1, 2. (a) Tunateli kuheta ñahi wumi wahaya nyaka? (b) Yumanyi yinateli kutukwasha kutwalekahu kwenda lwendu lwetu lwawumi wahaya nyaka?

 CHITWEKALA atumbanji twaYesu, twatachikaña kwenda lwendu. Ilu lwendu lunateli kututwala kuwumi wahaya nyaka, mwiwulu hela hamaseki. Yesu wahosheli nindi: “Muntu wakakakela nikunsa [kukuma kwawumi windi hela kukuma kwakanu kaayi kamakonu] diyi wakahanda.” (Mat. 24:13) Eñañi, neyi tutwalekahu kwikala ashinshika, tukekala hakachi kwawantu akapulwishawu. Hela chochu, hampinji yitudi halwendu twatela kubabala kulonda tubuli kuhuhwankana hela kujimbesha wumi wetu. (1 Yow. 2:15-17) Tunateli kutwalekahu ñahi kwenda lwendu lwetu?

² Yesu watulombolaña, watwimikila Chakutalilahu. Nsañu yalwendu lwindi hela yachihandilu chindi ayisonekeli muBayibolu. Twelukaña chekalayi Yesu kuhitila mukudiza nsañu yeniyi. Tunateli kumukeña nikumukuhwelela. (Tañenu 1 Petulu 1:8, 9.) Anukenu nenu kapostolu Petulu wahosheli nindi Yesu watushilili chakutalilahu chakulondela muyintampu yindi chikupu. (1 Pet. 2:21) Neyi tulondela chikupu muyintampu yindi, tukushikija “chikonkwanyi” chachikuhwelelu chetu, kuheta wumi wahaya  nyaka. * Muchibaaba chinafumuhu, twahanjekeli chitunateli kwimbujola chakutalilahu chaYesu chakudizoza nikwikala naluwi. Ichi dinu tushinshikenu chitunateli kulondela muyintampu yindi hakumwekesha kuhamuka nikashinshi.

3. Indi kuhamuka hichumanyi, nawa tunateli kwikala ñahi naku?

³ Kuhamuka hichililu chinateli kutukolesha nikutukwasha kuumika kukala. Kwikala wahamuka akwilumbulula nawu “hikutatakena hampinji yamakabi,” “kuhakwilaku yuma yaloña,” “kudiwunjika nikwikala nachikuhwelelu hampinji yitunakumona makabi.” Kuhamuka kwendelaña hamu nawoma, kuchiñeja nikukeña. Munjilanyi? Kumwakama Nzambi kwatuleñelaña kwikala ahamuka kulonda tubuleña kutiya antu woma. (1 Sam. 11:7; Yish. 29:25) Kuchiñeja kwalala kwatukwashaña kushindamena hayuma yakumbidi chatela twakameña hakukala kutudi naku. (Mas. 27:14) Kukeña kwakufuma hamuchima kwatuleñelaña kwikala ahamuka hela chakwila wumi wetu wudi hakatoña. (Yow. 15:13) Chitwamukuhwelela Nzambi nikulondela muyintampu yaMwanindi tukwikala ahamuka.—Mas. 28:7.

4. Indi Yesu wamwekesheli ñahi kuhamuka ‘mukachi kawankuluñaña’ mutembeli? (Talenu mwevulu wakutachikilahu.)

⁴ Nihampinji yadiñayi nayaaka 12, Yesu wadiña wahamuka hakuhakwilaku yuma yaloña. Talenu chuma chamwekeni chelili kansi Yesu amuwani “mutembeli, nashakami mukachi kawankuluñaña.” (Tañenu Luka 2:41-47.) Ana ankuluñaña adiña eluka chikupu Nshimbi yamwinkeluwu Mosi nitushidikilu twawantu twasekesheleña nshimbi yeniyi. Yesu hatiyili woma nakumwenahuku; ilaña ‘wayihwileña malwihu.’ Chakadi nikujina hayihwileña malwihu ehulañawu atwansuku. Tunateli kufwikija Yesu chayihwileñayi ana ankuluñaña malwihu alema chikupu aleñeleleña atiyilileña nikutoñojoka. Nawa neyi ankuluñaña esekeli kumukasila Yesu kafuta kuhitila mukumwihula malwihu abula kushikilamu, kachi akañenyi. Antu ejima atiyilileña kushilahu niankuluñaña, ‘ahayamini kashinshi kindi nimwayakwileñayi,’ ñakwilu yashindameneni hachalala Chezu daNzambi.

5. Munjilanyi mwamwekesheli Yesu kuhamuka hampinji yashimwinineñayi?

⁵ Hampinji yashimwinineñayi, Yesu wamwekesheli kuhamuka munjila jashiyashana. Wayikonkolweli akulumpi jayipompelu adimbileña antu nantañishilu yakutwamba. (Mat. 23:13-36) Yesu hetejeli yuma yatama yamukaayi kumuluwañeshaku. (Yow. 16:33) Watwalekeluhu kushimwina hela chakwila amukañesheleña kudi akwakudimbulula. (Yow. 5:15-18; 7:14) Kapampa kayedi wawahishili tembeli chakadi woma, nikuhaña antu ejima aluwañesheleña kudifukula kwalala.—Mat. 21:12, 13; Yow. 2:14-17.

6. Indi Yesu wamwekesheli ñahi kuhamuka hefuku dakukumishaku nampinji yawufuku muchihandilu chindi chahamaseki?

⁶ Chikuhwelelu chetu chikukolelaku neyi twikala ahamuka hakulondela muyintampu yaYesu hampinji yitunakumona kukala. Shinshikenu kuhamuka kwamwekesheliyi Yesu hefuku dakukumishaku nampinji yawufuku muchihandilu chindi chahamaseki. Welukili yuma yadi kumumwekena neyi anamufukejeli dehi. Dichi, hampinji yadyileñawu Chipandakenu, Yesu wamulejeli Yudasi nindi: “Ilaku swayi muwunakeñi kwila.” (Yow. 13:21-27) Mwitempa daÑesemani Yesu wadishimwini chakadi woma kudi amashidika enjili nakumukwata. Hela chakwila wumi windi wadiña hakatoña,  wahosheli kulonda atumbanji twindi abuli kuyikwata. (Yow. 18:1-8) Chamwihwiluwu muSanihedilini, wakwili chakadi woma nindi diyi Kristu nawa Mwana kaNzambi, hela chakwila welukili nindi kapristu muneni wakeñeleña njila yakumujahilamu. (Maku 14:60-65) Yesu watwalekeluhu kwikala washinshika ndo-o nichamujahililuwu hamutondu. Henohu wudi kwakwihi nakufwa, wabidikili nezu datiyakana nindi: “Chinamani.”—Yow. 19:28-30.

7. Atwansi, mwatiyaña ñahi hakuyitena hejina daYehova, nawa munateli kwikala ñahi ahamuka?

⁷ Tunateli kumwimbujola ñahi Yesu hakwikala ahamuka? Hashikola. Atwansi, ikalenu ahamuka hakudilumbulula enu aweni nenu mudi aYinsahu jaYehova hela chakwila akuyiseha kudi akwenu akashikola hela amakwawu. Chimwela mwenimu mukumwekesha nenu mwatiyaña kuwaha hakuyitena hejina daYehova. (Tañenu Masamu 86:12.) Anateli kuyikakeja kulonda mukuhweleli nsañu yakwila nawu yuma yadileñeli yayeni. Ilaña mwatela kukuhwelela nenu yuma yahosha Bayibolu kutalisha hakuleña yalala. Munateli kuzatisha buloshuwa yinakwila nawu The Origin of Life—Five Questions Worth Asking kulonda mwakuli munjila yakushinjila kudi antu anakukeña kwiluka “nsañu yakuchiñeja kumwachiñejaña.” (1 Pet. 3:15) Dichi mukutiya kuwaha hakwiluka nenu munahakwiluku nsañu yalala yaMwizu daNzambi.

8. Muloñadi chitwashimwinaña chakadi woma?

⁸ Mudimu wetu wakushimwina. Hakwikala akwaKristu alala, twatela kutwalekahu ‘kuhosha chakadi woma mudi Yehova.’ (Yil. 14:3) Muloñadi chitunateleli kushimwina chakadi woma hela nakuhamuka? Tweluka netu yuma yitwashimwinaña hinsañu yalala muloña yashindamena haBayibolu. (Yow. 17:17) Tweluka netu ‘twekala akwakukalakala hamu naNzambi’ nawa spiritu yajila diyi yatukwashaña. (1 Kor. 3:9; Yil. 4:31) Tweluka netu kuhitila mukushimwina neyena, twamwekeshaña netu twadihana kudi Yehova nawa twakeña atuñi netu. (Mat. 22:37-39) Hamuloña wakwila twekala ahamuka, hiyamba katwimweneshaku. Ilaña, twafwilaña kufuñununa tufuta twakwitiya kwakutwamba twaleñelaña antu kubula kwiluka chalala. (2 Kor. 4:4) Twakakelaña kumudimu wakushimwina nsañu yayiwahi hela chakwila atudiwulaña hela kutudimbulula.—1 Tesa. 2:1, 2.

9. Tunateli kumwekesha ñahi kuhamuka hampinji yamakabi?

⁹ Hampinji yamakabi. Kukuhwelela mudi Nzambi kwatukwashaña kwikala nachikuhwelelu nikuhamuka neyi tunaholokeli mumakabi. Neyi muntu itwakeña yafwa, twaneñaña, ilaña twatwalekañahu kwikala nakuchiñeja. Twakuhwelela chikupu mudi “Nzambi wakukundeja kwejima” kulonda yatukoleshi. (2 Kor. 1:3, 4; 1 Tesa. 4:13) Neyi tuholokela muyikatu yamaneni hela tudikatisha, tunateli kukabakana, ilaña hitunateli kufumpa nshimbuku. Hitwetejaña njila yakuukilamu yabula kuditeja nanshimbi jamuBayiboluku. (Yil. 15:28, 29) Neyi tunaneñi, ‘nyichima yetu yinateli kututanyisha,’ ilaña twamukuhwelela Nzambi muloña “wudi kwakwihi nawantu abaluka nyichima” nawa hitwazeyañaku. *—1 Yow. 3:19, 20; Mas. 34:18.

10. Kushinshika hichumanyi, nawa mukwakudifukula waYehova washinshika nateli kuhosha nikwila yuma munjilanyi?

¹⁰ Kushinshika hiwuswa wakwiluka chaambu chekala hakachi kayuma yaloña nayabula  kuloña kufumahu hiwukutonda yuma yaloña. (Heb. 5:14) Kushinshika akulumbulula nawu “hiwuswa wakufuukulahu chiwahi yuma yakuspiritu.” Mukwakudifukula washinshika wahoshaña nikwila yuma munjila yamuzañaleshaña Nzambi. Muntu wamuchidiwu wahoshaña mazu anateli kukwasha akwawu chatela yayihilishi. (Yish. 11:12, 13) “Walabaña kuzuwa.” (Yish. 14:29) Wendaña ‘choloka mwayañayi,’ wakakelaña kuyuma yaloña hampinji yinakwendayi munjila yaya kuwumi. (Yish. 15:21) Tunateli kwikala ñahi ashinshika? Twatela kudiza Izu daNzambi nikulondela yuma yitunadizi. (Yish. 2:1-5, 10, 11) Chikusweja kuwaha neyi tudiza nikwimbujola chakutalilahu chaYesu, muntu wasweja kashinshi hadi antu ejima.

11. Indi Yesu wamwekesheli ñahi kashinshi munhoshelu yindi?

¹¹ Yesu wamwekesheli kashinshi muyuma yejima yahosheleñayi niyelileñayi. Munhoshelu yindi. Yesu wazatishileña “mazu amawahi” hampinji yadiñayi nakushimwinayi nsañu yayiwahi nawa chumichi chahayamishili antiyilili jindi. (Luka 4:22; Mat. 7:28) Kakavulu wazatishileña Izu daNzambi, kutaña, kuhosha chayisonekawu, hela kutena nsona yayeni kulonda yashimuni chikuma. (Mat. 4:4, 7, 10; 12:1-5; Luka 4:16-21) Yesu walumbulwili Nyikanda Yajila, walumbulwili munjila yazañalesheli nyichima yawantiyilili jindi. Chahosheleñayi nawatumbanji ayedi hayileñawu kuEmawusi hanyima yakumusañula, ‘wayilumbulwilili munyikanda yajila, yuma yatenenuwu hadi yena.’ Chimwahitili mpinji atumbanji ahosheli nawu: “Twatiyilahu nyichima yetu mumavumu busu, . . . chadiñi nakutulumbulwilayi nyikanda yajila.”—Luka 24:27, 32.

12, 13. Chakutalilahwinyi chinakumwekesha nawu Yesu walabileña kuzuwa nawa wadiña nayitoñojoka yayiwahi?

¹² Chamweneñayi yuma niyililu yindi. Kashinshi kamukwashili Yesu kwikala “walabaña kuzuwa.” (Yish. 16:32) Wadiña ‘wawunda.’ (Mat. 11:29) Wadiña wadiwunjika nawatumbanji twindi mpinji yejima hela chakwila aluwañesheleña. (Maku 14:34-38; Luka 22:24-27) Nihampinji yamukabishiluwu watwelekeluhu kudiwunjika.—1 Pet. 2:23.

¹³ Kashinshi kamukwashili cheñi Yesu kwikala nayitoñojoka yayiwahi. Welukili nkeñelu yaNshimbi yamwinkeluwu Mosi, nawa yamukwashili kuhemba antu munjila yayiwahi. Chakutalilahu, talenu nsañu yasonekawu haMaku 5:25-34. (Tañenu.) Mumbanda wapwekeleña mashi wayili mwizaza nakukunka kwihina daYesu nawa wakoleli. Kwesekeja naNshimbi, wadiña wamajilu nawa hateleleli kukunka muntuku. (Lev. 15:25-27) Hela chochu Yesu welukili nindi “yuma yaNshimbi yalema” yabombelelumu “niluwi, nikukuhwelela,” hamuzuwilili iwu mumbanda chamukunkiliyi kumahininduku. (Mat. 23:23) Ilaña, wahosheli mumesu awunda nindi: “Eyi mwanami, kukuhwelela kweyi kunakukoleshi dehi; yaña nakuwunda, musoñu weyi wukufumi.” Ichi hichakutalilahu chachiwahi chinakumwekesha kashinshi chikamukojejeli Yesu kumutiyila iwu muntu luwi.

14. Yesu watondeluhu kwiladi, nawa watwalekeluhu ñahi kuhanda muniyi njila?

¹⁴ Chahandileñayi. Yesu wamwekesheli kashinshi hakutonda chihandilu chachiwahi nikutwalekahu kuhanda muniyi njila. Wadihanini hakushimwina nsañu yayiwahi muchihandilu chindi chejima. (Luka 4:43) Yesu wafuukwiluhu yuma yamukwashili kutwalekahu kusha maana hamudimu windi nakuwumanisha chikupu. Watondeluhu kwikala nachihandilu chapela kulonda ekali nampinji niñovu yakuzata mudimu wakushimwina. (Luka 9:58) Welukili nindi watela kudizisha antu amakwawu kulonda akatwalekuhu kuzata iwu mudimu neyi nafwi dehi.  (Luka 10:1-12; Yow. 14:12) Wayishiikili atumbanji twindi nindi wukatwalekahu kuyikwasha muniwu mudimu “nikwakakumina nyaka.”—Mat. 28:19, 20.

15. Tunateli kumwekesha ñahi kashinshi munhoshelu yetu?

¹⁵ Shinshikenu njila yikwawu mutunateli kumwimbujola Yesu. Munhoshelu yetu. Neyi tunakuhanjeka nawakwetu akwakwitiya, twazatishaña mazu akukolesha akwetu kubadika mazu akuneñesha. (Efwes. 4:29) Neyi tunakuhosha nawantu amakwawu hansañu yaWanta waNzambi, twatowejaña mazu etu “namuñwa.” (Kol. 4:6) Twafwilaña kwiluka yuma yakeñañawu eni matala nawa twatondañahu mazu amawahi. Tweluka netu mazu amawahi aleñelaña antu kutiyilila nawa ayishikaña hanyichima. Kubombelahu, neyi tunakushimuna yuma yitwakuhwelela twafwilaña kutaña Bayibolu chatela etu tuhosheña. Dichi, twatenaña nsona yamuBayibolu nikuyitaña neyi chinatwesheki. Tweluka netu nsañu yamuBayibolu yikweti ñovu kubadika yuma yidi yejima yitunateli kuhosha halwetu.—Heb. 4:12.

16, 17. (a) Tunateli kumwekesha ñahi netu twalabaña kuzuwa nawa twekala amwovu? (b) Tunateli kusha ñahi maana hamudimu wetu wakushimwina?

¹⁶ Chitwamonaña yuma niyililu yetu. Kashinshi katukwashaña kuwundisha muchima nikwikala ‘alabaña kuzuwa.’ (Yak. 1:19) Neyi antu amakwawu atuhilisha twafwilaña kwiluka muloña wunaleñeli ahoshi nikwila yuma yamuchidiwu. Chitwela mwenimu ndulu yikumana nawa chikutukwasha ‘kudiwula mwanatuvulumunuwu.’ (Yish. 19:11) Kashinshi katukwashaña cheñi kwikala amwovu. Twakuhwelela netu akwetu akwakwitiya hiyawaninaku nawa tweluka netu hadaha anakumona kukala kutunateli kubula kwiluka. Twafwilaña kutiyilila munakutoñojokawu nawa neyi chinatwesheki twetejaña munafuukuluwu.—Fwi. 4:5.

¹⁷ Muchihandilu chetu. Hakwikala atumbanji twaYesu, tweluka netu kwosi mudimu wasweja kulema kubadika mudimu wakushimwina nsañu yayiwahi. Twatwalekañahu kwila mwenimu kuhitila mukufuukulahu yuma yikutukwasha kusha maana hamudimu wetu wakushimwina. Twatondahu kutwamijaku yuma yakuspiritu nikwikala nachihandilu chapela kulonda tuzateña mudimu wasweja kulema wakushimwina henohu kukuma kanda kwinzi.—Mat. 6:33; 24:14.

18. Tunateli kutwalekahu ñahi kwenda lwendu lwetu lwawumi wayaha nyaka, nawa munakufwila kwiladi?

¹⁸ Komana hitunatiyi kuwaha kudiza yililu yikwawu yaYesu yayiwahuku? Chikusweja kuwaha neyi tudiza yililu yindi yikwawu nikudiza chitunateli kumwimbujola. Dichi tufwilenu kulondela chikupu muyintampu yindi. Chitwela mwenimu, tukutwalekahu kwenda lwendu lwetu lwawumi wahaya nyaka nawa tukukundama kwakwihi naYehova, Muntu embujoleliyi Yesu chiwahi.