1, 2. (a) Yumanyi yashimwiniyi Yesu kutalisha kumafuku akukuminina? (b) Malwihwinyi itukuhanjekahu?

 FWIKIJENU Yesu nashakami haMpidi yaOliveta nakutala tembeli muYerusalema, hampinji yahosheleñayi hawuprofwetu walema. Petulu, Anderi, Yakoba niYowanu ashiliku kashinshi chikupu nakutiyilila chashimwineñayi Yesu wuprofwetu wakumbidi. Wayilejeli yuma yalema yikamwekana kumafuku akukuminina akanu kaayi katama, mpinji yikatachika kuyuulayi muWanta waNzambi. Wayilejeli nindi muyina mpinji mukamwekanaña yuma yayivulu ‘nduñu yindi wamaana nikashinshi’ wakamwimenañaku hamaseki nakudyisha ambuñindi yakudya yakuspiritu hampinji yatelela.—Mat. 24:45-47.

² Kulondelahu, Yesu washimwini chishimu chawambanda ajiki ikumi muwuprofwetu wowumu. (Tañenu Matewu 25:1-13.) Tushinshikenu hanawa malwihu: (1) Nsañwinyi yalema yekala munichi chishimu? (2) Indi awayishewa azatishaña ñahi kufumba kwekala munichi chishimu, nawa yumanyi yafumañamu?  (3) Tunateli kuhetelamu ñahi muchishimu chaYesu hamuntu hamutu makonu?

3. Muyaaka yakunyima, nyikanda yetu yadiña nakushimuna ñahi chishimu chawambanda ajiki ikumi, nawa chumanyi chamwekeneña?

³ Muchibaaba chinafumuhu twadiza netu hayaaka yayivulu yinahituhu, nduñu washinshika nalumbululi chovu-chovu jiNsona chakubula kusweja kukonkomwena hawuprofwetu, ilaña nakulumbulula hayuma yinateli kutukwasha. Muyaaka yakunyima, nyikanda yetu mpinji yikwawu yadiña nakushimuna yuma yemeneneñaku yuma yejima yamuchishimu chaYesu chawambanda ajiki ikumi, kushilahu manoñu, manji, wanda niyuma yikwawu. Komana chinayi mukwila nawu, chineli twashili maana hakulumbulula yuma yejima, nsañu yayeni yalema nawa yaswayi kutiya yamuchishimu hitwayilumbulwileñaku? Neyi chitukudiza, ñakwilu yalema chikupu.

4. Munichi chishimu, (a) nsumbuli hinyi? (b) ambanda ajiki hiyanyi?

⁴ Tushinshikenu nsañu yalema yahosheliyi Yesu yekala munichi chishimu. Chatachi, shinshikenu hadi antu atenawu munichi chishimu. Nsumbuli ashimunawu munichi chishimu hinyi? Chakadi nikujina, Yesu wadiña nakuditena yomweni. Kafwampi hampinji yikwawu waditeneni yomwenindi nindi diyi nsumbuli. (Luka 5:34, 35) Indi ambanda ajiki hiyanyi? Munichi chishimu Yesu wahosheli nindi ambanda ajiki atela kudiloñesha nakwambula manoñu awu hampinji yikwinzayi nsumbuli. Talenu nshimbi yadifwanaku yenkeliyi Yesu ‘kamukanka kindi kawanyikoku kantesha’ kawatumbanji awayishewa nindi: “Pimpilenu mahinenu, manoñu enu abutukaña. Enu aweni ikalenu neyi antu adi nakutalila mwanta wawu wukufuma kumawija kwayiliyi.” (Luka 12:32, 35, 36) Kubombelahu, kapostolu Pawulu nikapostolu Yowanu ayoneneni kwesekeja atumbanji twaKristu awayishewa nawambanda ajiki ashinshika. (2 Kor. 11:2; Chim. 14:4) Chakadi nikujina, Yesu wakeñeleña nindi chishimu chasonekawu haMatewu 25:1-13 chikali chakufumba nikubabesha nachu atumbanji twindi awayishewa.

5. Indi Yesu washimwini ñahi mpinji yikamwekana yuma yashimwiniyi muchishimu chindi?

⁵ Chamuchiyedi, shinshikenu mpinji yayifumbileñayi Yesu. Indi kufumba kwindi kwateleli kuzatika mpinjinyi? Yesu watulejeli chiwahi chinjikijilu champinji yeniyi kumakumishilu anichi chishimu nindi: ‘Nsumbuli enza nikwinza.’ (Mat. 25:10) Neyi chitwahanjekeli mukaposhi kaJuly 15, kamu 2013, muwuprofwetu waYesu wasonekawu mumukanda waMatewu kapetulu 24 ni 25 atenamu ‘kwinza’ kwindi mapampa katanu nakasatu, nawa azatisha izu dodimu dachiGriki mapampa ejima. Mapampa ejima, Yesu wateneneña mpinji yalukadi lwasweja hakenzayi nakuzata mudimu wakusompesha nikujilumuna akanu kaayi katama. Chakadi nikujina, ichi chishimu chakundama kumafuku akukuminina, ilaña wakenza mpinji yalukadi lwasweja.

6. Nsañwinyi yalema yekala munichi chishimu?

⁶ Nsañwinyi yalema yekala munichi chishimu? Anukenu nsañu yakundama kuniyi nsañu. Yesu wafumini tuhu hakuhosha hadi ‘nduñu yindi wamaana nikashinshi.’ Ona nduñu wekalili kadizanvu kanyanya kawamayala awayishewa akalombolaña hakachi kawatumbanji twaKristu mumafuku akukuminina. Yesu wayisoñamishili awa amayala nindi atela kwikala ashinshika. Mukapetulu kanalondeluhu Yesu wazatishili chishimu chawambanda ajiki ikumi hakufumba atumbanji twindi awayishewa ejima mumafuku akukuminina kulonda ‘atoneña’ hakwila abuli kujimbesha wufwetu wawu walema. (Mat. 25:13) Tushinshikenu ichi chishimu kulonda tumoni awayishewa chazatishañawu iku kufumba.

7, 8. (a) Yililwinyi yiyedi yamwekeshaña nawu ambanda ajiki amaana adiloñesheli? (b) Indi awayishewa amwekeshaña ñahi nawu adiloñesha?

⁷ Chishimu chaYesu chakonkomweneni nawu ambanda amaana adiña adiloñesha hampinji yenjileñayi nsumbuli, ilaña abula maana hiyadiloñesheluku. Muloñadi? Muloña wayililu yiyedi: kudiloñesha nikwikala atona. Awa ambanda ajiki ateleleli kwikala asoñama nakuhembela chikwinzayi nsumbuli nawa manoñu awu ateleli kuyambula nikwikala atona wufuku wejima nakushika nimpinji yayiwahi yakwinzayi nsumbuli. Kwambukaku nawambanda abula maana, ambanda ajiki atanu adiloñesheli chikupu muloña asendeli manji amakwawu muyipunda nimanoñu awu. Komana awayishewa ashinshika niwena adiloñesha chikupu?

⁸ Adiloñesha chikupu! Mumafuku akukuminina ejima, akwaKristu awayishewa azataña neyi ana ambanda ajiki akweti maana, adiloñesha kulonda azati mudimu wawu nakashinshi nakushika nikunsa. Eluka nawu hakwila amuzatili Nzambi atela kudibonda yuma yayivulu yamukaayi kaSatana, ilaña adihanaña kwila mwenimu. Kukeña kwamukeñawu Nzambi niMwanindi diku kwaletesha adihani nakumuzatila Yehova namuchima wumu, bayi neyi hamuloña wakwila kukuma kudi mukamwihuku. Ahemba kashinshi kawu nakubula kudiñija muyililu yamukaayi katama yakufwila maheta, yuma yatama nilwisu lunateli kuyiluwañesha. Ekalaña adiloñesha nakutoñeka neyi manoñu nawa hiyadakamenaña nawu nsumbuli nalabi kwinzaku.—Fwi. 2:15.

9. (a) Indi Yesu wasoñamishili ñahi kutalisha hachaaku chitwekala nachu chakunoñoka? (b) Indi awayishewa elañadi nambila yakwila nawu “Nsumbuli owu”? (Talenu cheñi tumazu twaheshina.)

⁹ Kutona hichililu chamuchiyedi chakwashili ana ajiki kwikala adiloñesha. Komana mukwaKristu wayishewa nateli kukama tulu hampinji yinakuhembelelayi nsumbuli? Eña. Ilukenu nenu Yesu wahosheli nindi chalabiliyi nsumbuli, ambanda ajiki ikumi “hiyakunoñoka wejima wawu, akama nitulu.” Yesu welukili nindi nimuntu wunakukena kuhembelela nateli kuzeya hampinji yinakumuhembelelayi. Awayishewa ashinshika ovwahililili chayisoñamishiliyi nawa azataña nañovu hakwila atwalekuhu kwikala atona. Munichi chishimu, ambanda ajiki wejima wawu ahindukili mukachi kawufuku chatiyiluwu mbila nawu: “Nsumbuli owu!” Ilaña asoñama hohu diwu atatakeneni nakushika nikunsa. (Mat. 25:5, 6; 26:41) Chumanyi chelañawu awayishewa ashinshika makonu? Mumafuku akukuminina ejima, etejaña wunsahu walala wakwila nawu kudi mbila yabidikañawu nawu, “Nsumbuli owu” nawa keña yashiki. Omikaña nakudiloñesha kulonda atalili kwinza kwaNsumbuli. * Hela chochu, tushinshikenu kumakumishilu achishimu chaYesu, chahosha chikupu hampinji yayeni. Munjilanyi?

10. Lwihwinyi lutunateli kwihula kutalisha hampanji yekala kachi kawambanda ajiki amaana nawambanda ajiki abula maana?

¹⁰ Hadaha kwakwihi namakumishilu anichi chishimu diku kwekala nsañu yakuhayamisha chikupu, mpanji yadiña hakachi kawambanda ajiki abula maana nawambanda ajiki amaana. (Tañenu Matewu 25:8, 9.) Muniyi mpanji mwekala lwihu lwakwila nawu: “Munsañu yejima yawantu jaNzambi, mpinjinyi yakaaninuwu ashinshika  kukwasha antu amakwawu ayilombeli?” Hakwakula ilu lwihu twatela kushinshika hakuleha kwampinji yikahitahu. Kwesekeja nakulumbulula kwetu kwakatataka, Yesu diyi Nsumbuli wakenza nakusompesha kwakwihi nakumana kwalukadi lweneni. Komana chamwekana nawu iyi mpanji yinakushimuna hayuma yikamwekana henohu kukuma kwalukadi lweneni kanda kushiki? Dimu, muloña hayina mpinji awayishewa akekala atambwila dehi chilamiki chawu chamakumishilu.

11. (a) Yumanyi yikamwekana henohu lukadi lwasweja kanda lutachiki? (b) Indi ambanda amaana atalishili mudihi chayilejeluwu akwawu abula maana nawu ayi kudi akwakulandisha manji?

¹¹ Dichi, henohu lukadi lweneni kanda lutachiki, awayishewa ashinshika ejima akekala hamaseki akatambwila chilamiki chawu chamakumishilu. (Chim. 7:1-4) Kufuma hayina mpinji nakutwalekahu, akaya mwiwulu. Toñojokenu hayaaka yikahitahu henohu lukadi lweneni kanda lutachiki. Chumanyi chikamwekana kudi awayishewa akakañanya kutwalekahu kwikala atona chakwila ajimbesha nikashinshi kawu? Anateli kujimbesha wufwetu wawu wakuya mwiwulu. Chakadi nikujina, hiyakatambwila chilamiki chamakumishilu henohu lukadi lweneni kanda lutachikuku. Hayina mpinji, ashinshika amakwawu akayiwahisha. Chakatachika lukadi, antu asupa akahayama chakamonawu Babiloni Maneni anamujilumuni. Hampinji yeniyi dihu hakelukawu nawu adiloñeshili wanyi kwinza kwaNsumbuli. Chumanyi chikamwekena neyi alomba nawu ayikwashi hayina mpinji? Muchishimu chaYesu mwekala ñakwilu. Ambanda ajiki amaana akaanini kuhana manji awu kudi akwawu abula maana, ilaña ayilejeli kuya nakulanda kudi alandishaña manji. Anukenu nenu mwadiña “mukachi kawufuku.” Komana ateleli kuwuna alandishaña manji hayina mpinji? Inehi. Hiyadi kuyiwanaku muloña mpinji yadiña yahita dehi.

12. (a) Hampinji yalukadi lweneni, yumanyi yikayimwekena antu adiña awayishewa akañenyi kuhemba kashinshi kawu henohu kanda atambwili chilamiki chawu chamakumishilu? (b) Kukalanyi kukamonawu antu adi neyi ana ambanda ajiki abula maana?

¹² Munjila yoyimu, hampinji yalukadi lweneni awayishewa ashinshika hiyakakwasha antu abula kushinshikaku. Hikwakekala wukwashuku. Muloña mpinji yikekala yahita dehi. Kukalanyi kwakamonawu antu amuchidiwu? Yesu walumbulwili yuma yamwekeni kudi ana ambanda ajiki abula maana ayili nakulanda manji nindi: ‘Nsumbuli wenjili. Ana ambanda ajiki amaana adiñi nakumutalila eñila nimumawija, enzela nichenzelu.’ Chakenzayi Kristu mukulema kwindi kwakwihi nakumana kwalukadi lweneni, wakapompesha awayishewa indi ashinshika ejima nakuyitwala mwiwulu. (Mat. 24:31; 25:10; Yow. 14:1-3; 1 Tesa. 4:17) Chakadi nikujina, antu abula kushinshika akayenzelela hanji, muloña adi neyi ambanda ajika abula maana. Akadila nakwaboka nawu: “Mwanta, Mwanta, twenzulwiluku!” Ilaña wakayakula munjila yoyimu neyi chochakayakulayi antu adi neyi ampembi hampinji yakusompesha nindi: “Nukuyileja chalala nami hinayilukaku.” Yenoyu nsonyi yikatiyawu!—Mat. 7:21-23; 25:11, 12.

13. (a) Muloñadi chitukubula kuhosha netu atumbanji twaKristu awayishewa amavulu akekala abula kushinshika? (b) Muloñadi chitunateli kuhosha netu chishimu chaYesu chamwekeshaña nawu wayikuhwelela aKristu awayishewa? (Talenu mwevulu wakutachikilahu.)

¹³ Kwesekeja nansañu yitunashimuni, tunateli kukunkulula netudi? Komana Yesu wahosheleña nindi atumbanji twindi awayishewa akekala abula kushinshika nawa wakahiñishahu acheñi? Inehi. Anukenu nenu wafumini tuhu hakumusoñamisha ‘nduñu  yindi wamaana nikashinshi’ nindi akabuli kwikala nduñu watama. Hichinayi mukwila nawu yumiyi yikamumwekena nduñu yinduku. Munjila yoyimu, ichi chishimu chikweti nsañu yalema yakusoñamisha. Neyi chochichadiña kudi ambanda ajiki atanu abula maana niatanu amaana, awayishewa ejima akweti wuswa wakutondahu kwikala adiloñesha nikutona hela kwikala ayisupi abula kushinshika. Kapostolu Pawulu amoneneni kuhosha chikuma chochimu hampinji yalejeleñayi akwawu akwaKristu awayishewa. (Tañenu Aheberu 6:4-9; esekejenu Kuhituluka 30:19.) Ilukenu nenu Pawulu wayisoñamishili akwawu chikupu, ilaña wayilejeli cheñi munjila yakukeña nakukuhwelela nindi amana kwindi niahelindi akwaKristu akatambwila ‘yuma yabadika kuwaha.’ Munjila yoyimu, kusoñamisha kwekala munichi chishimu kwamwekeshaña nawu Yesu wakuhweleleli nindi awayishewa akatambwila yuma yayiwahi. Kristu weluka nindi awayishewa indi ejima anateli kutwalekahu kwikala ashinshika nakutambwila wuloku wawuwahi.

14. Muloñadi “anyikoku acheñi’’ chiyanateli kuhetela muchishimu chawambanda ajiki ikumi?

¹⁴ Chineli Yesu walejeleña atumbanji twindi awayishewa chishimu chawambanda ajiki ikumi, komana tunateli kukunkulula netu “anyikoku acheñi’’ aKristu hiyanateli kuhetelamuku? (Yow. 10:16) Kwakulehi chikupu! Ilukenu nenu, muchishimu mwekala nsañu yapela, nawu: ‘Tonenuña.’ Komana iyi nsañu yakundama hohu kudi awayishewa? Yesu wahosheli nindi: ‘Chinukuyilenu, nayili niantu ejima, nami, Tonenuña.’ (Maku 13:37) Yesu wakeñaña nindi atumbanji twindi ejima ekali adiloñesha munyichima kulonda azateña mudimu wawu nakashinshi nawa wejima wawu atela kwikala atona. Dichi akwaKristu ejima alondelaña chakutalilahu chawawayishewa nawa embujolaña chakutalilahu chawu chachiwahi chakutwamijaku mudimu wakushimwina muchihandilu chawu. Wejima wetu twatela kwanuka netu ambanda ajiki abula maana ehwili amaana nawu ayinkuhu manji awu. Kulomba kwawu kwatwanukishaña nawu wejima wetu twatela kutwalekahu kwikala ashinshika kudi Nzambi, adiloñesha nikutwalekahu kwikala atona nawa kwosi muntu wukutwilila yumiyuku. Wejima wetu twakalumbulula kudi Nsompeshi waloña watondawu kudi Yehova. Twatela kudiloñesha. Keña yenzi!

15. Muloñadi nsañu yashimunawu yamaluwi aKristu ninsumbuki yindi chiyazañaleshelaña akwaKristu alala ejima?

¹⁵ AkwaKristu ejima anateli kuhetela munsañu yayeni yekala muchishimu chaYesu. Kafwampi wejima wetu twatiyaña kuwaha hansañu yawuluwi washimunawu. Awayishewa ekekala mwiwulu; hanyima yanjita yaAmagedoni, akekala nsumbuki waKristu. (Chim. 19:7-9) Antu ejima hamaseki akahetelamu muniwu wuluwi wamwiwulu muloña watushiika kuleta nfulumendi yawanina yawantu ejima. Chili tukweti kuchiñeja kwakuya mwiwulu hela kwakushakama hamaseki, tufwilenu kudiza yuma yalema yekala muchishimu chawambanda ajiki ikumi. Twikalenu adiloñesha kuhitila mukuloñesha nyichima yetu, kwikala ashinshika nawa atona kulonda twakadiluñishi yuma yayiwahi yatuhembelayi Yehova kumbidi.