1. Muloñadi chitwatela kutwalekahu kukolesha wubwambu wetu naYehova chikupu?

 KOMANA wekala Chinsahu chaYehova wadihana? Neyi dimu, wukweti wuswana walema dikwila nawu wubwambu weyi naNzambi. Hela chochu iwu wubwambu bayi neyi awuzeyeshaña hamuloña wakwila twekala mukaayi kaSatana hohuku, ilaña nikubula kuwanina kwetu etu aweni. AkwaKristu ejima amonaña iku kukala. Dichi dinu, wubwambu wetu naYehova watela kwikala wakola chikupu.

2. (a) Wubwambu hichumanyi? (Talenu tumazu twaheshina.) (b) Tunateli kukolesha ñahi wubwambu wetu naYehova?

² Komana mwekala nawubwambu walala chikupu naYehova? Komana munakukeña kuwukolesha? Mukanda waYakoba 4:8 wayilejaña chimwatela kwila mwenimu nawu: “Kundamenu kwakwihi naNzambi, niyena wukukundama kwakwihi nanenu.” Ilukenu nenu iwu wubwambu wekala hohu wenwenu naYehova. * Chitwaswila  kwakwihi naNzambi, niyena wukuswila kwakwihi nanetu. Chitwasweja kwila mwenimu, wubwambu wetu naYehova niwena wukusweja kukolelaku. Chikufumamu wubwambu wetu wukwikala wakola chikupu. Tukwikala nachikuhwelelu neyi chadiña naYesu, wahosheli nindi: “Yena wantemesheli diyi walala, nawa . . . Ami namwiluka.” (Yow. 7:28, 29) Yumanyi yikwawu yimwatela kwila kulonda muswili kwakwihi naYehova?

3. Munjilanyi mutwahanjekelaña naYehova?

³ Kuhanjeka naYehova mpinji yejima hichuma chalema hakwila muntu yakundami kwakwihi nayena. Munateli kuhanjeka ñahi naNzambi? Mwahanjekaña ñahi nebwambu denu wekala kwakulehi? Chakadi nikujina, mwadisonekelaña nyikanda kakavulu nawa mwahanjekaña hanshiña. Mwahoshaña naYehova kuhitila mukulomba mpinji yejima. (Tañenu Masamu 142:2.) Munjila yikwawu, Yehova wahoshaña nanenu hampinji yimwatañaña Izu dindi dasonekawu nikutoñojokañahu chikupu. (Tañenu Isaya 30:20, 21.) Tushinshikenu iji njila jiyedi jakuhanjekelamu chijakoleshaña mpanda yetu naYehova chakwila wubwambu wetu nayena wekalaña walala chikupu.

4, 5. Indi Yehova wahoshaña ñahi nanenu kuhitila Mwizu dindi dasonekawu? Shimunenu chakutalilahu.

⁴ Chakadi nikujina, mweteja nenu muBayibolu mwekala nsañu yakwashaña antu ejima. Komana Bayibolu yahosha cheñi chimwatela kukundama kwakwihi naYehova? Eñañi. Munjilanyi? Chimukutañaña nikudiza Bayibolu mpinji yejima, shenuku kashinshi kulonda mwiluki yuma yimunakutaña chiyinakuyikwasha nichimunateli kuyizatisha muchihandilu chenu; chimwela mwenimu munakumwiteja Yehova kuhosha nanenu kuhitila Mwizu dindi. Yumiyi yikuyileñela kwikala nawubwambu wawuwahi naNzambi.—Heb. 4:12; Yak. 1:23-25.

⁵ Chakutalilahu, tañenu nikutoñojokahu chikupu hamazu aYesu akwila nawu “bayi mudilumbikilaña maheta hanu hamasekuku.” Neyi mumona nenu mwatwamijañaku Wanta waNzambi muchihandilu chenu, mukwiluka nenu Yehova watiyaña kuwaha nanenu. Munjila yikwawu, neyi mwiluka nenu mwatela kupeleshaku chihandilu chenu nakutwamijaku Wanta waNzambi, dikwila nawu Yehova nayikwashi kwiluka yuma yimwatela kwila hakwila mukundami kwakwihi nayena.—Mat. 6:19, 20.

6, 7. (a) Indi kudizaña Bayibolu, kwatukwashaña ñahikutalisha hakukeña kutwamukeña Yehova nichatukeñayi? (b) Nkeñelwinyi yitwatela kwikala nawu neyi tunakudiza Bayibolu nkawetu?

⁶ Kwekala yuma yikwawu yitwahetelañamu  neyi tudizaña Bayibolu kubadika hakwiluka yuma yitunateli kwila kulonda twikali nawubwambu wawuwahi naYehova. Yatukwashaña cheñi kusweja kukeña nshimbi jaYehova jajiwahi jatuleñelaña kumukeña chikupu. Neyi tukumukeña Nzambi chikupu niyena watukeñaña hama nawa mpanda yetu nayena yakolaña.—Tañenu 1 Akorinda 8:3.

⁷ Hakwila tukundami kwakwihi naYehova, twatela kwikala nayitoñojoka yayiwahi hakudiza Bayibolu. Mukanda waYowanu 17:3 wahosha nawu: ‘Wumi wahaya nyaka woweniwu, wakukwiluka eyi Nzambi walala wumu hohu, niYesu Kristu watemesheli.’ Dichi, nkeñelu yetu hiyatela kwikala yakudiza hohu yumaku, ilaña twatela ‘kumwiluka’ Yehova chachiwahi neyi Muntu.—Tañenu Kwidika 33:13; Mas. 25:4.

8. (a) Munateli kuhoshahu nenudi chamubabesheluwu Mwanta Azariya kudi Yehova neyi chashimunawu ha 2 Anyanta 15:1-5? (b) Indi kumwiluka Yehova chachiwahi kwatukwashaña ñahi kubula kudakamena hayuma yelañayi?

⁸ Neyi tumwiluka Yehova neyi ibwambu detu chikupu, hitunateli kwakamena neyi nsañu yikwawu yamuBayibolu hiyalumbulula muloña waweni weliliyi mwenomuku. Chakutalilahu, munateli kuhoshahu nenudi chamubabesheluwu Mwanta Azariya wamuYudeya kudi Yehova? (2 Anya. 15:1-5) Ilukenu nenu hela chakwila ‘antu atwalekeluhu kuketwila yimuna nikwochela insensi hayinañanaña,’ ilaña Azariya ‘watwalekeluhu kwila chaloña kumesu aYehova.’ Ilaña, “Yehova wamweteli mwanta ekali mukwambumba nikwifuku dafwiliyi.” Muloñadi? Bayibolu hiyashimunaku. Komana chumichi chinateli kutuleñela kwakamena hela kutukojeja kujinoka netu Yehova wamubabesheli Azariya chakadi muloña? Hitunateli kutoñojoka muniyi njilaku neyi twamwiluka Yehova chachiwahi. Chumichi chabombelamu kwiluka netu mpinji yejima Yehova ‘wababeshaña mwawuñaji.’ (Yere. 30:11) Hela chakwila hituneluki muloña waweni wamubabesheleluwu Azariya kudi Yehovaku, twatela kukuhwelela netu wunsompeshi Windi waloña.

9. Nsañwinyi yashimuna yaletesheli Yehova yamweti Azariya nambumba?

⁹ Hela chochu, Bayibolu yatulejaña cheñi nsañu yikwawu yahosha hadi Azariya. Mwanta Azariya ateneneñawu cheñi nawu Mwanta Uziya. (2 Anya. 15:7, 32) Munsañu yadifwana yekala ha 2 Kushindulula 26:3-5, 16-21, twadizaña nawu hela chakwila Uziya welileña yuma yaloña kumesu aYehova, chimwahitili yaaka watachikili “kudivwimba mumuchima windi hakwila nichakudikisañana.” Hamuloña wakudivwimba wakeñeleña kuzata nyidimu yawatupristu yabuliluwu kumwitejawu kuzata. Atupristu 81 amukaanishili kwila chumichi. Chumanyi cheliliyi Uziya? Wamwekesheli chikupu nindi wadiña wadivwimba. Uziya ‘wayizuwilili’ atupristu. Dichi chaletesheli Yehova yamweti nambumba!

10. Muloñadi wutukubulila kukeña netu Yehova yatulumbulwileña yuma yejima yelañayi, nawa tunateli kusweja kukuhwelela ñahi nshimbi jaYehova jaloña?

¹⁰ Tunadiziluku chuma chalema. Chumanyi chitwadi kwila neyi nsañu yikwawu hiyayilumbulwili Mwizu daNzambuku neyi chiyabula kulumbululawu munsañu yikwawu yamuBayibolu? Komana mukufwila kujinoka nenu Nzambi welili chuma chaloña? Indi kwiji mwadi kutoñojoka nenu muBayibolu mwekala nsañu yayivulu yatuleñelaña kukuhwelela netu Yehova welaña yuma yaloña mpinji yejima nawa washaku nshimbi yakwambula nachu yatama nayayiwahi? (Kuhit. 32:4) Neyi tumwiluka Yehova chachiwahi neyi Muntu, kukeña kutwamukeña ninshimbi jindi kukuswejelaku chakwila hitukukeñaña netu nsañu jejima jelañayi ajilumbululuku. Ilukenu chikupu nenu mukusweja kumukeña Nzambi neyi muzata nañovu hakudiza nikutoñojoka chikupu hansañu yayilejañayi Nzambi Mwizu dindi dasonekawu. (Mas. 77:12, 13) Chumichi chikukolesha wubwambu  wenu naYehova, nawa wukwikala walala chikupu.

11-13. Munateli kwiluka ñahi nenu Yehova watiyaña kulomba kwejima? (Talenu mwevulu wakutachikilahu.)

¹¹ Twakundamaña kwakwihi naYehova kuhitila mukulomba. Twamuhamekaña, kumusakilila nikukeña wunlomboli windi. (Mas. 32:8) Hakwila wubwambu wenu naYehova wukoli, mwatela kwiluka nenu watiya kulomba kwawantu ejima.

¹² Antu amakwawu akuhwelela nawu kulomba kwayikwashaña hohu muyitoñojoka. Ahoshaña nawu neyi wutoñojoka neyi kulomba kweyi anakwakuli, wunatoñojoki chikupu, wuneluki kukala kuwukweti nawa wunamoni mwakwilila. Kubombela hayuma yitunateni, munateli kwiluka ñahi nenu kulomba kwenu kwakufuma hamuchima anakutiyi kudi Yehova?

¹³ Toñojokenu chumichi: Kufuma tuhu mpinji yadiñayi mwiwulu, Yesu wamweneña Yehova chakwileñayi kulomba kwawantu Jindi. Kuhiñahu, hampinji yazatileñayi mudimu windi hamaseki, Yesu wazatishileña kulomba neyi njila yakuhanjekelamu naTata yindi wamwiwulu. Neyi welukili nindi Yehova hatiyaña mwalombañawu antuku, komana wadi kulomba wufuku wejima? (Luka 6:12; 22:40-46) Yesu neyi welukili nindi kulomba kwakwashaña hohu muyitoñojoka, komana wadi kuyidizisha atumbanji twindi chakulomba? Chakadi nikujina, Yesu welukili nindi kulomba diku kwatukwashaña kutiyañana naYehova. Hampinji yimu, wahosheli nindi: “Tata nakusakilili chiwunantiyi. Ninami neluka nami eyi wantiyaña mafuku ejima.” Anetu nawa neyi tunateli kukuhwelela netu Yehova “watiyaña mwalombañawu antu.”—Yow. 11:41, 42; Mas. 65:2.

14, 15. (a) Twahetelañamu ñahi neyi tushimuna chikupu yuma yitunakukeña mukulomba? (b) Indi kulomba kwalombeliyi muhela wumu kwamukwashili ñahi kukolesha mpanda yindi naYehova?

¹⁴ Neyi mulombaña chakufuma hamuchima, mukwiluka chikupu nenu Yehova wakulaña kulomba kwenu, hela chakwila hiyakuyakula hanoyu mpinjuku. Neyi kulomba kwenu akwakula chikuyileñela mumwiluki Yehova chikupu. Kubombelahu, chimwasweja kumuleja Yehova yitoñojoka yenu chakufuma hamuchima niyena wukukundama kwakwihi nanenu.

 ¹⁵ Shinshikenu chuma chamweniyi Kathy. * Hela chakwila wadiña nakushimwina mpinji yejima, hadiluñishileña mudimu wakushimwinaku. Walumbulwili nindi: “Hinakeñeli mudimu wakushimwinaku. Hinawukeñeli chikupuku. Chinalekeli kuzata mudimu wami wakumujimba eluda wumu wanlejeli nindi nateli kwikala payiniya wampinji yejima; wanyinkeli nifomu yakusonekeshelahu wupayiniya. Nafuukwiluhu kuzata wupayiniya, nawa natachikili kulomba mafuku ejima nami Yehova yankwashi kulonda nikeñi mudimu wakushimwina.” Komana Yehova wakwili kulomba kwindi? Wahosheli nindi: “Nazati dehi yaaka yisatu muwupayiniya. Chineli nazataña mpinji yeneni mumudimu wakushimwina nikudizila kudi ahela amakwawu, neluki chovu-chovu chakushimwina. Makonu nakeña chikupu mudimu wakushimwina. Sweje-e dinu, ichi wubwambu wami naYehova wunakoleluku chikupu kubadika chiwadiña.” Chakadi nikujina, kulomba kwalombeliyi Kathy kwamukwashili kukolesha wubwambu windi naYehova chikupu.

16, 17. (a) Yumanyi yitwatela kwila kulonda tukoleshi wubwambu wetu naYehova? (b) Kukalanyi kwadimena kutwakahanjekahu muchibaaba chinalondeluhu?

¹⁶ Tunateli kutwalekahu kwikala nawubwambu wakola naYehova haya nyaka. Twatela kufwila kukundama kwakwihi naNzambi neyi tunakukeña netu niyena yakundami kudi etu. Dichi tufwilenu kuhanjeka naNzambi mpinji yejima kuhitila mukutaña Bayibolu nikulomba. Neyi twila mwenimu, wubwambu wetu naYehova wukwikala wakola chikupu nawa chikutukwasha kuumika kweseka.

¹⁷ Hela chakwila tunakulomba mpinji yejima, mpinji yikwawu tunateli kumona kukala. Hampinji yamuchidiwu chikuhwelelu chetu mudi Yehova chinateli kuzeya. Tunateli kutachika kujinoka neyi chakwila Yehova watiyaña kulomba kwetu hela washañaku muchima kulonda twikali nawubwambu nayena. Tunateli kumanisha ñahi kukala kwamuchidiwu nakukuhwelela netu wubwambu wetu naNzambi walala? Twakahanjeka iyi nsañu muchibaaba chinalondeluhu.