1, 2. Muloñadi Yesu chashimwininiyi chishimu chantalenta?

 YESU wayilejeli hatooka mudimu wakazatañawu atumbanji twindi awayishewa muchishimu chantalenta. Twatela kwiluka mwatalisha ichi chishimu muloña chakundama kudi akwaKristu alala ejima, chili akweti kuchiñeja kwakuya mwiwulu hela kwakushakama hamaseki.

² Yesu washimwini chishimu chantalenta hakwakula lwihu lwehwiluwu atumbanji twindi kutalisha ‘hachinjikijilu chakwiluka nachu hamba kenzayi, nihamba kakuma nyaka yamakonu.’ (Mat. 24:3) Dichi, ichi chishimu chinakushikijewa makonu nawa hichinjikijilu chinakumwekesha nawu Yesu nakuyuula neyi Mwanta.

3. Yumanyi yitwadizilaña muyishimu yasonekawu mumukanda waMatewu kapetulu 24 ni 25?

³ Chishimu chantalenta chekala hakachi kayishimu yasonekawu mumukanda waMatewu 24:45 nakushika ku 25:46. Yikwawu yisatu yahosha hadi nduñu wamaana nikashinshi, ambanda ajiki ikumi, anyikoku niampembi, niyena yekala hakachi kañakwilu yaYesu yahosha hachinjikijilu chakwinza kwindi. Muyishimu yejima yiwana, Yesu washimwini yililu yikamwekesha chaambu chekala hadi atumbanji twindi alala munanu mafuku akukuminina. Chishimu chanduñu, chawambanda ajiki nichantalenta iyi yishimu yakundama kudi atumbanji twindi  awayishewa. Muchishimu chahosha hadi nduñu washinshika, Yesu wakonkomweneni nindi izanvu danyanya dawawayishewa denkawu mudimu wakudiisha akwetala dindi mumafuku akukuminina datela kwikala namaana nikashinshi. Muchishimu chawambanda ajiki, Yesu washimwini chikupu nindi atumbanji twindi ejima awayishewa atela kudiloñesha nikwikala atona muloña eluka nawu Yesu nakwinza, ilaña hiyeluka ifuku hela mpinjuku. Muchishimu chantalenta, Yesu washimwini nindi awayishewa atela kudikita chikupu hakuzata nyidimu yawu yawakwaKristu. Yesu washimwini chishimu chakukumishaku chahosha hadi anyikoku niampembi nawa wachikunjikili kudi antu akweti kuchiñeja kwakushakama hamaseki. Wakonkomweneni nindi atela kwikala ashinshika nawa atela kukwasha chikupu amana kwaYesu awayishewa achidi hamaseki. * Ichi dinu tushinshikenu hachishimu chantalenta.

4, 5. Indi muntu hela mwanta wemenañakwinyi, nawa ntalenta yadiña yalema ñahi?

⁴ Tañenu Matewu 25:14-30. Nyikanda yetu yalumbulula hampinji yayilehi nawu muntu hela mwanta washimunawu muchishimu hiYesu nawa wayili kwituña dacheñi hampinji yayiliyi mwiwulu muchaaka cha 33 C.E. Muchishimu chasambilili kushimunayi, Yesu washimwini nkeñelu yayililiyi kwituña dacheñi, nindi wayili ‘nakutambula wanta windi.’ (Luka 19:12) Yesu hashikeneni kutambula ñovu yejima yaWanta hampinji yafuntiliyi mwiwuluku. * Ilaña, ‘washakamini kuchikasa chaNzambi chachidiilu; kufumisha henohu hakutalila hamba kabalumunawu akwankunyi nindi kwikala itanda dakunyendu yindi.’—Heb. 10:12, 13.

⁵ Muntu wamuchishimu wadiña nantalenta jitanu najisatu, nawa adiña mali amavulu chikupu munana mafuku. * Henohu kanda ayi kwituña dacheñi, wayanzañeneni anduñu jindi ntalenta nawa wakeñeli nindi azati mudimu wakuselujola hampinji yayiliyi. Kufwana ona muntu, Yesu wadiña nachuma chasweja kulema henohu kanda ayi mwiwulu. Hichumanyi chenichi? Himudimu wazatileñayi muchihandilu chindi chahamaseki.

6, 7. Indi ntalenta yemenañaku chumanyi?

⁶ Yesu walemesheli chikupu mudimu windi wakushimwina nikutañisha. (Tañenu Luka 4:43.) Welukili nindi kuchidi mudimu weneni wakuzata nawa antu amavulu aketeja nsañu yayiwahi. Kafwampi wayilejeli atumbanji twindi nindi: “Talenu, nukuyileja nami, fumbulenu mesu mutali mumaha, chimwatookashana dehi to-o.” (Yow. 4:35-38) Wateneneña antu amavulu akweti nyichima yayiwahi akekala atumbanji twindi. Kufwana ndimi wamuwahi, Yesu hateleleli kushiya maha atookashana dehi adi kwakwihi nakumunaku. Chimwahitili kapinji kantesha kufuma hamusañwiluwu nawa henohu kanda ayi mwiwulu, wayinkeli atumbanji twindi mudimu walema nindi: “Yenu mwakelishi atumbanji.” (Mat. 28:18-20) Dichi Yesu wayinkeli maheta alema, mudimu wakushimwina wawakwaKristu.—2 Kor. 4:7.

⁷ Chumanyi chitunateli kuhosha? Hampinji yayinkeliyi atumbanji twindi mudimu wakwilisha atumbanji, dikwila nawu Yesu wayinkeli “yuma yindi” hela netu ntalenta jindi.  (Mat. 25:14) Munjila yikwawu, ntalenta yemenañaku mudimu wakushimwina nikwilisha atumbanji.

8. Hela chakwila anduñu ejima atambwilili ntalenta jashiyashana, chumanyi chakeñeleñayi mwanta?

⁸ Chishimu chantalenta chamwekeshaña nawu mwanta wamwinkeli nduñu yindi wumu ntalenta jitanu, mukwawu jiyedi, mukwawu niyena amwinkeli yimu hohu. (Mat. 25:15) Hela chakwila anduñu ejima atambwilili ntalenta jashiyashana, ilaña mwanta wakeñeleña nindi ejima azati nañovu hakuzatisha ntalenta jawu, dikwila nawu kuzata hakumina ñovu jawu jejima mumudimu wakushimwina. (Mat. 22:37; Kol. 3:23) Muyaaka nkulakaji yakusambila, kutachika tuhu haPentekosta 33 C.E., atumbanji twaKristu atachikili kuzatisha ntalenta. Mudimu wadikitiluwu hakushimwina nikwilisha atumbanji awusoneka chiwahi mumukanda wamuBayibolu waYililu. *—Yil. 6:7; 12:24; 19:20.

9. (a) Yumanyi yeliluwu anduñu ayedi ashinshika nantalenta, nawa chumichi chamwekeshañadi? (b) Mudimwinyi wazatañawu “anyikoku acheñi”?

⁹ Mumafuku akukuminina, sweje-e kufuma mu 1919 nakutwala kumbidi, anduñu aKristu ashinshika awayishewa adi  hamaseki azataña mudimu wakuselujola nantalenta jaMwanta. Kufwana anduñu ayedi akusambila, amana kwetu niahela awayishewa azataña hakumina ñovu jawu. Hitwatela kuboka kutalisha hadi muntu watambwilili ntalenta jitanu hela watambwilili ntalenta jiyeduku. Munichi chishimu, anduñu ayedi ashililuhu ntalenta jesekana najayinkeliyi mwanta wawu, dikwila nawu ejima wawu adiña ashinshika. Mudimwinyi wazatañawu antu akweti kuchiñeja kwakushakama hamaseki? Azataña mudi walema! Chishimu chaYesu chawanyikoku niampembi chatudizishaña nawu antu akweti kuchiñeja kwakushakama hamaseki ekala nakukooleka kwakukwasha amana kwaKristu awayishewa nakashinshi mumudimu wakushimwina nikutañisha. Munanu mafuku akukuminina akala, awa mazanvu ayedi azatilaña hamu neyi “mukanka wumu” hakudikita mudimu wakwilisha atumbanji.—Yow. 10:16.

10. Chinjikijilwinyi chalema chinakumwekesha kwinza kwaYesu?

¹⁰ Mwanta wakuhweleli nindi akazata nañovu kulonda akelishi atumbanji twindi. Neyi chitwashimuna hakusambila, atumbanji twindi ashinshika amuyaaka nkulakaji yakusambila avulishili maheta indi. Chumanyi chinakumwekena munanu mafuku akukuminina hampinji yinakushikijewa chishimu chantalenta? Ambuña Yesu ashinshika nawa adikita anazati mudimu weneni wakushimwina nikwilisha atumbanji muchihandilu chawantu. Muloña wejima wawu anakuzata nañovu, atumbanji amavulu amaha anakupapatishewa chaaka nichaaka nakwikala akwakushimwina aWanta nawa mudimu wakushimwina nikutañisha hichinjikijilu chalema chinakumwekesha kwinza kwaYesu muñovu yaWanta. Chakadi nikujina, Mwanta wawu nakuzañalala chikupu.

11. Muloñadi chitunateli kuhoshela netu Yesu wakenza nakuhituluka munyikudi yawanduñu jindi hampinji yalukadi lweneni?

¹¹ Yesu wakenza nakuhituluka munyikudi nawanduñu jindi kumakumishilu alukadi lweneni lunakwinza. Tuneluki ñahi? Muwuprofwetu windi wasonekawu mumukanda waMatewu kapetulu 24 ni 25, Yesu wahosheli hakwinza kwindi nakufuntila funtilahu. Hakuhosha hawunsompeshi wampinji yalukadi lweneni, wahosheli nindi antu “akamona Mwana kamuntu wudi nakwinza  hamavu amwiwulu.” Wayikonkomweneni atumbanji twindi amumafuku akukuminina kwikala atona, wahosheli nindi: “Himuneluki ifuku dakenzayi Mwanta wenuku” nawa “mpinji yimukubula kutoñojoka diyi yakenzayi Mwana kamuntu.” (Mat. 24:30, 42, 44) Dichi, Yesu chahosheliyi nindi ‘nkaka yanowu anduñu hakwinza, hakuchinda mali awu,’ chakadi kujina wateneneña mpinji yakenzayi nakujilumuna kaayi katama. *—Mat. 25:19.

12, 13. (a) Indi mwanta wakayila nindidi anduñu jindi ayedi atachi, nawa muloñadi? (b) Indi awayishewa akatambwila chilamiki chawu chamakumishilu mpinjinyi? (Talenu chikasha chinakwila nawu “ Kushimuna Chazatiluwu Hampinji Yakufwa.”) (c) Kukoolekanyi kwakekala nawantu akasompeshawu nawu hiyanyikoku?

¹² Kwesekeja nanichi chishimu, chakenzayi mwanta wakawana anduñu jindi ayedi atachi ashinshika, wenkeliyi ntalenta jitanu niwenkeliyi jiyedi nawa wejima wawu ayedi anashiluhu ntalenta jesekana najayinkeliyi. Mwanta wukayila anduñu jindi ejima ayedi namazu wowamu nindi: “Chachiwahi, wunduñu wamuwahi washinshika; wunashinshiki nayuma yantesha, nukukwinka wanta wayuma yayivulu.” (Mat. 25:21, 23) Chumanyi chikamwekana neyi Mwanta, Yesu enkawu ñovu nenzi nakusompesha antu kumbidi?

¹³ Ana emenañaku anduñu ayedi atachi, dikwila nawu atumbanji twindi awayishewa adikita, haniyi mpinji akekala atambwila dehi chilamiki chawu chamakumishilu henohu lukadi lweneni kanda lutachiki. (Chim. 7:1-3) Henohu Amagedoni kanda yitachiki, Yesu wukayinka wuloku wawu wakuya mwiwulu. Antu akweti kuchiñeja kwakushakama hamaseki akwashaña amana kwaKristu mumudimu wakushimwina, akayisompesha nawu hiyanyikoku nawa akekala nakukooleka kwakushakama hamaseki muchiyuulu chaWanta waNzambi.—Mat. 25:34.

14, 15. Komana Yesu wahosheli nindi amana kwindi amavulu awayishewa akekala atama nawa akatala? Lumbululenu.

¹⁴ Muchishimu, nduñu wakukumishaku wavumbikili ntalenta yindi hamaseki chatela yayi nakuyiselujola hela kuyisha mubanki. Iwu nduñu wamwekesheli yililu yatama muloña welili mumushikila chuma chabulili kukeñayi mwanta windi. Mwanta wamwilili nindi hinduñu ‘watama nawa wakatala.’ Mwanta wamutambwili ntalenta nakwinka mukwawu wadiña nantalenta ikumi. Iwu nduñu watama amunatilili “kumwidima wahanzi.” Diku ‘kwakadililañayi nakudisumona kumaji.’—Mat. 25:24-30; Luka 19:22, 23.

¹⁵ Chineli nduñu yamwanta wamuchisatu wavumbikili ntalenta yindi hamaseki, komana Yesu watalishili mukwila nindi atumbanji twindi amakwawu awayishewa akekala atama nawa akatala? Inehi.  Shinshikenu nsañu yakundama kunichi chishimu. Muchishimu chanduñu wamaana nikashinshi, Yesu wahosheli hadi nduñu watama weteleña akwawu anduñu. Yesu hatalishili mukwila nindi amu hakachi kanduñu wamaana nikashinshi akekala atamaku. Ilaña, wasoñamishileña nduñu washinshika kulonda abuli kwikala nayililu neyi yanduñu watama. Munjila yoyimu, muchishimu chawambanda ajiki ikumi Yesu hatalishili mukwila nindi chibalu chimu chawatumbanji twindi awayishewa akekala neyi ambanda ajiki atanu abula maanaku. Ilaña, wayisoñamishileña amana kwindi akuspiritu kutalisha kuyuma yikayimwekena neyi chakwila abula kutona nawa ekala akadi kudiloñesha. * Munjila yoyimu, muchishimu chantalenta Yesu hahosheleña nindi mukanka weneni wawa mana kwindi awayishewa kumafuku akukuminina akekala anduñu atama nawa akatalaku. Ilaña Yesu wayisoñamishileña atumbanji twindi awayishewa kutwalekahu kuzata nañovu mumudimu ‘wakuselujola’ nantalenta jawu nikubula kwikala nayililu neyi yanduñu watama.—Mat. 25:16.

16. (a) Yumanyi yitwadizilaña kuchishimu chantalenta? (b) Indi chinu chibaaba chinatukwashi ñahi kutiyisha chiwahi chishimu chantalenta? (Talenu chikasha chinakwila nawu “ Kwiluka Mwatalisha Chishimu chaNtalenta.”)

¹⁶ Yumanyi yiyedi yitwadizilaña kuchishimu chantalenta? Chatachi, Mwanta, Kristu wayinka anduñu jindi awayishewa chuma chalemeshayi nankashi, mudimu wakushimwina nikwilisha atumbanji. Chamuchiyedi, Kristu wakeñaña nindi wejima wetu tudikiteña mumudimu wakushimwina. Neyi twadikitaña, tunateli kukuhwelela chikupu netu, Mwanta wukatwinka wuloku hakwikala nachikuhwelelu, kutona nikashinshi.—Mat. 25:21, 23, 34.