Antu akañanyaña kwona chiwahi hamuloña wamalasha amonaña kukala. Dikwila nawu, akañanyaña mwakwilila hampinji yahumañanañawu nawantu awayaña malasha ifuku nifuku. Dichi, amakwawu alombaña nawu neyi chinatwesheki amana kwetu niahela atela kuleka kuwayaña malasha hakupompa kwawakwaKristu, hakupompa kwanyanya nikwamaneni.

Chakadi nikujina, kwosi mukwaKristu wunateli kwililamu hohu kulonda yamukabakeshi mukwawu hampinji yakupompaku. Wejima wetu twakeñaña kutukolesha hakupompa. (Heb. 10:24, 25) Hela chochu, neyi kuduhu antu anakumona kukala hamuloña wamalasha anakuwayawu amana kwetu chakwila anakukañanya nikupompa chiwahi, atela kuhanjeka iyi nsañu nawaeluda. Hela chakwila iyi nsañu hiyamunsonaku hela himunateli kuyituñila antu enzaña nakupompa nshimbi kutalisha hakuwaya malashaku, aeluda atela kukwasha antu amuchipompelu kulonda eluki kukala kwamonañawu akwawu. Kwesekeja nayuma chiyidi, aeluda anateli kutondahu nsañu yidi munyikanda nakuyihanjeka muchibalu chakupompa kwamudimu chinakuhosha hakukankila kwahenu hela kukeña nsañu yinateli kubidikawu kutalisha haniku kukala. * Hela chochu, aeluda hiyatela kutwalekahu kubidikaña nsañu yamuchidiwuku. Hampinji yakupompa, kwekalaña antu amaha akweti mpwila ninana anenzi hohu nakupompa anabuli kwiluka iku kukala, dichi twakeñaña antu wenawa ekali namuzañalu hampinji yakupompa. Kwosi muntu itwatela kuleñela yadakameneña hamuloña wamalasha anawayiyuku.

Neyi chakwila kukala kutwalekahu nawa neyi chikutwesheka, chikuwaha neyi izanvu dawaeluda diloñeshaku njila yakukwashilamu antu akweti kukala kwamalasha, kulonda ashakameña kwakakawawu Mwitala daWanta. Chakutalilahu, kunateli kwikala kapeka kamu munateli kuyishilawu yozelu chakwila ashakameña mwenomu hakutiyilila maprogiramu hampinji yakupompa. Neyi chakwila iyi njila kuzatika chiwahi nehi nawa antu amakwawu atwalekahu kumona kukala, chipompelu chinateli kukwataña mazu nakuyitwalila antu wenawa hela kuyisokankeshela nsambu yatelafoni kulonda atiyilileña kumatalawu, neyi chayililañawu antu akañanyaña kwinza nakupompa.

Muyaaka yamakonu, Mudimu Wetu waWanta wunakukolesha amana kwetu niahela kwakamenaña akwawu munsañu yamuchidiwu hampinji yakupompa kweluña. Antu ayilejaña kwakamena akwawu sweje-e hampinji yakupompa kweluña, muloña chakalaña kuloñesha maluña mwatela kushakamawu antu akweti kukala kwakwona hamuloña wamalasha evumba. Hela chochu, iyi nshimbi hiyayishimuna nawu yikaleñaku hampinji yakupompa kudi kwejimaku nawa bayi musweja kuyilemeshaku.

Chineli tuchidi kushakama mukanu kaayi kamakonu, wejima wetu twakabakanaña hamuloña wanshidi yitwaswanini. Twahamekaña nankashi antu azataña nañovu kulanda akeheshuku yuma yatukabishaña. Chakeñekaña kwikala namuchima wakudihana hakwila muleki kuwaya malasha evumba, kulonda chiyikwashuku amana kwetu niahela enzeña nakupompa. Eñañi, kukeña kukutuleñela tufuukuluhu kwila mwenimu swayi-swayi.

Pontusi Pilatu amwiluka kudi atañi aBayibolu muloña wachifulu chadiñayi nachu hampinji yamukabishiluwu Yesu nikumujaha. (Mat. 27:1, 2, 24-26) Hela chochu, ijina dindi damwekana cheñi mapapa kakavulu munyikanda yikwawu yakushankulu. Kwesekeja nadikishonali yaThe Anchor Bible Dictionary, yahosha nawu iwu mukanda wukweti nsañu yakunyaka yakwituña yashimuna kutalisha hadi yena nawu “himuneni nawa wukweti nsañu yayivulu chikupu kubadika anguvulu ejima awaYuda amuRoma.”

Ijina daPilatu damwekanaña kakavulu munyikanda yasonekeliyi kaYudeya mukwakusoneka nsañu wejina daJosephus, wasonekeli yuma yisatu yamwekeni kunyima yakundama kwikañesha daPilatu hampinji yayuulileñayi aYudeya. Nsañu yikwawu yamuchiwana, ayisonekeli kudi kaYudeya mukwakusoneka nsañu wejina daPhilo. Mukwakusoneka nsañu wamuRoma wejina daTacitus, wasonekeli nsañu yanyuuli wakushankulu wamuRoma, washimwini nindi muchiyuulu chaTiberius diyi mpinji yeliliyi Pontusi Pilatu yamuhani Yesu kulonda amujahi.

Mu 1961, akwakuvumbujola azatilileña mwitala dawaRoma dakuhemena yisela dakushankulu muKesareya, kuIsarela, awanini ilola dazatishawu dehi dapapalala hasonekeluwu chiwahi ijina daPilatu mwidimi daLatin. Nsona (yinamwekeshuwu hanu) diyi yejima wanyi ilaña ashimunaña nawu iyi nsañu ayisonekeli nawu: “Kudi anzambi alemeshewa (iwu) Tiberieum Pontusi Pilatu, Mukulumpi wawaYudeya, wadihanini.” Itala dinakutenawu hadaha hitembeli yakulemeshelamu Mwanta wawaRoma, Tiberius.

Muchibaaba chinakwila nawu “Malwihu Kufuma Kudi Antañi” chekala muKaposhi Kakutalila kaJuly 15, 2002 kaChibemba, ashimwinumu nawu muhela watela kuvwala chitambala neyi nakulombola kadizi waBayibolu hamu namukwakushimwina weyala wapapatishewa hela nehi. Iyi nsañu yashimwini cheñi nawu chumichi chalema nankashi kutalisha haniyi nsañu.

Neyi mukwakushimwina weyala wunakuzata hamu namuhela hakulombola kadizi waBayibolu wapapatishewa, muhela watela kuvwala chitambala hakulombola. Nakulemesha ntanjikilu yaYehova yakwila nawu iyala nateli kwikala mutu mukachi kachipompelu chawakwaKristu muloña nakuzata mudimu wazatañawu amana kwetu atondawu. (1 Kor. 11:5, 6, 10) Neyi chinatwesheki, muhela nateli kumuleja mana kwetu nindi yalomboli kadizi neyi washikahu nawa natweshi kudizisha.

Munjila yikwawu, neyi muhela nakuzatila hamu namukwakushimwina weyala wabula kupapatishewa wabula kwikala nfumwindi hakulombola kadizi waBayibolu, kwesekeja naNsona hanateli kuvwala chitambalaku. Hela chochu, chinleji chawahela chinatela kuyileñela avwali chitambala nihampinji yamuchidiwu.