1, 2. Akoñi añinza awana kukalanyi muyipompelu yayivulu?

 NKOÑI wañinza wadiña tuhu kwakwihi nakumanisha kuhanjeka nezanvu dawaeluda. Chayishinshikiliyi hamesu, watiyili muzañalu waweni nanawa atubiña adikita nawa hakachi kawu amakwawu adiña akula dehi neyi atata jindi. Ilaña kudi chuma chalema chamwakamishili, wayihwili nindi, “Amana kwami, chumanyi chimuneli hakwila mudizishi amana kwetu kulonda akameneña nyidimu yamuchipompelu?” Aeluda anukili mazu ahosheliyi nkoñi wañinza hampinji yahempwiliyi cheñi chipompelu, wayilejeli nindi atela kushaku maana hakudizisha antu amakwawu. Nkumininaku, eluda wumu wahosheli nindi, “Kuhosha hohu chalala, kwosi mudimu wutunazati.” Aeluda amakwawu niwena etejeleli.

² Neyi wudi eluda mukwaKristu, nineyi wunateli kuhosha chochimu neyi chahosheluwu awa aeluda? Hekwawu wunateli kuhosha momumu. Kunyeñumuka mukaayi kejima akoñi añinza awana neyi muyipompelu yayivulu mudi kukankila kweneni kutalisha hakudizisha amana kwetu atwansi niakulumpi kulonda  ashikuhu hakuhemba nyikoku. Chumichi chinateli kuleta kukala kweneni. Muloñadi?

3. (a) Indi Nyikanda Yajila yamwekeshaña ñahi kulema kwakudizisha amakwawu, nawa muloñadi wejima wetu chitwatela kushaku muchima? (Talenu tumazu twaheshina.) (b) Aeluda amakwawu chayikalilaña ñahi kuwana mpinji yakudizisha amana kwetu?

³ Chakadi nikujina, neyi mudi akabiña mweluka nenu kudizisha antu amakwawu hichuma chalema. * Mweluka nenu amana kwetu amavulu anakukeñeka kulonda akwashi mudimu wakuhemba yipompelu kwikala yakola kuspiritu nikukwashaku yipompelu yayiha yinakutuñewa. (Tañenu Isaya 60:22.) Mweluka cheñi nenu Izu daNzambi dayikonkomwenaña ‘kudizisha akwenu.’ (Tañenu 2 Timotewu 2:2.) Kufwana aeluda ashimunawu kumatachikilu chinateli kuyikalila kwila mwenimu. Chineli mwakamenaña chisaka chenu, mudimu wakumujimba, nyidimu yamuchipompelu niyuma yikwawu yamwekanaña mukukasumwisha, chinateli kuyikalila kuwana mpinji yakudizisha amakwawu muchipompelu. Chili tudi nanyidimu yayivulu, tuhanjekenu chichalemena kwikala nampinji yakudizisha amakwawu.

4. Chumanyi chaleñelaña aeluda mpinji yikwawu kulabajala hakudizisha amana kwetu?

⁴ Chumanyi chaleñelaña aeluda amakwawu kukañanya kuwana mpinji yakudizisha amakwawu? Hadaha, amakwawu atoñojokaña nawu: ‘Kudizisha amakwawu kwalema, ilaña hikwesekana nanyidimu yikwawu yamuchipompelu yakeñekaña kuzatilahu swayuku. Neyi nibula kunyakashana kudizisha amakwawu, chipompelu chikutwalekahu nakuzatika.’ Hela chakwila nyidimu yikwawu yakeñekaña kuzatilahu swayi-swayi, neyi mulabajala kudizisha amana kwetu mukuzeyesha chipompelu.

5, 6. Chumanyi chitunateli kudizila kuchakutalilahu chañendeshi nimunjila mwawahishilañayi injini yindi, nawa chumichi chinateli kuzatika ñahi kutalisha hakudizisha amakwawu muchipompelu?

⁵ Toñojokenu hanichi chakutalilahu: Ñendeshi weluka nindi hakwila yahembi injini yamotoka yindi chiwahi, watela kutalaña oyelu yamotoka mpinji yejima. Hela chochu, nateli kutoñojoka nindi kusha manji mumotoka dichi chuma chakeñekaña nankashi kubadika kutala oyelu. Kafwampi, neyi kusha manji mumotoka yindi nehi, motoka yinateli kujima. Nateli kutoñojoka nindi ‘neyi hinikweti mpinji yakuhimpa oyeluku, motoka yikutwalekahu kwenda hadi mpinji yantesha.’ Hanu dinu kukalanyi kwafumañamu? Neyi ñendeshi yatwalekahu kushintajala kuwahisha injini yamotoka, ifuku dimu motoka yakafwa chikupu. Neyi chumichi chimwekana, wukukisa mpinji nimali amavulu hakwila yawahishi motoka yindi. Chumanyi chitunakudizilaku?

⁶ Aeluda akweti nyidimu yalema nankashi yakalakalañawu mukunyakashana, ilaña neyi alabajala chipompelu chikuzeya. Kufwana ñendeshi ashimunawu muchakutalilahu watwalekañahu kusha manji mumotoka, aeluda atela ‘kushinshika yuma yabadika kulema.’ (Fwi. 1:10) Hela chochu, aeluda amakwawu ekala nanyidimu chikupu yayileñelaña akañanyeña kuwana mpinji yakudizisha amakwawu, dikwila nawu kuwahishaña injini mpinji yejima. Neyi aeluda alabajala kudizisha amakwawu, mukuhita kwampinji chipompelu hichikwikala nawamana kwetu ashikahuku akuzataña nyidimu yejima yakeñekañaku.

7. Twatela kuyimona ñahi aeluda ekala nampinji yakudizisha amakwawu?

 ⁷ Chakadi nikujina, hitwatela kutoñojoka netu kudizisha amakwawu hichuma chabula kulemaku. Aeluda ekalaña nampinji yakudizisha amana kwetu abula kukuluka yitembi, hiyankoñi akweti maana nawa akwashaña chipompelu chejima. (Tañenu 1 Petulu 4:10.) Indi chipompelu chahetelañamu ñahi?

8. (a) Yumanyi yayileñelaña aeluda kudizisha amakwawu? (b) Mudimwinyi wakunyakashana wazatañawu aeluda azatilaña kudi “kukankila kweneni”? (Talenu chikasha chikwila nawu “ Mudimu Watela Kuzatewa muKunyakashana.”)

⁸ Niaeluda akuluka yitembi atela kwiluka nawu neyi hiyakushinakaja hiyakuzataña nyidimu neyi chazatileñawu muchipompelu mafuku akunyimaku. (Mika 6:8) Atela kwiluka cheñi nawu, ‘mpinji nakululakana chayilulakenu’ kunateli kuhimpa chikupu wuswa wawu wakwakamena nyidimu yamuchipompelu. (Mukwa. 9:11, 12; Yak. 4:13, 14) Hamuloña wakukeña kwakamena nyikoku yaYehova, aeluda akweti kashinshi azatishaña mpinji yawu hakudizisha amana kwetu achidi atwansi yuma yinadizuwu hayaaka yinamuzatiluwu Nzambi nakashinshi.—Tañenu Masamu 71:17, 18.

9. Yumanyi yikamwekana kumbidi yaleñelaña mudimu wakudizisha amakwawu wikali walema?

⁹ Indi aeluda adizishaña amakwawu ekala alema ñahi kudi nyikoku? Akoleshaña mpanda yachipompelu. Munjilanyi? Aeluda azataña nañovu hakudizisha amana kwetu amavulu aleñelaña chipompelu kwikala chakola nikunuñañana chayinu mpinji, sweje-e mumpinji yalukadi lweneni lunakwinza. (Ezek. 38:10-12; Mika 5:5, 6) Aeluda, tunayilembeleli netu shenu maana hakudizisha amakwawu muyuma yashiyashana yamumudimu wenu wakushimwina makonu.

10. Chumanyi chatela kwilawu eluda hakwila ekali nampinji yakudizisha amakwawu?

¹⁰ Kafwampi, tweluka netu mpinji yimwazatishaña hakwakamena nyidimu yikwawu yamuchipompelu yalema, nawa yayileñela mubuli kwikala nampinji. Dichi, mwatela kwambula mpinji yenu kulonda muyizatisheña hakudizisha amakwawu. (Mukwa. 3:1) Neyi mukudizisha amakwawu akayikwashaku nyidimu kumbidi.

11. (a) Njilanyi jajiwahi jashimunawu aeluda akumatuña ashiyashana adizishaña amakwawu? (b) Kwesekeja naYishimu 15:22, muloñadi chichalemena kulondela njila jashimunawu aeluda amakwawu?

¹¹ Katataka, izanvu dawaeluda dakwashili amana kwawu kukulilaku kuspiritu ayihwili njila yazatishañawu hakudizisha amakwawu. * Hela chakwila chihandilu chanawa aeluda chashiyashana, ilaña ashimwini yuma yoyimu. Chumichi chamwekeshañadi? Chamwekeshaña nawu kufumba kwashindamena muBayibolu kwakwashaña antu adizaña ‘ejima muyipompelu yejima’ neyi chochichadiña mumafuku akapostolu Pawulu. (1 Kor. 4:17) Dichi, muchinu chibaaba nichinalondeluhu tukudiza jinjila jazatishañawu awa aeluda. (Yish. 15:22) Hakwila tupeleshi yuma, chinu chibaaba chikutena antu adizishaña akwawu nawu, “antañishi” nawa antu adizaña nawu, “atudizi.”

12. Ntañishi watela kukeña njilanyi, nawa muloñadi?

¹² Ntañishi watela kukeña njila yayiwahi yakwilukilamu muntu wunakudizishayi.  Neyi chochadimañayi ndimi hela kuwahisha iseki henohu kanda yatumbi mbutu, dichi ntañishi niyena watela kuloñesha muchima wamuntu henohu kanda yatachiki kumudizisha yuma yayiha. Indi ntañishi nateli kukeña ñahi njila yayiwahi yakwilukilamu muntu wunakudizishayi? Kuhitila mukulondela njila yoyimu neyi yazatishiliyi kaprofwetu wumu wakunyaka. Hinjila yamuchidinyi yeniyi?

13-15. (a) Mudimwinyi watambwililiyi kaprofwetu Samweli? (b) Samweli wazatili ñahi mudimu windi? (Talenu mwevulu wakutachikilahu.) (c) Muloñadi aeluda makonu chiyatela kushilaku muchima kuniyi nsañu yamuBayibolu yahosha hadi Samweli?

¹³ Yaaka yakubadika 3,000 yinahituhu, Yehova wamulejeli kaprofwetu wakashinakaji Samweli nindi: ‘Kumadiki, hampinji yoyeniyi, nakakutemeshela muntu wakwituña daBenjamini, wakamuwayishi manji ekali nlomboli yawantu ami aIsarela.’ (1 Sam. 9:15, 16) Samweli welukili nindi mudimu windi wawunlomboli wamanini nawa Yehova wamulejeli kuwayisha muntu wakamuswana. Samweli watela watoñojokeli nindi, ‘Nateli kumukwasha ñahi iwu muntu kulonda yazati iwu mudimu?’ Wawanini njila nawa dimu mweliliyi.

¹⁴ Ifuku dalondeleluhu, Samweli wamumweni Sawulu nawa Yehova wamwilili nindi: ‘Talaku iyala inakuleja!’ Kuhiñahu, Samweli wazatilili hayuma yatoñojokeliyi. Wamwilili Sawulu nindi adyili hamu mwitala dakudyila. Wamwinkeli Sawulu nikalama kindi yitwamu yayiwahi nawa ninyisunyi yambiji yayiwahi, nawa wamulejeli nindi: ‘Nonaku wudyi muloña diyi yakwambwilawu kufumisha hinatambikili antu.’ Nkumininaku, kaprofwetu Samweli wamusendeli Sawulu kwitala dindi iku anakuhanjeka. Samweli wazatishili chiwahi kana kapinji kiyadiileñawu yakudya nikuhanjeka hakwenda kulonda yaloñeshi muchima waSawulu. Dichi wamutambikili Sawulu hetala dahewulu. Chikwelili melela Samweli “hakuhanjika naSawulu hewulu detala” kushika nimpinji yakukama. Chikwachili, Samweli wamuwayishili Sawulu, kumupwepujola nikumuleja nshimbi jajivulu. Nkuminaku wamulejeli Sawulu kuya, iku namukwashi dehi nanyidimu yakazatayi.—1 Sam. 9:17-27; 10:1.

¹⁵ Kuwayisha muntu kulonda yekali nlomboli wamunza, hikwesekana nakudizisha mana kwetu kulonda yekali eluda hela nkoñi wakuzatila muchipompeluku. Hela chochu, njila yazatishiliyi Samweli yinateli kuyidizisha aeluda yuma yalema makonu. Tuhanjekenu hanjila jiyedi.

16. (a) Samweli watiyili ñahi chelili aIsarela akeñi mwanta walukanu? (b) Chililwinyi chamwekesheliyi Samweli hakuzata mudimu windi wakumuwayisha Sawulu?

¹⁶ Ikalenu namuchima wakukeña, bayi wakubula kukeñaku. Samweli chatiyiliyi nawu aIsarela anakukeña mwanta walukanu, waneñeli nawa wamweni nindi antu jindi anamukaani. (1 Sam. 8:4-8) Nawa Samweli hakeñeleña kwila chuma chamulejeluwu antu jinduku, chakwila Yehova wamulejeli mapampa kasatu nindi yitiyilili. (1 Sam. 8:7, 9, 22) Hela chochu, Samweli hamuhembeleli nkunyi iwu muntu wamuswaninuku. Yehova chamulejeliyi nindi yamuwayishi Sawulu, iwu kaprofwetu wovwahilili bayi neyi chakumukanjikijaku ilaña namuchima wakukeña.

17. Indi aeluda makonu amwekeshaña ñahi chililu chaSamweli, nawa muzañalwinyi watiyañawu?

¹⁷ Kufwana Samweli, aeluda akuluka yitembi makonu amwekeshaña yililu yayiwahi hakudizisha amakwawu. (1 Pet. 5:2) Aeluda amuchidiwu hiyashintajalaña hakudizisha amakwawu muloña wakuchiina kuyitambula nyidimu yikwetuwu muchipompeluku. Antañishi ekala namuchima  wawuwahi amonaña atudizi nawu hiyakwakudibecha nawuku, ilaña nawu ‘hiyakwawu akwakukalakala hamu nawu,’ nawa alema muchipompelu. (2 Kor. 1:24; Heb. 13:16) Nawa antañishi abula lwisu azañalalaña hakumona atudizi anakuzatisha wuswa wawu hakukwasha chipompelu.—Yil. 20:35.

18, 19. Indi eluda nateli kuloñesha ñahi muchima wakadizi, nawa kwila mwenimu kwalemenadi?

¹⁸ Ikalenu ibwambu, bayi neyi ntañishi hohuku. Ifuku dayiliyi Sawulu kudi kaprofwetu Samweli, wadi kumwichila Sawulu chipunda chamanji kumutu hohu nakumutemesha neyi mwanta wamuha chakadi kumuleja nshimbi jajivulu. Ilaña, Samweli wekalili nampinji yakuloñesha muchima waSawulu chovu-chovu. Hanyima yakudya, kolola nyendu, kuhanjeka hampinji yayilehi nikunooka, dihu hamweniyi kaprofwetu nindi himpinji yayiwahi yakumuwayisha Sawulu.

¹⁹ Munjila yoyimu, ntañishi niyena makonu watela kudizisha amakwawu kuhitila mukuwana mpinji yayiwahi yakunooka nikwikala nawubwambu wawuwahi nakadizi. Njila jikuzatishayi eluda hakwila yekali nawubwambu wamuchidiwu jikushiyashana kwesekeja nachekala chisemwa niiluña dawu. Hichidi namuloña nakumwashakamañaku, ikalenu nampinji yakwikala hamu nakadizi kulonda yeluki nindi ‘mwamulemesha.’ (Tañenu Aroma 12:10.) Chakadi nikujina, atudizi akusakilila chikupu hakukeña kumukuyimwekeshela nichimukuyakamena.

20, 21. (a) Munateli kulumbulula ñahi ntañishi wamuwahi? (b) Yumanyi yitwakahanjekahu muchibaaba chinalondeluhu?

²⁰ Aeluda anukenu nenu: Ntañishi wamuwahi bayi neyi himuntu wakeña kudizisha akwawu hohuku, ilaña wakeñaña muntu wunakudizishayi. (Esekejenu Yowanu 5:20.) Kadizi welukaña nindi ntañishi yami wukweti kukeña nawa yililu yamuchidiwu yikumukwasha kulonda yashuku maana kuyuma yimunakumudizisha. Dichi enu aeluda, hampinji yimunakudizisha ikalenu amabwambu, bayi neyi antañishi hohuku.—Yish. 17:17; Yow. 15:15.

²¹ Hanyima yakuloñesha muchima wakadizi, eluda watela kumuleja yuma yakeñekaña. Njilanyi jatela kuzatishayi eluda? Iji njila twakajihanjeka muchibaaba chinalondeluhu.