HAKUPOMPA kwadimena kwadiña muNagoya, kuJapan haApril 28, 2013, Anthony Morris waMwizanvu Dalombolaña wahayamishili izaza chabidikiliyi nsañu yazañalesheli antu, wedishili mukanda wawuha wamwidimi damuJapan wukweti mutu wakwila nawu Bayibolu, Nsañu Yayiwahi Yashimwiniyi Matewu. Kubadika hadi antu 210,000 amumweni namesu kapu hela adiña nakutalila haIntaneti ahamekeli kuhitila mukusakilila hampinji yayilehi.

Iwu mukanda wadimena waNsañu Yayiwahi yaMatewu wukweti mafu 128 wapulintawu kufuma muBayibolu yaNew World Translation yamwidimi dakuJapan. Mana Kwetu Morris walumbulwili nindi mukanda weniwu awuloñesheli “kulonda wukwashi antu ahoshaña idimi dakuJapan.” Indi iwu mukanda wamuBayibolu wambuka ñahi? Awuloñeshelelidi? Nawa antu anakutambwila ñahi iwu mukanda?

Njila yaloñeshelelumu iwu mukanda waMatewu yahayamishili izaza. Nyikanda yamuJapan ayisonekaña kufumisha kuchimunswa nakutwala kuchidiilu hela kufuma hewulu nakutwala kwishina, nyikanda yantesha, kushilahu ninyikanda yetu yakatataka anakuyisoneka kufumisha kuchimunswa nakutwala kuchidiilu. Dichi, nsona jidi muniwu mukanda wawuha anajisoneki kufuma kuchimunswa nakuya kuchidiilu, neyi chochiyasonekañawu yipapilu yansañu ninyikanda yikwawu yamwidimi daJapan. Atañi amavulu ahoshaña idimi dakuJapan amonaña iyi njila neyi diyi yaswayi kutaña. Kubombelahu, nyitu yansañu yekalaña kwiwulu defu ayishili mukachi kansona nakwikala nyitu yansañu yanyanya kulonda antañi chiyipeleli kwiluka yikuma yayeni.

Amanakwetu niahela amuJapan atachikili kutaña iwu mukanda waMatewu chakadi nikunata mpinji. Muhela wamuyaaka yamuma 80 wahosheli nindi “Natañi mukanda waMatewu kakavulu nankashi, ilaña iyi nsonekelu ninyitu yansañu yanyanya yinankwashi kutiyishisha chikupu Mpanji yahaMpidi.” Muhela wumu wakansi wasonekeli nindi: “Natañi mukanda wejima waMatewu munfulu yimu. Nenjilila kutaña nsona jakufumisha kwiwulu nikuya kwishina, ilaña antu amavula amuJapan akeña kutaña nsona jakufumisha kuchimunswa nakuya kuchidiilu.”

Muloñadi iwu mukanda wumu wamuBayibolu chiwukukwashila antu amuJapan? Hela chakwila, antu amavulu amuJapan eluka wanyi nsañu yamuBayibolu, ilaña adi namuchima wakukeña kuwutaña. Iyi Nsañu Yayiwahi Yashimwiniyi Matewu yikukwasha antu abulahu dehi kutaña nsañu yamuBayibolu kwikala nakukooleka kwakwikala naBayibolu nikuyitaña.

Muloñadi chiyatondeleluwu mukanda waMatewu hohu? Antu amavulu muJapan atoñojokaña nawu, “Bayibolu” diyi Yesu Kristu. Dichi mukanda waMatewu awutondeli muloña wukweti nsañu yejima yahosha hachihandilu nikusemuka kwaYesu, Mpanji yindi yaya mpuhu yahaMpidi ninsañu yashimwiniyi kutalisha kumafuku akukuminina, nsañu yinateli kuleta ikoku kudi antu amuJapan amavulu.

 Akwakushimwina aWanta amuJapan atachikili kuzata neyena hakuhana iwu mukanda wawuha kwitala nikwitala nikufuntilañaku. Muhela wumu wasonekeli nindi, “Nikweti kukooleka kwakushimwina Izu daNzambi kudi antu amwiluña detu. Dichi, natachikili kuhana kopi yamukanda waMatewu hadodina ifuku namelela hanyima yakumanisha kupompa.”

Indi iwu mukanda waMatewu anakuwuzatisha ñahi hakushimwina kudi antu? Eniimatala amavula muJapan eluka nhoshelu yidi neyi “chisu chanyanya,” “kunatila añulu mperola jenu,” nawa “bayi mwakama ifuku dakumadikuku.” (Mat. 6:34; 7:6, 13) Ahayamini hakwiluka nawu awa mazu ayihosheli kudi Yesu Kristu. Hakutaña iyi Nsañu Yayiwahi Yashimwiniyi Matewu, antu amavulu ahosheli nawu: “Nakeñaña kutaña Bayibolu kamu hefuku.”

Neyi akwakushimwina afuntila kudi antu enkeluwu mukanda waMatewu, kakavulu eniimatala ahoshaña nawu anyakashanaña kutañamu, hadaha kuwutaña wejima. Iyala wumu wayaaka yamuma 60 walejeli mukwakushimwina wumu nindi: “Natañi iwu mukanda kakavulu nawa wunankundeji. Mwani ndizishenu nsañu yayivulu yamuBayibolu.”

Mukanda waMatewu anawuloñeshi kushimwina nachu wunsahu kumaluña kwekalaña antu amavulu. Hampinji yadiña nakushimwinayi, Chinsahu wumu wahanini e-mail yindi kudi kansi wamumbanda watambwili mukanda waMatewu. Chimwahitili ora yimu, iwu kansi wamumbanda wamutemesheleli iwu muhela e-mail, nakuhosha nindi natañi dehi chibalu chaniwu mukanda nawa nakukeña kwilukilahu jajivulu. Chimwahitili mulungu wumu, watachikili kudiza Bayibolu nawa watachikili kuya nakupompa.

Makopi aBayibolu akubadika 1,600,000, aNsañu Yayiwahi Yashimwiniyi Matewu anayitemeshi muyipompelu yamuJapan, nawa tukweji twejima, aYinsahu ahanaña nyikanda yayivulu chikupu. Mazu adi muntachikilu yaniwu mukanda anakushimuna yitoñojoka yawansoneki anakuhosha nawu: “Tunakuhweleli chikupu netu kutaña iwu mukanda kukuyikwasha kulonda musweji kukeña kwiluka nsañu yekala muBayibolu.”