NAVWALIKILI muMarch 1930, antaña jami niamabwambu jawu adiña nakumukalakela Yehova nakashinshi. Navwalikilili hamukala waNamkumba kwakwihi namusumba waLilongwe, mwituña datenañawu makonu nawu Malawi. Mu 1942, nadihanini kudi Nzambi nawa napapatisheweli mukaloña kakawahi. Hayaaka 70 yalondeleluhu, nafwilileña kwila chuma chamukonkomwenenuwu Timotewu kudi Pawulu nindi ‘shimunaku mazu mumpinji yayiwahi nimumpinji yakala.’—2 Tim. 4:2.

Lwendu lwatachi lwayiluwu aNathan H. Knorr naMilton G. Henschel kuMalawi kumatachikilu achaaka cha 1948 lwasañumwini mpwila yami yakumuzatila Yehova mumudimu wampinji yejima. Nanukaña chatukolesheluwu kudi añimenu awaYinsahu jaYehova akukasanji keneni kamukaayi kejima muBrooklyn, New York. Antu akushika ku 6,000 emeni mwiluña mwadiña malowa kulonda atiyilili nakanañachima kumpanji yakukolesha yahaniniyi Mana Kwetu Knorr yadiña namutu wakwila nawu “Permanent Governor of All Nations,” (Mwanta Wahaya Nyaka waNyunza Yejima).

Chinamuwanini muhela Lidasi wamuwahi wakulishiliwu muchisaka chawaYinsahu jaYehova neyi ami, nelukili nami niyena wadiña nachikonkwanyi chakuzata mudimu wampinji yejima. Twadisumbwili mu 1950 nawa mu 1953 twadiña nawanyana ayedi. Hela chakwila twadiña namudimu wukwawu wakukulisha anyana, twafuukwiluhu netu nitachiki wupayiniya wampinji yejima. Chimwahitili yaaka yiyedi, anlejeli kuzata wapayiniya wadimena.

Chimwahitili mafuku antesha, anyinkeli kukooleka kwakwendela yipompelu neyi nkoñi wañinza. Chineli Lidasi wankwashileña chiwahi, nadiña nakwakamena chisaka chetu muyuma yakumujimba niyakuspiritu hampinji yinazatileña iwu mudimu. * Ilaña wejima wetu twafwilileña kukalakala mudimu wampinji yejima. Chelili tutanjiki yuma chiwahi nikutiyañana chiwahi nawanyanetu, Lidasi watachikili mudimu wampinji yejima mu 1960.

Twadiluñishili muyina mpinji yayiwahi hakukalakela amana kwetu niahela muyipompelu yashiyashana. Twazatilileña kufuma kunyikunkumuki yayiwahi yaMpidi jaMulanje nakushika kukabeta kachidiilu kachikumu cheJiya daMalawi, dasenda kwakwihi neluña dejima dakumusela waMalawi. Twamweni chavulileña akwakushimwina niyipompelu mujiñinza mutwazatilileña.

Mu 1962 twadiluñishili Kupompa kwaNkambi kwadiña namutu nawu “Courageous Ministers.” (Akwakushimwina Ahamuka) Chinatoñojoka haniji  jiprogiramu jadimena, namonaña nami jatukwashili kudiloñesha nikutukolesha mumpinji yakala yadiña kwakwihi nakwinza. Chaaka chahiñiluhu Mana Kwetu Henschel wendeleli cheñi ituña daMalawi nawa twapompeli kupompa kwadimena kwadiña hanji yamusumba waBlantyre kwapompeli antu akushika ku 10,000. Kupompa kweniku kwatukolesheli kuumika kweseka kwadiña kwakwihi nakwinza.

Mu 1964 aYinsahu ayikabishili chikupu muloña akaanini kudiñija munsañu yajipolitiki. Matala aWanta akubadika 100 nimatala awaYinsahu akubadika 1,000 ayikisañeni hampinji yayikabishileñawu. Hela chochu, twatwalekeluhu kuzata mudimu wakwenda kushika nimpinji yalekesheli nfulumendi yaMalawi mudimu wawaYinsahu mu 1967. Kasanji kamutayi kadiña muBlantyre akitambwili, amishonali ayihañili nawa aYinsahu amavulu amuMalawi kushilahu ami niLidasi atushili mukaleya. Chatufumishiluwu mukaleya, twatwalekeluhu kwendela yipompelu mukuswamujoka.

Ifuku dimu mukakweji kaOctober 1972, antu akushika kunkulakaji yimu amwizanvu dapolitiki dateneneñawu nawu Malawi Youth League enjili kwitala detu. Ilaña wumu hakachi kawu wenjili lufuchi nakunleja nindi niswami muloña akeñela kunjaha. Namulejeli ñodami nianyanami nami aswami kumakondi adiña kukamwihi. Kufumahu natemukili nakukandama kumutondu weneni wambuma. Henohu nidi kumutondu namweneña chakisañeneñawu itala detu niyuma yetu yejima.

Chelili asweji kutukabisha muMalawi, etu amavulu twatemukilumu. Chisaka chetu chashakamineña muchilombu chawamatunduka kumujika waMozambique kushika nimuJune 1974. Hayina mpinji, ami niLidasi atulejeli kuzata neyi apayiniya adimena muDómue, Mozambique, kwakwihi nañinza yaMalawi. Twatwalekeluhu kuzata iwu mudimu kushika nimu 1975, chaaka chakuulikili ituña daMozambique kuchiyuulu chawaPortugal. Dichi, atukakejeli hamu nawakwetu aYinsahu kufunta muMalawi mwadiña antu atukabishileña.

Chitwafuntili kuMalawi, anyikeli mudimu wakwendela yipompelu yamumusumba weneni muLilongwe. Hela chakwila atukabishileña nawa yuma yadiña yakala, yipompelu yavulili mujiñinza mutwazatilileña.

Hampinji yimu, twashikili mumukala mwapompeleluwu akapolitiki. Antu amakwawu elukili nawu tudi aYinsahu jaYehova nawa atushakamishili hamu nezanvu dawakwapolitiki dateneneñawu nawu Malawi Young Pioneers. Twalombeli chakufuma hamuchima kudi Yehova netu yatukwashi nikutulombola muniku kukala. Chamanini kupompa, atachikili kutweta. Kashinakaji wumu wamumbanda wenjili lufuchi nakubilela nindi: “Mwani, yilekenu! Iwu iyala himwana kamana kwami. Mulekenu yatwalekuhu nalwendu lwindi!” Mukulumpi  wawu wahosheli nindi: “Yilekenu adiyili!” Tuneluki wanyi yuma yatoñojokeleñayi ona mumbanda muloña hadiña ntaña yetuku. Twelukili netu Yehova nakuli kulomba kwetu.

Mu 1981 twadiwanini cheñi nezanvu dawaMalawi Young Pioneers. Atutambwili makinga etu, yiteli, makatani anyikanda nimafayilo amuñinza. Twatemukililili kwitala daeluda wumu. Twalombeli cheñi kudi Nzambi kulonda atukwashi. Twakameneni hansañu yejima yadiña mumafayilo yatutambwiluwu. Chelili aYoung Pioneers atali mumafayilo, amweni nyikanda yejima yansonekeleleñawu kufuma muMalawi mwejima. Chumichi chayitiyishili woma muloña atoñojokeli nawu nadiña wamunfulumendi. Dichi afuntishili yuma yejima kudi eluda wamunidi iluña neyi chayiwaninuwu.

Ifuku dikwawu twadiña nakuzambuka kaloña muwatu. Mwini watu wadiña cheyamani wezanvu dapolitiki munodu iluña, dichi wafuukwiluhu kutala antu ejima akandamini muwatu neyi adi namakaadi apolitiki. Chelili nindi ashiki hadi etu, wamweni ikombi akeñeleñawu kudi akapokola. Chumichi chaleteli ipumba, nawa chaletesheli kuleka kukeña makaadi apolitiki. Twamweni cheñi netu Yehova watukwashili haniyi mpinji.

MuFebruary 1984, nadiña halwendu lwami lwakuya kuLilongwe kulonda nakahani lipoti kudi muntu wadi kuyitwala kukasanji kamutayi muZambia. Kapokola wumu wañimikili nawa wapikitili mwipakumu dami. Wawaninumu nyikanda yashindamena haBayibolu, dichi wantwalili kukapokola nawa watachikili kuñeta. Kufumahu wankasili munyonji nakuñusha mukapeka mwadiña atuyili akwatiluwu nayuma yakwiya.

Ifuku dahiñiluhu, mukulumpi wawakapokola wantwalili mukapeka kakwawu mwasonekeliyi nsañu yahosheleña nawu: “Ami, Trophim R. Nsomba, naleki kwikala Chinsahu chaYehova kulonda añumbuku.” Nakwili nami: “Nadiloñeshi kunkasa hohuku, neteji hela tuhu kufwa. Nichidi Chinsahu chaYehova.” Nakaanini kufwachika. Chumichi chamuhilishili mukulumpi wawakapokola nawa weteli nkonyi nañovu hamesa chakwila kapokola wadiña mukapeka kakwawu wenjili lufuchi nakutala chuma chamwekeni. Mukulumpi wawakapokola wamulejeli nindi: “Iwu muntu nakukaana kufwachika nindi naleki dehi kwikala chinsahu. Dichi muleki yafwachiki nindi hiChinsahu chaYehova nawa tukamutwala kuLilongwe kulonda amukasi.” Mpinji yejimiyi ñodami helukili yuma yinadiña nakumonaku. Chimwahitili mafuku awana amana kwetu amulejeli kunadiña.

Anhembeli chiwahi kukapokola kakuLilongwe. Mukulumpi wawakapokola wahosheli nindi: “Tambulaku cheña chalosu muloña anakukasili kukoola Izu daNzambi. Antu amakwawu adi munu hiyamakombi.” Kuhiñahu wantwalili kuKaleya kaKachere, kwanhembeluwu tukweji tutanu.

Kapokola wahembeleña atuyili watiyili kuwaha chinashikili; wakeñeleña nindi nikali “pasita” wamukaleya. Wamulekesheli pasita wadiñamu nakumuleja  nindi: “Hinnakukeña nami wutañisheña Izu daNzambi cheñuku, akumbilili mukaleya muloña weyili muchechi yenu!” Dichi anyinkeli mudimu wakutañisha Bayibolu mulungu nimulungu hakupompa kwaloñesheleluwu atuyili.

Chimwahitili mpinji, yuma yatamini chikupu. Akulumpi atalaña tuleya añihwili kulonda eluki kuvula kwawaYinsahu adiña muMalawi. Chinabulili kuyakula kwesekeja nachakeñeleñawu, añeteli chakwila nihwidila nikuhwidila. Hampinji yikwawu, akeñeleña kwiluka kwekala kasanji ketu keneni. Nayilejeli nami, “Ohu hantesha nikuyileja.” Atupokola atiyili kuwaha nawa anoneli jitepu jawu nawu akwati mazu. Nayilumbulwili nami kasanji keneni kawaYinsahu jaYehova akilumbulula muBayibolu. Ahayamini chikupu nawa añihwili nawu, “Akisoneka hadi muBayibolu?”

Nayakwili nami “hamukanda waIsaya 43:12.” Atañili iwu mukanda nakanañachima: “‘Dichi Yehova nindi, Yenu ayinsahu jami akunshimuna nenu,’ ‘yami Nzambi.’” Atañili iyi nsañu mapapa kasatu. Dichi ehwili cheñi nawu: “Indi kasanji kawaYinsahu jaYehova kanateli kwikala ñahi muBayibolu chatela kekali kuAmerica?” Nayilejeli nami: “Ayinsahu jaYehova niwena kuAmerica anakutaña iyi nsona yinakulumbulula kwekala kasanji kawu keneni.” Chineli hinayilejeli yuma yakeñeleñawuku, antuntulwili nakuntwala kuKaleya kaDzaleka, kuchimunswa chaLilongwe.

Mu July 1984, nadimbombeli nawaYinsahu akushika ku 81 adiña Mukaleya kaDzaleka. Mwadiña atuyili akushika ku 300 akamineña hamu hamaseki. Etu aYinsahu twatachikili kudambula chovu-chovu mumazanvu anyanya kulonda tuhanjekeña nsona mafuku ejima, nsona yeniyi adiña nakuyishimuna kudi akwetu nawu tuhanjekeñahu. Chumichi chatukolesheli chikupu.

Kufumahu kapokola wahembeleña atuyili watwambwili nawatuyili amakwawu. Nhembi watulejeli mukuswamujoka nindi: “Nfulumendi hiyinayiheluku. Tunayihembeli mukaleya hamuloña wayuma yiyedi: Nfulumendi yachiinaña nawu akamba kayijaha kudi aYoung Pioneers, nawa nawu muloña mwashimwinaña hanjita yakenza, nfulumendi yatiyaña woma nawu amashidika awu akatemuka haniyi njita.”

Mu October 1984, wejima wetu atutwalili kuchota chanyiloña. Wejima wetu atukasili yaaka yiyedi. Neyi dikalu, atushili mukaleya hamu nawantu abula kwikala aYinsahu. Ilaña Kapokola wahembeleña atuyili wabidikili kudi ejima nindi: “A Yinsahu jaYehova anwaña makanya wanyi. Dichi enu anhembi, bayi muyikabishaña nenu ayinki makanya nawa bayi muyitumaña nenu ayileteli ikala dakesi dakwambula nachu makanyaku. Hiyantu jaNzambi! A Yinsahu jaYehova ejima atela kuyinka yakudya kayedi hefuku muloña kwosi nyiloña yakoñeluwuku, ilaña ayikasili kukola yuma yakuhwelelawu muBayibolu.”

 Twahetelelumu munjila jikwawu muloña wakwikala nayililu yayiwahi. Neyi kuneyili dehi hela neyi nvula yinakunoka, atuyili hiyayitejeli kwendujolaku. Ilañetu atwitejeli kwidika nakuya kwejima kutwakeñeleña. Elukili nawu hitunateli kutemukaku. Kafwampi, ifuku dimu nhembi watutalileña hampinji yitwazatileña mwiha wakatili nawa twamusendeli nakumutwala muchilombu chakaleya kulonda amuuki. Akulumpi jatuleya elukili nawu atela kutukuhwelela. Chelili twatwalekeluhu kwikala nayililu yayiwahi, twatiyili kuwaha hakumona ijina daYehova dinakulemeshewa mutunwa twawantu atukwatili.—1 Pet. 2:12. *

Hefuku daMay 11, 1985, anfumishili Mukaleya kaDzaleka. Wenowu muzañalu wunatiyili hakuhumañana cheñi nachisaka chami! Twamusakililili Yehova hakutukwasha kulonda tuhembi kashinshi ketu hampinji yakala. Hampinji yitwadiña muniku kukala, twatiyili neyi kapostolu Pawulu wasonekeli nindi: ‘Enu ana kwetu, hitunakeñenu kuyamba nsañu yalukaduku . . . Hitwelukili netu tukuhanda nawaku. Eñañi, etu aweni twatiyili mumuchima wetu kafwampi neyi anatuhishi namuloña wakufwa hohu, kulonda tubuli kudikuhwelela etu aweni, tukuhweleli Nzambi wasañulaña afu. Diyi watupulwishili mukufwa oku kwasweja kutoha.’—2 Kor. 1:8-10.

Chakadi nikujina, mpinji yikwawu chamwekeni neyi hitukuhandaku. Ilaña twamulombeleña Yehova mpinji yejima netu yatwikwashi kwikala ahamuka nawa namaana hakwila twikali naspiritu yakudizoza kulonda tutwalekuhu kuleta kulemesha hejina dindi dabadika.

Yehova watukiswilili chitwazatileña mudimu windi, mumpinji yayiwahi nimumpinji yakala. Makonu tukweti muzañalu hakumona kasanji kamutayi kamanishiluwu kutuña muLilongwe muchaaka cha 2000, kushilahu niMatala aWanta amaha akubadika ha 1,000 anatuñuwu mwahita Malawi yejima! Ami niLidasi tunahetelumu chikupu munkisu yakuspiritu yafumaña kudi Yehova nawa yinakumwekana hohu neyi chilota! *