1-3. Indi chikuhwelelu chaPawulu mudi Yehova chakoleli ñahi? (Talenu mwevulu wakutachikilahu.)

 AKWAKRISTU ashakamineña muRoma adiña muwubanji. Atumbanji twaKristu ayikabishileña chikupu muloña ayitwambililili nawu ocheli kesi mumusumba mu 64 C.E. nawa adiña ahela antu. Neyi wadiña mukwaKristu muniyi mpinji, hadaha wadi kwikala mukukala kwakukwata nikukabisha. Amana kweyi niahela amakwawu akuspiritu adiña nakuyitabola kudi anyama hela kuyipopela hamutondu nikuyocha amomi kulonda atoñekeña chejeji nawufuku.

² Chakadi nikujina, muniyi mpinji yakala dimu mwamushiluwu Pawulu mukaleya kamuchiyedi muRoma. Komana akwaKristu amakwawu amukwashili? Hakusambila Pawulu watela wadiña nakwakamena nindi amukwashili wanyi, muloña wamusonekeleli Timotewu nindi: “Chinadihakwilili chakusambila, hikwadiñi muntu niwumu wankwashiluku, ejima anshiyili; nalombi nami bayi ayinkelachu muloñaku.” Hela chochu, Pawulu wetejeli nindi adiña nakumukwasha. Wasonekeli nindi: “Ilaña Mwanta wañimenenuku, wankolesheli.” Eña, Mwanta Yesu wamukolesheli  Pawulu. Indi Nzambi wamukwashili ñahi? Wasonekeli nindi: “Ampulwishili mukanwa kamutupa.”—2 Tim. 4:16, 17. *

³ Pawulu wakolesheweli chanukiliyi yuma yamweniyi nawa yamukwashili kukuhwelela nindi Yehova wukumukolesha kuumika makabi amweneñayi yina mpinji niadi kumonayi kumbidi. Kafwampi, watwalekeluhu nakuhosha nindi: “Mwanta wakampulwisha kunyidimu yatama yejima.” (2 Tim. 4:18) Eñañi, Pawulu welukili nindi hela chakwila antu hiyanakumukwashaku, wukwashu wafumaña kudi Yehova niMwanindi walala chikupu.

4, 5. (a) Hinyi watela kuyikwasha mpinji yejima? (b) Munateli kukolesha ñahi wubwambu wenu naYehova?

⁴ Mwamonahu dehi kukala kweneni chakwila mutiya neyi kwosi muntu wakuyikwasha? Hadaha hikubula mudimu, ikakeja dakushikola, kukata hela kukala kukwawu. Hekwawu mwalombeli wukwashu, ilaña akwenu akañenyi muloña hiyayinkeli yuma yimwakeñeleñaku. Kafwampi kukala kukwawu hiyanateli kukumanisha kudi antuku. Neyi mumona kukala kwamuchidiwu, komana munateli kukuhwelela kufumba kwamuBayibolu kwakwila nawu “Mukuhweleli Yehova”? (Yish. 3:5, 6) Komana iku kufumba kwamukunkulwayi? Inehi! Nzambi wakwashanaña chikupu neyi chashimunawu munsañu yayivulu yamuBayibolu.

⁵ Dichi, neyi akwenu antu akañanya kuyikwasha chatela muyihembeli nkunyi, mwatela kumukuhwelela chikupu Yehova kulonda yayikwashi neyi chamukwashiliyi kapostolu Pawulu. Chumichi chinateli kukolesha chikuhwelelu chenu nawa wubwambu wenu naYehova wukwikala walala.

6. Muloñadi chichinateli kuyikalila kumukuhwelela Yehova neyi mudi mukukala?

⁶ Komana munateli kunatila kukala kwenu hadi Yehova kuhitila mukulomba kulonda mwikali nakuwunda nikwiluka nenu muneli chuma chimwatela kwila nawa yena wukuzatilahu? Eñañi! (Tañenu Masamu 62:8; 1 Petulu 5:7.) Neyi munakukeña kwikala nawubwambu wawuwahi naYehova mwatela kwiluka chakumukuhwelela. Ilaña kukuhwelela nenu Yehova nateli kuyikwasha hichuma chakala. Muloñadi? Muloña wumu wakwila nawu, mpinji yejima Yehova hashikenaña dakukwashana hohenohuku.—Mas. 13:1, 2; 74:10; 89:46; 90:13; Hab. 1:2.

7. Muloñadi Yehova chabulilañayi kwakulayi kulomba kwetu hohenohu?

⁷ Muloñadi Yehova chabulilañayi kutwinka hohenohu yuma yejima yitwamulombaña? Anukenu nenu wesekejaña wubwambu wetu nayena nawubwambu wekala hakachi kawanyana natata yawantu. (Mas. 103:13) Mwana hanateli kukuhwelela nindi nvwali wukumwinka chuma chejima chinalombiyi hela kumwinka yoyenoyu mpinjuku. Yuma yikwawu yalombañawu anyana hiyayikeñaku. Amakwawu ahembelelaña kulonda ayinki hampinji yatelela. Ilaña yuma yikwawu yalombaña mwana hiyinateli kumukwasha yena hela akwawuku. Cheñi nawa, neyi nvwali yamwinkaña mwana yuma yejima yikukeñayi hohenohu chumichi chikuleñela wubwambu wawu kuhimpika nakwikala neyi wamwanta nanduñu, mwana wukwikala mwanta. Munjila yoyimu, Yehova nateli kuhitishahu mpinji henohu kanda yatwinki yuma yitwamulombaña. Iyi diyi ñovu yikwetiyi Nleñi yetu wukweti maana, Mwanta wakukeña nawa Tata yetu wamwiwulu. Neyi atwinka yuma yitwakeñaña hohenohu, wulunda  wetu naNzambi wukuluwankana.—Esekejenu Isaya 29:16; 45:9.

8. Yehova watukana chumanyi kwesekeja nahakumina ñovu jetu?

⁸ Muloña wukwawu wudi wakwila nawu Yehova weluka hakumina ñovu jetu. (Mas. 103:14) Dichi, hakeñaña nindi tuumikeña nañovu jetuku, ilaña watukwashaña neyi tata yawantu. Kafwampi, mpinji yikwawu tunateli kutoñojoka netu hitukutwesha kuumikaku. Ilaña Yehova watukana nindi haketeja ambuñindi kuyeseka chakubadika ñovu jawuku. Eña, “wukubuzilaku njila.” (Tañenu 1 Akorinda 10:13.) Dichi, tukweti muloña watuleñelaña kukuhwelela netu yuma yamonañayi Yehova nindi tunateli kuumika yaloña.

9. Chumanyi chitwatela kwila neyi tulomba wukwashu ilaña kutwakula hohenohu nehi?

⁹ Neyi tulomba netu atukwashi ilaña hanatwakuli hanoyu mpinjuku, twatela kumuchiñilila Muntu weluka mpinji yakutukwasha. Anukenu nenu niyena wadiwunjika nawa wafwilaña kutukwasha. “Chakachiñililayi Yehova, kulonda akayitiyili luwi; dichi chakaditwalilayi kwiwulu, kulonda akayitiyili wushona; muloña Yehova hiNzambi wawuñaji; antu ejima akumuchiñilila yena anakooleki.”—Isa. 30:18.

10-12. (a) Indi yuma yinateli kumukalila ñahi mukwaKristu wunakuhemba ntaña yindi wunakuyekela nayikatu? (b) Indi kumukuhwelela Yehova hampinji yimudi mukukala kunateli kuleñela wubwambu wamuntu naNzambi kwikala ñahi? Hanenu chakutalilahu.

¹⁰ Neyi mudi mukukala kwakweni, munateli kutiya neyi chatiyiliyi Pawulu watiyili neyi kwiji wudi kwakwihi ‘nakanwa kamutupa.’ Hampinji yamuchidiwu chalema nankashi kumukuhwelela Yehova. Chakutalilahu, twili netu munakuhemba ntaña yenu wunakuyekela nayikatu. Hadaha munalombi nenu Nzambi yayinki maana niñovu. * Neyi mwila yuma yejima yimwatela kwila kwesekeja nakukala kumukweti, komana himunateli kwikala nakuwunda neyi mwiluka nenu mesu aYehova adi hadenu nawa wukuyikwasha kulonda muumikuku?—Mas. 32:8.

¹¹ Kudi yuma yinateli kuyileñela kumona neyi Yehova nakuyikwasha wanyi. Andotolu anateli kuyileja nsañu jashiyashana. Hamwaha antaña jenu imwakuhwelela nenu akuyikundeja anateli kuleñela yuma yiyikalili. Twalekenuhu kulomba kudi Yehova kulonda yayikoleshi. Twalekenuhu kukundama kwakwihi nayena. (Tañenu 1 Samweli 30:3, 6.) Neyi ayikwasha, wubwambu wenu naNzambi wukukola.

¹² Linda * welukili nindi chumichi chalala chelili yakwashi anvwali jindi hayaaka yayivulu henohu kanda afwi. “Hampinji yitwadiña muniku kukala, ami, nfumwami nimana kwami kakavulu chatukalilileña kwiluka mwakwilila. Mpinji yikwawu hitwadiña nañovuku. Hela chochu, neyi twanuka yuma yitwamweni, twelukaña chikupu netu Yehova watukwashili. Watukolesheleña nawa watwinkeleña yuma yitwakeñeleña nihampinji yitwabulileña kwiluka mwakwilila.”

13. Indi kumukuhwelela Yehova kwamukwashili ñahi muhela wumu kuumika kukala kwakuvulu kwamweniyi?

¹³ Kumukuhwelela Yehova chikupu kunateli kutukwasha cheñi neyi tunamoni kukala. Hampinji yakeñeleñayi nfumwa Rhonda wabula kwikala Chinsahu nindi adiseñi, mana kwaRhonda wadiña nachikatu chafwana chakwataña kwikowa nimumanuñi. Chimwahitili tukweji twantesha, ñoda mana kwindi wafwili. Chelili chineñi chatiyili  Rhonda hayuma yamweniyi hichikumana, watachikili wupayiniya wampinji yejima. Chimwahitili kapinji kantesha mama yindi wafwili. Chumanyi chamukwashili Rhonda kuumika? Walumbulwili nindi: “Nahanjekeleña naYehova mafuku ejima nimutuyuma twanyanya. Kwila mwenimu kwankwashili kumukuhwelela Yehova. Nadizili kumushindamena Nzambi kubadika kudishindamena ami aweni hela antu amakwawu. Nawa wankwashili chikupu, nakuñakamena muyuma yejima yinakeñeleña. Chafuminumu, twazataña hamu naYehova.”

14. Chumanyi chinateli kukuhwelelayi muntu wukweti ntaña yindi anahañuwu muchipompelu?

¹⁴ Shinshikenu chuma chikwawu. Twili netu ntaña yenu imwakeña anamuhañi muchipompelu. Mweluka dehi chakushakama namuntu ahañawu kuhitila muyuma yimwadizaña muBayibolu. (1 Kor. 5:11; 2 Yow. 10) Ilaña kulemesha mwanafuukuluwu kutalisha hakuhaña muntu muchipompelu hichuma chakala hama, nawa mpinji yikwawu himukutwesha kwovwahilaku. * Komana munateli kukuhwelela nenu Tata yenu wamwiwulu nateli kuyinka ñovu yimunakukeña kulonda mwovwahili nshimbi yamuBayibolu yahosha hakuhaña muntu muchipompelu? Komana mukumona chumichi nenu hinjila yimwatela kukoleshelamu wubwambu wenu naYehova kuhitala mukukundama kwakwihi nindi?

15. Muloñadi Adama chadikañililiyi nanshimbi yaYehova muEdeni?

¹⁵ Kutalisha haniyi nsañu, toñojokenu nsañu yamuntu watachi, Adama. Komana wakuhweleleli chikupu nindi neyi yadikaña  naYehova nateli kutwalekahu nakuhanda? Inehi, muloña Bayibolu yatulejaña nawu Adama ‘hiyamudimbiluku.’ (1 Tim. 2:14) Hanu dinu, muloñadi chadikañililiyi? Adama wadyili mukambu wamwinkeliyi Evu muloña wamukeñeli ñodindi kubadika Yehova. Watiyilili mwizu dañodindi chatela atiyilili mwizu daNzambi yindi, Yehova.—Kutach. 3:6, 17.

16. Hinyi yitwatela kukeña chikupu, nawa muloñadi?

¹⁶ Komana chumichi chaya mukwila nawu hitwatela kukeña chikupu antaña jetuku? Inehi! Ilaña twatela kumukeña Yehova chikupu. (Tañenu Matewu 22:37, 38.) Neyi twamukeña Yehova nankashi tunateli kukwasha antaña jetu chiwahi, chili anakumukalakela Yehova hela nehi. Dichi twalekenuhu kumukeña Yehova chikupu nikumukuhwelela. Neyi chuma cheliliyi ntaña yenu ahañawu muchipompelu chayineñesheli nankashi, mulejenu Yehova yuma yejima yimunakukeña mukulomba. * (Rom. 12:12; Fwi. 4:6, 7) Zatishenu iyi nsañu yinayineñeshi kulonda mukoleshi wubwambu wenu naYehova. Chumichi chikuyikwasha kumukuhwelela Yehova nenu mwakafuma yuma yayiwahi.

17. Neyi tudikitaña mumudimu wakushimwina Wanta, tukumwekesha ñahi netu twamukuhwelela Yehova?

¹⁷ Muloñadi Yehova chamupulwishililiyi Pawulu “mukanwa kamutupa”? Washimwini nindi: ‘Kulonda nsañu asweji kuyishimwina kuhitila mudami, aJentili ejima atiyi.’ (2 Tim. 4:17) Kufwana Pawulu, twadikitaña chikupu mumudimu wakushimwina, twakuhwelela netu Yehova ‘wakatushilaku’ yuma yikwawu yejima yitwakeñaña. (Mat. 6:33) Hakwikala akwakushimwina aWanta, ‘atukunjika mudimu wakushimwina nsañu yayiwahi,’ nawa Yehova watumonaña nindi ‘tuyakwakukalakala hamu’ nindi. (1 Tesa. 2:4; 1 Kor. 3:9) Neyi tutwalekahu kuzata mudimu waNzambi neyena, chikatupelela kuhembelela mpinji yakatukwashawu.

18. Munjilanyi mutunateli kumukuhwelela Yehova nikukolesha wubwambu wetu nayena?

¹⁸ Tuzatishenu iyi mpinji yamakonu kulonda tukoleshi wubwambu wetu naNzambi. Neyi kudi nsañu yitunakwakama, tukuyizatisha kulonda tukundami kwakwihi naYehova. Eñañi, tumukuhwelelenu Yehova netu nateli kutukwasha mukukala kutwamonaña makonu nikutukamona kumbidi kuhitila mudiza chikupu Izu daNzambi, kulomba mpinji yejima nikudikita munyidimu yaNzambi.