JULIAN washimwini nindi, “Chinatiyili hiyakubidika nawu mwanami weyala anamuhañi muchipompelu, namweni nami kaayi kejima kanakumi. Diyi wadiña mwanami wamukulumpi nawa twadikundili chikupu chakwila twelilileña yuma yayivulu hamu. Mpinji yejima wadiña mwana wamuwahi, ilaña twakashimukili hohu natachiki dehi kwila yuma yatama. Kakavulu ñodami wadiña nakudila chakwila nakañenyeña nimwakumukundejela. Twatwalekeluhu nakudihula netu hekwawu kuduhu yuma yitwakañenyi kwila hamu neyi avwali.”

Muloñadi chitukuhoshela netu ntanjikilu yakuhaña mukwaKristu muchipompelu yayiwahi henohu yaletaña chineñi nankashi? Indi Bayibolu yahoshahu nawudi kutalisha haniyi nsañu? Nawa yumanyi yayeni yaleñelaña muntu amuhañi muchipompelu?

Kwekala yuma yiyedi yaleñelaña Chinsahu chaYehova amuhañi muchipompelu. Chatachi, Chinsahu wapapatishewa neyi yakoña nshidi yahamesu bwi-i. Chamuchiyedi, neyi yabula kubalumuka mumuchima.

Hela chakwila Yehova hakeñaña nindi twikali awaninaku, ilaña washaku nshimbi yajila yakeñañayi nindi ambuñindi ejima ayovwahileña. Chakutalilahu, Yehova wakeñaña nindi tuleki kukoña nshidi yahamesu bwi-i, yidi neyi wuvumbi, kupesha, wukombi, nyilami, kujahana nikupanda.—1 Kor. 6:9, 10; Chim. 21:8.

Komana himunateli kwitejaku nenu nshimbi jaYehova jakadi majilu jajiwahi nawa jatukiñaña? Hinyi wubulaña kukeña kushakama mukuwunda hela nawantu ashinshika imunateli kukuhwelela? Twawanaña antu amuchidiwu hakachi kawamana kwetu niahela amuchipompelu, nawa chuma chitwasanyikili hampinji yitwadihanini kudi Nzambi kulonda twovwahileña nshimbi yekala Mwizu dindi dichi chatukwashaña.

Chumanyi chatela kwilawu neyi mukwaKristu wapapatishewa yakoña nshidi yahamesu bwi-i hamuloña wakuzeyazeya? Ambuña Yehova akunyima niwena akoñeli nshidi yamuchidiwu, ilaña Nzambi wayanakeneni. Mwanta Davidi himuntu welukawu nawu wavulumwini. Davidi welili wuvumbi nikujahana; ilaña kaprofwetu Natani wamulejeli nindi: ‘Yehova . . . nakwanakeni nshidi yeyi.’—2 Sam. 12:13.

Nzambi wamwanakeneni Davidi nshidi yindi muloña wabalumukili chikupu mumuchima. (Mas. 32:1-5) Munjila yoyimu, kambuña Nzambi makonu anateli kumuhaña muchipompelu neyi yabula kubalumuka mumuchima hela yatwalekahu nakwila yuma yatama. (Yil. 3:19; 26:20) Neyi aeluda adi mukomiti yawunsompeshi amona nawu muntu nabalumuki chikupu wanyi mumuchima, anateli kumuhaña muchipompelu.

Hakusambila, tunateli kumona neyi aeluda  afuukula chatama hakumuhaña muntu wunavulumuni muchipompelu hela netu adana luwi, sweje-e neyi muntu anahañuwu wadiña ibwambu hela ntaña yetu. Hela chochu, Izu daYehova datulejaña nyiloña yashikila yitwatela kukuhwelela netu afuukulaña mwamuwahi.

Yesu washimwini nindi, “Maana alumbulukaña nanyidimu yawu.” (Mat. 11:19) Chafuukulahu mwamaana nawu amuhañi muntu wunavulumuni wunabuli kubalumuka mumuchima mwafumaña yuma yayiwahi. Shinshikenu iyi yuma yisatu:

Kuhaña muntu wunavulumuni kwaletaña kalemesha hejina daYehova. Chineli atutenaña hejina daYehova, yililu yetu yamwekenaña chikupu hejina dindi. (Isa. 43:10) Neyi chochatela yililu yamwana kuleta kalemesha hela kasawuntu hadi anvwali jindi, dichi antu anateli kumulemesha Yehova hela kumusawula neyi antu atenañawu hejina dindi akweti chakutalilahu chachiwahi hela chatama. Ijina daNzambi adilemeshaña neyi antu atenañawu hejina daYehova ovwahilaña nshimbi jindi. Iyi nsañu yadifwana nayamumafuku aEzekeli muloña antu akumatuña akunjikileña chikupu ijina daYehova kudi aYudeya.—Ezek. 36:19-23.

Tunateli kuleta kasawuntu hejina daNzambi neyi twilaña yuma yatama. Kapostolu Petulu wayifumbili akwaKristu nindi: ‘Neyi anyana ovwahilaña, bayi mulondeja mwaya kufwila kwakukulu kwakuyamba kwenuku; hakwila chelayi yena wayitambikili Wajila, enu nawa ikalenu ajila mumwelilaña mwejima; muloña anasoneki nawu, Ikalenu ajila, muloña ami najila.’ (1 Pet. 1:14-16) Yililu yayiwahi yakujila yaletaña kalemesha hejina daNzambi.

Neyi Chinsahu chaYehova yela chuma chatama, chakadi nikujina amabwambu jindi anateli kwiluka chumichi. Ntanjikilu yakuhaña muntu muchipompelu yamwekeshaña nawu Yehova wukweti antu akadi majilu alondelaña nshimbi yamuBayibolu hakwila ekali ajila. Muntu wumu wenjili Hetala daWanta muSwitzerland nakupompa nawa wahosheli nindi wakeñeleña kwikala membala wamuchipompelu. Muhelindi amuhañili muchipompelu muloña welili wuvumbi. Wahosheli nindi wakeñeleña kwikala mukuloñesha “kwabulaña kwiteja yililu yatama.”

Kuhaña muntu muchipompelu kwakiñaña chipompelu chawakwaKristu chakadi majilu. Kapostolu Pawulu wayisoñamishili Akorinda hawubanji wekala hakwiteja antu anavulumuni mumushikila kushakama mukachi kawu. Wesekejeli yililu yatama yawantu amuchidiwu neluñi daleñelaña chikanka chejima kunana. Wahosheli nindi, ‘Iluñi dantesha dananishaña chikanka chejima.’ Kuhiñahu wayifumbili nindi: “Fumishenu owu muntu watama mukachi kenu.”—1 Kor. 5:6, 11-13.

Chakadi nikujina, “muntu watama” wateneniyi Pawulu welileña wuvumbi chakadi kutiya nsonyi. Antu amakwawu amuchipompelu atachikili kuhakwilaku yililu yindi. (1 Kor. 5:1, 2) Neyi muntu wavulumwini nshidi yeneni yamuchidiwu amulekeli, akwaKristu amakwawu adi kutachika kulondela yililu yawuvumbi yadiña mumusumba mwashakamineñawu. Muntu wunavulumuni mumushikila neyi amwanakena chaleñelaña antu amakwawu kudiwula nshimbi jaNzambi. (Mukwa. 8:11) Cheñi nawa, antu anavulumuni abulaña kubalumuka mumuchima anateli kwikala ‘malola akuhukena akadi kumwekana hatooka’ nawa ajiyishaña chikuhwelelu chawakwawu muchipompelu.—Yuda 4, 12.

Kuhaña muntu muchipompelu kunateli kuleñela muntu wavulumwini kufuntishamu muchima. Yesu wahosheli hadi mukwenzi wafumini kwitala datata yindi nawa wayili nakukisañana mahetindi nakwenda nakubajama. Mwana wajimbeli wamweni kukala hakwila yeluki nindi kuhanda chakubula tata yindi hichuma chakala chikupu. Nkuminaku iwu mwana welukili chuma cheliliyi nindi chatama, wabalumukili mumuchima nawa wafuntili kudi chisaka chindi. (Luka 15:11-24) Yesu chalumbulwiliyi hadi nvwali wukweti kukeña wazañaleli chabalumukiliyi mwanindi mumuchima chatukwashaña kwiluka Yehova chatiyañayi. Watulejaña chikupu nindi, “Hinatiyaña kuwaha nakufwa kwamuntu watamaku; chiña muntu watama abalumuka aleka mwelañayi, ahanda.”—Ezek. 33:11.

Munjila yoyimu, antu ahañawu abula kwikala amuchipompelu chawakwaKristu, chisaka chawu chakuspiritu, anateli kwiluka nawu ajimbesha yuma yayiwahi. Yuma yatama yafumaña hakuvulumuna  kushilahu niyuma yayiwahi yanukañawu hampinji yadiluñishiluwu wulunda wawuwahi naYehova niantu jindi, yinateli kuyileña kufuntishamu muchima.

Kukeña nikukakela mumunahoshi kwakeñekaña hakwila mufumi yuma yayiwahi. Ñimbi yamasamu Davidi wahosheli nindi, “Muntu waloña añeti tuhu, nañili chachiwahi; anhosholi kwindi, nanwayishi manji kumutu.” (Mas. 141:5) Chakutalilahu: Fwikijenu muntu nakudya, dichi mbiji yinamukakameni hanshiñu. Nakukañanya kwoona chiwahi nawa ñovu yinamumani. Nawa nakukañanya kuhosha. Neyi kunyakashana kumukwasha nehi nateli kufwa. Dichi ibwambu dindi hakumweta mbañala munyima kulonda mbiji yifumi. Mbañala yinateli kukata, ilaña yinateli kupulwisha wumi windi. Munjila yoyimu, Davidi welukili nindi muntu waloña nateli kumufumba munjila yinateli kukata kulonda yahetelumu.

Kakavulu, muntu wunavulumuni wakeñekaña kumufumba kuhitila mukumuhaña muchipompelu. Chimwahitili yaaka ikumi kufuma hamuhañiluwu, mwana kaJulian atenawu kumatachikilu walekeli kwila yuma yatama nawa amufuntishili muchipompelu, chayinu mpinji nakukalakala neyi eluda. Wetejeli nindi, “kunhaña muchipompelu kwankakejeli kuhimpa chihandilu chami. Iku diku kufumba kwanteleleli.”—Heb. 12:7-11.

Kuhosha hohu chalala, kuhaña muntu muchipompelu hichuma chakala, ilaña ichi chuma bayi chikala wubanji wunateli kuyichinishaku. Wejima wetu twazataña mudimu weneni hakwila nkeñelu yakuhaña muntu muchipompelu yizatiki.

Aeluda ekala namudimu wakala wakuleja muntu nawu anamuhañi muchipompelu afwilaña kwimbujola kukeña kwaYehova. Neyi anakumuleja muntu nawu anamuhañi, amulumbulwilaña chachiwahi yuma yatela kwilayi kulonda amufuntishi muchipompelu. Hamuloña wakukeña kuyanukisha antu ahañawu muchipompelu chatela kufuntawu kudi Yehova, aeluda anateli kuhempula mumpinji mumpinji antu anakumwekesha nawu anahimpi yililu yawu. *

Antu amuchisaka anateli kumwekesha kukeña muchipompelu nikudi antu avulumwini kuhitila mukulemesha ntanjikilu yakuhaña muntu muchipompelu. Julian walumbulwili nindi, “Wachidiña mwanami, ilaña yililu yindi yashili mukoleku hakachi ketu.”

Ejima muchipompelu anateli kumwekesha kukeña kwalala kuhitila mukubula kuhanjeka namuntu ahañawu muchipompelu. (1 Kor. 5:11; 2 Yow. 10, 11) Dichi akoleshaña kufumba kwanamufumbuwu kudi Yehova kuhitila mudi aeluda. Kuhiñahu, atela kumwekeshela kukeña kwakweni nikukwasha chisaka chamuntu anahañuwu, aneñaña chikupu nawa atela kubula kutoñojoka nawu niwena hiyatela kuhanjekaña nawakwawu akwakwitiyaku.—Rom. 12:13, 15.

Julian wakunkulwili nindi, “Ntanjikilu yakuhaña muntu muchipompelu hintanjikilu yitwakeñaña, yatukwashaña kuhanda kwesekeja nanshimbi jaYehova. Hela chakwila chakataña kumuchima, mwafumaña yuma yayiwahi mukuhita kwampinji. Neyi netejeli yililu yamwanami yatama mutenowu hadi kafuta muchipompeluku.”