1, 2. (a) Muloñadi aIsarela 24,000 chajimbesheleluwu nkisu jajiwahi? (b) Muloñadi yuma yamwekeni kushankulu chiyalemena kudi etu?

HENOHU kunashali mafuku antesha hakwila munza waIsarela wiñili Mwituña daChikaninu, amayala amavulu nankashi elili “wuvumbi nawanyana kawaMowabi awambanda.” Chafuminumu, antu 24,000 ayijahili kudi Yehova. Fwikijenu chumichi, aIsarela adiña kwakwihi nakutambwila wuswana wadiña nakutalilawu hampinji yayilehi, ilaña ajimbesheli nkisu jajiwahi hamuloña wakudiñija mukweseka.—Kuch. 25:1-5, 9.

² Ichi chakutalilahu chatama achisonekeli “kulonda kutukonkomwena etu tudi kunu kunsa yanyaka yamakonu.” (1 Kor. 10:6-11) Makonu tudi kumakumishilu ‘amafuku akukuminina,’ nawa ambuña Nzambi adi kwakwihi nakwiñila mwituña dadiha mwakekala kuloña. (2 Tim. 3:1; 2 Pet. 3:13) Chawushona, akwakudifukula aYehova amakwawu anafunti hanyima. Anafwi mumuhetu wawuvumbi nawa anakumona yuma yatama yafumaña mukwila wuvumbi. Antu amuchidiwu anateli kujimbesha wumi wahaya nyaka.

3. Muloñadi antu adisumbula chakeñelañawu wunlomboli waYehova nikukiñewa? (Talenu mwevulu wakutachikilahu.)

³ Hamuloña wakwila wuvumbi wunasweji mukaayi makonu,  eyala namumbanda atela kukeña wunlomboli waYehova nikukiñewa kulonda ñovu yazatishañawu hakuhemba wuluwi wawu yibuli kuya mumenji. (Tañenu Masamu 127:1.) Tukuhanjeka hadi adisumbula chatela kukoleshawu wuluwi wawu kuhitila mukuhemba nyichima yawu, kukundama kwakwihi naNzambi, kuvwala wuntu wawuha, kutwalekahu kuhanjeka chiwahi nikudinka yuma yakeñekaña muwuluwi.

4. Chumanyi chaleñelaña akwaKristu amakwawu kuvulumuna?

⁴ Indi mukwaKristu nateli kudiñija ñahi muwuvumbi? Kakavulu mesu diwu aleñelaña muntu kwila wuvumbi nawa mwafumaña yuma yatama. Yesu walumbulwili nindi: “Muntu wukutala mumbanda namesu akumufwila, neli dehi nindi wuvumbi mumuchima windi.” (Mat. 5:27, 28; 2 Pet. 2:14) AkwaKristu amavulu avulumunaña azeyeshaña chikuhwelelu chawu kuhitila mukutala nyevulu yanzekesi, kutaña nsañu yasañumunaña wuvumbi, hela kutala nsañu yawuvumbi haIntaneti. Amakwawu atiyaña kuwaha kutala akwakuhañana, jifilimu hela maprogiramu ahaTV asañumunaña wuvumbi. Amakwawu ayaña kumatala akunwina walwa nawufuku, nakutala yisela yawantu asubulaña hela kuya kumaluña kwekala nsañu yasañumunaña wuvumbi yakutaña.

5. Muloñadi chitwatela kuhemba nyichima yetu?

⁵ Antu amakwawu adiñijaña mukweseka muloña wakusweja kuhanjeka namuntu wabula kwikala mwinikwawu. Mukanu kaayi mwekala antu abulaña kudihemba nawa akeña nsañu yejima yawuvumbi, chineli muchima wasweja kudimbana tunateli kutachika kukeña muntu wabula kwikala mwinikwetu. (Tañenu Yeremiya 17:9, 10.) Yesu wahosheli nindi: “Kumuchima diku kwafumaña yitoñojoka yatama, niwubanji, niwuvumbi, nikubajama.”—Mat. 15:19.

6, 7. (a) Muchima wadimbana wunateli kumuleñela muntu kuvulumuna munjilanyi? (b) Munateli kutondolwela ñahi kuvulumuna?

⁶ Neyi yitoñojoka yatama yishakama munyichima yawu yadimbanaña, antu ayedi anadikeñi anateli kutachika kuhanjeka nsañu yatela kuhanjekawu hohu nawenikwawu. Chakubula nikuumba mpinji, akeñaña mpinji yakwikala hamu nawa adimonaña kakavulu nakutwamba neyi anadiwani hohu chakuluwukila. Chiyaswejawu kudikeña, chikuhwelelu chawu chazeyaña. Nawa neyi asweja kudiñija muyuma yatama, chayikalilaña kuleka, hela chakwila aneluki nawu yuma yinakwilawu yatama.—Yish. 7:21, 22.

⁷ Yitoñojoka yatama nikuhanjeka kwayileña kuvulamena nshimbi jaYehova jajiwahi nakutachika kudikwata kumakasa, kudifufwa, kudihemesha, kudikwata munjila yakusañumuna wuvumbi ninjila jikwawu jakumwekeshelamu kukena jatela kwilawu nawenikwawu hohu. Chalala, ‘ayikokolaña nakuyidimbeka nakufwila kwawu aweni kwatama.’ Neyi kufwila kwatama kubaaba ivumu, “hikukuvwala nshidi,” muniyi nsañu yitunakuhoshahu, kwavwalaña wuvumbi. (Yak. 1:14, 15) Mwafumaña yihuñu yamaneni! Wejima wawu ayedi hiyadi kuvulumunaku neyi chakwila alemesha nshimbi yaYehova yahosha hakujilika wuluwi. Munjilanyi?

8. Indi kwikala nawubwambu naYehova kwatukiñaña ñahi kuwuvumbi?

⁸ Tañenu Masamu 97:10. Kwikala nawubwambu naYehova dichi chuma chalema chatukiñaña kuwuvumbi. Chitwadiza hayililu yaNzambi yayiwahi nakufwila ‘kwikala akwakumwimbujola Nzambi, neyi anyana  akeñewa nikwenda nakukeña,’ tukwikala nañovu yakukaana “wuvumbi, nawuzondu wamumuchima wejima.” (Efwes. 5:1-4) Neyi eluka nawu “Nzambi wakasompesha akwakubajama niayivumbi,” adisumbula atela kuzata nañovu kulonda wuluwi wawu wikali walema nawa wajila.—Heb. 13:4.

9. (a) Indi Yosefu wakaanini ñahi kweseka kwakwila wuvumbi? (b) Yumanyi yitukudizilaku kuchakutalilahu chaYosefu?

⁹ Ambuña Nzambi ashinshika amakwawu anazeyeshi chikuhwelelu chawu kuhitila mukudikunda nawakwawu akwanyidimu abula kwikala aYinsahu hanyima yakuzata. Nihampinji yakuzata, anateli kuyeseka. Mukwenzi walubanji wejina daYosefu amukomokeli chikupu kudi iñoda muntu wamwiñijili mudimu. Mumbanda yeniwu wafwilileña kukama nindi hefuku hefuku. Nkumininaku, ‘mumbanda hakumukwata kwihina dindi, nindi, Nikami neyi.’ Ilaña Yosefu wamutemukili. Chumanyi chamukwashili Yosefu kutwalekahu kwikala nachikuhwelelu chakola hampinji yamwesekeluwu muniyi njila? Muloña wafuukwiluhu chikupu kuhemba wubwambu windi naNzambi, chumichi chamukwashili kuhemba kashinshi kindi. Chelili wakaanini kwila wuvumbi, amuhañili mudimu nawa amuumbilili mukaleya, ilaña Yehova wamukiswilili. (Kutach. 39:1-12; 41:38-43) AkwaKristu atela kubabala kulonda abuli kudiñija mukweseka kwakwila wuvumbi neyi adi hanyidimu hela kwakankawawu.

10. Wuntu wawuha watukiñaña ñahi kunsañu yawuvumbi?

¹⁰ Muloña wuntu wawuha ‘awuleñeli mwekalilayi Nzambi mukuloña nakujila kwansañu yalala,’ chumichi chalema nankashi kudi adisumbula hakwila akoleshi wubwambu wawu naNzambi. (Efwes. 4:24) Antu avwalaña wuntu wawuha ‘ajahaña’ yidi yawu yakumujimba ‘yidi neyi wuvumbi, wuzondu wamumuchima, kufwila kwila yuma yatama, kusweja kukeña yatama, nilwisu.’ (Tañenu Akolosi 3:5, 6.) Izu dakwila nawu “jahenu” damwekeshaña nawu twatela kuzata nañovu kulonda tuleki kufwila kwatama kwakumujimba. Twatela kutondolwela yuma yejima yinateli kuletesha kwila wuvumbi. (Yoba 31:1) Neyi twovwahila nshimbi jaNzambi, tukudiza ‘kuhela yuma yatama nakukakela yuma yayiwahi.’—Rom. 12:2, 9.

11. Indi wuntu wawuha wunateli kukolesha ñahi wuluwi?

¹¹ Wuntu wawuha ‘wafwana Wawuleñeli,’ Yehova yomweni. (Kol. 3:10) Eyala namumbanda neyi akolesha chikuhwelelu chawu kuhitila mukuvwala “muchima wawushona, niluwi, nikudizoza, nikwovwaha, nikudiwunjika,” akutambwila nkisu jajivulu. (Kol. 3:12) Adiluñishaña cheñi kwikala anuñañana muwuluwi wawu neyi ‘eteja kuwunda kwaKristu kuyuula munyichima yawu.’ (Kol. 3:15) Neyi adisumbula ‘akeñañana,’ adiluñishaña chikupu. Atiyaña kuwaha neyi ‘eteja mwinawu abadika kulema.’—Rom. 12:10.

12. Yililwinyi yimwamonaña nenu yalema hakwila mwikali nawuluwi wamuzañalu?

¹² Chelili amwihuli yililu yaletesha ekali namuzañalu muwuluwi wawu, Sid wahosheli nindi: “Twazatili nañovu kulonda twikali nachililu chalema chakukeña. Nawa tweluka netu kwikala nachililu chakwovwaha hichuma chalema hama.” Ñodindi Sonja wetejeli nawa wabombeleluhu nindi: “Kwikala naluwi hichililu chalema nankashi. Nawa twafwilaña cheñi kwikala adizoza hela chakwila hichuma chakala.”

13. Chumanyi chaleteshaña wuluwi kukola, nawa muloñadi?

¹³ Chakadi nikujina, nhoshelu yayiwahi hichuma chalema hakwikala nawuluwi wakola. Chikusweja kutama neyi adisumbula ahoshaña namwinikwawu chakadi kalemesha kubadika chalemeshañawu antu acheñi hela yimuna. Neyi adisumbula adizuwilaña ‘nandulu yejima, nindombu, nikuzuwa, nimapumba, nikutukana,’ chumichi chazeyeshaña mpanda yamuwuluwi. (Efwes. 4:31) Chatela azeyeshi wuluwi wawu nakudihoshola mpinji yejima nakasawuntu, adisumbula atela kukolesha wubwambu wawu namazu amawahi, awunda nawa aluwi.—Efwes. 4:32.

14. Yumanyi yitwatela kutondolwela?

¹⁴ Bayibolu yahosha nawu kwekala “mpinji yakumwena.” (Mukwa. 3:7) Chumichi hichinayi mukwila nawu tuleki kuhanjeka namwinikwetu hayuma yalemaku. Mumbanda wakuGermany wahosheli nindi, “Chimwaleka kuhanjeka hayuma yalema, munateli kumuneñesha mwinikwenu.” Hela chochu wabombeleluhu nindi: “Hela chakwila mpinji yikwawu chakala kuwundisha muchima, chachiwahi wanyi kumanishila ndulu mukuzuwa. Munateli kuhosha chakadi kutoñojoka hela kwila yuma yinateli kuhilisha mwinikwenu, nawa chumichi chikuleñela yuma kutaminaku.” Mukuhita kwampinji, eyala namumbanda hiyakutwesha kumanishaña kukala kwawuku kuhitila mudizuwila nikukaana kudihoshesha. Ilaña anateli kukolesha wuluwi wawu kuhitila mukufwila kumanisha kukala kwawu hela kwikala nachaaku chakubula kuditadikisha.

15. Indi kuhanjeka chiwahi kunateli kukolesha ñahi wuluwi?

¹⁵ Mpanda yawuluwi yakolaña neyi adisumbula ekala nampinji yakuhanjeka hayuma yinakutiyawu niyitoñojoka yawu. Njila yitwahoshelañamu yuma yesekana nayuma yitwahoshaña. Dichi, hela hadi nsañu yakala, fwilenu kuhosha munjila yayiwahi, kuzatisha mazu amawahi nezu dadovu.  Chimwela mwenimu chikumupelela mwinikwenu kutiyilila. (Tañenu Akolosi 4:6.) Eyala namumbanda anateli kukolesha wuluwi wawu neyi ahanjekaña chiwahi kuhitila mukuhosha hohu “mazu amawahi anatweshi kukolesha antu hakumonawu kukala, kulonda akwashi” enikwawu.—Efwes. 4:29.

16, 17. Muloñadi chichalemena kudinka yuma yakeñekaña muwuluwi?

¹⁶ Adisumbula anateli cheñi kukolesha mpanda yawuluwi wawu neyi atwamijaku yuma yakeñaña mwinikwawu kubadika yawu. (Fwi. 2:3, 4) Amayala niambanda atela kwiluka yuma yinakutoñojokawu enikwawu nawa atela kwiluka neyi mwinikwawu natiyi mpwila yakudikama.—Tañenu 1 Akorinda 7:3, 4.

¹⁷ Chawushona, amayala nawambanda amakwawu hiyamwekeshaña kukeña hela kuhosha hansañu yakudikama nawenikwawuku, nawa amayala amakwawu amonaña nawu neyi ekala amwovu nawañodijawu dikwila nawu azeya. Bayibolu yahoshaña nawu: “Ninenu amayala, shakamenu nawañodi jenu mwaya maana.” (1 Pet. 3:7) Iyala watela kwiluka nindi kudinka yuma yakeñekaña muwuluwi mwabombela yuma yayivulu kubadika kudikama hohu. Mumbanda nateli kudiluñisha wulunda muwuluwi neyi nfumwindi yamumwekeshela kukeña mpinji yikwawu, kubadika hampinji yakudikama hohu. Neyi wejima wawu amwekesha kukeña, chikuyipelela kudakamena muyitoñojoka nikumujimba.

18. Indi eyala namumbanda anateli kukolesha ñahi mpanda yawu yawuluwi?

¹⁸ Hela chakwila chetejewa wanyi muntu wamuwuluwi kwila wuvumbi, neyi muntu yakañanya kumukeña mwinikwindi, chumichi chikuleñela mukwawu kukeña muntu wacheñi. (Yish. 5:18; Mukwa. 9:9) Hela chochu, Bayibolu yayikonkomwena adisumbula nawu: “Bayi mudibondaku [yuma yakeñekaña muwuluwi], chiña mushamu mafuku akutoñola.” Muloñadi? “Kulonda Satana abuli kuyeseka hansañu yakubula kudihemba.” (1 Kor. 7:5) Chawushona neyi adisumbula amwiteja Satana kuyeseka ‘hansañu yakubula kudihemba’ chakwila iyala hela mumbanda yela wuvumbi. Ilaña, neyi eyala namumbanda adinkaña yuma yakeñekaña muwuluwi, dikwila nawu ‘hanakulonda yakudiwahisha nachu yomwenuku, chiña yakuwahisha nachu mukwawu,’ chumichi chamwekeshaña kukeña kwakubula kudikanjikija, nawa kukeña kunateli kukolesha mpanda yawuluwi.—1 Kor. 10:24.

19. Chumanyi chitwatela kufuukulahu kwila, nawa muloñadi?

¹⁹ Tudi kwakwihi nakwiñila mwituña daloña dadiha. Diwu muloña waweni wukutuleñela tubuli kudiñija muyuma yakumujimba yinateli kutujahisha neyi chafwiluwu aIsarela 24,000 muChaana chaMowabi. Hanyima yakushimuna iyi nsañu yasonyi nawa yatama yamwekeni, Izu daNzambi datusoñamishaña nawu: “Yowu natoñojoki nindi nemani, ababali kuchina kudimbuka.” (1 Kor. 10:12) Dichi, chalema nankashi kukolesha wuluwi wetu kuhitila mukutwalekahu kwikala ashinshika kudi Tata yetu wamwiwulu nikudi mwinikwetu. (Mat. 19:5, 6) Sweje-e makonu, twatela ‘kudikwatisha kulonda akatuwani tunashakami chachiwahi zo-o, chakadi ihuji, nakubula hakutwinkela muloña kumesu indi.’—2 Pet. 3:13, 14.