (Talenu mwevulu wakutachikilahu.)

¹⁴ Muchihandilu chawantu chejima, antu jaYehova azañalalaña nankisu jatambwilawu. Chakutalilahu, hanyima yakupuluka kudi Fwaro niamashidika indi haKaluñalwiji Kachinana, aIsarela amwekesheli muzañalu wawu kuhitila mukwimba tumina twakuhameka nikusakilila. (Kwid. 15:1-21) Hakachi kankisu yitwalemesha makonu hikuchiñeja kwetu kwakupuluka kuyuma yejima yaletaña makabi nichineñi. (Mas. 37:9-11; Isa. 25:8; 33:24) Fwikijenu chitukatiya neyi Yehova nafumishuhu dehi ayilumbu jindi ejima nakututwala mwituña dadiha mwakekala kuwunda nikuloña. Idi dakekala ifuku dakusakilila chikupu!—Chim. 20:1-3; 21:3, 4.

15. Chumanyi chiwunakufwila kwila muchaaka chejima cha 2015?

¹⁵ Tukutambwila nkisu jajivulu jakuspiritu muchaaka cha 2015 kufuma kudi Yehova. Kafwampi tunateli nikumona kweseka. Hichikweti muloña nachuma chitukumonaku, tweluka netu Yehova hamba katuumbaku. (Kuhit. 31:8; Mas. 9:9, 10) Wakatwalekahu kutwinka yuma yejima yitwakeñaña hakwila tumukalakeli nakashinshi. Dichi tufwilenu kutwalekahu kwikala naspiritu neyi yakaprofwetu Habakuki wahosheli nindi: “Muloña hela chikuyu chikubula kukenuka, hela nyivinyu yikubula kusoña, hela nyiolive yikucheluka, nimaha akubula kwidisha yakudya yawu, niyimuna yikumana mwiyinda, niañombi akubula mumataña, Ami kwami nukuluñila mudi Yehova, nukutiya kuwaha mudi Nzambi yawamwinu wami.” (Hab. 3:17, 18) Eñañi, muchaaka chejima tutoñojokenuña namuzañalu hankisu jetu nikulondela kufumba kwansona yachaaka cha 2015 yinakwila nawu: ‘Musakililenu Yehova, muloña himuwahi.’—Mas. 106:1.