Ambuña Nzambi amakwawu ahoshaña munjila yoyimu kutalisha hakuwana muntu wakusumbula hela kusumbuka nindi. Hela chochu, eluka kufumba kwakapostolu Pawulu kwakwila nawu kusumbula hela kusumbuka chiña “mudi Mwanta hohu,” akwaKristu alala ejima atela kulondela iku kufumba. (1 Kor. 7:39) Muloñadi chiyahoshelañawu mazu amuchidiwu?

AkwaKristu ahoshaña mazu amuchidiwu atoñojokaña nawu ahela ajiki diwu anasweji kuvula nankashi kupandakana amana kwetu ajiki. Dichi chichekala nimumatuña amavulu. Shinshikenu yakutalilahu yiyedi: MuKorea, hakachi kawaYinsahu ajiki 100, 57 ahela, 43 amana kwetu. Chileji chamuColombia chashimwini nawu hadi aYinsahu 100, 66 hiyahela, 34 hiyamana kwetu.

Mumatuña amakwawu, anvwali abula kwikala aYinsahu alombaña nsewu yeneni chikupu nawa chumichi chayikalilaña amana kwetu abula mali amavulu kusumbula. Kukala kwamuchidiwu kunateli kumuleñela muhela kutoñojoka nindi hanateli kuwana muntu wakusumbuka nindi ‘mudi Mwantaku.’ Nateli kwihula nindi, “Komana chachiwahi kutoñojoka nami nateli kuwana muntu wamuwahi wakusumbuka nindi hakachi kawakwetu akwaKristu?” *

Neyi chakwila mwatoñojokahu dehi muniyi njila, ilukenu nenu Yehova nakumona kukala kumukweti. Chakadi nikujina, weluka chimwatiyaña nakukala kumwamonaña.—2 Kushi. 6:29, 30.

 Yehova washimuna Mwizu dindi nshimbi yakwila nawu kusumbula hela kusumbuka chiña mudi Mwanta hohu. Muloñadi? Muloña weluka yuma yinateli kuyitisha antu jindi kuwaha. Bayi neyi wakeñaña hohu kukiña ambuñindi kukala kwafumaña mukufuukulahu yuma yatamaku, ilaña wakeñaña nindi ekaleña namuzañalu. Mumafuku aNehemiya, chineli aYudeya amavulu asumbwileña ambanda akumatuña acheñi abulileña kudifukula kudi Yehova, Nehemiya wayesekejeli nachakutalilahu chatama chaSolomoni. Hela chakwila Solomoni “amukeñeli kudi Nzambi yindi, . . . amuvulumwishili kudi ambanda akwacheñi.” (Nehe. 13:23-26) Hakwila nawu ambuñindi ashakami chiwahi, Nzambi watwinka nshimbi yakusumbula hela kusumbuka kudi akwakudifukula alala hohu. (Mas. 19:7-10; Isa. 48:17, 18) AkwaKristu alala amusakililaña Nzambi chayakamenañayi nakukeña nawa ashindamena hanshimbi jindi. Amwiluka nawu diyi Mwanta Wakuleña Kwejima kuhitila mukumwovwahila neyi Nleñi yawu.—Yish. 1:5.

Chakadi nikujina munateli kukaana ‘kudibomba’ namuntu wunateli kuyileñela mufumi kudi Nzambi. (2 Kor. 6:14) AkwaKristu amavulu makonu ovwahilaña nshimbi jaNzambi jazatikaña mpinji yejima nawa atondahu chuma chachiwahi. Ilaña, amakwawu afuukulañahu kubula kuyovwahila.

Maggy, * muhela wakuAustralia, walumbulwili yuma yamwekeni chelili atachiki kudiluka namuntu wabula kwikala chinsahu, nindi: “Najiñileña nankashi kukupompa hamuloña wakukeña kwikala hamu nindi. Wubwambu wami naYehova wazeyeli chikupu.” Ratana wakuIndia watachikili kudiluka namukwawu mukwashikola weyala watachikili kudiza Bayibolu. Ilaña, chimwahitili mpinji chamwekeni hatooka to-o nawu wadizileña kulonda yamwiluki muhela. Muhela wafumini muchalala nakuya mukwitiya kwacheñi kulonda yasumbuki naniwu mukwenzi.

Chakutalilahu chikwawu chaNdenguè wakuCameroon. Wasumbukili nayaaka 19 yakusemuka. Dichi iyala asumbukileñayi nindi wamukaanini nindi wakatwalekahu kupompa muchipompelu chindi. Ilaña chimwahitili nyilungu yiyedi kufuma hadisumbwiluwu, nfumwindi wamukaanishili kuyaña kukupompa kwawakwaKristu. Wahosheli nindi: “Natiyileña wuudi nawa nadilileña. Nelukili chikupu nami chihandilu chami chidi dehi mumakasa amuntu wacheñi. Nadiña nachikela mpinji yejima.”

Kafwampi bayi neyi antu ejima abula kwikala ayinsahu ekala atama nawu akabishaña enikwawuku. Hela chakwila ayikabishili wanyi chimwasumbukili namuntu wabula kwikala chinsahu, hanu dinu wubwambu wenu naTata yenu wamwiwulu wekala ñahi? Mwatiyaña ñahi hakwiluka nenu himwovwahilili kufumba kwindi kwayikwashañayuku? Sweje-e dinu, Yehova watiyaña ñahi nachuma chimwafuukwiluhu?—Yish. 1:33.

Amana kwetu niahela kunyeñumuka mukaayi kejima anateli kwiteja nawu kusumbwila hela kusumbukila “mudi Mwanta hohu” diyi nshimbi yabadika kuwaha. Ajiki afwilaña kumuzañalesha Nzambi neyi akeña kudisumbula namuntu wamuwahi hakachi kawakwakudifukula aYehova. Michiko wakuJapan amukakejeli kudi antaña jindi nawu yasumbuki namuntu wabula kwikala chinsahu. Hampinji yamukakejeleñawu, wamweneña amabwambu jindi amakwawu anakusumbuka nawakwaKristu. Wahosheli nindi: “Natwalekeluhu kutoñojoka nami chineli Yehova ‘hiNzambi wamuzañalu,’ muzañalu wetu hiwashindamena hakusumbuka hela kubula kusumbukaku. Nelukili cheñi nami Nzambi watwinkaña yuma yakeñaña muchima wetu. Dichi neyi tunakukeña kusumbuka ilaña hitunawani muntu wakusumbuka ninduku, chachiwahi kutwalekahu nawujiki hanoyu mpinji.” (1 Tim. 1:11) Nkumininaku, Michiko wasumbukili namana kwetu wamuwahi nawa watiyaña kuwaha muloña wahembeleli.

Amana kwetu amakwawu niwena ahembelelaña hakwila awani muntu watelela kusumbula. Mana kwetu Bill wakuAustralia niyena dichi cheliliyi. Wetejeli nindi hampinji yimu wakomokeleña ambanda akwituña. Hela chochu, hakeñeleña kudikunda nawu chikupuku. Muloñadi? Hakeñeli kutachika wubwambu wunateli kumuleñela ‘yadibombi mumpanda yimu’ nawabula kwitiyaku. Chimwahitili yaaka, wakeñeli ahela antesha, ilaña wena hiyamukeñeluku. Bill wahembeleli nichashikijiliyi yaaka 30 yakusemuka hakwila yawani muhela wadiña nayikonkwanyi neyi yindi. Bill wahosheli nindi: “Hinaditoñeshañaku.” Washimwini nindi: “Nekala wamuzañalu  muloña twayaña nakushimwina hamu, twadizilaña hamu nikudifukula hamu. Natiyaña kuwaha neyi tudimona nikuhanjeka nawamabwambu jañodami muloña hiyakwakudifukula aYehova. Twazatishaña nshimbi yamuBayibolu muwuluwi wetu.”

Yumanyi yimwatela kwila hampinji yimunakumuchiñilila Yehova kulonda yayikwashi? Chuma chimu hikutoñojoka hayuma yinaleñeli mutwalekuhu nawujiki. Neyi mumona nenu muloña waweni wunashindameni hanshimbi yamuBayibolu yakusumbwila hela kusumbukila “mudi Mwanta hohu,” tunayihameki hakulemesha nshimbi yaNzambi. Ilukenu chikupu nenu mwamuzañaleshaña Yehova hakwovwahila nshimbi Jindi. (1 Sam. 15:22; Yish. 27:11) Mwatela kutwalekahu ‘kwichila nyichima yenu’ kudi Nzambi mukulomba. (Mas. 62:8) Mukulombaña chakufuma hamuchima hampinji yimunakumulembelela chakadi kuleka. Wubwambu wenu naNzambi wunateli kukola ifuku nifuku neyi mwimika mushindu hampinji yimunakumona kukala. Ilukenu nenu Mukwakubadika Mwiwulu watiyaña kuwaha nawambuñindi ashinshika ejima, nawa wayilemesha. Wakamenaña yuma yimwakeñaña niyimwafwilaña. Hakanaña muntu wudi wejima kumwinka iyala hela mumbandaku. Dichi neyi munakukeña chikupu muntu wakusumbula hela kusumbuka nindi, Nzambi weluka njila yayiwahi yakumanishilamu mpwila yenu yimukweti.—Mas. 145:16; Mat. 6:32.

Mpinji yikwawu munateli kutiya neyi chatiyili ñimbi yamasamu Davidi, wahosheli nindi: ‘Nyakala wuñakuli, Eyi Yehova; ñovu yami jinakumi dehi. Bayi wunswekela mesu eyuku.’ (Mas. 143:5-7, 10) Hampinji yamuchidiwu, muchiñilili Tata yeyi wamwiwulu kulonda yakumwekesheli chuma chakeñañayi nindi wili. Munateli kwila mwenimu neyi mutañaña Izu dindi mpinji yejima nikutoñojoka chikupu hayuma yimunakutaña. Mukwiluka nshimbi yindi chiyekala nichakwashiliyi antu jindi kunyima. Neyi mumutiyilila Nzambi, chumichi chikuyikwasha kutwalekahu kumwovwahila.

Yumanyi yiwunateli kwila kulonda wutwalekuhu kwikala namuzañalu hampinji yiwuchidi ajiki? Munateli kuzata nañovu kulonda mwikali nawubwambu wawuwahi naYehova, nikwikala nayililu yayiwahi, kuhana, kuzata nañovu, kutiyañana nawakwenu, kwikala ashinshika kudi Yehova, iyi yililu yalema nankashi neyi munakukeña kwikala nawuluwi wawuwahi. (Kutach. 24:16-21; Luti 1:16, 17; 2:6, 7, 11; Yish. 31:10-27) Sambilenu kutwamijaku Wanta kuhitila mukuzata nañovu mumudimu wakushimwina ninyidimu yikwawu yawakwaKristu; neyi mwila mwenimu chikuyikwasha kufuukula mwamaana. Bill, itwatena dehi hakusambila wahosheli kutalisha hayaaka yakeñeleña kusumbulayi nindi: “Yaaka yahitili swayi! Nazatishileña mpinji yami mumudimu waYehova neyi payiniya.”

Eña, kusumbwila hela kusumbukila “mudi Mwanta hohu” kuchidi kwetejewa. Kwovwahila iyi nshimbi kunateli kuyikwasha kumulemesha Yehova nawa mukwikala namuzañalu walala. Bayibolu yahoshaña nawu: “Muntu wamwakamaña Yehova, watiyaña mwalejeliyi kuwaha nankashi, nakooleki. Mwitala dindi mudi maheta, mudi yuma yayivulu; kuloña kwindi kwahaya nyaka.” (Mas. 112:1, 3) Dichi fwilenu kukakela kunshimbi yaNzambi yakusumbwila hela kusumbukila “mudi Mwanta hohu.”