1. Muloñadi kumwimbujola Yesu chikunateli kutukundamisha kwakwihi naYehova?

 TWAFWILAÑA kwimbujola antu akweti yililu yitwakomokaña. Hadi antu ejima ashakamahu dehi hamaseki, Yesu Kristu diyi muntu wukweti yililu yayiwahi nankashi yitwatela kwimbujola. Muloñadi? Yesu yomweni wahosheli nindi: “Muntu nanmonami namoni Tata.” (Yow. 14:9) Yesu wamwekesheli yililu yaTata yindi chiwahi chikupu chakwila neyi muntu namumoni Mwana chidi neyi namumoni Tata. Dichi neyi tumwimbujola Yesu, tukukundama kwakwihi naYehova, Muntu wabadika kulema mukuleña kwejima. Tukutambwila nkisu jajivulu neyi twimbujola yililu nichihandilu chaMwanindi.

2, 3. (a) Muloñadi Yehova chatwinkelayi iyi nsañu yasonekawu yamwekeshaña chekalayi Yesu, nawa Yehova wakeñaña nindi twileñadi? (b) Yumanyi yitukuhanjeka muchinu chibaaba nimuchibaaba chinalondeluhu?

² Hanu dinu tunateli kwiluka ñahi chekalayi Yesu? Tukweti mukanda wonenawu wamwekeshaña chekalayi Yesu. Yehova watwinka iyi nsañu yekala muNyikanda Yajila yawakwaKristu yachiGriki muloña wakeñaña nindi tumwiluki  Mwanindi kulonda tumwimbujoleña Yesu. (Tañenu 1 Petulu 2:21.) MuBayibolu, chakutalilahu chashiliyi Yesu achesekeja ‘nayintampu’ hela mahaji. Munjila yikwawu, Yehova nakutuleja nindi tumulondeleña Yesu munyima nakwenda muyintampu yindi. Kafwampi, Yesu watushilili chakutalilahu chaloña, ilaña etu hitwaloñaku. Ilaña Yehova hafwilaña nindi twikali aloña hakulondela muyintampu yaYesuku. Hela chochu, Tata wakeñaña nindi tumwimbujoli Mwanindi kwesekeja nahakumina ñovu jetu hamu neyi antu abula kuwanina.

³ Tushinshikenu hayililu yikwawu yaYesu yayiwahi. Muchinu chibaaba tukuhanjeka hakudizoza niluwi lwindi; muchibaaba chinalondeluhu tukahanjeka hakuhamuka nikashinshi kindi. Hachililu nichililu, tukwakula malwihu asatu anakwila nawu: Chatalisha mudihi? Indi Yesu wamwekesheli ñahi ichi chililu? Tunateli kumwimbujola ñahi?

4. Indi kudizoza kwatalisha mudihi?

⁴ Kudizoza hichumanyi? Mukanu kaayi munenzali antu adivwimba, antu amakwawu anateli kutoñojoka nawu muntu wadizoza wazeya hela nawu hahamukaku. Hela chochu, antu adizoza diwu ahamuka. Hakwila muntu yekali wadizoza watela kwikala wahamuka. Izu dakudizoza adilumbulula nawu “hichililu chaambuka nakudivwimba hela kudinka wanta.” Hakwila twikali adizoza twatela kwikala nayililu yayiwahi kutalisha hadi etu aweni. Dikishonali yimu yahosha haBayibolu yashimuna nawu “Kudizoza hikwiluka chitwakeha kumesu aNzambi.” Neyi twadizoza chikupu kumesu aNzambi, hitukudimonaña netu twalema kubadika akwetuku. (Rom. 12:3) Kwikala adizoza hichuma chayikalilaña antu abula kuwanina. Ilaña tunateli kudiza chakwikala adizoza neyi tutoñojoka chikupu chitwakeha kumesu aNzambi nawa neyi tulondela mumahaji aMwanindi.

5, 6. (a) Indi Mikeli mukulumpi wawañelu hinyi? (b) Indi Mikeli wamwekesheli ñahi chililu chakudizoza?

⁵ Indi Yesu wamwekesheli ñahi kudizoza? Mwana kaNzambi wekala wadizoza mpinji yejima, hampinji yadiñayi kañelu wañovu mwiwulu nihampinji yadiñayi muntu wawanina hamaseki. Shinshikenu iyi yakutalilahu yantesha.

⁶ Chamweneñayi yuma. Nsoneki waBayibolu Yuda wasonekeli chuma cheliliyi Yesu henohu kanda yenzi hamaseki neyi muntu. (Tañenu Yuda 9.) Chineli diyi Mikeli mukulumpi wawañelu, Yesu ‘waditadikishili naDiyabolu,’ watama. Aditadikishili hansañu “yamujimba waMosi.” Anukenu nenu chelili Mosi yafwi, Yehova wajiikili mujimba windi kwiluña kwabulili kwilukawu antu. (Kuhit. 34:5, 6) Hekwawu Satana wakeñeleña kuzatisha mujimba waMosi hakutwala hambidi kudifukula kwakutwamba. Hichikweti muloña nayuma yatama yakeñeleña kwilayi Diyaboluku, Mikeli wamukañesheli chakadi kumutiya woma. Mukanda wumu wahosha nawu izu dachiGriki dabalumunawu nawu ‘waditadikishili’ ‘adizatishaña cheñi hakutadika nsañu yakundama kunshimbi’ nawa damwekeshaña nawu “Mikeli ‘wakañesheli wuswa waDiyabolu’ wakusenda mujimba waMosi.” Ilaña Mukulumpi wawaÑelu welukili nindi hiyamwinkeli wuswa wakumusompesha Diyaboluku. Hela chochu, washili iyi nsañu kudi Nsompeshi Muneni, Yehova. Dichi Mikeli hakeñeli kuzatisha wuswa windi munjila yatamaku hela chakwila amuhilishili. Wadiña wadizoza chikupu.

7. Indi Yesu wamwekesheli ñahi kudizoza munhoshelu yindi nimuyuma yeliliyi?

 ⁷ Hampinji yazatileñayi mudimu windi wakushimwina hamaseki, Yesu wahosheleña nikwila yuma yamwekesheleña nawu wadiña wadizoza chikupu. Nhoshelu yindi. Hakeñeleña nindi amuhamekeña kudi antuku. Ilaña, wamulemesheleña Tata yindi. (Maku 10:17, 18; Yow. 7:16) Hayisupishileña atumbanji twindi hela kuyimona neyi amukunkulwayuku. Ilaña, wayilemesheleña nikuyihameka hayililu yawu yayiwahi yamweneñayi nawa wayikuhweleleli. (Luka 22:31, 32; Yow. 1:47) Yuma yeliliyi. Yesu watondeluhu kwikala nachihandilu chapela chakubula kwikala namaheta amavulu. (Mat. 8:20) Wadihanini kuzata nyidimu yakehelamu chikupu. (Yow. 13:3-15) Wemikili chakutalilahu chakudizoza kuhitila mukwovwahila kwindi. (Fwi. 2:5-8) Kwambukaku nawantu adivwimba abulaña kukeña kwovwahila, Yesu wadizozeli nakwovwahila hakwila nkeñelu yaNzambi, nakwikala ‘wovwahila ho-o, ndo-o nikukufwa.’ Chamwekana hatooka to-o nawu Yesu Mwana kamuntu wadiña ‘wadizoza mumuchima.’—Mat. 11:29.

8, 9. Tunateli kumwekesha ñahi kudizoza?

⁸ Tunateli kumwimbujola ñahi Yesu hakwikala adizoza? Chitwamonaña yuma. Kudizoza kwatukañeshaña kuzatisha wuswa wetu chatama. Neyi twiluka netu hitukweti wuswa wakusompesha antuku, hitukunyakala kwinka antu nyiloña hayiluwa yawu hela kujinooka yuma yelañawuku. (Luka 6:37; Yak. 4:12) Kudizoza kwatukwashaña kubula kwikala ‘asweja kuloña’ nikusekesha antu abula wuswa hela kukooleka kutukweti. (Mukwa. 7:16) Aeluda adizoza hiyadimonaña nawu alema kubadika akwawu akwakwitiyaku. Ilaña atubiña amuchidiwu ‘atoñojokaña nawu akwawu ayibadika kulema’ nawa adimonaña nawu akehelamu.—Fwi. 2:3; Luka 9:48.

⁹ Shinshikenu W. J. Thorn, wakalakeleña neyi nkoñi wendaña kutachika mu 1894. Hanyima yakuzata yaaka yayivulu muniwu mudimu, amutambikili kuya nakuzatila kuFwamu yaWanta yadiña kwakulehi namusumba waNew York nawa wazatileña mudimu wakuhemba tusumbi. Wahosheli nindi: “Neyi nitachika kutoñojoka yuma yakudinyamuna, nayileña mwiwombu nakuhosha nami: ‘Eyi kalunkuñu kanyanya. Yumanyi yiwudi nayu mwaka wudinki wanta?’” (Tañenu Isaya 40:12-15.) Chalala wadiña wadizoza.

10. Tunateli kumwekesha ñahi kudizoza munhoshelu yetu nimuyuma yitwelaña?

¹⁰ Nhoshelu yetu. Neyi chalala twadizoza mumuchima, yuma yitwahoshaña yikumwekesha nawu twadizoza. (Luka 6:45) Hampinji yitunakuhanjeka nawakwetu hitukuhoshaña hayuma yitwazata nikukooleka kutukwetuku. (Yish. 27:2) Ilaña, tukutalaña hayuma yayiwahi yelañawu amana kwetu niahela nikuyihameka hayililu yawu yayiwahi, wuswa niyuma yazatañawu. (Yish. 15:23) Yuma yitwelaña. AkwaKristu adizoza hiyakeñaña kuya mpuhu mukanu kaayuku. Akeñaña kwikala nachihandilu chapela, hela kuzata nyidimu yamonañawu antu mukaayi nawu yamukunkulwayi kulonda amuzatileña Yehova chikupu. (1 Tim. 6:6, 8) Sweje-e dinu, tunateli kumwekesha kudizoza kuhitila mukwikala ovwahila. Chakeñekaña kwikala adizoza mumuchima hakwila ‘twovwahileña anlomboli jetu’ muchipompelu nikwiteja kulondela nshimbi yitwatambwilaña mukuloñesha kwaYehova.—Heb. 13:17.

11. Lumbululenu mwatalisha luwi.

¹¹ Luwi hichililu chakukeña. Nyikanda yajila yashimuna nawu Yehova niYesu akweti luwi nikukeña. (Luka 1:78; 2 Kor. 1:3; Fwi. 1:8) Mukanda wumu waBayibolu wahosha haluwi lwashimunawu muNyikanda Yajila nawu: “Kumutiyila muntu luwi kwabadika kutiyila wushona muntu wunakaankili yuma. Chakeñekaña kumwakamena chikupu nikumukwasha kuhitila mukumwilila chuma chinateli kumukwasha chikupu muchihandilu chindi.” Luwi dilu lwaleñelaña muntu yakwashani. Muntu wukweti luwi wakwashaña akwawu munjila yinateli kuhimpa chihandilu chawu.

12. Yumanyi yinakumwekesha nawu Yesu watiyilili luwi antu amakwawu, nawa luwi lwamuleñeleli kwila chumanyi?

¹² Indi Yesu wamwekesheli ñahi luwi? Luwi lwindi niyuma yelileñayi. Yesu wayitiyilileña antu luwi. Chamweniyi ibwambu dindi Mariya niantu amakwawu anakumudila mana kwindi Lazaru wafwili, Yesu niyena ‘wadilili.’ (Tañenu Yowanu 11:32-35.) Luwi lwamuleñeleli kumusañula mwana kanfwila, dilu lwamuleñeleli yamusañuli Lazaru. (Luka 7:11-15; Yow. 11:38-44) Yesu wamwinkeli Lazaru kuchiñeja kwakwikala nawumi mwiwulu. Hampinji yimu, Yesu ‘watiyilili wushona’ izaza denjili kudi yena. ‘Watachikili kuyitañisha yuma yayivulu’ muloña wayitiyilili wushona. (Maku 6:34) Chumichi chahimpili chihandilu chawantu alondeleli nsañu yayitañishiliyi. Ilukenu nenu bayi neyi Yesu wayitiyilili hohu antu wushonaku, ilaña wushona diwu wamuleñeleli kuyikwasha.—Mat. 15:32-38; 20:29-34; Maku 1:40-42.

13. Yesu wahosheli ñahi chiwahi nawantu amakwawu? (Talenu mwevulu wakutachikilahu.)

¹³ Mazu indi amwovu. Muchima waYesu waluwi wamuleñeleli kuhosha chiwahi nawantu amakwawu, sweje-e kudi antu akabishileñawu. Kapostolu Matewu wakunjikili mazu aIsaya kudi Yesu nindi: “Iteti dachikeka hakadikotolaku, wanda wudi nakufwinda wishi hakawujimaku.” (Isa. 42:3; Mat. 12:20) Yesu wahosheli munjila yakukundeja antu adiña neyi iteti dachifwikija dachikawu hela wanda wamwinoñu damanji dinakukeña kujima. Washimwinini mazu akuchiñeja ‘kulonda akasakasi chachiwahi abaluka nyichima.’ (Isa. 61:1) Watambikili antu adiña ‘nakukabakana nawa asendeli yalema’ kulonda enzi kudi yena, nakuyileja nindi anateli ‘kumona kunooka.’ (Mat. 11:28-30) Wayilejeli chikupu atumbanji twindi nindi Nzambi wakamenaña chiwahi akwakudifukula Indi ejima kushilahu ‘nianyana anyanya,’ antu amonañawu nawu amukunkulwayi kudi antu amukaayi.—Mat. 18:12-14; Luka 12:6, 7.

14. Tunateli kwikala ñahi nachililu chakutiyila akwetu luwi?

¹⁴ Tunateli kumwimbujola ñahi Yesu hakumwekesha luwi? Luwi lwetu. Hadaha hitunateli kumutiyila muntu luwuku, ilaña Bayibolu yatukonkomwenaña nawu tuzateña nañovu kulonda twikali naluwi. AkwaKristu ejima atela kuvwala ‘muchima wawushona niluwi’ muloña hiyililu yekala hakachika kawuntu wawuha. (Tañenu Akolosi 3:9, 10, 12.) Munateli kwikala ñahi nachililu chakutiyila akwenu luwi? Enzununenu nyichima yenu nankashi. (2 Kor. 6:11-13) Tiyililenu nakanañachima neyi muntu nakuyileja yuma yinakwakamenayi. (Yak. 1:19) Zatishenu yitoñojoka yenu nakudihula nenu: ‘Neyi yami namona iku kukala nadi kutiya ñahi? Yumanyi yinadi kukeña?’—1 Pet. 3:8.

15. Yumanyi yitunateli kwila kulonda tukwashi antu adi neyi iteti dachikeka hela wanda wunakufwinda?

 ¹⁵ Yuma yayiwahi yitwelaña. Luwi lwatuleñelaña kukwasha akwetu, sweje-e antu adi neyi iteti dachikeka hela wanda wunakufwinda. Tunateli kuyikwasha ñahi? Mukanda waAroma 12:15 wahosha nawu “dilenu nawakwakudila.” Antu ananeñi akeñaña kuyikundeja kubadika kuyileja mwakwilila. Muhela wumu wakundejeluwu kudi akwawu akwakwitiya hampinji yajimbesheliyi mwanindi wamumbanda wahosheli nindi: “Natiyili kuwaha chelili amabwambu enzi nakundilishaku.” Tunateli cheñi kumwekesha muchima waluwi kuhitila mukukwasha akwetu. Kuduhu nfwila imuneluki wunakukeña kumuloñeshela itala dindi? Muchipompelu chenu muduhu kashinakaji mukwaKristu wunabuli ñendelu hakuya nakupompa, mumudimu wakushimwina hela kuya nakudimona nandotolu? Nikamudimu kantesha kanateli kumukwasha chikupu mukwetu mukwakudifukula wunakaankili. (1 Yow. 3:17, 18) Sweje-e dinu, tunateli kuyimwekeshela akwetu luwi kuhitila mukuzata nawu chikupu mumudimu wakushimwina. Kwosi njila yinateli kuyikwasha antu akweti nyichima yayovu muchihandilu chawu kubadika iyi.

16. Yumanyi yitunateli kuhosha hakukundeja antu ananeñi?

¹⁶ Mazu etu amwovu. Luwi lutwatiyilaña akwetu lwatuleñelaña ‘kukundeja antu akweti chineñi.’ (1 Tesa. 5:14) Tunateli kuhoshadi hakwila tukoleshi antu amuchidawa? Tunateli kuyikolesha kuhitila mukuyileja netu twayakamenaña chikupu. Tunateli kuyihameka chakufuma hamuchima kulonda eluki nawu akweti wuswa niyililu yayiwahi. Tunateli kuyanukisha netu Yehova wayikundamishili kudi Mwanindi, dikwila nawu ekala alema kumesu indi. (Yow. 6:44) Tunateli kuyileja netu Yehova wakamenaña nankashi ambuñindi “abaluka nyichima” hela “akweti spiritu yachikeka puchi.” (Mas. 34:18) Mazu etu amwovu anateli kukwasha antu anakukeña kuyikundeja.—Yish. 16:24.

17, 18. (a) Yehova wakeñaña nindi aeluda ahembeña nyikoku jindi munjilanyi? (b) Yumanyi yitukuhanjekahu muchibaaba chinalondeluhu?

¹⁷ Aeluda, Yehova wakeñaña nindi muhembeña anyikoku jindi chiwahi. (Yil. 20:28, 29) Anukenu nenu mukweti mudimu wakudyisha, kukundeja nikukolesha anyikoku jindi. (Isa. 32:1, 2; 1 Pet. 5:2-4) Dichi, eluda wukweti luwi hafwilaña kuyuula anyikoku, kutuña nshimbi hela kuyileñela kulonda adimoneña neyi akweti muloña hakwila azateña nyidimu yinateli kubula kuzatawuku. Ilaña, wafwilaña nindi ekali namuzañalu, nakukuhwelela nindi kukeña kwamukeñawu Yehova kukuyileñela kumuzatila chikupu neyi chinatwesheki.—Mat. 22:37.

¹⁸ Chitukutoñojokaña chikupu hakudizoza niluwi lwaYesu, chakadi nikujina yumiyi yikutuleñela kutwalekahu kwenda muyintampu yindi. Muchibaaba chinalondeluhu, tukuhanjeka hayililu yikwawu yayiwahi yaYesu, kuhamuka nikashinshi.