KUSHIMWINA nsañu yayiwahi diwu mudimu walema wunakuzatawu antu hanu hamaseki makonu. Hakwikala ambuña Yehova, mwamonaña iwu mudimu wakwilisha atumbanji nenu hikukooleka kwakweni. Munateli kwiteja chikupu nenu apayiniya niakwakushimwina kakavulu amonaña kukala hakwila atwalekuhu kwikala neyena mumudimu wakushimwina.

Akwakushimwina amakwawu chayikalilaña kuwana muntu wunateli kuhanjekawu nindi neyi anakushimwina kwitala nikwitala. Kakavulu, antu amavulu twayiwanaña wanyi hamatalawu. Neyi eni matala anayendeli, hiyamwekeshaña mpwila yansañu yaWanta hela kwiteja nsañu yinakuyilejawuku. Akwakushimwina amakwawu chayikalilaña muloña akweti iluña deneni nankashi muyatela kushimwinawu, nawa atiyaña woma nawu hiyanateli kumanisha iwu mudimuku. Antu amakwawu amuchipompelu anashimwini hadi yaaka yayivulu kubadika chiyakuhweleleluwu, nawa ananeñi.

Komana tunateli kuhayama netu antu jaNzambi ejima amonaña kukala kunateli kumanisha iyena dawu dakushimwina? Inehi. Komana twakuhweleleli netu, chinateli kutupelela kushimwina nsañu yalala yaNzambi yakupulwisha mawumi awantu mukanu kaayi kanakuyuulewa ‘nawatama’ Satana Diyabolu?—1 Yow. 5:19.

Elukenu nenu Yehova nateli kuyikwasha kumanisha kukala kwejima kumudi naku hakushimwina nsañu yayiwahi. Yumanyi yimwatela kwila kulonda muswejeshi iyena dakushimwina mumudimu wawakwaKristu? Tushinshikenu jinjila jikwawu jinalondeluhu.

Chaaka nichaaka antu amavulu ayipapatishaña nakwikala aYinsahu jaYehova. Neyi mwadihana kudi Nzambi kuhitila mukupapatishewa katataka, chakadi nikujina mukudiluñisha kuzata nawantu anazati mumudimu wakushimwina hadi yaaka yayivulu kubadika enu. Neyi munashimwini hadi yaaka yayivulu, komana himunateli kwakukwashaku amaha anapapatishewi katatakaku?

Yesu welukili nindi atumbanji twindi akeñeleña  kuyikwasha kulonda ekali akwakushimwina awanta ashikahu, nawa wayilejeli chiyatela kuzatawu iwu mudimu. (Luka 8:1) Makonu, anetu nawa twatela kudizisha amakwawu kulonda ekali akwakushimwina ashikahu.

Hitwatela kukuhwelela netu mukwakushimwina wamuha nateli kwiluka chakushimwina kuhitila mukuya mwiha hohuku. Wakeñaña kumukwasha munjila yayiwahi nawa yakukeña. Munateli kumukwasha mukwakushimwina wamuha (1) chakuloñesha nichakuhituluka munsañu yikahoshayi, (2) chakuhanjeka namwini itala hela antu itwabulakanaña mumukwakwa, (3) chakuhana nyikanda, (4) chakufuntila kudi antu amwekesheli mpwila, ni (5) chakutachika kudizisha antu Bayibolu. Chakadi nikujina, munatela kufuma yuma yayiwahi neyi mukwakushimwina wamuha yashaku kashinshi nikulondela jinjila jakuzatisha mwiha jinakumulejawu kudi muntu wunakumukwasha. (Luka 6:40) Mukwakushimwina wamuha nateli kutiya kuwaha kuzata namuntu wunateli kumutiyilila nikumukwasha neyi nakukeña wukwashu. Mukwakushimwina wamuha natela cheñi kuhetelamu kuhitila mukumuhameka nikumuleja njila jinateli kumukwasha.—Mukwa. 4:9, 10.

Hela chakwila munazati nañovu hakuhanjeka naweni matala, mpinji yikwawu kuhanjeka namukwenu imunakushimwina nindi dichuma chalema. Anukenu nenu Yesu watemesheli atumbanji twindi “ayedi ayedi” kulonda akashimwini. (Luka 10:1) Hampinji yazatilileñawu hamu adikolesheleña nikudikwasha wumu namukwawu. Mpinji yimukwikala hamu namukwenu mukwakwitiya mumudimu wakushimwina himpinji yayiwahi ‘yakudikolesha wumu namukwawu.’—Rom. 1:12.

Yumanyi yikwawu yimunateli kuhanjekahu? Komana hakachi kenu haduhu muntu wawanini nsañu yamukolesheli katataka? Chikumanyi chachiwahi chimwawana hampinji yimwadizaña nkawenu hela nachisaka? Komana kuduhu chikuma chimwatiyili hakupompa chayikolesheli? Mpinji yikwawu, munateli kuzata namukwakushimwina imwabula kwiluka chiwahi. Komana mweluka chenjiliyi muchalala? Chumanyi chamuleñeleli yeluki nindi iku diku kuloñesha kwaYehova? Kukoolekanyi hela yumanyi yinamoniyi muchihandilu chindi? Hadaha munateli kumuleja yuma yimwamweni muchihandilu chenu. Hichidi namuloña nachinakutambwilawu antu nsañu yalala mwiluña denuku, kuzata namukwenu mwiha himpinji yayiwahi ‘yakutwalekahu . . . kudikolesha wumu namukwawu.’—1 Tesa. 5:11.

Hakwila tutwalekuhu kwikala neyena mumudimu wakushimwina twatela kwikala nachaaku chachiwahi  chakudiza. ‘Nduñu wamaana nikashinshi’ watuloñeshelaña nansañu jajivulu nawa jikweti nyitu yashiyashana. (Mat. 24:45) Nsañu yimunateli kudiza hakwila mudyi yakudya yakuspiritu yashiyashana chikupu. Tutalenu chakutalilahu chamutu wansañu yayiwahi yitunateli kudiza nkawetu: Muloñadi mudimu wakushimwina Wanta chiwasweja kulema? Chikasha chinalondeluhu chinakushimuna mudimu wakushimwina Wanta chiwasweja kulema.

Kulondela nyitu yansañu yinashimunuwu munichi chikasha yinateli kuyikwasha kutwalekahu kushimwina neyena. Komana kwila mwikala nandandanda yakudizaña iyi nsañu kulonda mumoni jinsona jimunateli kwiluka jakuzatisha mwiha nehi? Toñojokenuña hayikuma yimunadizi nijinsona jinakoleshi oyu yikuma. Kwila mwenimu kunateli kuyikwasha chikupu kwikala neyena mumudimu wakushimwina.

Kuloñesha kwaYehova kakavulu kwatulejaña yuma yatuloñeshelawu yinateli kutukwasha mumudimu wetu wakushimwina. Kubombela hamudimu wetu wakushimwina kwitala nikwitala, tunateli kushimwina antu kuhitila mukuyisonekela nyikanda, kuzatisha nshiña, kushimwina mumukwakwa hela kumaluña amakwawu kwawanikaña antu kulonda tuyishimwini nsañu yayiwahi kuhitila muwunsahu wakukoolekela nikumaluña kwazatilañawu. Tunateli cheñi kufukulahu kuya nakushimwina kumaluña kudi aYinsahu antesha hela kwabula kwikalawu aYinsahu.

Komana munakukeña kuzatisha yuma yinayilejuwu? Komana mwesekahu dehi kuzatisha iyi yuma yinayilejuwu? Antu amavulu azatishaña iyi yuma adiluñishaña chikupu nayuma yafumañamu. Shinshikenu iyi yakutalilahu yisatu.

 Chakutalilahu chatachi chinakumwekesha yuma yayiwahi yashimwinuwu muyibaaba yaMudimu waWanta wumu, chitwatela kutachika kudiza Bayibolu nawantu. Chamuleñeleli muhela wejina daApril kutachika kudiza nawakwawu asatu muyazatilaña. Wahayamini chikupu nawa watiyili kuwaha chelili akwawu asatu eteji kudiza nawu nikutachika kuya nakupompa.

Chakutalilahu chamuchiyedi chidi chakuhana magazini etu. Atukoleshaña nawu tukeñakeñeña antu anateli kwiteja nsañu yekala muyibaaba yamumagazini etu. Nkoñi wañinza wakuUnited States washimwini nindi wahanini magazini yaAwake! yikweti chibaaba chahosheleña hatufumbu kudi akulumpi janyidimu amumasitolu ejima alandishaña tufumbu amwiluña dimu. Yena niñodindi azatishileña cheñi yibaaba yahosheleña nawu “Understanding Your Doctor” dichi andotolu akubadika ha 100 munidi iluña ayinkeli. Wahosheli nindi: “Iwu wenyi wakuya nakushimwina watukwashili chikupu kudilumbulula nikuhana nyikanda. Hanyima yakudiluka nawantu munawa maluña, chatukwashili kutachika kuya nakuyishimwina.”

Chakutalilahu chamuchisatu chidi chakushimwina hanshiña. Muhela wejima daJudy wasonekeleli kukasanji keneni kamukaayi kejima nakusakilila chatukolesheluwu nawu tuzatisheña nshiña hakushimwina. Wahosheli nindi mama yindi wudi nayaaka 86 wakatakataña nankashi niyena watwesheli kuzata iwu mudimu waNzambi nawa wekalili namuzañalu chikupu hakutachika kulombola kadizi wudi nayaaka 92 hanshiña.

Njila jakushimwinamu jatulejañawu munyikanda yetu jazatikaña chikupu. Jizatishenu. Jinateli kuyikwasha kutwalekahu kwikala namuzañalu niyena mumudimu wakushimwina.

Kuzata nankashi mumudimu wakushimwina hikwashindamena hanyikanda yayivulu yitwahanaña, kulombola atudizi aBayibolu amavulu hela antu amavulu itunakwashi kwikala ambuña Yehovaku. Indi Nowa wakwashili antu añahi abulili kwikala amuchisaka chindi ekalili akwakudifukula aYehova? Hela chochu, wadiña mukwakushimwina wadikita. Chuma chalema hikumukalakela Yehova nakashinshi.—1 Kor. 4:2.

Akwakushimwina aWanta amavulu eluka nawu hakwila ekali neyena mumudimu wakushimwina, atela kwimika yikonkwanyi yatela kushikijawu. Hiyikonkwanyinyi yeniyi? Yikonkwanyi yantesha anayishimuni muchikasha.

Lombenu wukwashu kudi Yehova kulonda muwani njila yakudikitilamu chikupu mumudimu wakushimwina. Neyi mushikija chikonkwanyi chenu nikwiluka nenu munakuzata nañovu kulonda mushimwineña nsañu yayiwahi, mukwikala namuzañalu.

Chakadi nikujina, kushimwina nsañu yayiwahi kunateli kuyikalila. Ilaña kudi yuma yimwatela kwila kulonda mwikali akwakushimwina aWanta adikita. Dikoleshenuña namukwenu mukwakushimwina, twalekenuhu kwikala nachaaku chenu chachiwahi chakudiza, zatishenuña yuma yinakuyilejawu nikwikala nayikonkwanyi yatelela. Kubombelahu, anukenu nenu Nzambi wayinka mudimu wasweja kulema wakushimwina nsañu yayiwahi nakwikala Chinsahu chindi. (Isa. 43:10) Chimukutwalekahu kuzata neyena mudimu wenu wakushimwina, mukwikala namuzañalu.