1, 2. (a) Yishimwinyi yalejeliyi Yesu alundanindi? (Talenu mwevulu wakutachikilahu.) (b) Yumanyi yitwatela kwiluka hachishimu chahosha hadi anyikoku nawampembi?

 YESU wahanjikileña nawalundanindi aPetulu, Anderi, Yakoba niYowanu. Afumini tuhu hakutiya chashimwiniyi yishimu yahosha hadi nduñu wamaana nikashinshi, ambanda ajiki ikumi nintalenta. Yesu wakunkulwili mpanji yindi kuchishimu chimu. Washimwini mpinji yakasompeshayi ‘Mwana kamuntu’ ‘nyunza yejima.’ Ichi chishimu chazañalesheli atumbanji twindi. Munichi chishimu Yesu wahosheli chikupu hamazanvu ayedi, izanvu dimu dawanyikoku dikwawu dawampembi. Nawa washimwini cheñi hezanvu damuchisatu dalema nindi ‘hiyamana kwaMwanta.’—Tañenu Matewu 25:31-46.

² Ichi chishimu chazañaleshaña cheñi antu jaYehova amunanu mafuku muloña munichi chishimu dimwahosheliyi Yesu hadi antu akapuluka hela akafwa. Washimwini muloña wukaleñela amakwawu akatambwili wumi wahaya nyaka nichuma chikaleñela amakwawu akayijilumuni haya nyaka. Hakwila tukapuluki twatela kwiluka nsañu yalala yashimwini Yesu nikuzatisha yumiyi. Chineli iyi hinsañu yalema, twatela  kudihula netu: Indi Yehova walumbululaña ñahi chovu-chovu yuma yitweluka hanichi chishimu? Muloñadi chitukuhoshela netu ichi chishimu chakonkomwena hamudimu wakushimwina chiwalemena? Anyi enkeluwu mudimu wakushimwina? Nawa muloñadi iyi mpinji chiyinekalili yakwovwahila “Mwanta” niantu atenañayi nindi ‘ana kwami’?

3, 4. (a) Yumanyi yalema yitwatela kwiluka yekala muchishimu chawanyikoku niampembi? (b) Indi kaposhi kaZion’s Watch Tower kalumbulwili ñahi ichi chishimu mu 1881?

³ Hakwila tutiyishi chishimu chawanyikoku niampembi, twatela kwiluka yuma yisatu yalema yekala muniyi nsañu: antu ashimunawu, mpinji yakusompesha nimuloña wakaleñela akayisompeshi nawu hiyanyikoku hela ampembi.

⁴ Mu 1881, kaposhi kaZion’s Watch Tower kashimwini nawu “Mwana kamuntu,” atenañawu cheñi nawu “Mwanta” diyi Yesu. Atudizi aBayibolu akusambila elukili nhoshelu yakwila nawu ‘ana kwami’ yatalisha kudi antu akayuula hamu naKristu niantu ejima hamaseki neyi anekali dehi awanina. Amweneña nawu kwambula anyikoku hadi ampembi kukekalaku hampinji Yakuyuula kwaYaaka Ikombakaji daKristu. Nawa akuhweleleli nawu antu akayitena nawu anyikoku muloña wakwovwahila nshimbi yaNzambi yakukeña.

5. Indi yuma yitweluka ayihimpili ñahi muyaaka yamuma 1920?

⁵ Kumatachikilu ayaaka yamuma 1920, Yehova wakwashili antu jindi kutiyisha chiwahi mwatalisha ichi chishimu. Kaposhi Kakutalila kaOctober 15, 1923, kahosheli chikupu nawu “Mwana kamuntu” diyi Yesu. Hela chochu, kahosheli cheñi nawu antu atenawu nawu ana kwaKristu hiyantu akayuula nindi mwiwulu, nawa kalumbulwili nawu anyikoku hiyantu akweti kuchiñeja kwakushakama hamaseki muchiyuulu chaWanta waKristu. Komana aka kaposhi kahosheli hampinji yakwambula anyikoku nawampembi? Ichi chibaaba chahosheli nawu amana kwaKristu akayuulaña hamu nindi mwiwulu hampinji Yakuyuula kwaYaaka Ikombakaji kulonda akabuli kuyikwasha hela kuyuumbilila kudi antu ahamaseki. Dichi, kwambula kwawanyikoku niampembi kwakekalaku henohu Kuyuula kwaYaaka Ikombakaji kanda kutachiki. Hakwila muloña wukaleñela muntu amusompeshi nawu himukoku, ichi chibaaba chahosheli nawu antu akayisompesha muniyi njila muloña eteja Yesu kwikala Mwanta wawu nawa adiña nakutalila Wanta chiwakaleta chihandilu chachiwahi.

6. Indi yuma yitweluka ayilumbulwili cheñi chiwahi munjilanyi muyaaka yamuma 1995?

⁶ Muloña waniku kuhimpa, antu jaYehova elukili nawu antu ayisompeshaña nawu hiyanyikoku hela ampembi mumpinji yejima yakukuma kwanyaka yamakonu kwesekeja nachatambwilañawu nsañu yaWanta. Hela chochu, muyaaka yamuma 1995, yuma yitweluka ayilumbulwili chiwahi. Yibaaba yiyedi yamuKaposhi Kakutalila kaOctober 15, 1995, yahosheli hakudifwana kwekala hamazu aYesu asonekawu haMatewu 24:29-31 (tañenu) namazu asonekawu haMatewu 25:31, 32. (Tañenu.) * Yakunkulwili nawudi? Chibaaba chakonkomweneni haniyi nsañu chahosheli nawu: “Antu akayisompesha nawu hiyanyikoku niampembi kumbidi.” Mpinjinyi yayeni yakayisompeshawu? “Akayisompesha hanyima yakwila ‘lukadi lweneni’ lwashimunawu haMatewu  24:29, 30 lunatachiki dehi nawa Mwana kamuntu ‘nenzi dehi mukulema kwindi.’ . . . Kuhiñahu, chikela kaayi katama kanakumi dehi, Yesu wukasompesha antu.”

7. Makonu twatiyisha ñahi chiwahi ichi chishimu?

⁷ Makonu, tweluka chikupu mwatalisha chishimu chawanyikoku niampembi. Kutalisha hamuntu ashimunawu, Yesu diyi “Mwana kamuntu” nawa Mwanta. Antu atenawu nawu ‘ana kwami’ hiyamayala niambanda awayishawu naspiritu akayuulila hamu naKristu mwiwulu. (Rom. 8:16, 17) “Anyikoku” ‘niampembi’ emenañaku antu akunyunza yejima. Awa antu ayiwayisha wanyi naspiritu yajila. Indi mpinji yakusompesha yikashika mwakanyi? Yesu wukasompesha antu kwakwihi nakumana kwalukadi lweneni ludi mukamwihi. Nawa muloñanyi wakaleñela antu akayisompeshi nawu hiyanyikoku hela ampembi? Yuma yikafumamu yashindamena hachahembañawu ashalahu amana kwaKristu awayishewa naspiritu achidi hamaseki. Chineli kukuma kwakanu kaayi kudi kukamwihi, twamusakililaña Yehova chikupu muloña nakulumbulula chovu-chovu mwatalisha ichi chishimu niyishimu yadifwanaku yasonekawu mumukanda waMatewu kapetulu 24 ni 25!

8, 9. Muloñadi anyikoku chayilumbululawu nawu ‘aloña’?

⁸ Muchishimu chahosha hanyikoku niampembi, Yesu hahosheli jiika hamudimu wakushimwinaku. Hanu dinu tukuhosheladi netu chakonkomwena hakulema kwakushimwina?

⁹ Chatachi, ilukenu nenu Yesu wazatishileña yishimu hakutañisha. Chakadi nikujina, hadiña nakuhosha kutalisha hanyikoku niampembi awenuku. Cheñi nawa, hahosheli nindi muntu akusompeshawu nawu himukoku watela kudiisha, kuvwika, kuhemba hela kuhempula amana kwindi adi mukaleyaku. Ilaña, wahanini chakutalilahu chamwekeshaña yililu yamwekeshañawu anyikoku achifwikija kudi amana kwindi. Wayilumbulwili anyikoku nindi ‘aloña’ muloña eluka nawu Kristu wukweti izanvu dawamana kwindi awayishewa achidi hamaseki nawa anyikoku ayikwashaña awayishewa nakashinshi munawa mafuku akukuminina akala.—Mat. 10:40-42; 25:40, 46; 2 Tim. 3:1-5.

10. Indi anyikoku anateli kuyikwasha ñahi ana kwaKristu?

¹⁰ Chamuchiyedi, shinshikenu nsañu yakundama kumazu aYesu. Wahosheleña hachinjikijilu chakwinza kwindi nikukuma kwanyaka yamakonu. (Mat. 24:3) Kumatachikilu ampanji yindi, Yesu washimwini nindi chinjikijilu chabombelamu chuma chasweja kulema, nsañu yayiwahi yaWanta “akayishimwañena mwahita matuña ejima.” (Mat. 24:14) Henohu kanda yahoshi hadi anyikoku niampembi, washimwini chishimu chantalenta. Neyi chitwahanjekeli muchibaaba chinafumuhu, Yesu wazatishili achina chishimu kulonda akonkomweni atumbanji twindi awayishewa naspiritu, ‘ana kwindi,’ nindi atela kudikita mumudimu wakushimwina. Hela chochu, awayishewa antesha achidi hamaseki hampinji yakwinza kwaYesu amonaña kukala kweneni, kwakushimwina ‘kunyunza yejima’ henohu kukuma kanda kwinzi. Chishimu chawanyikoku niampembi chamwekeshaña nawu awayishewa akayikwasha. Dichi, njila yimu yalema yamwekeshelañamu antu akasompeshawu nawu anyikoku hikuyikwasha ana kwaKristu mumudimu wakushimwina. Hanu dinu, chumanyi chakeñekaña hakuyikwasha? Komana chakeñekaña hohu kuyinka mali nikuyikundeja, tahindi kudi yuma yayivulu yakeñekaña?

11. Lwihwinyi lunateli kwihula, nawa muloñadi?

¹¹ Makonu, antu amavulu chikupu hakachi kawatumbanji twaYesu akushika ku 8 miliyoni hiyawayishewa naspirituku. Hiyatambwilili ntalenta yayinkeliyi Yesu anduñu jindi awayishewaku. (Mat. 25:14-18) Tunateli kwihula netu, ‘Komana mudimu wakushimwina wakundama kudi antu awayishewa naspiritu yajila hohu?’ Shinshikenu yuma yinateli kutuleñela twakuli netu inehi.

12. Yumanyi yitwadizilaña kumazu aYesu asonekawu haMatewu 28:19, 20?

¹² Yesu wayilejeli atumbanji twindi ejima kuya nakushimwina. Hanyima yakumusañula, Yesu walejeli atumbanji twindi kuya nakwilisha atumbanji nikuyitañisha kuhemba ‘yuma yejima’ yayilejeliyi. Mudimu wakushimwina wadiña hakachi kanshimbi yayilejeliyi. (Tañenu Matewu 28:19, 20.) Dichi, atumbanji twaKristu ejima atela kushimwina hela akweti kuchiñeja kwakuya mwiwulu indi kwiji kwakushakama hamaseki.—Yil. 10:42.

13. Indi chimwenu chamweni Yowanu chamwekeshañadi, nawa muloñadi?

¹³ Mukanda waChimwekeshu washimuna nawu mudimu wakushimwina akawuzata kudi awayishewa nianyikoku acheñi. Yesu wamumwekesheleli kapostolu Yowanu chimwenu ‘chansumbuki,’ a 144,000 antu awayishewa akayuula naKristu mwiwulu atambikaña antu kulonda ‘atambuli menji awumi chakadi kulanda.’ (Chim. 14:1, 3; 22:17) Awa menji achifwikija emenañaku yuma yaloñeshayi Yehova yakukuula nachu antu kunshidi nikufwa kushindamena hefutu damulambu waKristu. (Mat. 20:28; Yow. 3:16; 1 Yow. 4:9, 10) Ifutu diyi nsañu yalema yitwashimwinaña nawa awayishewa alombolaña mudimu wakukwasha antu kudiza hefutu nichiyanateli kuhetelamu. (1 Kor. 1:23) Muchimwenu, Yowanu wamweni antu amakwawu abula kwikala mwizanvu dansumbuki. Niwena ayilejeli kuhosha nawu, “Inzaña!” Ovwahilaña nakutambika amakwawu kulonda atambuli menji awumi. Idi izanvu  damuchiyedi hiyantu akweti kuchiñeja kwakushakama hamaseki. Dichi, ichi chimwenu chamwekeshaña hatooka to-o nawu antu ejima etejaña mutambi wakwila nawu ‘inzaña’ akweti mudimu wakushimwina antu amakwawu.

14. Yumanyi yakeñekaña hakwovwahila “lushimbi lwaKristu”?

¹⁴ Ejima ovwahilaña “lushimbi lwaKristu” atela kushimwina. (Ŋal. 6:2) Yehova wakeñaña nindi antu ejima adifukulaña kudi yena ovwahileña nshimbi jojimu. Chakutalilahu, wayilejeli aIsarela nindi: “Akekali nalushimbi lwawu lumu hohu, nimwenimbu nimwenyi wenza nakushakama nenu.” (Kwid. 12:49; Lev. 24:22) AkwaKristu hiyovwahilaña Nshimbi yejima yamwinkeluwu Mosuku. Ilaña wejima wetu, chili twawayishewa hela nehi, twatela kwovwahila “lushimbi lwaKristu.” Yumiyi yabombelamu yuma yejima yatañishiliyi Yesu. Chuma chasweja kulema hayuma yejima yatañishiliyi Yesu, wayilejeli atumbanji twindi nindi atela kudikeña. (Yow. 13:35; Yak. 2:8) Nawa njila yimu yitwatela kumwekeshelamu netu twamukeña Nzambi, Kristu niantuñinetu hikushimwina nsañu yayiwahi yaWanta.—Yow. 15:10; Yil. 1:8.

15. Muloñadi chitukuhoshela netu nshimbi yaYesu yakundama kudi atumbanji twindi ejima?

¹⁵ Mazu alejeliyi izanvu danyanya akundama nikudi izanvu deneni. Chakutalilahu, Yesu watiyañeni chitiyañenu chaWanta nawatumbanji indi 11, ilaña achina chitiyañenu chakundama kudi a 144,000 ejima. (Luka 22:29, 30; Chim. 5:10; 7:4-8) Munjila yoyimu, Yesu walejeli hohu izanvu danyanya dawatumbanji twindi adimweni nindi hampinji yamusañwiluwu nindi ashimwineña. (Yil. 10:40-42; 1 Kor. 15:6) Ilaña atumbanji twindi ejima ashinshika amuyaaka nkulakaji yakusambila elukili nawu yina nshimbi yayikundamini hela chakwila atiyili wanyi Yesu chahosheleñayi. (Yil. 8:4; 1 Pet. 1:8) Nimakonu, Yesu hahoshahu namuntu wudi wejima hadi akwakushimwina aWanta akushika ku 8 miliyoni ashimwinaña mpinji yejimaku. Ilaña ejima eluka nawu atela kukuhwelela mudi Kristu nikumwekesha ichi chikuhwelelu kuhitila mukuzata mudimu wakushimwina.—Yak. 2:18.

16-18. Indi anyikoku akwashaña ñahi ana kwaKristu, nawa muloñadi chiyatela kuyikwashilawu chayinu mpinji?

¹⁶ Satana nakulwa njita nawana kwaKristu awayishewa naspiritu ashalahu hamaseki, nawa wukasweja kuyilukuka neyi “mpinji yindi yantesha” yinashaluku hiyikumana. (Chim. 12:9, 12, 17) Hela chakwila ayikabishaña, awayishewa atwalekañahu nakulombola mudimu wakushimwina nawa antu amavulu chikupu anakutiya nsañu yayiwahi. Chakadi nikujina Yesu nakuyilombola.—Mat. 28:20.

¹⁷ Mukanka weneni wakadi kuchinda wawanyikoku akweti kukooleka kwakukwasha ana kwaKristu bayi neyi mumudimu wakushimwina hohuku ilaña nimunjila jikwawu. Chakutalilahu, ahanaña yawana yamali nikukwasha mudimu wakutuña Matala aWanta, Matala Akupompelamu kupompa kwamaneni, nitusanji twanyitayi nawa ovwahilaña antu atondawu kudi ‘nduñu wamaana nikashinshi’ kulonda ayilomboleña.—Mat. 24:45-47; Heb. 13:17.

¹⁸ Katataka añelu keña aleki kukwata mpepela yakisañanaña yalukadi lweneni. Chumichi chikamwekana neyi ana kwaKristu ashalahu hamaseki anatambwili dehi chilamiki chawu chamakumishilu. (Chim. 7:1-3) Awayishewa akayitwala mwiwulu henohu Amagedoni kanda yitachiki. (Mat. 13:41-43) Dichi, antu akasompeshawu nawu anyikoku, ayinu diyi mpinji yatela kukwashawu ana kwaKristu nakashinshi.