Mu 1870 kadizanvu kanyanya kumuPittsburgh (Allegheny), Pennsylvania, U.S.A., katachikili kusandujola muNyikanda Yajila. Charles Taze Russell diyi walombweleña aka kadizanvu, adizileña hansañu yefutu danyiloña daKristu kulonda eluki nawu Yehova wukweti nkeñelu. Wenowu muzañalu watiyiluwu chelukiluwu nawu ifutu danyiloña denzununa njila yawumi wahaya nyaka, nikudi antu abulili kumwiluka Yesu! Dichi adiña nakusakilila kuhitila mukwanakana kufwa kwaYesu chaaka nichaaka kulonda amwanukeña nachu.—1 Kor. 11:23-26.

Mana kwetu Russell watwalekeluhu kusoneka magazini yateneneñawu nawu Zion’s Watch Tower, yatuumbakesheli ntañishilu yefutu danyiloña kulonda kumwekesha kukeña kwaNzambi. Kaposhi Kakutalila kateneni mpinji yaChanukishu chakufwa kwaKristu nawu “chilaaka chachiwahi nankashi” nawa kakolesheli antañi kwanakanaña muPittsburgh hela mumazanvu acheñi. “Hela chakwila akwikala antu ayedi hela asatu akweti chikuhwelelu chakola chamuchidiwu,” hela tuhu wukwikala nkawindi, dikwila nawu “Kristu wukwikala hamu nawu.”

Chaaka nichaaka, antu amavulu enjileña kuChanukishu muPittsburgh. Chipapilu chakutambikilahu antu chahosheleña nawu, “Tukayitambwila namuzañalu.” Eñañi, atudizi aBayibolu amunidi iluña atambwilili nikudiisha amana kwawu niahela akuspiritu mumatalawu. Mu 1886, kwadiña “Kupompa Kwawantu Ejima” kwadiñaku mafuku amavulu muchilaaka chaChanukishu. Kaposhi Kakutalila kakonkomweneni nawu, “Inzenu mwakadiluñishi kukeña kwaMwanta niana kwindi nichalala chindi.”

Hayaaka yayivulu, Atudizi aBayibolu muPittsburgh apompeleña nawantu akuhweleli mwifutu danyiloña enjileña kuChanukishu. Chelili Atudizi aBayibolu avuli, niantu enjileña kuChanukishu niwena avulililuku mukaayi kejima. Ray Bopp wamuchipompelu chaChicago washimwini nindi muyaaka yamuma 1910, mwahitileña maora amavulu hakwila ahitishumu yifwikija mudi antu amavulu chikupu apompeleña muloña antu amavulu adyileña nikunwa yifwikija.

Azatishili yifwikija yamuchidinyi? Hela chakwila tweluka netu Yesu wazatishili vinyu hampinji yaKudya kwaMwanta kwaMelela, hayina mpinji Kaposhi Kakutalila kayikolesheli kuzatisha yimpwita yanyikabu yanyivinyu hela nyikabu yanyivinyu yoma yakuteleka, kulonda antu “azeya kumujimba” abuli kwikala mukweseka. Hela chochu, vinyu ayiloñesheleli antu elukili nawu “ateleleli kuzatisha vinyu yayila.” Chimwahitili mpinji, Atudizi aBayibolu elukili nawu vinyu yayeni yichinana diyi yashikilamu kwimenaku mashi aYesu.

Kwanakanaña kufwa kwaYesu kwayikwashili kwikala nampinji yakutoñojokahu chikupu. Hela chochu, muyipompelu yikwawu aneñeleña chikupu, nawa neyi progiramu yinamani dehi antu ejima ayileña chakubula kuhoshahu izu. Ilaña mukanda wamu 1934 wukweti  mutu wunakwila nawu Jehovah, wahosheli nawu hitwatela kwanakanaña Chanukishu ‘nachineñuku’ kutalisha hakufwa kwaYesu kwayandiliyi, chiña ‘namuzañalu’ muloña hiMwanta wunakuyuula kufuma tuhu mu 1914.

Muchaaka cha 1935 yuma yahimpili chikupu kutalisha hakwanakana Chanukishu kumafuku akumbidi muloña alumbulwili chiwahi mwatalisha “izaza deneni” dashimunawu muChimwekeshu 7:9. Kufuma kunyima nakushika mu 1935, ambuña Yehova amweneña idi izanvu nawu hiyakwaKristu adihanini adiña neyena dantesha. Makonu idi izaza dawantu adiluka nawu hiyakwakudifukula ashinshika akweti kuchiñeja kwakushakama muparadisa hamaseki. Kufuma halumbulwiluwu chumichi nawa chelili yatoñojokuhu chikupu, Russell Poggensee wahosheli nindi, “Yehova hanyinkeli kuchiñeja kwakuya mwiwulu kuhitila mudi spiritu yindi yajilaku.” Mana kwetu Poggensee niantu amavulu ashinshika adi neyi yena alekeli kudya nikunwa yifwikija, ilaña atwalekeluhu kwanakana Chanukishu.

Hanichi “chilaaka chachiwahi nankashi,” kampeni yadimena yakushimwina yadiña hinjila yayiwahi kudi antu ejima yakumwekeshelamu kusakilila hefutu danyiloña. Mu 1932 Bulletin (Mudimu Wetu waWanta) wakonkomweneni akwaKristu nawu hiyatela kwikala “akwakujila ayaña kuChanukishu” nakudya nikunwa hohuku, ilaña atela kwikala “akwakuzata” mudimu wakushimwina nsañu yalala. Mu 1934, Bulletin yahosheli hadi “apayiniya akukwasha” nakwihula nawu: “Komana kukekala apayiniya akukwasha akushika ku 1,000 akasonekesha mumpinji yaChanukishu?” Informant yahosheli hadi awayishewa nawu: “Anateli kwikala namuzañalu chikupu neyi azata mudimu wakushimwina nsañu yaWanta.” Mukuhita kwampinji, antu akweti kuchiñeja kwakushakama hamaseki niwena anateli kwikala namuzañalu neyi ashimwinaña. *

Muchaaka chejima, ifuku daChanukishu nampinji yawufuku, hifuku dasweja kujila kudi antu jaYehova ejima. Idi ifuku adanakanaña hela chakwila adi mukukala. Mu 1930, Pearl English nimuhelindi Ora, endeli makilomita 80 kulonda ayi nakwanakana Chanukishu. Hampinji yamushiluwu mukaleya mwakankawindi muChina, Harold King kamishonali wasonekeli nkumbu nitumina twahosha haChanukishu nawa wazatishili nyikabu yanyivinyu yiyila nilosu hakutuña yifwikija. Kufuma kuEastern Europe nakushika kuCentral America nimuAfrica, akwaKristu ahamuka hiyatiyili woma wakwanakana kufwa kwaYesu hampinji yanjita hela hampinji yayilekesheluwu mudimu wawuku. Kwejima kutudi hela tudi mukukala hela nehi, twahumañanaña hamu nakumulemesha Yehova Nzambi niYesu Kristu hampinji yachilaaka chachiwahi chaChanukishu.