1. Chumanyi chamuleñeleli Yesu ‘yazañalali mudi spiritu yajila’? (Talenu mwevulu wakutachikilahu.)

 KOMANA munateli kufwikija chichadiña hakumona Yesu Kristu ‘nazañalali mudi spiritu yajila’? Hadaha munakumona chinazañalaliyi kuhitila mukutumba chimwemweta nawa mesu indi anakumwekesha nawu natiyi kuwaha. Chumanyi chamuleñeleli yazañalali? Wafumini tuhu hakutemesha atumbanji twindi 70 kulonda ayi nakushimwina nsañu yayiwahi yaWanta waNzambi. Wakeñeleña kwiluka chikupu chakuzatawu mudimu wawu. Kwadiña ayilumbu añovu amavulu ansañu yayiwahi, adi neyi ansoneki ataña chikupu niaFwarisi. Aleñeleli antu amavulu kumumona Yesu neyi himukwakusoña hohu nawa atumbanji twindi ayimweneña neyi “hiyantu akadi kwiluka nyikanda, hela kwiñila mumashikola amaana.” (Yil. 4:13; Maku 6:3) Ilaña atumbanji afuntili namuzañalu chikupu kufuma kwayiluwu nakushimwina. Ashimwinini hela chakwila ayidimbulwileña nikudi andemoni. Chumanyi chayiletesheli kwikala namuzañalu nikuhamuka?—Tañenu Luka 10:1, 17-21.

2. (a) Indi atumbanji twaYesu adiña ñahi neyi anyana anyanya? (b) Chumanyi chayikwashili atumbanji twaKristu kwiluka nsañu yalala yalema nankashi?

² Talenu Yesu chamulejeliyi Yehova nindi: “Eyi Tata, Mwanta wewulu niiseki, nakusakilili chiwajindili yumiyi kudi akwamaana nikudi ashinshika, hiwukuyimwekesha kudi anyikeki.  Mwamweni Tata, dichi chiwamweni kuwaha.” (Mat. 11:25, 26) Hela chochu, Yesu hatalishili mukwila nindi atumbanji twindi adiña anyana anyanya awenuku. Ilaña welukili nindi atumbanji amwekeneña neyi anyana anyanya neyi ayesekeja nawaFwarisi niansoneki ataña chikupu adimweneña aweni nawu akweti maana. Sweje-e dinu, Yesu wayidizishili atumbanji twindi kwikala neyi anyana anyanya kuhitila mukwikala adizoza nawa amwovu. (Mat. 18:1-4) Ahetelelumu ñahi mukwikala adizoza? Yehova wayikwashili naspiritu yajila kulonda eluki nsañu yalala yalema nankashi, ilaña akwamaana ayisupishileña ayiputishili mesu kudi Satana hamuloña wakudinka wanta.

3. Yumanyi yitukuhanjekahu muchinu chibaaba?

³ Chumichi dichi chamuleñeleli Yesu kuzañalala nankashi. Wazañaleli muloña Yehova wayimwekesheleli antu adizoza akunyichidi yejima nsañu yalala yakunama, hela chakwila adiña antu abula kwiñila mumashikola. Wazañaleli chelukiliyi nindi Tata yindi neteji iyi njila yakutañishilamu. Komana Yehova wahimpa, nawa nakumwekesha ñahi nindi wuchindi weteja iyi njila yakutañishilamu? Hampinji yitunakushinshika hañakwilu, tukutiya muzañalu waweni neyi chatiyiliyi Yesu.

4. Indi Kaposhi Kakutalila kasonekañawu mwidimi dapela kanakukwasha antu munjilanyi?

⁴ Muyaaka yamakonu, nshimbi yakuspiritu yahanaña kuloñesha kwaYehova anakuyisoneka chikupu munjila yapela nawa yaswayi kutiya. Shinshikenu yakutalilahu yisatu. Chatachi, tudi naKaposhi Kakutalila kasonekañawu mwidimi dapela. * Aka kaposhi kanakukwasha chikupu antu akweti kukala kwedimi daEnglish hela kukala kwakutaña. Yisaka yinamoni neyi anyana anakutiya chiwahi nsañu yamuniyi magazini yasonekawu mwidimi dapela. Antu amavulu asoneka nyikanda yakusakilila chikupu. Muhela wumu wasonekeli nindi walekeli kwakulahu haKudiza Kaposhi Kakutalila. Wahosheli nindi, “Natiyileña nsonyi.” Ilaña chayinu mpinji hatiyaña nsonyuku. Hanyima yakuzatisha kaposhi kasonekawu mwidimi dapela, wasonekeli nindi: “Ichi nakulañahu kayedi nakubadikahu muloña hinatiyaña womaku. Namusakililaña Yehova ninenu.”

5. Yumanyi yayiwahi yidi muBayibolu yayiha yaNew World Translation of the Holy Scriptures?

⁵ Chamuchiyedi, tudi naBayibolu yayiha yaNew World Translation of the Holy Scriptures, yedishiluwu muEnglish hakuhumañana kwahachaaka haOctober 5, 2013. * Nsona jajivulu anajihihishi, ilaña nsañu hiyanahipikuku nawa hekwawu yinakutiyakana chikupu. Chakutalilahu, Yoba 10:1 hatachi yadiña namazu 27 ilaña ichi yidi namazu 19; Yishimu 8:6 hatachi yadiña namazu 20 ilaña ichi yidi namazu 13. Mavasi ejima ayilumbulula chachiwahi muniyi Bayibolu yayiha. Kafwampi mana kwetu wumu wawayishewa wunakalakali nakashinshi hadi yaaka yayivulu wahosheli nindi: “Namanishi tuhu kutaña mukanda waYoba muBayibolu yayiha, inakutiya neyi kwiji dikatachi kwiluka nsañu yamuniwu mukanda!” Amavulu niwena dichi chinakuhoshawu.

6. Munakutiya ñahi hayuma yitwelukili yalumbululawu kutalisha hamukanda waMatewu 24:45-47?

⁶ Chamuchisatu, tushinshikenu hakuhimpika kwakatataka muyuma yitwelukili. Chakutalilahu, yuma yitwelukili yalumbululawu kutalisha hadi ‘nduñu wamaana nikashinshi,’  yekala muKaposhi Kakutalila kaJuly 15, 2013, yatuzañalesheli chikupu. (Mat. 24:45-47) Alumbulwili nawu nduñu washinshika Hiizanvu Dalombolaña nawa “akwetala” hiyantu ejima adyaña yakudya yakuspiritu, chili awayishewa hela “anyikoku acheñi.” (Yow. 10:16) Wenowu muzañalu wutwatiyili hakudiza nsañu yamuchidiwu nikuyidizisha amaha! Njilanyi jikwawu jinakumwekesha nawu Yehova watiyaña kuwaha ntañishilu yapela nawa yaswayi kutiya?

7, 8. Yakutalilahwinyi yikwawu yonenawu yahoshaña hawuprofwetu wamuBayibolu?

⁷ Neyi munamukalakeli dehi Yehova hadi yaaka yayivulu, hadaha munamoni nenu munyikanda yetu adiña nakuhimpa chovu-chovu njila yakulumbulwilamu nsañu yayivulu yasonekawu muBayibolu. Munjilanyi? Kumafuku akunyima, kakavulu ahosheleña nawu nsañu yikwawu yadiña nakwimenaku yuma yalema yikamwekana kumbidi. Komana chalema kulumbulula nsañu yamuBayibolu muniyi njila? Eñañi. Chakutalilahu, Yesu wahosheli ‘hachinjikijilu chakaprofwetu Yona.’ (Tañenu Matewu 12:39, 40.) Yesu walumbulwili nindi mafuku antesha ashakaminiyi Yona mwivumu danshi mwadi kwikala mwijamu daYona neyi chakwila Yehova wamupulwishili wanyi, mafuku wenawa emeneneñaku mpinji yashakaminiyi Yesu mwijamu.

⁸ MuBayibolu mwekala nsañu yikwawu yonenawu yawuprofwetu. Kapostolu Pawulu wahosheli hawuprofwetu wukwawu. Chakutalilahu, wulunda waAbarahama naHaga niSara wemeneneñaku wulunda waYehova namunza wawaIsarela nikuloñesha kwaNzambi kwamwiwulu. (Ŋal. 4:22-26) Chochimu, tabanaka nitembeli, Ifuku daKubuta Nshidi, kapristu muneni niyuma yikwawu yamuNshimbi yamwinkeluwu Mosi yemeneneñaku “mwevulu wayuma yayiwahi yikwinza.” (Heb. 9:23-25; 10:1) Kudiza wuprofwetu wamuchidiwu kwatuzañaleshaña nikukolesha chikuhwelelu chetu. Komana tunateli kuhosha netu muntu wejima, yuma yamwekeni nichuma chashimunawu muBayibolu yemenañaku muntu hela yuma?

9. Indi nsañu yamuBayibolu yaNaboti adiña nakuyilumbulula ñahi kunyima?

⁹ Muyaaka yakunyima, njila yamuchidiwu diyi yazatishileñawu kakavulu. Chakutalilahu, shinshikenu nsañu yaNaboti afwishiluwu namuloña wakutwamba kuhitila mukafuta kakwatiliyi Mwadi watama Yezebeli kulonda amujahi, hakwila mfumwindi Ahabi atambuli itempa danyivinyu daNaboti. (1 Anya. 21:1-16) Iyi nsañu ayilumbulwili mu 1932 nawu yadiña hiwuprofwetu. Alumbulwili nawu Ahabi niYezebeli adiña nakwimenaku Satana nikuloñesha kwindi; Naboti wemeneneñaku Yesu; kufwa kwaNaboti kwemenañaku chamujahiluwu Yesu. Hela chochu, chimwahitili yaaka ahosheli mumukanda wunakwila nawu “Let Your Name Be Sanctified,” wedishiluwu mu 1961 nawu Naboti wadiña nakwimenaku awayishewa nawa Yezebeli wemenenuku Kristendomu. Dichi chamukabishiluwu Naboti kudi Yezebeli kwemenenuku chakakabishawu awayishewa mumafuku akukumina. Iyi njila yakulumbulwilamu nsañu yamuBayibolu yakolesheli chikuhwelelu chawantu jaNzambi hayaaka yayivulu. Muloñadi yuma chiyinahimpikili?

10. (a) Indi nduñu washinshika nakuzatisha ñahi kashinshi chikupu hakwila alumbululi nsañu yamuBayibolu? (b) Nyikanda yetu makonu yinakuvula kuhosha hanka?

¹⁰ Hayaaka yayivulu yinahitihu Yehova nakwashi ‘nduñu wamaana nikashinshi’ kwikala namaana hama. Ashinshikaña hachuma chikupu hakwila ahoshi nawu nsañu yamuBayibolu yinakwimenaku  wuprofwetu, elaña mwenimu chiña neyi awana Nsona yinakulumbulula chikupu oyu nsañu. Cheñi nawa, yuma yikwawu yadiña nakulumbululawu kunyima hawuprofwetu niyuma yemeneneñaku yayikalilileña amavulu kutiya. Yuma yayivulu yantañishilu yakwila nawu iwu muntu nakwimenaku muntwinyi nawa muloñadi, yakala kuyilumbulula, kuyanuka nikuyizatisha. Sweje-e dinu, neyi tusweja kusha maana hakwiluka muyatalisha nsañu yamuBayibolu, chumichi chikutukañesha kudiza yuma yalema. Dichi, tunawani neyi nyikanda yetu makonu yinashindameni nankashi hakulumbulula chapela, yuma yalema yitwadizaña hachikuhwelelu, kutatakena, kwakama Nzambi niyililu yikwawu yalema yitwadizaña munsañu yamuBayibolu. *

11. (a) Indi nsañu yaNaboti twayiluka ñahi makonu, nawa muloñadi chakutalilahu chindi chichatukwashaña? (b) Muyaaka yamakonu, muloñadi nyikanda yetu chiyabulilaña kutena nsañu yamuBayibolu nawu yemenañaku chuma chalema? (Talenu “Malwihu Kufuma Kudi Antañi” muyinu magazini.)

¹¹ Indi nsañu yaNaboti twayiluka ñahi makonu? Tunayiluki chikupu nawa ayilumbulula mumazu apela. Ona muntu waloña wafwili bayi neyi hamuloña wakwila wemeneneñaku Yesu hela awayishewaku, ilaña amujahili muloña wadiña washinshika. Wakakeleli kuNshimbi jaYehova hela chakwila amukabishili chikupu kudi anyuuli akweti ñovu. (Kuch. 36:7; 1 Anya. 21:3) Chakutalilahu chindi chatukwashaña muloña ninetu anateli kutukabisha neyi chamukabishiluwu. (Tañenu 2 Timotewu 3:12.) Antu ejima anateli kunyakala kuyitiya, kuyanuka nikuzatisha nsañu yamuchidiwu yakoleshaña chikuhwelelu.

12. (a) Tunateli kuhosha netudi hansañu yasonekawu muBayibolu? (b) Muloñadi nduñu wamaana chinakulumbululayi yuma yakunama munjila yapela? (Talenu tumazu twaheshina.)

¹² Komana tunateli kuhosha netu nsañu yamuBayibolu yahosha hohu hayuma yinateli kukwashana nawa mwosi mukwawu muyatalisha? Piñi. Makonu nyikanda yetu  yinakuvula kutañisha nawu nsañu yimu yesekana nansañu yikwawu. Kudi yuma yantesha yinakulumbulula nsañu yayivulu yamuBayibolu nawu yemenañaku chuma chalema chamuwuprofwetu. Chakutalilahu, tunateli kuhosha netu Naboti chatwalekeliyi kwikala washinshika hampinji yamukabishiluwu nikumujaha chatwanukishaña kashinshi kaKristu niawayishewa. Hela chochu, chumichi chatwanukishaña cheñi kashinshi ‘kawanyikoku acheñi’ aMwanta. Chalala Nzambi nakututañisha munjila yapela chikupu. *

13. Yakutalilahwinyi yinakumwekesha nawu tunakulumbulula yishimu yaYesu munjila yapela kutiya?

¹³ Yesu Kristu wadiña Ntañishi muneni hanu hamaseki. Kuzatisha yishimu diyi njila yimu yakeñeliyi kutañishilamu. (Mat. 13:34) Yishimu yazatikaña chiwahi muloña yalumbululaña nsañu yakala munjila yapela yinateli kutukojeja kutoñojoka nawa yinateli kutushika hamuchima. Komana nyikanda yetu yinalumbululi yishimu yaYesu munjila yapela nawa yaswayi kutiya hayaaka yayivulu? Tunateli kuhosha chakadi nikuhita mumbadi netu, eñañi. Twazañaleli chikupu chalumbulwiluwu chiwahi mwatalisha yishimu yaYesu yahosha heluñi, kalubutu kamostadi nikaleñi muKaposhi Kakutalila kaJuly 15, 2008. Tuneluki chikupu netu iyi yishimu yatalisha kuWanta waNzambi nawa yinakwashi antu amavulu kukaana yuma yamukaayi katama nakwikala atumbanji twaKristu.

14. (a) Indi chishimu chakaSamariya wamuwahi twadiña nakuchilumbulula ñahi? (b) Makonu tweluka ñahi chishimu chaYesu?

¹⁴ Chumanyi chitunateli kuhosha hansañu yakunama hela hayishimu yashimwiniyi Yesu? Yikwawu yikweti yuma yemenañaku nawa yikwawu hiwuprofwetu; yikwawu yatudizishaña yuma yalema. Tunateli kwiluka ñahi netu iyi nsañu yikweti yuma yemenañaku hela nehi? Hayaaka yayivulu yinahituhu, ñakwilu anayilumbululi chiwahi chovu-chovu. Chakutalilahu, shinshikenu chitwadiña nakulumbulula chishimu chaYesu chakaSamariya wamuwahi. (Luka 10:30-37) Mu 1924, Kaposhi Kakutalila kahosheli nawu kaSamariya wemeneneñaku Yesu; njila yafuma kuYerusalema nakukunkumukila kuYeriku, yemenenuku chihandilu chawantu chinakutaminaku kufuma tuhu hampinji yakudikaña kwamuEdeni; atupondu adiña munjila emeneneñaku mazanvu awantu niakwakuselujola akweti lwisu; nawa kapristu nikaLevi emeneneñaku Kristendomu. Makonu, nyikanda yetu yazatishaña ichi chishimu kulonda kuyanukisha akwaKristu ejima nawu hitwatela kwikala nachaambuku neyi tunakukwasha antu anakaankili, sweje-e kuspiritu. Komana chumichi hichatuzañaleshañaku hakumona Yehova chatudizishañayi munjila yapela?

15. Yumanyi yitukahanjekahu muchibaaba chinalondeluhu?

¹⁵ Muchibaaba chinalondeluhu, tukushinshika hachishimu chikwawu chaYesu chahosha hadi ambanda ajiki ikumi. (Mat. 25:1-13) Indi Yesu wakeñeleña nindi atumbanji twindi amumafuku akukuminina eluki ñahi ichi chishimu chalema? Komana muntu wejima, chuma ninsañu yamwekeni yashimunawu muchishimu yemenañaku chuma chalema chikamwekana kumbidi? Tahindi watalishili mukwila nindi atumbanji twindi akazatisha yuma yalema kulonda yikayikwashi mumafuku akuminina? Twayenu tumoni.